Mataupu 2

Pe e Mafai e Tagata ona Aumaia le Manuia Tumau ma le Saogalemu?

1. Ai se ā ua tāua ai ona faavae lo tatou faamoemoe mo le manuia ma le saogalemu i luga o le mea moni ma le upu moni?

O LE FAAMOEMOE moni ua faavae i luga o mea moni ma le upu moni. O faamoemoe pepelo ua na ona faatauasoina tagata i le faamoemoe moni, ma olegia ai latou. I se taimi o faigata e pei ona tatou fesagai nei, o faamoemoega pepelo e mafai ona oo lava ina faoina ai le ola o se tasi.

2, 3. (a) O ā fesili o le a aogā le fesili ai i a i tatou lava e uiga i faafitauli e aafia ai i le aumaia o le manuia ma le saogalemu? (e) O le ā le isi fesili atili ua fesagaiina i latou o e ua fai mai o loo faatuatua i le Atua?

² O le mea lea, ua manaomia ona tatou fesili i a i tatou lava: Pe ua tatou talisapaia ma le manino lelei le tetele naunau o faafitauli e tatau ona foia ina ia aumaia le manuia ma le saogalemu moni? Pe ua tatou matauina ea le faanatinati ua oo i ai taualumaga? Po o a faamaoniga ua tatou maua moni lava faapea o vaifofo a tagata o le a tutusa lelei lava ma le telē naunau o le mataupu?

³ E le gata i lea, ua tatou fesagai foi ma le fesili pe e mafai ona tatou tuu atu lo tatou faatuatuaga i taʻitaʻi o le lalolagi ma le Atua i le taimi lava e tasi. O nisi ua talitonu latou te mafaia. Ua latou talitonu o taumafaiga a tagata o loo fai nei agaʻi atu i le aumaia o se filemu tumau ua i ai le lagolagoina a le Atua. Ae pe latou te mafaia ea? Talu ai le tele naua o le tulaga lē mautu, ua lelei tele mo i tatou le iloiloina o mea moni.

UA UUNAIA TAGATA E GAOIOI E LE FAANATINATI MA LE MATAʻU

4-6. O le ā ua iloa nei e taʻitaʻi o le lalolagi e uiga i le mataʻutia o faafitauli ua fesagai nei ma le fanau a tagata?

⁴ Mo le faitau afe o tausaga o sailia pea e tagata  le manuia tumau ma le saogalemu e aunoa ma le faamanuiaina. Peitai o le taimi nei ua i ai se tulaga fou ua talitonu le toatele o le a faapogai ai ona tagofia e tagata faafitauli ma faamanuiaina. O le ā lenei tulaga fou?

⁵ O lenei, o le uluai taimi lenei ua faamaonia ai e taʻitaʻi o le lalolagi e tatau ona latou filifili i le va o le filemu o le lalolagi po o le pule o le lalolagi i lona lava ola. Ua latou malilie uma lava o se taua nuikelea o le a matuā sili ona mataʻutia, ma e matuā leai lava ni atunuu e manumalo, a e faiaina uma lava. E le gata i lenei, ae o le toatele, ae maise lava saienitisi, fai mai ua i ai se isi tulaga e sili atu le mataʻutia, mai le faaoonaina lea o le lalolagi aoao, atoa foi ma le “pasae aʻe o le faitau aofai,” faatasi ma le sosolo atu o le oge, o faamaʻi atoa ma le le toʻa filemu ua tau faamataʻu mai ai. Ua latou fai mai ua toeitiiti uma le taimi mo malo uma i le lalolagi atoa latou te gaoioi ai faatasi, pe afai e mananao e alofia le malaia o le a oo mai i le lalolagi lautele. E pei ona faamatalaina e se lipoti mai Washington, D.C.:

“Ma le faafuasei lava, i soo se aofaiga o atunuu eseese—o le Iunaite Setete, Peretania, Farani, Siamani, Italia, Suetene, Czechoslovakia, Rusia, Initia, Iapani—o tagata aloaia ua latou masalomia le ono oo mai o se tulaga mataʻutia ua lei faapea ona iloa muamua e le fanau a tagata. O e ua suesueina le lumanai ua latou faaigoaina o le mala o mala, o le taunuuga o mea sese le fuafuaina a le tagata.”— Washington Post.

⁶ Ua matauina e nei tagata, e tusa lava pe sao auauaʻi mai le fanau a tagata i nei mala, ae o le a lē mafai lava ona latou sao mai mala uma, ae maise pe afai e palalasi faatasi mai ni mala e tele i se taimi e tasi. Peitai la o le fesili, Pe o le fefe ea i se mala faafuasei o le a faaliliuina ai tagata mai fevaevaeaiga ma fetauaiga i se faiga o le a aumaia ai le filemu ma le saogalemu moni?

 O SE LALOLAGI LE FAI TAUA MAI TAUMAFAIGA A TAGATA?

7-11. (a) A e tusa ai ma le tomai o le tagata e faamutaina taua, o le ā ua faaalia e tala tuufaasolo? (e) Pe o se faavae mautu ea mo le filemu, le fefe i meatau faaatomika? (i) Pe o le sainia ea o feagaiga mo le lafoaia o auupega po o le filemu ua faamaonia ai se filemu tumau?

⁷ O le ā se mafuaaga moni ua i soo se tasi o i tatou e talitonu ai e mafai e tagata ona aumaia se iʻuga atoa o taua? O le ā ua faaalia e tala faasolopito?

⁸ E moni sa i ai ni nai tausaga vava solo na tuusaolotoina ai lenei paneta o le lalolagi mai taua. Peitai e laitiiti lava. O le tagata na suesueina faiga a taua e igoa i a Hanson W. Baldwin na ia faavasegaina faapea, i le 3,457 tausaga o tala tuufaasolo faamaumauina e sili atu i le 3,230 tausaga na aafia i taua a e na o le 227 tausaga o le filemu.

⁹ Ae pe lē o le aafia uma ea i le mataʻu i meatau ma le fai taua atomika o le a suia ai lenei tulaga? Ia manatua, sa amata le aʻoaʻoina o le mataʻu e tagata i auupega niukelea i le sili atu i le kuata senituri ua mavae, ina ua olopalaina e pomu atomika aai Iapani e lua. Ae o le ā la ua uunaia latou e fai ona o lo latou matataʻu talu mai lena taimi? O le mea moni ua taʻitaʻia ai latou e faaputuina ma faateleina pea lava pea ia ituaiga o meatau, atoa foi ma le fausia o nisi meatau e sili mamao atu lo latou mataʻutia ma le malolosi.

¹⁰ Pe e te lē talitonu ea, na i lo le faamaoniga o se filemu moni, o le fefe ua aumaia e le taufaamataʻu mai o se osofaiga ua na ona tupu ai o le masalosalo ma le lē mautonu? Afai e te tausia le filemu i le va o oe ma lou tuaoi talu ai ua e iloa ua faaauupegaina o ia ma na te faamataʻu i a te oe e faaaoga na auupega, pe o le filemu moni lea? Pe e mafai ona e lagona le saogalemu a o nofo pea lea tuaoi lata i a te oe? O le mea moni, e mafai ona taʻitaʻia vave ma le faigofie lea fefe i gaoioiga leaga e aunoa ma le mafaufau. Ma le mautinoa lava e le o se faavae mo le filemu moni le “paleni o le fefe” ua atiina aʻe e taʻitaʻi o le lalolagi.

¹¹ E moni, atonu e sainia e malo feagaiga mo le  lafoaia o auupega ma mo le filemu. Peitai i le gasolo mai o senituri ua mavae, e afe ma afe o feagaiga faapenei na sainia. E ui i lea e aliaʻi mai loa peiseai o le a oo mai se taua, ona faamaonia loa lea o nei feagaiga e leai lava se aogā, ua na o ni fasi laupepa. Pe o se mea moni le manatu faapea o le a tausia e taʻitaʻi o le lalolagi o aso nei a latou folafolaga pe a foliga mai o le a afaina o latou lava lelei faapito tau malo? E sili atu atili ona tāua, pe o le a e tuu faalētonu ai lou faamoemoe mo le ola i le manuia a le saogalemu i le latou folafolaga ia tausia le filemu?

12, 13. (a) Pe faapefea i valoaga a le Tusi Paia e uiga i le lē taulau o taumafaiga a le tagata ia aumaia se filemu tumau ona talafeagai ma mea ua tutupu? (e) O le a ua faailoina mai e le Tusi Paia o le pogai moni o taua?

¹² A e faapefea la te Tusi Paia? Pe o uunaia ea tatou e tuu atu lo tatou faamoemoe ma lo tatou talitonuga i taumafaiga a tagata ia aumaia le filemu, a o fesagai ma faamaoniga uma o loo faaalia ai le lē tomai o tagata e mafaia ai lenei mea? I le eseesega, na uluai valoia lava mai anamua, e le mafai e tagata na o latou lava ona aumaia le filemu tumau. Sa uluai lapatai mai, e oo lava i le vaitaimi a o toeitiiti lava tafieseina e le malo o le Atua mai le lalolagi tagata uma lava e lē i ai le alofa moni i le amiotonu, o le a i ai “taua ma fouvalega,” e ‘sii le taua e le tasi nuu i le tasi nuu ma le tasi malo i le isi malo’ i se taua a le kelope atoa. (Luka 21:9, 10, 31; Faaaliga 6:1-4) O se fasia o tagata e aupito sili ona faanoanoa i le tala faasolopito o le tagata ua tupu lea i le tatou tupulaga i taua e lua a le lalolagi. Ma talu mai le iʻuga o le Taua II a le Lalolagi e tusa e sili atu i le tolu selau taua, po o ni faalavelave mataʻutia, e tusa lea e tasi le taua i masina taitasi! O le mea na valoia e le Tusi Paia ua tutusa lelei lava ma mea moni ua tutupu. Ua lē aumaia ai i a i tatou se faamoemoe pepelo.

¹³ Ua faailoa mai foi e le Tusi Paia le pogai moni o le faafitauli. Ua faaalia o taua ua le mafua mai pulufana po o pomu po o vaatau ae o tagata, tagata manatu faapito. (Iakopo 4:1-3) Afai e mananao tagata  e ā-ea le filemu tumau, e tatau ona muamua aumaia se suiga i le lalolagi lautele o tagata. Peitai i luga o le faavae o le tala faamaumauina o le tagata i le gasologa o senituri, pe e te fai mai ea e talafeagai se tulaga faapena? A e faapefea le talaaga o lenei tupulaga? Pe o faasino mai ai ea ua lata mai sea suiga—faapea o tagata i soo se mea ua lafoai lo latou manatu faapito, lo latou loto atunuu, le inoino i le va o lanu ma ituaiga, le matapeapea i faiga faatamaoaiga? E matuā leai lava! Ma ua faamatala mai ma le moni e le Tusi Paia, afai e sailia e tagata le filemu ina ia faaauau ai a latou faiga faapito, o le a le taulau lo latou manao.—Isaia 57:19-21; 59:7, 8.

PE E MAFAI E TAGATA ONA TAOFIA LE “POMU O TAGATA” MAI LE PASAE AʻE?

14-17. (a) O le ā le saosaoa o le faateleina o le faitau aofai o le lalolagi, ma o le ā le uiga o lenei mea e tusa ai ma le faafitauli i le aumaia o mea taumafa? (e) E tusa ai ma le pe ua maua e saienitisi le fofo moomia, po o ā mea ua latou fai mai ai lava latou?

¹⁴ O le faitau aofai a tagata o le lalolagi na pāʻia le tasi le piliona (tasi le afe miliona) o tagata mo le taimi muamua i le tau amataga o le senituri e sefulu iva. E oo mai i le 1930 ua oso aʻe i le sili atu i le lua piliona. I le taimi nei e sili atu i le fa piliona tagata i luga o le lalolagi, ma o le fuafuaga faapea o le fuainumera o le a silia le ono piliona i le isi tolu sefulu tausaga! O le ā le uiga o lenei mea?

¹⁵ O lona uiga i aso taitasi uma ua faaopoopoina le toa 200,000 tagata e tatau ona fafagaina. Ma o le tele lava o i latou nei e i atunuu e tele ai le mativa, fia taumafa ma faamaʻi e oo lava i le taimi nei ua afaina ai le faitau miliona o tagata. E pei ona fai mai le saienisi polofesa o mea taumafa o Georg Borgstrom, o le Michigan State University:

“Soo se tasi ua manatu o le mala tau polotini ua i ai nei le lalolagi faapea o le a uma ma toe faaleleia e ia lava, e tatau ona manatua: o e fia taumafa o le lalolagi ua faaluaina le aofai o i latou televave na i lo tagata o loo lava mea taumafa.”

¹⁶ Peitai pe ua lei atiina aʻe ea e saienitisi faafaatoaga  faiga fou e faateleina ai alaisa ma saito i le mea ua taʻua nei o “le suiga lelei o laau lanu meamata” (“green revolution”)? Ioe, peitai pe o le a foia ai ea e lea le faafitauli tau le fia taumafa o le lalolagi? Ua faateleina pea ē popoto faapitoa i mea taumafa ua fai mai nei, E leai. E toatele ua lapatai mai faapea o ituaiga eseese o fatu laau aina fou atonu o le a faateleina le oge. E faapefea? O le lipoti i le 1971 mai le nusipepa o le Associated Press na faapea mai:

“O le faiga fou lenei o le mauaina mai o ni fatu laau aina ona o le feusuaiga a ni laau eseese se lua ua le tutusa lona malosi e tetee atu i le faaleagaina, na i lo ituaiga tuai. Ua i ai se avanoa e matua faaumatia ai le fuata a se atunuu atoa— atonu po o le lalolagi foi lava—i se faamaʻi tau laau. Na toeitiiti lava tupu le mea faapena i le tausaga talu ai i le fuata-sana i le Iunaite Setete.”

¹⁷ O le mea moni, o saienitisi lava latou ua masani ona lapatai mai ua le i a i latou le poto e foia. E pei ona faamatalaina e se tasi tagata taʻutaʻua suesue i mea tau le soifuaga:

“Ua lagona e nisi faapea o le taua mo le fafagaina o le faitau aofai o le lalolagi ua toilalo nei, ma o se faaiʻuga lava ua uma ona fai faapea e oo atu i le 1985 o le a i a i tatou oge i le lalolagi lautele lea o le a faitau selau miliona ai tagata e matelaina i le fia taumafa seia oo ina maliliu ai. E tatau ona ou ioe e oo mai i lenei taimi ua ou le vaaia lava se polokalama e taʻitaʻiina ai aʻu ia ou le malie i lenei faaiʻuga.”

18-21. (a) O le ā na valoia e le Tusi Paia e uiga i lenei tulaga? (e) Pe o le faaitiitia ea o tupe alu i vaegaau o le a foia ai le faafitauli? (i) Ai se ā ua tuputupu aʻe ai sea tulaga mataʻutia?

¹⁸ Tiga le tele o faiga faasaienisi mo faiga o faatoaga, ae ua le mafai lava e le sosaiete faaonapo nei ona alo ese mai tulaga tonu lava na uluai valoia mai e le Tusi Paia. Na ia uluai valoia mai ma le saʻo lelei le taunuu mai o le mataʻutia o le faaitiitia o mea taumafa i le lalolagi lautele i le taimi o le “faaiʻuga o le faiga o mea.”—Mataio 24:3, 7, NW; Faaaliga 6:5-8.

¹⁹ O le tele o le faafitauli ua taoto lea, e le o le autu ona o faiga tau faatoaga, ae ona o tagata ma o latou uiga tetee i mataupu silisili a le Tusi Paia. Mo le faitau sefulu nei o tausaga, ua faaaluina e malo aofaiga tele o tupe i auupega a o faitau miliona o tagata i le  lalolagi lautele o loo fesagai ma le matelaina. E tusa ai ma se lipoti a Malo Aufaatasi, i ni nai tausaga talu ai na faaaluina ai e malo le $200 piliona i le tausaga i a latou vaegaau. E sili atu lena i le aofaiga o tupe maua a le tasi-o-vaetolu o le faitau aofai o le lalolagi!

²⁰ E tusa lava pe lafoai lenei atiina aʻe tele o vaegaau, ae o loo galue lava le faiga fevaevaeai o le tamaoaiga o le lalolagi faasagatau i le faaleleia o le faafitauli. E tusa lava pe o i ai mea taumafa, ae o le naunau ia maua faasiliga tetele o tupe ua masani ona taofia ai lona faasoasoaina atu i e latou te manaomia. I nisi atunuu, ua totogiina e le malo i fai faatoaga ina ia aua neʻi totoina nisi laau aina faapitoa, ma, na i lo le totoina ia tele ma faaitiitia ai le tau, ua oo lava ina faatamaʻia le tele o nei mea.

²¹ Paga le ese o lenei uiga mai mataupu silisili o le Tusi Paia o loo uunaia ai le uiga mata alofa i e o manaomia. (Teuteronome 24:19-21) Ua atiina aʻe e tagata a latou faiga o le tamaoaiga i luga o le manatu faapito ma, na i lo le aumaia o le manuia ma le saogalemu, o se tulaga ua faamataʻu mai ai se iʻuga mataʻutia ua amata ona tuputupu aʻe. E tuai, tuai lava a e fai e tagata le ‘seleseleina o le mea na latou luluina,’ e pei lava ona faasino mai e le Tusi Paia.—Kalatia 6:7.

PE E MAFAI E TAGATA ONA FAIA SE FILEMU MA LE LALOLAGI?

22-25. (a) Pe faapefea le tele o le mataʻutia o le faafitauli tau le polusione? (e) E ui lava ina vaavaai atu nisi tagata i faiga faasaienisi a tagata ia aumaia le fofo, o ā ua fai mai ai saienitisi?

²² Mo le tele o tausaga, ua fai taua ai pea tagata ma le lalolagi o loo latou mau ai. E faapefea? I le faapolusioneina po o le faaleagaina o le lalolagi lautele. O le faapolusioneina, o le otaota oona lea ua faia e le tagata ma ua faulaʻi atu i ona faaputuga o vai, le ea o loo ia manavaina ma mea ai o loo ia taumafaina seia oo ina e le mafai ona ia uunai eseina. Ma i lea ua ia faatamaʻiaina ai elemeni autu o loo ia moomia mo le ola.

 ²³ O i latou e faatuatua i tagata e aumaia le manuia ma le saogalemu ua latou fai mai o le a maua e le tagata se auala e sao mai ai i lenei mala e pei ona ia sao ai i mala ua tuanai. Ua latou talitonu o faiga faasaienisi a le tagata o le a maua mai ai le fofo.

²⁴ Peitai, ua toe faaalia foi, o e ua faaalia le faalētonu sili i le taimi nei o saienitisi lava latou. Ia matau le faamatalaga o i lalo:

“O Dr. William D. McElroy, le faatonu talu ai o le National Science Foundation, na ia faapea mai lata mai nei, o le tali atu ua fai ma natura i le taufaamataʻu ua aumaia e le polusione e faapea ua faasaoina le tagata mai isi tulaga mataʻutia muamua ma o le a faapea foi ona ia toe mafaia. A o lenei, paga, ‘ua le taitai ona talafeagai lea ma mea moni. O le upu moni faigofie i le aso nei o le faasaoina o le tagata i se sosaiete ua lē mautinoa, . . . O le faaumatiaga e ia lava mai le gasolo ina leaga o mea o siomia ai o se mea e ono tupu.’”—Atlanta Journal.

²⁵ E mafai e tagata ona uluai iloa ma fausia masini e tele ma maua ai se sosaiete o fale faigaluega e tele. Peitai i le faaaogaina o masini, ua latou faaleagaina ai lo latou lava siomaga. E pei ona fai mai Dr. Renē Dubos, o se ua lauiloa i le mataupu o le polusione:

“I loʻu manatu, ua leai lava se avanoa o le foia o le faafitauli o le polusione—po o isi taufaamataʻuga i le soifua o le tagata—pe afai tatou te talia le manatu faapea o le a pulea lo tatou lumanai i suesuega o le poto faaletagata.”

26-28. (a) Pe sa valoia ea e le Tusi Paia se tulaga faigata faapenei e tuputupu aʻe i le lalolagi? (e) O le ā tonu le pogai o le faafitauli tau le polusione? (i) I le faafetaiaia o faafitauli o le polusione, o le ā le poto e sili ona tāua ua lē maua e saienitisi faatagata, peitai o ai e i ai lea poto?

²⁶ Ua muai taʻua mai foi e le Tusi Paia le lē lava o le atamai o tagata e faaaogaina le tele o mea sauniunia a le lalolagi. O le valoaga i le Faaaliga 11:18 na uluai valoia ai le taimi o le a tatau ai i le Atua ona faia se gaoioiga “e fano ai foi i latou o e na fano ai le lalolagi.”

²⁷ Ma, ua toe faamaonia foi le maufaatuatuaina o le Tusi Paia i lona faasino mai o le pogai moni o faafitauli faapolusione o le fanau a tagata. Pe o fale faigaluega ea ma masini? E le o le autu lena. O le autu o tagata ua pogai ai le polusione. Ua latou fai le polusione ona o manaoga faapito po o le le amanaia po o   ona o ia uiga uma e lua. Ua latou atiina aʻe faiga faaletamaoaiga o i ai nei ina ia faataunuuina ai o latou manaoga, peitai ua latou maua nei, o ia faiga ua aveesea ai mea tonu lava o loo latou manaomia ina ia mafai ona faaolioliina ai i latou i le soifuaga.

²⁸ E moni ua tele lava ni faamatalaga i aso nei e uiga i le suesuega agaʻi i le lalolagi ma mea o siomia ai. Peitai o loo tumau pea le le malamalama o saienitisi i le pogai tonu ma fesootaiga i le va o faiga i le lalolagi ua mafua ai ona tutupu ma ola mea (“eco-systems”). Fai mai le mekesini Time e uiga i ia tulaga:

“E oo lava i le aupito sili ona faigofie e matua faigata tele ona malamalama i ai e oo lava i le masini na ta sailia lava e ia tali (computer), e le mafai atoatoa ona faamatalaina.”

Ua ioe lava tagata latou te le malamalama i le lavelave o le ola o mea o le lalolagi. Peitai e mafai e le Atua, auā o ia na foafoaina le lalolagi. Pe ua le atamai ea ma aoga ona vaavaai atu i Le na Foafoaina ia mea ina ia maua mai ai le tali i nei faafitauli?

SAOGALEMU I LE AVEESEINA O LE SOLITULAFONO

29-31. (a) O le ā le tele o le salalau atu o le solitulafono? (e) Ai se ā e lē avea ai le faia o tulafono fou ma mea e taofia ai le solitulafono. (i) O le ā ua faasino mai ai o le tamaoaiga i mea faitino o le a lē foia ai le faafitauli?

²⁹ E ui lava ina tulaga mataʻutia mea tāua moni mo le faatumauina o le tagata ona o le polusione, ae o le faateleina o le solitulafono ua faapogai ai ona matataʻu le toatele o tagata. O le solitulafono ua faatumauina pea lona faoa o le saogalemu totino o le toatele pea o tagata, e le gata i aai tetele a e faapea foi i nuu laiti ma nofoaga uma o se atunuu. Ua le gata i mea totino, ae ua masani ai, o le tino lava foi o se tasi ua i ai i se tulaga mataʻutia. Pe e mafai e tagata ona aumaia i a te oe le saogalemu moni mai nei faalavelave?

³⁰ Pe e mafai ona latou faia e ala i ni tulafono fou? Ua leva ona i ai le selau, e oo lava i le faitau afe o tulafono i tusi tulafono a le lalolagi. Ae ua le mafai  ai lava ona taofia le tuputupu aʻe o le solitulafono. E le gata i lea, o faiga iʻuvale mauaʻa ua masani lava ona tutupu aʻe i totonu lava o faalapotopotoga faamalosi tulafono. O le le faamaoni mai tulaga maualuluga atonu ua soloia ai taumafaiga a tagata faamalosi tulafono o e faamaoni. Ma ua tumau pea le mea moni, o le amiotonu e le mafai ona tuuina i fatu o tagata e ala i tulafono.

³¹ Pe o taatia ea le tali i auala fou e puʻeina ai ma tetee atu i le solitulafono? Mo faiga fou uma ua aumaia, ua faia foi e tagata solitulafono auala fou e sao mai ai. Ma, pe o le a foia ea le faafitauli e le faatuputupuina aʻe o le tamaoaiga i se “vaitaimi o le filemu” ua faia e tagata? O se mea matuā sese pe a faapea mai o le solitulafono ua aafia ai na o e lē lava a latou tupe maua. Mo se faaaʻoaʻoga, ia matau le lipoti lenei:

“O le fuainumera o solitulafono ua faia e tagata fai pisinisi ma faapolofesa i Ausetalia ua mapuna aʻe i se tulaga maoae i le lua po o le tolu tausaga ua tuanai.”—The Australian.

E le gata i lea, ua lipotia mai e le New York Times faapea o le gaoi i le itumalo tau tupe o Wall Street ua pei o se “saolotoga mo tagata uma,” ma na faaopoopo atili mai: “Ua gaoi tagata uma—o ave feau, o le au tusitusi, e oo i e vaaia matagaluega po o e pule.” Ua faaalia ai e mea moni o solitulafono aupito tele ua maua lea i atunuu mauoloa. Ma e le tatau ai foi ona faasopolia le tagaʻi i le mapuna aʻe o le faaaogaina o vailaau oona.

32. Pe ua faataunuuina ia le mea na valoia e le Tusi Paia e uiga i lenei tulaga?

³² O le mea o loo tupu ua pei lava ona uluai taʻu mai e valoaga anamua a le Tusi Paia: “O ona aso e gata ai e oo mai ai aso faigata. Auā e avea tagata ma e alolofa i latou ia i latou lava, . . . o e le taofi manao o le tino, o e faasaua, o e le alolofa i tagata amio lelei, . . . o e ua tele le manao i mea faafiafia a e leai se manao i le Atua.” (2 Timoteo 3:1-4) Ae maise ai lava le mataina ona o nei tulaga sa valoia, o le a i ai i tagata ua fai mai o loo i ai le faatuatuaga i le Atua,  ae o le mana ua i lea mea ua latou teena. (2Ti 3 Fuaiupu 5) Ma pe ua tatou le maua ea lena i aso nei, o nuu lava o Atunuu Kerisiano o i latou ia ua sili atu ona taia mamafa i le solitulafono atoa foi ma isi tulaga faigata uma? Sa valoia foi e Iesu le “tupu tele o le amio leaga” i le vaitaimi a o lumanai itiiti lava le faaumatiaga e le malo o le Atua o tagata amioleaga ina ia avea le lalolagi ma nofoaga o le ‘tofi o tagata agamalu.’ O lena “tupu tele o le amio leaga” o se mea moni o le soifuaga i o tatou aso.—Mataio 24:12; 5:5.

O FAAFITAULI E AUPITO SILI I FAAFITAULI UMA

33-38. (a) E tusa lava pe e mafai e tagata ona foia faafitauli uma ua maea nei ona talanoaina, o ē fili e sili atu i le manuia ma le saogalemu o le a i ai pea lava? (e) Po o ā ni faamoemoega ua vaaia e fomaʻi e uiga i le faatoilaloina o faamaʻi tetele ua afaina ai le fanau a tagata?

³³ Sei manatu faapea e mafai e tagata ona foia faafitauli o taua, mativa, fia taumafa, polusione, solitulafono ma le pulea e vailaau faasaina. Pe o le a aumaia ai ea i a te oe le manuia atoatoa ma le saogalemu e lea? Leai, e i ai pea se mea manaomia o loo lē i ai. O le maʻi ma le oti o le a tumau pea o ni fili lē faatoilaloina o lou saogalemu. O le mea moni, po o le a le aoga po o le uiga o le manuia ma le saolotoga mai isi faafitauli uma pe afai e vaai atu se tasi i se isi ua pele o lona aiga ua maʻi e oo i le oti,pe ua osofaia foi lona tino i se maʻi faigata?

³⁴ Ua iloga se agaʻi i luma o sailiga faafomaʻi i ni nai taimi ua mavae. Ae o le ā le saogalemu moni ua aumaia ai mo i tatou? O le ā le mea ua iloa e taʻitaʻi o faiga faafomaʻi?

³⁵ O se lipoti mai le Wall Street Journal, i lalo o le ulutala “Ua Tuumuli Saienisi mai le Taua Faasaga i Faamaʻi i Atunuu Matitiva,”ua faaalia ai e tolu faamaʻi (malaria, trachona, schistosomiasis) ua afaina ai nei le 800 miliona tagata i ia atunuu. Ma o lipoti faafomaʻi ua faasino mai ai o le faitau aofai o e afaina ai o loo tuputupu aʻe pea. O lea la e toeitiiti lava o le tasi-o-vae-fa  o le faitau aofai o le lalolagi ua malaia i le na o le tolu mai le anoano o faamaʻi.

³⁶ A e faapefea i atunuu e sili aʻe le mauoa? O i inei ua avea le maʻi fatu ma mafuaaga muamua e oti tagata. I se fonotaga talu ai nei e uiga i le fia taumafa ma le lē lelei o mea ai (Conference on Hunger and Malnutrition), sa taʻua ai le faamaʻi fatu o se “faamaʻi tele.” I Kanata ua afaina ai le tasi mai le toafa o tagata matutua. I le Iunaite Setete e sili atu i le 50 pasene o oti i tausaga taitasi e mai le maʻi fatu, faatasi ma le toatele o tane talavou ua aafia ai nei i tagata o loo afaina ai. Ae, e tusa ai ma le lipoti i le New York Times, “fai mai Dr. Moses, le ofisa o le Faalapotopotoga tau le Fatu i Amerika (American Heart Association) faapea, ua iloa e fomaʻi ua latou le mafaia ona ‘soloiesea’ le faamaʻi fatu.”

³⁷ O le fuainumera foi o tagata ua afaina i le faamaʻi leaga o le kanesa o loo tuputupu pea. O le ā le faamoemoe mo se mapusaga? O le Polofesa tau Tāʻotoga i le Columbia University e suafa i a Harry Grundfest ua faapea mai: “Ua na o ni nai tau matematega lē mautinoa ua iloa nei e uiga i le natura o le faafitauli o le kanesa—a e le aofia ai sona fofo.”

³⁸ E oo lava i tagata e sili ona naunau i le faiva faafomaʻi ua ioe faapea i le taimi o lo tatou nei soifuaga, ua leai se foliga mai o le a maua ni fofo mo le maʻi fatu, kanesa, malaria ma isi faamaʻi mataʻutia uma. E tusa lava foi pe maua, ae ua latou iloa lava e itiiti se fesoasoani mo le faalevalevaina o le soifuaga o le toatele o tagata. O le a tumau pea le gasolo ina matutua tagata ma feoti. Ma o lea la, o le ā le faamoemoe moni o se saogalemu mai faamaʻi, tino matua ma le oti e mafai e tagata ona ofoina mai?

39. O fea e mafai ona tatou aʻoaʻoina ai le mafuaaga ua pogai ai le puupuu tele o le olaga o le tagata ma ua tumu i faafitauli?

³⁹ E ui lava ina sa tusia i le faitau afe o tausaga ua mavae, ae maeu le faaauauina pea o le moni o upu o le Tusi Paia i le Iopu 14:1,2 i aso nei: “O le tagata ua fanau mai i le fafine, ua saasaa ona aso, mona ua  tumu i le atuatuvale. E tupu ae o ia e pei o le fuga, a e salaeseina; e mavae atu foi o ia e pei o le ata, ma ua le tumau.” Ua faaalia foi e le Tusi Paia le mafuaaga o lenei mea ma ua ia faailoaina le pogai sili lē vaaia o faafitauli uma tau le tagata, e pei ona o le a tatou iloa mulimuli ane.

I LE A O LE A E FAAMOEMOE I AI?

40, 41. O le fea e te talitonu i ai—pe e sili atu ea le vaai atu i tagata e foia faafitauli o loo fesagai ma le fanau a tagata, po o na o le Atua na te mafaia lenei mea? Aiseā?

⁴⁰ I le faamaoni uma la, pe o se mea tatau ea ona faatuatua i taʻitaʻi o le lalolagi po o isi tagata ia foia faafitauli o loo fesagai ma le fanau a tagata? Pe e sili atu ona tatau ea le faatuatua i le fofo ua faasino mai e le Tusi Paia, o lona uiga, le gaoioiga a le Atua lava ia e ala i se pulega amiotonu faalelagi? I anamuā lava sa tusia e le fai salamo faagaeeina upu nei:

“Aua tou te faatuatua i alii, po o le fanau a tagata, e le o i ai se olataga. E alu ese lona agaga, e foi atu i le eleele na i ai o ia; e faaumatia i lea lava aso ona manatunatu. Amuia le tagata o i ai le Atua o Iakopo e fai mona fesoasoani; o i ai lona faamoemoe ia Ieova lona Atua; o le na faia le lagi atoa ma le lalolagi, o le sami ma mea uma o i ai.”—Salamo 146:3-6 [145:2-6, Dy].

⁴¹ Aua lava neʻi galo, e tusa lava po o le a le loto naunau o tagata, e tusa lava po o le a le tau faatosina ma le malolosi atonu latou te oo i ai e tusa ai o ni taʻitaʻi o le lalolagi, ae o i latou uma lava e oti. Talu ai e le mafai ona latou laveaiina i latou lava, pe e mafai faapefea la ona latou laveaiina isi?

[Fesili mo le Suʻesuʻega]