Pe o Avatua e Lotu a le Lalolagi le Taʻimua Saʻo?
Mataupu 3
Pe o Avatua e Lotu a le Lalolagi le Taʻimua Saʻo?
1-3. (a) O ā fesili tāua e uiga i lotu a le lalolagi ua laga i inei? (e) Ai se ā ua talafeagai ma tatau ai nei fesili?
E TUSA lava po o le a lou manatu e uiga i lotu, ua e iloa ma le mautinoa lava le tele o lana tāaiga i luga o le fanau a tagata. E pei ona fai mai le World Book Encyclopedia o le 1970: “O le lotu o se tasi lea o uunaiga aupito sili ona malosi i le tala faasolopito.”
2 Faatasi ma lana faatosinaga i luga o le faitau selau miliona o tagata, pe ua avea ea lotu a le lalolagi ma uunaiga moni mo le filemu po o le manuia ma le saogalemu? Po o, pe o latou fesoasoani i le tulaga fesousouaʻi o le lalolagi? Pe atonu ea o i a i latou le tiute tauave mo le aumaia o le fanau a tagata e fesagai ma le faaumatiaga o le lalolagi?
3 O nei fesili atonu e ono faapopoleina ai. A e ao ina tatou manatua sa fetalai Iesu e uiga i taʻitaʻi lotu o lona taimi: “Tuu pea ia i latou, o tauaso i latou e taʻitaʻi i e ua tauaso; afai foi e taʻitaʻiina le tauaso e le tauaso, ona la pauu uma ai lea i le lua.” (Mataio 15:14) I aso nei, e i ai le faitau selau lotu ua fai mai o Kerisiano ma ua gugutu mai faapea e toaitiiti le piliona o ona sui. O malo o Atunuu Kerisiano ua i ai i le vaega aupito sili ona malolosi i le lalolagi. Ma le mautinoa lava o mea ua aʻoaʻoina e lotu a Atunuu Kerisiano ua tele lava sana vaega i tulaga ua i ai le lalolagi. Ma, o lea la, pe ua latou ola talafeagai ea ma le latou manatu o sui latou o le Atua ma Keriso Iesu ma mulimuli i le Tusi Paia o le Afioga a le Atua? Po o, pe e mafai ea ona faapea o i latou, atoa foi ma isi lotu a le lalolagi, i le uiga moni o loo taʻitaʻia le fanau a tagata i se feteenaiga ma le Atua, se feteenaiga na o le mala na te aumaia?
4, 5. I le ā le auala e mafai ai e tali i nei fesili ona fesoasoani i a i tatou ia iloa le tele o le maufaatuatuaina o le Tusi Paia?
4 Afai e te sailia le soifuaga manuia ma le saogalemu mo oe ma lou aiga, e tatau ona e talisapaia le suesueina ma le naunautai o nei fesili. O tali i nei fesili o le a faailoa atu ai foi se isi mea e ese mai ai i a te oe. O le a e mafaia ai ona e iloa le tele o le maufaatuatuaina o le Tusi Paia, le malosi o lana ofo mai faapea o le Afioga a le Atua. Ai se ā?
5 Auā ua fai mai le Tusi Paia e i ai le lotu moni ma lotu sese. Ma ua ia fai mai e faamaonia ma faamanuia e le Atua na o le tapuaiga ua faavaeina i le upu moni, ua saoloto mai le tala pepelo ma le tau faaoleole. (Mataio 15:7-9; Ioane 4:23, 24; Tito 1:16) Ua ia folafola mai na o le tapuaiga moni lava ua talafeagai atoatoa ma le Afioga a le Atua na te mafai ona maua mai tagata o ē ola i le filemu ma le loto gatasitasi, atoa ma le alofa moni o le tasi i le tasi. (Isaia 32:17,18; Ioane 13:35) Afai o le tulaga lenei, ua mautinoa lava la, o le lotu e alu ese mai le Tusi Paia e le mafai lava ona manuia i lona taʻitaʻia o le fanau a tagata i le manuia ma le saogalemu moni. Pe o lea ea le tulaga o i ai?
O LE A LE TAʻITAʻIGA UA AVATU E LOTU A LE LALOLAGI E UIGA I TAUA?
6. A o lumanai le mafai o se filemu moni, o le ā e tatau ona faia e tagata?
6 Ua faasino mai e le Tusi Paia e uiga i le Atua o lē “e ona le manuia.” (Roma 16:20) Ma ua faatonuina ona tagata ia “saili i le filemu ma tausisi i ai,” ia “latou tuʻi ai lea i a latou pelu e fai ma uamea o suotosina,” ma ia latou lē toe aʻoaʻo i taua. (1 Peteru 3:11; Isaia 2:2-4) O sea filemu i le lalolagi lautele, e tasi lava le auala e maua ai pe afai e muamua ona ‘alolofa tagata i o latou tuaoi e pei o i latou lava.’—Mataio 22:39.
7-12. O le ā ua faaalia e mea moni pe ua aʻoaʻoina e lotu a le lalolagi le ituaiga o alofa o le a faatupuina ai le filemu faavao-malo?
7 Pe ua aʻoaʻoina atu ea e lotu a lenei lalolagi i ona tagata lea alofa? Pe ua latou aʻoaʻoina ea latou o lenei alofa e sili aʻe i luga o va tau atunuu ma feeseeseaiga i lanu ma gagana? Pe ua faamaoni ea e lotu a Atunuu Kerisiano, Katoliko ma Porotesano, le latou faamatalaga o loo mulimuli i a Iesu Keriso “le Alii o le Filemu”? E ui ina atonu e teʻi ai nisi e toatele, ae o tala faasolopito ua faamaonia ai o le tuu faafeagai ua moni.
8 E pei ona matauina e le nusipepa le New York Times: “I le taimi ua mavae o vaega pule Katoliko o atunuu e masani lava ona latou sapasapaia uma taua a o latou malo, ua latou faamanuia vaegaau ma ofoina atu talosaga mo lo latou manumalo, a e faapea foi i se isi vaega o faifeau Katoliko i le isi itu ona latou tatalo i luma o le lautele mo le faatoilaloina o le isi itu.” Sa faapena foi ona faia e taʻitaʻi i lotu Porotesano.
9 O se faataʻitaʻiga le Taua 1 a le Lalolagi, lea na gapā aʻe i le ogatotonu o Atunuu Kerisiano. O le toatele o tagata o itu uma e lua sa auai i se lotu e tasi. O le nusipepa o Belgium o le La Derniére Heure ua faamatalaina faapea i le vaitaimi o le taua sa tautala atu ai se Katinale Katoliko Roma e igoa ia Amette o Pare i fitafita Farani:
“Oʻu uso e, uo i le vaegaau a Farani ma ana aumea mamalu,ua i le tatou itu le Atua e ona le Malosi uma. . . . Ua latalata le Atua i a tatou fitafita totoa i le taua, ua na avatu le malosi i a te i latou ma puipui latou faasaga i le fili. . . . O le a aumaia e le Atua le manumalo i a i tatou.”
10 I le taimi lava lea e tasi i le isi itu sa tautala atu ai le akipikopo Katoliko o Cologne, Siamani, i o latou fitafita:
“Ua faatasi le Atua ma i tatou i lenei taua mo le amiotonu...Ua matou poloaiina outou i le suafa o le Atua, ia tau seia oo i le toe matāua o le sisina o outou toto mo le mamalu ma le viiga o le atunuu....Ua silafia e le Atua o loo tatou i ai i le itu o le amiotonu ma o le a ia aumai i a te i tatou le manumalo.”
11 Pe ua suia ea le Atua e lotu a o latou aumaia lenei feteenaiga, ma le taʻitaʻiga ua tumu i le inoino? Ina ua mavae le osofaiga e Italia o Aitiope i le 1935, na fai mai se faamatalaga a le Pittsburgh Courier:
“Ua mulimuli le lotu i le fuʻa, e ui lava ina lilofia le fuʻa i le toto o tagata lē sala ona o le faavale malosi o taua, ua fasia ai tagata i le igoa o le malamalama fou. . . .
“Ma e pei lava ona faamaonia e le Lotu Katoliko po o le seasea lava ona lē faamaonia lenei faomea faava-o-malo, faiga saua ma le fasiotia o tagata, ua faapena foi i lotu Porotesano. . . .
“I le vaega tele, o le vaivaiga faaleagaga o le Lotu Kerisiano i aso nei ua faapogai lava i lo latou faagutugutulua ma mea leaga o loo tatau ona latou teteea.”
12 I le vaitaimi o le Taua e Lua a le Lalolagi ma i taua uma talu mai ai, ua mulimuli lava lotu i le ata e tasi. A e faapefea la lotu i fafo atu o Atunuu Kerisiano? Pe ua ese ea lo latou talaaga? I le tuufaafeagai, o tagata lava o lotu lē Kerisiano ua masani ona fefasiotiaʻi i ni feainaiga leaga tele ma fetauaʻiga e pei ona molimauina tele e tala tuufaasolo. Ua masani lava ona sapaia e a latou aʻoaʻoga tau lotu ia faiga saua ma le faamasaa toto.
13. Pe e malie le Tusi Paia i gaoioiga a na failotu o ē, i le igoa o le filemu, ua auai i teteega saua faasaga i pulega a malo o i ai nei?
13 E moni, i taimi o le filemu e viia e taʻitaʻi lotu le filemu; ma ua taatele loa ona faia faapena. Ma atonu e te faalogo i nisi taimi po o le faitau foi i a i latou o ē ua faia se tulaga tetee i taua e ui lava ina o sea tulaga e lē taatele. Ae o ia taʻitaʻi lotu lava foi ia ua masani ona faaalia e lē amio filemu moni latou, auā latou te auai i faiga tetee ua masani ona saua ma le malosi tele. O nisi ua oo lava ina latou sapasapaia gaoioiga faasipai ma fouvalega agaʻi i faigā malo o loo pulea atunuu. Peitai ua lē faamaonia e le Tusi Paia lea ituaiga a faiga.—Roma 12:17-19; 13:1, 2.
14. (a) I le ā le gagana faafaatusa ua faamatalaina ai lotu a le lalolagi e le Tusi Paia? (e) O le ā le agasala ua tuuaia i a “Papelonia le aai Tele”?
14 O le faatosinaga a lotu o le lalolagi i luga o malo o le lalolagi ua matuā mataʻutia naua, ua faamatalaina ai e le Tusi Paia nei lotu tuufaatasi o se emepaea. Ma ua tautalagia latou i lalo o le igoa “Papelonia le Aai Tele,” lea faapea “o le aai tele lea e i ai le pule i tupu o le lalolagi.” (Faaaliga 17:3-5, 15, 18) Talu ai ona o le gaoioiga ‘faalefafine talitane’ lē mafaafitia o lotu a le lalolagi mo lo latou lava lelei mai faiga faalemalo, mai le tamaoaiga ma le va fealoaloai, ua faaataina ai lenei emepaea faalotu, o Papelonia le Aai Sili, e se “fafine talitane.” E uiga i lenei emepaea faalotu fafine talitane ua faapea mai: “Ua iloa foi ia te [ia] le toto o . . . i latou uma ua fasiotia i le lalolagi.” (Faaaliga 18:24) Pe o se faamatalaga ea e teʻi ai—faapea o lotu a le lalolagi ua na tauamoina le tele o le agasala mo ē uma ua fasiotia i le tala faasolopito o le lalolagi? Ae o le faatosinaga ua latou faaaogaina ma le taʻitaʻiga ua latou faataatia i le lagolagoina o taua, atoa foi ma le auai i taua mataʻutia faalotu ma sauaga faalotu, ua aumai tonu ai lava le avega tauave mo lea i o latou luga.—Ia faatusatusa Mataio 23:33-36; 27:20-23, 25.
15. Afai e mananao moni tagata lotu i le filemu o ā fesili e ao ina latou naunau latou te vaavaai ai e uiga i le latou lava lotu?
15 Ua faapea le aʻoaʻoga a le Tusi Paia, “ia tatou fealofani. E le pei o Kaino na i loo leaga [Satani le Tiapolo], na fasioti foi i lona lava uso.” (1 Ioane 3:10-12) Peitai o loo faaauau pea le fanau a tagata i le ala o Kaino, ma ua faamanuiaina e lotu a le lalolagi i latou o faaauau i lea auala. Afai o oe o se tagata lotu, ia fesili ifo i a te oe lava, ‘Pe faapefea i laʻu lava lotu? Afai e auai tagata uma i laʻu lotu, pe e taofia ai nei ea taua ma avea ai loa lenei lalolagi ma nofoaga o le filemu moni?’
PE UA SIITIA EA E LOTU A LE LALOLAGI LE AMIOGA LELEI?
16. (a) Ai se ā ua avea ai le pipii atu i tulaga moni tau le amio ma mea tāua i le filemu ma le saogalemu? (e) E pei ona aʻoaʻoina i le Tusi Paia, o le ā e siitia ai ia amioga lelei?
16 Pe e mafai e soo se tasi ona fiafia i le filemu moni ma ona tuaoi po o le saogalemu moni pe afai e leai se pipii atu i tulaga moni tau amioga? Ua mautinoa lava e leai. A aunoa ma lea, o le a i ai le pepelo, gaoi, mulilua, ma isi uiga uma faapena. O le alofa moni i tuaoi e tatau ona siitia ai amioga lelei. E pei ona faaupuina ai e le Tusi Paia:
“Auā ai sē alofa atu i se tasi tagata, ua atoatoa ona faia e ia o le tulafono. Auā o upu ia, Aua le mulilua, Aua le fasioti tagata, Aua le gaoi, Aua le molimau pepelo, Aua le tuʻinanau; afai foi ua toe se isi poloaiga, o loo ua aofia lava i lenei upu, Ia e alofa atu i lē lua te tuaoi, ia pei o oe lava ia te oe. E le agaleaga atu le alofa i lē la te tuaoi; o lenei, o le alofa o le atoatoa lea o le tulafono.”—Roma 13:8-10.
17, 18. (a) Pe e mafai ona tatou faatalitalia se olioli i le filemu ma le Atua pe afai tatou te lē pipii atu i tulaga amiotonu tau le amio? (e) O ai na faataatiaina na tulaga?
17 Peitai, e sili atu ona tāua i lea, pe e te talitonu e mafai e soo se tasi ona i ai i le filemu ma le Atua ma maua le faamaoniga o Lona Finagalo lelei ma lana puipuiga, pe afai na te lē faia le amioga saʻo? Pe e mafai ona e ava ma faaaloalo i le Atua pe afai na te lei manaomia ia amioga mai i a i latou ua ia faamaonia?
18 E moni lava, mo le Atua ia manaomia le amiotonu e tatau ona ia faamanino i ona tagata po o a ana tulaga tau le amio. O le faapea e tatau i le tagata lava ia ona faia ana tulaga ma alu aʻi, e leai lava se eseesega i lea ma le faapea atu e tatau i le tagata lava ia ona faia ana tulafono tau auala ma mulimuli i ai. Ua e iloa le iʻuga e oo i ai. Ua faaalia e le Tusi Paia na o le tasi lava le auala e aumaia ai le faamaoniga a le Atua ma o soo se isi lava auala o le a na ona taʻitaʻiina atu ai i le faaumatiaga.—Mataio 7:13,14.
19. Afai ua faataatia e lotu a Atunuu Kerisiano le taʻitaʻiga lelei i amioga, o le ā o le a e faatalitali e vaaia i olaga o ona tagata?
19 O lea, pe ua suia moni ea e lotu a Atunuu Kerisiano le Tusi Paia, sapasapaia ana tulaga tau amioga ma faataatia ai se taʻiala mo le isi vaega atoa o le lalolagi? O le ā ua faaalia i olaga o tagata e i ai i nei lotu? Ua fai mai le Tusi Paia o “fua o le Agaga [o le Atua] o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoiā.” (Kalatia 5:22,23) Pe o le fua ea lea o maua mai lotu a le lalolagi? Po o e te maua ai ea ma le faateʻia o oe i le anoano o fua “leaga,” “o galuega a le tino . . . o le mulilua, o le faitaaga, o le amio leaga, o le matāitu, o le ifo i tupua, o le fai togafiti faataulāitu, o le feitagai, o le femisai, o le losilosi vale, o le lotoa, o le finau vale, o le fevaevaeaiga, o maseiga, o le mataua, o le fasioti tagata, o le onaga, o le poula”? (Kalatia 5:19-21) I le faatusaina o tagata i laau, fai mai le Tusi Paia o “laau” e fua mai i na ituaiga o fua o le a faaumatia.—Mataio 7:17-19; 12:33.
20-22. (a) E uiga i le amioga, o ā fesili e manaomia le fesiligia e uiga i tagata o le lotu a se tasi lava ia? (e) O le ā ua fai mai ai le Tusi Paia e tatau ona faia i se tagata o se faapotopotoga ua fai ma masani le faia o le amio leaga? (i) Pe o uia lea auala e lotu?
20 Afai e i ai sau lotu, ia fesili i a te oe lava: ‘O le ā le faatuatua ma le saogalemu ua ou lagona e uiga i le tulaga tau amioga a ona tagata? Afai e ola tagata uma o i le lalolagi e pei o laʻu lotu, pe o le a faaumaina ai ea taua, faiga lē faamaoni tau pisinisi, femisai ma amioga lē mamā tau ituaiga?
21 Ua manino le upu moni i le lapataiga a le Tusi Paia “E faafefeteina le palugā falaoa uma lava i sina mea itiiti e faafefete aʻi,” ma e faapea foi ma “O le feoai ma e amio leaga e leaga aʻi amio lelei.” (Kalatia 5:9; 1 Korinito 15:33) O le mafuaaga lena sa tusi mai ai le aposetolo faagaeeina i Kerisiano: “Ai se tasi ua taʻuusoina a e faitaaga, pe matapeapea, pe ifo i tupua, pe agatele, pe onā, pe fao mea; aua lava neʻi tau feoai, aua foi tou te aai faatasi ma le o faapea. . . . O lenei, ia faateaeseina e outou lena tagata amio leaga ia te outou.”—1 Korinito 5:11-13.
22 E moni, atonu e faia e se tasi sina laasaga e sese ma toe lelei. A e faapefea i latou ia e tusi faatatau i ai le aposetolo, latou ia ua fai ma masani le faia o nei mea, ma avea o se vaega o latou olaga? Afai ua manatu na tagata o i latou o auauna i le Atua, o i latou o ni pepelo. Ma le moni lava e te inoino i le tala pepelo, ma ua faaalia e le Tusi Paia e inoino i ai le Atua i na mea faatasi ai ma i latou o faia. (Mataio 23:27, 28; Roma 12:9) Pe faapefea la, i lau lotu? Pe ua puipuia ea e ona taʻitaʻi lotu ona tagata mai tulaga mataʻutia faaleagaga i lo latou aʻoaʻi atu i ē agasala i luma o tagata uma’? (1 Timoteo 5:20) Pe latou te faamamāeseina ea i latou o e faaauau pea i amioga leaga ma ua lē faaalia le salamo moni ona o le sese sa fai? Pe latou te faataga pea lava ia tagata o ni sui o le latou lotu i le tulaga lelei ma afaina ai isi? Pe na ona latou faaali atu i ‘laugutu’ le tulaga tau amioga, ae o le mea moni o loo latou ‘tilotilo ese’ pe ‘moeʻiini’ i le mea sese ua faia?—Mataio 15: 7, 8.
23. (a) O le ā ua fai mai ai le toatele o le au failotu i nei ona po e uiga i mea nei e pei o le faitaaga, le mulilua ma le tauatane? (e) O le ā ua fai mai ai le Tusi Paia e tusa ai ma na uiga?
23 I le lalolagi atoa, ua faateleina molimau faasaga i lotu a le lalolagi, molimau ia faapea, e lei avea lava latou ma malosi moni mo le amioga mamā ma le saogalemu ma le filemu e aumai ai. Ua faateleina pea lava pea taʻitaʻi lotu i aso nei ua fai mai, i luma o le lautele faapea, o le faitaaga, le mulilua ma le faatauatane e leai se mea e sese ai fua. Atonu ua e faitau lava oe i ni nusipepa e uiga i lena mea. O nei mea ua fai ma sui o le uiga taatele o lotu a le lalolagi. Ae peitai ua latou le suia le Tusi Paia, lea e faapea mai:
“Aua neʻi faaseseina outou; o e faitaaga, ma e ifo i tupua, ma e mulilulua, ma e tauātane, ma e faasotoma, ma e gaoi, ma e matapeapea, ma e onā, ma e agatele, ma e fao mea, e le fai mo latou tofi le malo o le Atua.”—1 Korinito 6:9,10.
24. Pe e mafai faapefea ona iloa ma le mautinoa e se tasi po o ā talitonuga o le faifeau o lana lotu i nei amioga?
24 Atonu ē te manatu o loo tutumau taʻitaʻi o lau lotu mo tulaga tau amio mamā. Ae pe ua e fesili patino ea lava oe i lou faifeau po o a ona manatu i nei mataupu? Ua tatau lou iloaina ma e manaomia lou iloa, auā o lou lava faamoemoe mo le ola o loo aafia ai.
SAOLOTO MAI LE MATAPEAPEA MA LE LOTO FAAPITO
25. O le ā le aafiaga o le va feagai ai o tagata ona o le manao i tupe?
25 O le matapeapea ma le loto faapito ua manino lava le i ai i le aʻa o le tele o femisaiga ma le lē saogalemu i aso nei. Fai mai le Tusi Paia o le “manao i tupe, o le pogai lea o mea leaga uma lava.” (1 Timoteo 6:10) Pe ua tuusaototoina ea lotu a le lalolagi, ae maise ai lava lotu a Atunuu Kerisiano, mai lenei mea?
26, 27. Faapefea ona faaalia e lotu a le lalolagi lo latou manatu agaʻi i tupe ma le tele o ona fanua?
26 Pe ua lē moni ea o le faiga masani a lotu i Atunuu Kerisiano o le faia lea o lafoga, totogi sefuluai, aoina tupe i ipu, faia sailigā tupe ma talosaga atu i luma o le lautele mo ni tupe i polokalama faalelotu i letio ma televise po o meli foi? Afai e manaomia e tagata lotu se auaunaga a le au failotu, pe e lē o le latou manatu taatele ea o se tiute tauave le totogi atu—mo se faaaʻoaʻoga, le papatisoga, faaipoipoga po o sauniga o ni maliu? Ma i le lalolagi atoa, o tagata atonu e matuā matitiva lava ua talosagaina ma uunaia ia lafo tupe mo le fausia o fale lotu ma malumalu taugata.
27 I le tele o atunuu ua umia ai e lotu a le lalolagi le tele o le oa ma fanua tetele. I le senituri lona sefuluiva sa umia ai e le Lotu Katoliko Roma i Mexico e lē itiiti ifo i le afa o le fanua uma i le atunuu. Ua faapena foi i le tele o atunuu e leai ni lotu Kerisiano, o le tele lava o faaputuga oa ua masani ona i ai i malumalu o lotu, ma ua masani lava ona faafeagai ma le mativa o le tele o le faitau aofai o ē o loo siomia ai ia nofoaga.
28. Pe faapefea ona eseese lenei faiga ma aʻoaʻoga a Iesu Keriso ma ona aposetolo?
28 Ua eseese lenei ma le aʻoaʻoga a Iesu Keriso, o lē na taʻu atu i ona soo: “Na outou maua fua, ia avatu fua.” (Mataio 10:8) Ua faaalia i faamaumauga a le Tusi Paia o uluai Kerisiano sa latou foai atu ma le loto malie, e aunoa ma le faamalosia. (Galuega 11:29, 30; 2 Korinito 9:7) O ē sa taʻimua, o aposetolo ma isi, sa le avea ma avega mamafa i o latou uso Kerisiano, ma sa lei faamauoaina foi i latou mai mea a o latou uso. Sa latou galulue i o latou lava lima. (Galuega 18:1-4; 20:33-35) Pe ua moni ea lea i taʻitaʻi lotu ua e iloa?
29. O ā uiga tutusa ua e vaaia i le va o taʻitaʻi lotu o le lalolagi i o tatou aso ma ē na tetee i a Iesu i le uluai senituri T.A.?
29 Ia faatusatusa taʻitaʻi lotu o le lalolagi i aso nei ma taʻitaʻi lotu sa tetee i a Iesu i le uluai senituri T.A.E ui ina sa faia ni nai galuega alofa, ae o na tagata sa naunau tele i le viiga ma le fia iloa ma sa latou atiina aʻe le fiafia atu i a i latou o taʻitaʻi faalemalo. (Mataio 6:2; Mareko 12:38-40; Ioane 11:47, 48; 19:15) Sa taʻu manino atu e Iesu i nei ‘tagata alolofa i tupe’ ua inosia i latou i le silafaga a le Atua, auā o i latou o tagata pepelo. Na ia faatusaina i latou i “tuugamau ua faasinasinaina, o loo matagofie i fafo a o totonu ua tutumu i ivi o tagata oti ma mea leaga uma,” ma ona fai atu ai lea i a i latou: “E faapea foi outou, o fafo ua mataamiotonu i luma o tagata, a o totonu, ua tutumu outou i le pepelo ma le amioletonu.”—Luka 16:14, 15; Mataio 23:27, 28.
I LE A UA IʻU I AI ONA O LE TEENA O LE TUSI PAIA?
30. E pei ona faaalia i le Isaia 48:17, 18, o le ā le iʻuga pe a faalogo tagata i poloaiga a Ieova?
30 I tagata o Isaraelu, se atunuu sa fai mai e tapuai i a te ia, ua tusia faapea na fetalai atu Ieova le Atua: “O aʻu o Ieova, o lou Atua, o loo aʻoaʻo ia te oe i mea e aogā, . . . E! ana uai mai ou taliga i aʻu popoaiga, po ua tusa ma le vaitafe lou manuia; ma lau amiotonu, e tusa lea ma peau o le sami.”—Isaia 48:17, 18.
31-33. O le ā ua faaalia i inei e uiga i manatu o le tele o le au failotu agaʻi i le Afioga a le Atua?
31 Peitai o le faamaoniga ua iloiloina ua faaalia ai o lotu a le lalolagi ua le faalogo i poloaiga a le Atua. O le mea moni, i Atunuu Kerisiano ua faatoateleina pea lava pea faifeau ua faaali atu i luma o le lautele le leai o so latou faatuatua i le Tusi Paia faapea o le Afioga faagaeeina a le Atua. Ua faamatalaina e le mekesini Science o Novema 1972 le fonotaga a le komiti o aʻoga i Kalefonia, fai mai sa finau ai se ‘taʻitaʻi Mamona ma le ulu o le Grace Episcopal Cathedral i San Francisco’ e sapasapaia le evolusione a e tetee i le faamatalaga o le foafoaga e pei ona aumaia e le Tusi Paia i le tusi o Kenese.
32 O le New Catholic Encyclopedia, a o ia fai mai na te talia le Tusi Paia e faagaeeina, ae fai mai: “A e ui lava i lea ua manino lava e tele faamatalaga faale-Tusi Paia e lē moni pe a faamasinoina e tusa ai ma poto faaonapo nei o le faasaienisi ma tala tuufaasolo.”
33 O se manatu faapea foi ua faaalia i le Baptist Broadman Bible Commentary. I le fonotaga i le 1972 o le Southern Baptists (le ituaiga porotesano aupito tele i le Iunaite Setete), sa tuuina atu ai se iʻugafono ina ia toe valaaulia ma toe tusia lenei galuega talu ai ona sa lei sapasapaia le moni atoatoa o le Tusi Paia. Peitai sa lē talia le iʻugafono i se fuafuaga tutusa e tusa o le 4 i le 1.—The Christian Century, Aokuso 2, 1972.
34, 35. (a) O ā iʻuga ua oo i ai talu ai le teena o aʻoaʻoga a le Tusi Paia? (e) O lea, pe alaga tatau ea ona tatou vaai atu i lotu a le lalolagi e taʻitaʻiina atu le fanau a tagata i le manuia ma le saogalemu?
34 Po o ā iʻuga o nei mea uma? Pe ua mafai ea e le lalolagi ona faataʻitaʻia latou te mafai ona taʻufaatauvaaina aʻoaʻoga a le Tusi Paia ma aumaia ai pea amio lelei, e fesoasoani ai i le manuia ma le saogalemu? I le tuueseese ai, ua faateleina le leaga o tulaga i le lalolagi lautele, ma o Atunuu Kerisiano ua leva ona sili atu ona mafatia e uiga i solitulafono, amioga lē mamā, pulea e vailaau faasāina, femisaiga ma taua tau lanu. O atunuu foi e leai ni lotu Kerisiano ua faapea foi ona avea tele ma vaaiga o le lē toafilemu ma fevaevaeaʻiga, iʻuvale tau faigā malo ma le solo i tua tau amio mamā. E pei ona faaupu ai e le Tusi Paia: “Ua latou lafoai le afioga a Ieova; se a foi se poto ua ia te i latou?—Ieremia 8:9.
35 O le faamaoniga i le lalolagi lautele ua lē mafai ona faafitia. Ua faamaonia o lotu a le lalolagi ua lē o se malosi moni mo le manuia ma le saogalemu. O le ā ua na faailo mai mo i tatou?
LE IʻUGA O LOTU A LE LALOLAGI UA LATA MAI
36, 37. O le ā ua lapatai mai e le Tusi Paia o le a oo mai i luga o lotu a le lalolagi?
36 Sa taʻua e Iesu Keriso: “O laau uma e lei totōina e loʻu Tamā o i le lagi o le a liaiina ia.” (Mataio 15:13) O ō latou fua leaga ua faamaonia ai o lotu a le lalolagi ua lē o se totōga a le Atua. E pei lava ona lapataia e le Tusi Paia le lē mafaia e nei lotu ona aumaia tulaga filemu ma amiotonu, ua faapea foi ona lapatai mai i le faaumatiaga o loo sau o faiga sese uma lava o tapuaiga.
37 I le tautala i ai i lalo o le faatusaina i le fafine talitane “Papelonia le aai tele” fai mai le Atua i lea emepaea faalotu:
“Auā ua paʻi atu ana agasala i le lagi, ua manatua foi e le Atua ana amioleaga. . . . o le mea lea e oo mai ai i le aso e tasi ona mala, o le oti, ma le faanoanoa, ma le oge; e susunuina foi o ia i le afi; auā e malosi lava le Alii le Atua o lē faasala ia te ia.”—Faaaliga 18:5-8.
38. Pe o le ā faapefea ona sau sea faaumatiaga, ma mai le ā le pogai?
38 Matau mai ia o le faaumatiaga o le emepaea o le lalolagi o lotu sese o le a sau ma le matuā faafuasei e teʻi ai, e pei “o le aso e tasi.” O le ʻoa uma sa ia faaputua o le a faataugāina e atunuu faalemalo ma o le a tetei ma meia ai le toatele o tagata.—Faaaliga 18:10-17,21; 17:12,16.
39. (a) I le Faaaliga 18:4, o le ā ua uunaia ai tagata e naunau ia maua le faamaoniga a le Atua latou te fai? (e) O le ā ua uunaia latou e faia lea gaoioiga?
39 O lea la, ua faapea le valaau tau atua: “Loʻu nuu e, ia outou o ese ia te ia, ina neʻi faatasia outou i ana agasala, ina neʻi tofusia foi outou i ona mala.” (Faaaliga 18:4) Ina ia faia lea gaoioiga o lona uiga e mo oe ina ia e tagaʻi i lenei emepaea o le lalolagi o lotu sese e pei ona silasila i ai le Atua, ma ʻinoʻino i ai ona o ona fua leaga, lona pepelo ma le talitonu i mea faataulāitu. E tatau ona lagona le ʻinoʻino i le auala ua suiseseina ai e “Papelonia le aai tele” le Atua i luma o le fanau a tagata, ma, mo le mafatiaga, omiga ma le olopalaina i lalo o tagata, lea ua ia fesoasoani i ai. (Roma 2:24; Ieremia 23:21,22) Afai ua e iloaina lenei mea, o le a e aveesea uma au fesoasoani mai i a te ia, ma o le a faaalia ai lou lagolagoina atoatoa o le iʻuga faafaamasinoga a le Atua faasaga i a te ia.
40. (a) I le faaopoopo i ai, o le ā e tatau i se tagata ona saili, pe afai e fia maua le olaga fiafia, manuia ma le saogalemu? (e) O le ā le ituaiga o tagata e tatau i se tasi ona sailia a o sueina e ia ia maua i latou o faia le tapuaiga moni?
40 Peitai e lē lava lou na ona solomuli mai ai, pe afai e te saili se olaga manuia ma le saogalemu mo oe ma lou aiga. E tatau ona e saili atu ma maua nei le tapuaiga moni, ma le lē pepelo, lea o le a na aumaia i a te oe le filemu o le Atua ma lana faamalumaluga pe a oo mai le faaumatiaga pei ona muai valoia. O i latou, o ē auai i le tapuaiga moni, e tatau o ni tagata o ē ua uma ‘ona latou tuʻi ai lea i a latou pelu e fai ma uamea o suōtosina, latou te le toe aʻoaʻo foi i taua.’ (Isaia 2:4) E tatau ona avea o ni tagata ua matuā talitonu i le Afioga a le Atua, ma ola moni ai, ma avea ma taʻiala malosi i o latou olaga. (Salamo 119:105 [118:105, Dy]) E tatau ona latou faaalia le alofa moni lē pepelo mo o latou uso a tagata. (Ioane 13:35; Roma 13:8) Ua i ai tagata faapena i aso nei. Ma o le manuia ma le saogalemu ua latou fiafia ai ua faamaonia ai le moni atoatoa ma le mana o le Afioga a le Atua, o le Tusi Paia lea.
41. O le ā o le a mafai ona e matauina e oe lava ona o lou faatasi i sauniga a molimau a Ieova i lo latou Maota o le Malo?
41 O i latou ua e maua mai ai lenei tusi, o molimau Kerisiano a Ieova, ua matuā manatu mamafa lava i le tulaga mataʻutia ua avatu i ai tagata e lotu sese. O i latou foi ua taumafai lava ma le loto naunau ia faamuamua le Afioga a le Atua i o latou olaga. Ua valaaulia oe ia e faatasi atu i a latou sauniga i lo latou Maota o le Malo i lou oganuu ma e suesueina ai e oe lava le tele o le latou faaalia o fua o le agaga o le Atua ma fiafia ai i le manuia ma le saogalemu ua na aumai. O le a e tagaʻi ai foi pe faapefea ona latou aʻoaʻo ma faatatauina mea e manaomia e le Atua mai tagata uma o ē o le a faasaoina atu i Lana faiga fou amiotonu.
[Fesili mo le Suʻesuʻega]
[Ata i le itulau 25]
Pe na e silafia ea sa matuaʻi tele se aafiaga o lotu i taua?
[Ata i le itulau 30]
Pe o le ituaiga o taʻitaʻiga ea lenei o loo e manaomia mo lou aiga?
