Po o Afea e oo Mai ai le Faaumatiaga ua Muai Taʻua mo le Lalolagi?
Mataupu 7
Po o Afea e oo Mai ai le Faaumatiaga ua Muai Taʻua mo le Lalolagi?
1. Po o le ā le fuafuaga e sili ona tāua a le Atua mo le fanau a tagata?
FAAUTA i le mapusaga ma le saolotoga pe a soloiesea taua, le soligātulafono, ma le faaleagaina o le lalolagi! Maeu le matagofie ma le faamalie loto le ola i lalo o se pulega amiotonu, e mafai ai ona olioli se tasi ma lona au aiga i le saogalemu atoatoa. Ua faaalia mai e le Tusi Paia o le a faataunuuina e le Atua nei mea. Ae peitai, po o afea ea?
2. (a) Pe ā oo mai le “aso o Ieova,” po o ai o le a maua faafuasei ma le teʻi? (e) Pe e mafai faapefea ona tatou alo ese mai le oo mai o se mea faapena i a te i tatou?
2 Sa tusi mai se tasi o aposetolo a Iesu Keriso e uiga i le faaumatiaga o faiga o mea o le lalolagi, ina ia ulufale mai le faiga fou amiotonu a le Atua, faapea: “O le aso o [Ieova] e pei o le gaoi i le po, e faapea ona oo mai ai.” Ona faapea mai ai lea o ia i tagata o loo suesue ma usiusitai i le Afioga a le Atua: “A o outou, le au uso e, tou te le o i le pouliuli, ia maua mai ai outou e lena aso, pei o se gaoi.” (1 Tesalonia 5:2, 4) O e le faalogo i le lapataiga, o le a maua faafuasei ma le teʻi i latou. Pe a oo mai le “aso o Ieova” o le a pei i latou o se manu ua maua faafuasei i se mailei e le mafai lava ona sola ese ai. Ae peitai, e lē faapea e tatau ona oo i a te oe lena mea. Auā e pei ona fai mai le Tusi Paia, o loo i ai ni tagata e “le o i le pouliuli.” E lē faapea ona o so latou lava atamai lea. E leai, a ua latou suesue ma tuu i totonu o latou loto le Afioga a le Atua. Po o le ā ea, ua fai mai ai lena Afioga e uiga i o tatou aso? —Luka 21:34-36.
3, 4. (a) Po o fea o faamatala mai ai uiga moni atoatoa o mea tutupu i lenei luasefulu o senituri? (e) Po o ā mea tāua e fa ua faaalia mai e valoaga a le Tusi Paia o le a tatou iloiloina nei?
3 O loo faamatala mai ai mea e tutupu i lenei luasefulu o senituri. Ae sa ia valoia mai e tusa o le lua afe tausaga a e lei tutupu mai! E ui ina faapea o le tele o mea ua tutupu ua lauiloa e tagata, ua na o le Tusi Paia e faaalia mai ai le uiga moni atoatoa.
4 O faamatalaga i totonu o le Tusi Paia e uiga i o tatou aso ua faasino mai ai nei mea: (1) Le faailogaina o se tausaga faapitoa o le taimi lena e tuuina atu ai e le Atua le pule o le “malo o tagata i le ua ia finagalo i ai.” (2) Faamauina mea tutupu tāua e tutupu i le vaitaimi ua taʻua o “le faaiʻuga o le faiga o mea.” (3) Faaali mai le umi o le vaitaimi mai le amataga o le “faaiʻuga o le faiga o mea” seia oo i le faaumatiaga o le lalolagi e pei ona valoia mai. (4) Taʻu mai se faiga uiga ese o mea a le lalolagi e fai ma faailoga mulimuli, o le a amata loa le faaumatiaga o le lalolagi. Sei tatou iloiloina taitasi nei mea.
O LE TAUSAGA FAAILOGAINA—1914 T.A.
5. Po o anafea na muai iloa ai e molimau a Ieova ua faasinoina mai e le Tusi Paia le tausaga e 1914 T.A. o se tausaga tāua tele?
5 O le tausaga e 1914 T.A. ua faailogaina e valoaga a le Tusi Paia o se taimi lena e oo mai ai se suiga tele i faiga o mea a tagata ona o mea tetele e tutupu i lugā i lagi. I tua lava i le tausaga e 1876, o molimau a Ieova (i lena taimi sa taʻua i latou o “Tagata Suesue o le Tusi Paia”) sa latou iloa lena mea moni ma sa latou faalauiloa i le lautele. E te mafaia lava ona e iloiloina nei faamatalaga auiliili i totonu o lau lava Tusi Paia.
6. (a) Sei sue lau Tusi Paia i le Tanielu mataupu e 4, i le Ta 4 fuaiupu e 3 ma le 17 ma taʻu mai po o a mea ua talanoaina i ina. (e) Po o ai lē ua tuuina i ai e Ieova le “malo”?
6 Ia sue lau Tusi Paia i le tusi a Tanielu mataupu e fa. E te maua ai se valoaga e faaalia mai ai le fuafuaga a le Atua e uiga i le faiga o lana pulega silisili i luga o le lalolagi. Ua taʻu mai faapea o le fuafuaga o lena valoaga “ina ia iloa e tagata ola ua pule lē Silisili ese i le malo o tagata, ua tuuina atu ai i le ua ia finagalo i ai.” (Ta 4 Fuaiupu e 3, 17) Ua tatou iloa o “le” ua filifilia e Le Silisili ese ia tuuina atu i ai le “malo,” o Iesu Keriso lea. Ua taʻu mai e le tusi mulimuli o le Tusi Paia le taimi e tuuina atu ai “malo o le lalolagi” i a Iesu Keriso le tupu faalelagi. (Faaaliga 11:15; 12:10) O lona uiga, o le valoaga a Tanielu e faatatau i le taimi e aapa atu ai le Atua Silisili ese i faiga o mea a tagata ina ia tuuina atu le “malo o le lalolagi” i lona Alo o Iesu Keriso. Po o afea ea, e oo mai ai nei mea e tusa ma le valoaga?
7. Po o le ā le aano moni o le miti faavaloaga ua tusia i le Tanielu mataupu e 4, ma pe sa faapefea ona faatatauina i le Tupu o Nepukanesa?
7 Ua taʻu mai e le miti faavaloaga sa tusia e Tanielu faapea o se laau matuā telē ma le maualuga lava sa tuu i lalo ma sa fusifusia i se fusi uamea ma le fusi ʻapa memea, seia mavae “tausaga e fitu” po o (“taimi e fitu”). I lena taimi, e pei ona taʻuina mai, e tuuina atu i a te ia “le loto o le manu.” (Tanielu 4:10-17) Po o le ā ea lona uiga? Sa taʻitaʻiina e le Atua lana perofeta o Tanielu ia faamatala lona uiga: O Nepukanesa, le Tupu o Papelonia, o le a aveesea o ia mai lona nofoalii ma tuliesea ia teʻa ma tagata ina ia ola pei o se manu. Pe a mavae tausaga e fitu e toe maua e le tupu lona atamai, na te iloa ai le silisili ese o le pule a le Atua, ma o le a toe faafoisia i a te ia lona lava nofoalii. (Tanielu 4:20-37) Ua i ai se uiga maoae o nei mea uma lava, o le mafuaaga lena ua tusia ai i totonu o le Tusi Paia.
8. (a) Po o le ā le malo ua faatatau i ai le uiga tāua ma le sili o lenei valoaga? (e) I le faataunuuga sili ma le tāua o lenei valoaga, po o le ā ua faaataina i le taina i lalo o le laau, ma pe sa faapefea ona tuuina atu le ‘loto o le manu’ i a te ia?
8 O le uiga maoae e faatatau lea i se pulega e manuia ai mea faiola uma lava i luga o le lalolagi. E pei ona fai mai le valoaga, e maua au “mea e ʻai mā mea uma,” e maua ai foi le lafitaga mo manu ma manu felelei. (Tanielu 4:12; ia faatusatusa ma le Mataio 13:31, 32.) E tasi lava le pulega na te mafaia nei mea ua na o le malo o le Atua. Mo le tele o senituri sa faaalia mai tulafono ma uiga amiotonu o lena pulega faaletupu e le malo o Iuta, sa fai ma ona tupu le gafa tau tupu o Tavita i Ierusalema. Ona o lo latou lē faamaoni, sa tuuina atu i latou e Ieova ia faatoilaloina e le tupu o Papelonia o Nepukanesa. E pei o le laau telē ma le maualuga sa vaaia i le miti sa taina i lalo ma fusifusia lona tagutugutu. Sa amata ai ona pule malo o Nuu Ese i le lalolagi, ma sa sili ona lauiloa le malo o Papelonia sa pulea e Nepukanesa. O nei malo o Nuu Ese ua faatusaina i totonu o le Tusi Paia i “manu feai.” (Tanielu 8:1-8, 20-22) Sa folafolaina mai e se agelu mai le lagi mea e tutupu i faiga a malo faapea: “Ia tuuina atu ia te ia le loto o le manu, seia mavae tausaga e fitu.” (Tanielu 4:16) Mulimuli ane, o le a mavae na “taimi e fitu” (po o “tausaga e fitu,”) o le a aveesea ‘fusi,’ ma o le a tupu ae le “laau” pei o se malo pule i le lalolagi ua amata ona pulea e lē sa fetalai mai ai Ieova na te tuuina atu i ai le “malo o le lalolagi.”
9, 10. (a) I le sailia o le umi o ‘taimi e fitu,’ po o le ā le umi o ‘taimi’ taitasi? Pe faapefea ona faasino mai e le Tusi Paia lenei mea? (e) Po o anafea na amata ai ‘taimi e fitu,’ pe fia tausaga o lona umi, ma po o afea e faaiʻuina ai?
9 Po o le ā ea, le umi o na “taimi e fitu”? E sili atu lona umi i tausaga lava e fitu, auā ina ua mavae le selau ma selau o tausaga sa faaalia mai e Iesu e lei mavae atu. I le uluai senituri o tatou Tausaga Taatele, sa fetalai o ia e uiga i lenei mea faapea o “tausaga o nuu ese,” o lona uiga, o Nuu Ese sa pulea le lalolagi talu mai le taimi na manumalo ai Papelonia i a Ierusalema i le tausaga e 607 T.L.M.—Luka 21:24.
10 Sei e matau lelei mo oe lava pe ā tautala le Tusi Paia e uiga i “taimi” faavaloaga. Ua faaalia mai e le Faaaliga 11:2, 3 faapea o aso e 1,260 ua tusa ma masina e fasefulu ma le lua, po o le tolu ma le afa tausaga. Ua taʻu mai foi e le Faaaliga 12:6, 14 lena lava aofai o aso (1,260) ae peitai, ua faasino faapea o “le tausaga, ma tausaga, ma lona vaeluagalemu o le tausaga” po o le tolu ma le afa “tausaga.” O lea la, o na “tausaga” taitasi ua tusa ma le 360 aso (3-1/2 x 360 = 1,260). E le gata i lea, o aso taitasi o “tausaga” faavaloaga o le valoaga a Tanielu ua tusa ma le tausaga atoa, e tusa ma le tulafono, “o le aso ma le tausaga,” e pei ona tusia e perofeta faagaeeina eseese e toalua a le Atua. (Numera 14:34; Esekielu 4:6) O le faamautuina o lenei mea, o le a leai ai se faigata e iloa ai le umi o “tausaga e fitu” (7 x 360) e tusa o le 2,520 tausaga. Amata ona faitauina le 2,520 tausaga mai le vaitaimi o le tau e latalata i le tau malulu i le tausaga e 607 T.L.M., o le taimi lena sa faatoilaloina ai e Papelonia le malo faafaatusa o le Atua i totonu o Iuta, o le 2,520 tausaga na ua taunuu atu ai tatou i le tau e latalata i le tau malulu i le tausaga e 1914 T.A., (606-1/4 + 1913-3/4 = 2,520). O le taimi lena e tatau ai ona tuuina le “malo o le lalolagi” i a Iesu Keriso i lona nofoalii faalelagi.
11. Po o ā upu a tusitala o tala faasolopito e uiga i le tāua o le tausaga e 1914?
11 Ina ua latou iloa ua faasino moni e le Tusi Paia i le tausaga e 1914 T.A., sa tatau ona faatalitali molimau a Ieova mo tausaga e tele seia latou vaai tino i lona faataunuuga. I le amataga o le tausaga e 1914, ona o le filemu o tulaga o faiga o mea i le lalolagi, sa manatu ai le toatele o tagata, atoa foi ma taʻitaʻi o malo o le lalolagi, o le a leai lava se mea o le a tupu. Ae peitai, a o lei mavae atu le tau vevela i lena tausaga sa magoto le lalolagi i se taua e leai sona tusa i le tala faasolopito faaletagata. E uiga i mea sa tutupu i lena tausaga, fai mai le tusitala faasolopito mai Oxford o A.L. Rowse:
“Afai lava e i ai se isi tausaga e faailoaina ai le iʻuga o se vaitaimi ma le amataga o se tasi, o le tausaga lena e 1914. O lena tausaga na oo mai ai le iʻuga o le lalolagi tuai ma ona uiga saogalemu ma amata ai tausaga faaonapo nei ma ona uiga lē saogalemu ua fai lena ma o tatou tofi i lea aso ma lea aso.”
Ua faapena foi ona taʻuina mai e se ripoti i se tusi i le olaga o le taʻitaʻi tautaua o le malo o Peretania o Winston Churchill:
“O le fana sa faapaina ia Iuni 28, 1914 i Sarajevo sa lepetia ai le nofofilemu, ma le saogalemu, ma mafaufauga lelei o le lalolagi . . . Talu mai lena taimi, e lei toe maua e le lalolagi se tulaga faapena. . . . O se suiga tele lena, ma o le lalolagi o ananafi, ofoofogia, ma le filemu ma le faafiafia loto ua mou atu, e le toe aliali mai lava.”—Mai le tusi Winston S. Churchill, Tusi 2, tusia e Randolph Churchill.
O lena tausaga, sa muai faailogaina e valoaga a le Tusi Paia e tusa o le lua ma le afa afe tausaga ua mavae, ua avea ma faamaoniga o se suiga lena i le tala faasolopito. Sa faamanino atili lona uiga moni ma lona tāua ina ua amata ona tutupu mai isi mea.
12. Po o le ā le mafuaaga sa matuā vevesi tele ai faiga o le olaga faaletagata i le tausaga e 1914 ma tausaga mulimuli ane ai?
12 I le amataga atonu e foliga mai o se mea uiga ese o le taimi e nofotupu ai Keriso ina ia pule i le lalolagi o le fanau a tagata e faailogaina e se taua e leai sona tusa i luga o le lalolagi. Aua neʻi faagaloina o le “alii o lenei lalolagi” O Satani le Tiapolo o loo vatau o ia ma le Atua. (Ioane 14:30) Sa le manao o ia e vaai ua tuuina atu le malo fou faavaeina o le Atua i aao o le Keriso ina ia pule i faiga o le lalolagi. Ua iloa tino lenei mea, i ana lava taumafaiga ia tosina ese manatu o tagata mai le mea sa tupu e sili ona taʻua i le lalolagi aoao, sa ia taʻitaʻiina i latou ia sii taua ina ia faatumauina a latou lava pulega sili. E le gata i lea, e pei ona faaalia mai e le Tusi Paia, ina ua fanau mai ma amata ona pule le malo, sa nofo sauni Satani ma ana temoni e ʻaina le malo fou faavaeina. Po o le ā sa tupu? “Ua tau foi le taua i le lagi.” “Ua lafo foi le tarako tele, o le gata tuai lea, ua igoa i le tiapolo, i le ma Satani, o lē faasese i le lalolagi uma; ua lafo ifo i le lalolagi, ua lafo foi ana agelu faatasi ma ia.” Ua iloa e Satani “ua saasaa ona po.” Ua ita tele o ia. (Faaaliga 12:3-12) Po o le ā ea, le iʻuga o nei mea? Sa muai tuuina mai e le Tusi Paia se faamatalaga moni e tusa o le sefulu ma le iva senituri a e lei tutupu mai.
O MEA TUTUPU MA O LATOU UIGA FAAPITO MA LE TĀUA
13. Po o ā mea sa uluai talanoaina, na taʻitaʻia i le taʻuina mai ai e Iesu le ‘faailoga o lona faatasi mai ma le gataaga o le faiga o mea’?
13 I tuā i le tausaga e 33 T.A. sa faamatala māeʻaēʻa e Iesu ‘le faailoga o lona faatasi mai ma le gataaga o faiga o mea.’ Ua tusia lea i le Mataio mataupu e 24 ma le 25, Mareko 13 ma le Luka 21. A o faatasi o ia ma nisi o ona soo i Ierusalema, sa valoia mai e Iesu le faaumatiaga o le malumalu matagofie sa tu i totonu i ina. Mulimuli ane, ina ua nofo o ia i le itu o le mauga i fafo o le aai, sa fesili atu ona soo e fia maua ni isi faamatalaga, ma faapea atu: “Ia e fetalai mai ia te i matou pe oo afea ia mea? pe se a foi le faailoga o lou maliu mai, ma le gataaga o le lalolagi?”—Mataio 24:1-3.
14. Ia taʻu mai ni mea tāua tele e tutupu sa aofia i le fetalaiga a Iesu e uiga i “le faailoga.”
14 Ina ua uma ona lapataia i latou ia ʻaua neʻi faaseseina e tagata faaoleole o e fai mai o Keriso i latou, ina ia maua ni tagata e mulimuli i a te i latou, sa ia tali atu faapea: “E faalogo outou i taua ma tala o taua; ia outou, neʻi tou atuatuvale; auā e ao ona taunuu o nei mea uma, a e lei oo i le gataaga [po o, e lei iʻua loa lava]. Auā e sii le taua e le tasi nuu i le tasi nuu, ma le tasi malo i le tasi malo; ona oo mai ai lea o oge, ma faamai, ma mafuie i lea mea ma lea mea. O na mea uma o le amataga ia o puapuaga.” E pei ona faaalia mai e le Luka 21:11 sa ia fetalai foi o ‘faamai i lea mea ma lea mea.’ Sa ia lapatai mai e “tupu tele o le amio leaga,” ma ona o lena mea, sa faapea mai ai o ia “e maalili foi loto o tagata e toatele.” Sa ia valoia mai foi se mea tāua tele: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.”—Mataio 24:4-14.
15, 16. (a) Pe sa tutupu ea, nei mea a e lei faaumatia Ierusalema i le tausaga e 70 T.A.? (e) Pe faapefea ona tatou iloa e tatau ona i ai se isi faataunuuga e sili ona tāua?
15 Peitai atonu o le fesili o le a faia nei: ‘Pe e lei faataunuuina ea, nisi o nei valoaga a e lei oo mai le faaumatiaga o Ierusalema e Roma i le tausaga e 70 T.A.?’ Ioe, e moni, sa faataunuu nisi; ae peitai o le tele o nei mea e faatatau i le lumanai, e pei lava ona faaalia mai e valoaga. Sa tali Iesu i se fesili sa mamafa i le manatu o le au soo i lena lava taimi, ae peitai, sa ia faaaogaina lena avanoa e tuuina mai ai faamatalaga mo le lumanai e uiga i mea e sili atu ona tāua. Sa fetalai atu o ia i a te i latou, o lana fetalaiga e faatatau foi i le taimi e afio mai ai le “Atalii o le tagata” “ma le mana ma le mamalu tele” ma o ana afioga e faatatau i le afio mai o “le malo o le Atua.”—Luka 21:27, 31.
16 Sa lei faataunuuina nei mea i le taimi na faaumatia ai Ierusalema i le tausaga e 70 T.A. O le tusi mulimuli o le Tusi Paia, o le Faaaliga, sa tusia e latalata i le faaiʻuga o le uluai senituri, ua faaalia mai ai o nei mea e tutupu e tusa ma le Malo, o le a faataunuuina i le lumanai. (Faaaliga 1:1; 11:15-18; 12:3-12) Ua faaalia mai foi e le tusi o Faaaliga i upu faafaatusa faapea o le taua, ma oge, ma faamaʻi e lē mafaatusatusaina, sa valoia mai e Iesu, o le a faataunuuina i le lumanai i le taimi e amata ai ona faatoilaloina, ma seia oo ina manumalo aʻiaʻi Keriso i a te i latou uma lava o ē tetee i le malo o le Atua. (Faaaliga 6:1-8) O lenei, o le mea moni faapea, o le tele o vaega o le valoaga sa tuuina atu e Iesu i ona soo sa faataunuuina i le uluai senituri ua faamaonia ai lona moni ma le faamaoni, ua fai foi lena ma mafuaaga mautu mo le talitonuga mautinoa i le faataunuuina o mea atili uma lava i totonu o lena valoaga.
17. Po ua matuā eseese lava tulaga o faiga o mea i le lalolagi i aso nei ma aso i tua atu o le tausaga e 1914?
17 Pe e lei faataunuuina ea, nei valoaga i se tulaga e sili ona taua atoatoa i lenei luasefulu o senituri? I manatu o tagata e lē malamalama, o ē itiiti ifo i le fitu sefulu tausaga, o tulaga o faiga o mea o loo siosiomia ai i latou i le lalolagi atonu e leai ni uiga tāua, i a te i latou. Talu ai, latou te lei iloa se taimi sa matuā ese ai le olaga, ua latou manatu faapea o tatou aso ua pei lava ona ‘masani ai.’ Ae peitai o tagata matutua, o e ua malamalama i mataupu e uiga i tala faasolopito, ua latou iloa sa le faapena. Fai mai se tusi sa faaaogā e aʻoga i Suisilani e uiga i mea sa tutupu i le lalolagi i le tausaga e 1914 T.A.:
“Sa na o le sefulu ma le lima atunuu e lei vatau i le taua . . . A o nei atunuu e leai lava se tasi ua i a te ia le malo malosi e fai ai o ia ma puluvaga. E lei tupu lava se mea faapenei i le tala faasolopito o le lalolagi; e lei i ai lava se taua e faapena lona lautele. O le valoaga a le Tusi Paia faapea: ‘E sii taua e le tasi atunuu i le tasi atunuu ma le tasi malo i le tasi malo,’ sa matuā faataunuuina lava.”—Schweizergeschichte vom Dreiländerbund bis zum Völkerbund, e Gustav Wiget.
18. Pe ai se ā o le a sese ai i tatou pe a manatu faapea, o le taua sa tupu i le lalolagi atoa ua na o lea lava, le vaega o “le faailoga”?
18 O lenei, e le faapea sa na o le ‘sii taua o le tasi atunuu i le tasi atunuu ma le tasi malo i le tasi malo’ sa fetalai mai ai Iesu o le a fai ma “faailoga.” Sa fetalai mai foi o ia i se faataoto faapea: “Ina vaai ia i le mati atoa ma laau uma; pe a faatoa matala mai lau, ua outou vaai, ona outou iloa ai lea ua latalata le tausaga vevela. Ia faapea foi outou, pe a iloa e outou ia mea ua faia, ia outou iloa ua latalata le malo o le Atua. E moni, ou te fai atu ia te outou, E le mavae atu lenei tupulaga, seia taunuu mea uma.” (Luka 21:29-32) Afai e te vaaia se laau e tasi ua amata ona tutupu mai ona lau e lē tusa ma le tau, e lē faaseseina oe i lou manatu faapea ua latalata mai le tau vevela. Ae peitai, afai e te vaai atu i laau uma lava ua amata ona tutupu ma matala mai o latou lau, ua e iloa lona uiga. E faapena foi, e pei ona valoia mai e Iesu lona “faatasi mai” ma le “faaiʻuga o le faiga o mea” o le a faailogaina, e lē faapea na o taua, ao isi mea e tutupu lava i le tupulaga e tasi.
19. (a) E pei ona faaalia mai e le faasologa tusia o mea tutupu, pe sa faapefea ona faataunuuina nei vaega eseese o “le faailoga” talu mai le tausaga e 1914? (e) Pe ai se ā e le avea ai taua, ma oge, ma mafuie ma isi mea i taimi ua mavae ma mea e faia aʻe ai “le faailoga” e pei ona fetalai mai ai Iesu?
19 Po o ua faataunuuina ea, nei mea? Silasila ma iloilo ia i le faasologa i itulau e sosoo mai o mea tutupu i lalo o le ulutala faapea “Po O Le A le Faailoga?” A o e iloiloina, atonu e te manatua tala faasolopito sa e faitauina e uiga i taua i uluai senituri ua mavae atu. Peitai, ua mautinoa lava, e uiga ese le Taua Muamua a le Lalolagi mai isi lava taua, o se suiga lena i le tala faasolopito. E te manatua foi oge, ma faamaʻi, mafuie lauiloa po o soligātulafono sa talatalaina mai e le au tusitala a e lei oo mai le tausaga e 1914. E ui i lea, e leai lava se isi taimi i le tala faasolopito ua sili atu ona faateleina le tutupu o nei mea uma i se tupulaga e tasi. O isi foi vaega o “le faailoga” sa tusia e le au tusitala o le Tala Lelei ua iloa tino le faataunuuina. O lenei, i le loto faamaoni, afai o mea sa tutupu talu mai le tausaga e 1914 e lē o se faataunuuga lena o le faailoga, po o ā ea, isi mea e tatau ona tutupu? E leai lava se faaletonu, ua tatou ola i le tupulaga sa faatatau i ai le fetalaiga a Iesu.
20, 21. Pe faapefea ona faamaonia o mea sa tutupu faatasi ma le Taua Muamua a le Lalolagi “o le amataga ia o puapuaga,” e pei ona valoia mai e Iesu?
20 O le aliali mai o nei vaega o “le faailoga” e le faapea o le a soloiesea loa e le Malo o le Atua amioga leaga uma lava mai luga o le lalolagi. E pei ona valoia mai e Iesu, “o na mea uma o le amataga ia o puapuaga.” (Mataio 24:8) E i ai isi mea, mulimuli ane, o le a tutupu mai. E uiga i mea sa tutupu mai, fai mai le tusi o le World Book Encyclopedia: “O le Taua Muamua a le Lalolagi ma ona fua, na oo mai ai le pagatia tele i le tamaoaiga e sili atu ona leaga i le tala faasolo i le amataga o tausaga o le 1930. O fua o le taua ma faalavelave i le taumafaiga ia faanofo filemu ua mafua ai ona tupu le lē toafilemu toetoe lava soo se atunuu uma.” Ina ua mavae ni nai tausaga, sa pa le Taua Lona Lua a le Lalolagi, e sili atu lona mataʻutia i lo le uluai taua. Talu mai lena taimi, ua faateleina le faatalale i le ola o tagata ma mea totino, ua avea foi le fefe ona o soligātulafono ma vaega o le olaga fai soo. Ua tuulafoaiina le amio lelei. O le “faateleina o le aofai o tagata” o se tasi faalavelave lea, fai mai taʻitaʻi o malo e leai sa latou togafiti moni. O le faaleagaina o mea o loo siosiomia ai i tatou ua faaleagaina ai foi le tulaga lelei o mea fai ola, ma ua i ai nei i se tulaga e faaumatia ai. Ona o lena tulaga, fai mai le ripoti a le Fono a Malo Aufaatasi e uiga i Mea O Loo Siosiomia ai le Tagata (United Nations Conference on the Human Environment), o loo tu nei le fanau a tagata i le faitotoa o se “faalavelave e sili atu ona faafuasei ona tupu, e sili atu ona lavea tele ai le lalolagi atoa, e matuā le mafai ona alo ese mai ai, e sili atu ona tupu ai le fememeaʻi i lo soo se isi faalavelave ua oo i le fanau a tagata.”
21 O ana fea na amata ai nei “puapuaga”? Fai mai le nusipepa o le London Star: “O nisi tusitala o tala faasolopito i le senituri o loo lumanai nei atonu latou te filifilia faapea, o le aso na oso ai le valea i le lalolagi . . . o le tausaga e 1914.” E pei ona tatou uma ona iloa, o lena tausaga, 1914 T.A., ua leva ona faailogaina e valoaga a le Tusi Paia.
MEA E TUTUPU I LOTU E TATAU ONA MATAULIA
22. (a) Po o le ā le mea sa tuu faatasia e Iesu ma le faateleina o le amio leaga ma le maalili o le loto alofa? (e) Pe faapefea ona avea aʻoaʻoga a le au failotu a Atunuu Kerisiano ma fesoasoani i lenei tulaga?
22 Sa fetalai mai Iesu e uiga i ni isi mea e i ai o latou uiga tāua e ao ona tutupu i le taimi o le “faaiʻuga o le faiga o mea”: “E tutū mai foi perofeta pepelo e toatele latou te faasese foi i tagata e toatele. E maalili foi loto o tagata e toatele, ona ua tupu tele o le amio leaga.” (Mataio 24:11, 12) E tatau lava ona mataulia lelei o le faateleina o le amio leaga ma le maalili o le loto alofa sa tuu faatasi e Iesu ma taʻitaʻiga a perofeta pepelo, o lona uiga, o aʻoaʻo (faiaʻoga) lotu ua latou fai mai ma le pepelo, ua avea i latou ma sui o le Atua. I le amataga o lenei tusi, sa faaalia mai ai mau faamaonia e uiga i le ʻau failotu a Atunuu Kerisiano ua latou faamanuia taua a malo ma sapasapaia le manatu faapea ua le toe aogā i aso nei faaaʻoaʻoga o amioga lelei a le Tusi Paia, ma faavasegaina isi vaega o le Tusi Paia faapea o “tala o le vavau” (tala faafagogo). Po o le ā ia, le fua ua maua? O le ‘maalili’ o le alofa i le Atua ma le faalēnaunau i ana tulafono. O se mafuaaga sili lena ua tupu tele ai le amio leaga, atoa foi ma le lē usiusitai i pulega a malo ma le manatu faalēalofa tau tagata.—2 Timoteo 3:1-5.
23, 24. Po o le ā le mea ua tupu i lotu talu ai nei, ona o na mea?
23 Ona o na mea ua tutupu, ua mafua ai ona o ese le afe ma afe o tagata mai faalapotopotoga a lotu a Atunuu Kerisiano. O nisi ua latou liliu atu i le Tusi Paia ma tausisi i ona ala. A o isi ua latou o ese ma le loto lē malie ma le matuā ʻinoʻino tele, talu ai ua leai se malosi o lotu e saunia se fesoasoani moni faaleagaga. O le toatele o i latou nei ua avea lotu ma o latou fili.
24 O le mafuaaga lena ua ala ai ona fai mai le nusipepa o le New York Post: “O lotu, o le vaega lena o faiga o mea tuai peiseai ua tamoʻe tautevateva i o tatou luma pei o le saosaoa o le malamalama.” Ua ripotia mai e le New York Times faapea: “O lotu e pei ona masani ai, ua amata ona mavae atu, o le faamatalaga lena a se tasi alii poto Siamani i talaaga o lotu.” Ua faaali mai e le nusipepa Vatikane o le LʻOsservatore Della Domenica, ua lomia i vaiaso taitasi, ua lūlūina le Ekalesia Katoliko Roma i le Iunaite Setete e se “mafuie tele.” Fai mai e tau le asa se aso ma se “faalavelave fou” e tupu i le ekalesia, pei o patele ua tuulafoai o latou tofiga, taupou sa ua faamavae, aʻoga mo tamaiti ma aʻoga faalelotu Katoliko ua tapunia. Ua toaitiiti tama talavou e ulufale atu i aʻoga a lotu a Atunuu Kerisiano, ua tapunia foi aʻoga faalelotu, e oo foi i le tele o mekesini faalelotu ua lē toe lomia. Ua iloa ma lagona e lotu ua faaitiitia pea le aofai o tagata e auai atu i sauniga. E tele fale sā ua ofoina atu ia faatauina.
25. (a) Pe faapefea ona faaalia mai e le Tusi Paia le eseesega o lena tulaga ma le mea e oo i le tapuaiga moni i lenei taimi? (e) I lalo o le taʻitaʻiga a ai, o loo faia ai lenei galuega o le faapotopotoina o ē tapuai i le Atua moni, ma po o le ā le mea ua fai ma faavae e tuueseeseina ai? (i) O le mea lea, po o le ā le finauga ua faafesagai nei ma tagata o atunuu uma lava?
25 Ua eseese lava lena tulaga ma le mea ua faaalia mai e le Tusi Paia o se “motu o tagata e toatele” mai atunuu uma ua latou lolofi atu i le tapuaiga moni i le taimi o le iʻuga. (Faaaliga 7:9, 10, 14) O lenei galuega o le faapotopotoina faatasi o tagata e tapuai i le Atua moni, ua faia i lalo o le taʻitaʻiga a Iesu Keriso. Sa ia muai valoia mai faapea, pe ā afio mai o ia i “lona mamalu” o le a faasaga atu ona fofoga i tagata o atunuu uma lava, ona tuueseese ai lea o le tasi ma le tasi ma le fuafuaga ia faasaoina i latou i le “puapuaga tele” po o le faaumatiaga e faavavau. (Mataio 25:31-33) Po o a mea ua fai ma faavae e tuueseeseina ai i latou? E pei ona fetalai mai Iesu, i luga o le faavae i le faapefea ona latou faia i ona “uso” faaleagaga i luga o le lalolagi. Ai se ā? Auā o sui i latou o le malo o le Atua o loo i aao o Iesu Keriso. Ona o le usiusitai i a te ia, ua latou talaʻia le feau “o lenei tala lelei o le malo.” Ua latou faia lenei ina ia “fai ma molimau i nuu uma.” (Mataio 24:14) O lenei tala lelei o le Malo ua faafesagai ai nei tagata o atunuu uma ma le mataupu faafitauli e uiga i le pulega sili aoao. Pe latou te sapasapaia ea, le pulega a le Atua? Pe latou te mananao i le pule tutoatasi a tagata, e tusa ma le uunaiga a Satani i Etena? Ua tuuina mai e Ieova le Atua, e ala mai i lona Alo, le avanoa i tagata ia latou faia lenei filifiliga.
26, 27. (a) Po o le ā le mamao ma le lautele ua faia ai lenei galuega molimau? (e) Pe ai se ā o se mea e sili ona tāua ai le tali a se tagata i le feau a le Malo?
26 Ua uma ona faia se galuega o le molimau atu i le lalolagi aoao. I atunuu e sili atu i le 200 o loo asiasi molimau Kerisiano a Ieova i tagata i o latou lava aiga ma ofoina atu ia suesue le Tusi Paia ma soo se aiga po o se tagata, e aunoa ma se totogi. O tusi ua latou faaaoga e faalauiloa atu ai le malo o le Atua ua aofia i tusi ua sili atu ona faasalalauina i le lalolagi atoa, ma ua lomia i gagana e sili atu i le 160.
27 Ua faia pea lenei galuega o le tuueseeseina mo tausaga e tele. Ua toeitiiti lava faaiʻuina lenei galuega. E tusa ma le Afioga a le Atua, o i latou o ē teena ma le loto i ai le pule a lona Malo, atoa foi ma i latou o e ua tuulafoaiina ma le faatalale le avanoa e aʻoaʻo ai lona finagalo, o le a faafanoina i le faaumatiaga e faavavau. (Mataio 25:34, 41, 46; 2 Tesalonia 1:6-9) A o ē ua latou faailoa mai ma le fiafia ma le lotomalie ua latou sapasapaia ma le faamaoni le malo o le Atua, o se taimi faailogaina lenei mo le mapusaga e sili ona lelei. Pe vave ea, ona oo mai lenei faamasinoga e tusa ma le Tusi Paia?
“E LE MAVAE ATU LAVA LENEI TUPULAGA”
28. Po o afea e oo mai ai le faaumatiaga o le lalolagi e tusa ma le fetalaiga a Iesu?
28 E pei ona fetalai mai Iesu, “A o lea aso ma lea itu aso e le iloa e se tasi, e le iloa lava e agelu i le lagi, po o le Atalii, ua na o loʻu Tamā lava.” (Mataio 24:36, NW) Ae peitai, sa tuuina mai e Iesu se mea e fai ma fesoasoani e iloa ai le taimi ina ua fetalai mai o ia faapea: “E le mavae atu lava lenei tupulaga, seia oo mai nei mea uma.” (Mataio 24:34) Po o ā nei mea uma? O vaega eseese uma lava o “le faailoga” sa fetalai mai ai o ia, atoa foi ma le “puapuaga tele” sa ia taʻuina mai. Ina ia tutupu nei mea i se tupulaga o lona uiga, o tagata sa latou vaaia mea sa tutupu i le tausaga e 1914 T.A., i le amataga o le “faaiʻuga o le faiga o mea,” o le a ola pea i latou seia oo i le iʻuga o lena vaitaimi, e oo mai ai le “puapuaga tele.” O i latou o ē manatua mea sa tutupu i le tausaga e 1914, ua tau fāiifo nei le malosi. O le toatele o i latou ua maliliu. E ui i lea, ona taʻutino mai lea e Iesu i a te i tatou a e lei maliliu uma tagata mai “lenei tupulaga,” o le a oo mai le faaumatiaga o lenei faiga leaga o mea.
29. O le faatagaina o mea talu mai le tausaga e 1914 ia tutupu pea seia oo i le tulaga ua i ai nei, pe faapefea ona faafaigofieina e le Atua mo tagata ina ia latou faia le filifiliga tonu?
29 Faauta i le onosai o le Atua ina ua faatagaina lenei vaitaimi! I lenei lava tupulaga, faatoā tupu se mea faapenei i le tala faasolopito, o faalavelave ua sili ona faateleina e leai sona tusa—o taua, o le faaleagaina o le lalolagi, le ea, le vai ma le fanua, le faateleina o le aofai o tagata ma isi faalavelave. Soo se tasi o nei faalavelave e mafai ona oo mai ai se faafanoga atoa. O le faatagaina ia faateleina ma faulaʻi nei faamaoniga, ua faia e le Atua se auala e faigofie ai i tagata ona latou iloa e le mafai ona maua se vaifofo moni i pulega a tagata. Ae peitai, o le talaʻiga o le “tala lelei o le malo,” ua ia fesoasoani ai i ē loto faamaoni ina ia latou iloa o le malo o le Atua ua na o lea lava le faamoemoe mo le manuia ma le saogalemu moni, ma ina ia latou faailoa atu foi ua latou au faatasi ma ia i lana itu ʻau o le finauga sili.
30. Po o le ā le faailoga mulimuli, e iloa ai o le matuā latalata mai o le faaumatiaga o le lalolagi, ua faasino tonu mai e le Tusi Paia?
30 O loo totoe ai se tasi mea manino e ao ona tupu, e fai ma faailoga lē masesē e faailoa mai ai o le a oo mai ma le faataalise le faaumatiaga o le lalolagi e aunoa ma se faatuai. Ua faasino mai e le aposetolo o Paulo lenei faailoga i lana tusi: “O le aso o [Ieova] e pei o le gaoi i le po, e faapea ona oo mai ai; auā pe a latou fai ane, O loo filemu, ua le afaina, ona oo lea ia te i latou o le fano faafuasei, . . . latou te le sosola ai lava.”—1 Tesalonia 5:2, 3; Luka 21:34, 35.
31, 32. (a) Pe e moni ea, ma le faamaoni le ‘filemu’ ma le “saogalemu” o le a talaʻiina e taʻitaʻi o malo? (e) Pe ai se ā o se mea mataʻutia ai le faaseseina i lenei mea?
31 Ua iloa e taʻitaʻi o malo o le lalolagi, afai latou te vatau i se taua e faaaogā ai auupega niukelea, e leai se tasi e manumalo. O le iʻuga e maua, o le matuā faafanoina. E le gata i lea, ua latou iloa o faalavelave faigata ma le mamafa e uiga i le faaleagaina o mea i le lalolagi, ma le “faateleina o le aofai o tagata” atoa foi ma isi faalavelave i totonu o le atunuu, e tatau lava ona matuā faasaga atu i ai ma faaaogā le tupe. O le mea lea, ua latou galulue ma le tinoū ia faafifilemu le va fealoaʻi o atunuu ua taumalepelepe. O le mea moni, o a latou filifiliga faatasi e le mafai ona faia ai ni suiga moni i loto o tagata ina ia latou alolofa i le tasi i le tasi. Latou te lei mafaia ona taofia soligatulafono, pe soloiesea faamaʻi ma le oti. E ui i lea, ua faaali mai e le valoaga o le a oo mai le taimi, latou te faapea mai ai ‘ua filemu ma saogalemu.’ Pe a taunuu lena valoaga, ona oo mai ai lea o le “fano faafuasei” i luga o taʻitaʻi taufaasese o le fanau a tagata, atoa foi ma tagata uma lava ua tuu o latou faamoemoega i na taʻitaʻi.
32 Ae peitai, o le a i ai nisi e faaolaina. Pe o le a e i ai ea, faatasi ma i latou?
[Fesili mo le Suʻesuʻega]
[Pusa i le itulau 82]
“Po O Le A le Faailoga?”
“E SII LE TAUA E LE TASI NUU I LE TASI NUU”—
“Ua aumaia e le Taua 1 a le Lalolagi le senituri o Taua Atoatoa, o—i le uiga atoatoa muamua o le fuaitau—taua o le kelope. . . . E lei faapea muamua lava a o lumanai le 1914-1918 ona i ai se taua na...faapea ona ufitia ai se vaega tele o le lalolagi. . . . E le taitai foi ona faapea le fasioti ona anoanoaʻi ma le fenuminumiaʻi.”—“World War I,” e H. Baldwin.
Na fasiotia e le Taua 1 a le Lalolagi le sili atu i le 9 miliona o tagata tau, ma le faitau miliona o isi tagata savili.
Na fasiotia e le Taua Lona II a le Lalolagi le toa 55 miliona.
I totonu o vaitaimi e lua e tai sefulu tausaga talu ona mavae le Taua Lona II a le Lalolagi, e sili atu i le 300 ni gaoioiga pei o taua, fouvalega ma vavao i nuu ua tutupu i le lalolagi aoao.
“ONA OO MAI AI LEA O OGA”—
O le lē lava o mea taumafa ua pagatia ai le tele o atunuu ina ua mavae le Taua I a le Lalolagi, ma faapena foi ina ua uma le Taua Lona II a le Lalolagi.
E ui lava i tausaga e tele o le agaʻi i luma faasaienisi e le mafaatusatusaina, i totonu o le tausaga 1967, sa lipotia mai ai, e toa 10,000 sa maliliu i aso taitasi lava, 3,500,000 e puapuagatia i le lē mauaina o mea tausami e tusa ai ma le soifuaga lelei o loo manaomia i tausaga uma lava.
“I le vaitaimi i le va o le 1970 ma le 1980, a le a oo atu ai le lalolagi i ni oge—e selau ma selau o miliona o tagata o le a matelaina i le fia ai seia oo i le oti, e ui lava i ni fuafuaga o ni polokalama ua i ai nei ua faagaoioia.”—“The Population Bomb,” e Dr. Paul Ehrlich.
“FAAMAI”—
E matua leai lava ni tala tusitusia o faamaʻi e tutusa ma le fulū Sepania o le tausaga 1918-1919. Na lavea ai e sili atu i le 500 miliona o tagata; ma e sili atu i le 20 miliona e na maliliu.
O aso nei, ua le mafai e suesuega faafomaʻi ona taofia le faamaʻi fatu mai i lona oo atu i se tulaga sasao faamala; ua taatele foi le kanesa. O le aofaiga foi o tulaga o le faamaʻi o le maʻi afi ua pasae aʻe e tau i le lagi.
“MAFUIE” I LE TELE O NOFOAGA—
I le 1915 i Avezzano, i Italia, e toa 29,970 e sa maliliu i se mafuie; e toa 180,000 e sa maliliu i Saina i le 1920; e toa 143,000 e na maliliu i Iapani i le 1923; i Initia e toa 60,000 e na maliliu i le 1935. I le 1960 na vaaia ai mafuie tetele i totonu o Iran, Chile, Morooco, Yugoslavia, Libya, El Salvador, Rusia, Colombia, Farani, Indonesia ma Take, ma i le tele o isi atunuu. I le 1970, na maliliu ai le 70,000 o tagata i se mafuie i Peru, ma e sili atu i le 12,000 e na maliliu i totonu o Nicaragua i le 1972.
“UA TUPU TELE O LE AMIO LEAGA”—
Ua e silafia i mea moni. Ua aafia ai lou lava ola. I totonu o lou lava alaalafaga, o ā mea ua tutupu i aʻoga? Pe ua i ai ea se faaaogaina o vailaau oona e le tusa ai ma le tulafono i lou lava atunuu? A e faapefea i le lē faamaoni i faiga pisinisi? O le ā le tele o le saogalemu e te faalogoina i le fetaulaiga o ala i le po?
Ua matua toatele foi le salalau o “soligatulafono” faapea, i le 1972, na taloina ai e le Failautusi-Pule o le Malo Aufaatasi se gaoioiga faalelalolagi atoa.
O le soligatulafono ua le gata ai i tulafono a tagata, ae ua sili atu foi le lē amanaiaina o tulafono a le Atua.
UA TALAʻIA LE MALO O LE ATUA I LE LALOLAGI ATOA—
Ua faia pea lava lenei galuega i lona tulaga masani ai i le sili atu o le 200 atunuu.
I le vaitaimi o le tolusefulu o tausaga ua mavae atu, o se aofaiga o itula e 3,676,343,869 na faaaluina e molimau Kerisiano a Ieova i le talaʻiga lautele o lenei feau. I lena lava vaitaimi na latou lomia ai ni lomiga tusitusia e sili atu i le 5 piliona i ni gagana eseese e sili atu i le 160, ua faasino agaʻi i le malo o le Atua e na o le pau lava lena o le faamoemoe o tagata.
Ua avea nei mea ma “le faailoga” o le ā? E faapea o loo tatou ola nei i le “faaiʻuga o lenei faiga o mea.” Ua nofoia nei e Keriso lona nofoalii faalelagi, ma o loo ia tuueseeseina nei tagata mai atunuu uma lava o e o loo faia moni lava le finagalo o le Atua. Ma ua faamaonia ai foi le lata tele mai o le “puapuaga tele”!
(Mo ni isi faamatalaga auiliili, ia faitau le mataupu e 24 ma le 25 o le Mataio, Mareko mataupu e 13 ma le Luka mataupu e 21.)
