Po o Ai o le a Faasaoina?
Mataupu 8
Po o Ai o le a Faasaoina?
1. Po le ā le faavae o le faasaoina o se tasi ia ola i le faiga fou filemu a le Atua?
O LE faasaoina mai le faaumatiaga o faiga o mea i le lalolagi aoao o loo sau nei e le o se mea mao, e pei ona masani o tupu i taua faaletagata. O lenei mea e le filifilia e tusa ma le itu o le lalolagi e mau ai se tagata. E le faapea foi o le a faaolaina o se tasi ona o le vave ona sola i totonu o se ana ua fai ma malu mai pomu po o ni isi lava lafitaga pe a faaleo mai le sailini. O le faasaoina o le a faalagolago i le alofa mutimutivale o le Atua ma le filifiliga maoti ua faia e le tagata a e lei amata le “puapuaga tele” sa folafolaina mai. Pe e mafai faapefea ona e faia le filifiliga e tuuina ai oe faatasi ma ē o le a faasaoina ia ola i se faiga fou filemu ma le manuia?
LE FAAAʻOAʻOGA FAAVALOAGA MAI ANAMUA
2. Po o ai ua ana faatulagaina mea e tatau ona faia ina ia faasaoina, ma po o fea tatou te maua ai na mea?
2 E le faapea ua na o le faasaoina o tagata i le faaumatiaga o faiga o mea i le lalolagi aoao o loo sau ua valoia mai e le Tusi Paia. Ua taʻu mai foi e le Tusi Paia se faaaʻoaʻoga e mafai ai ona tatou iloa le ituaiga o tagata o le a faasaoina. Talu ai o le Atua na te faia lenei faaolataga, o le mea lea, e tatau ai ma tonu i a te ia ona faatulagaina mea e ao ona faia.
3. Ina ia maua le filemu ma le saogalemu, pe ai se ā e tatau ai ona faaumatia tagata amioleaga?
3 O le a filifilia ma le tonu ma le atamai e le Atua ē o le a faasaoina i le “puapuaga tele” o loo sau, o i latou o ni tagata lē faatamaʻia a o le a faia e i latou mea lelei i lana faiga fou. Na o ē naunau i le amiotonu o le a Ia faasaoina. Afai o le a ia faasaoina tagata amioletonu, o le a lē maua se manuia ma le saogalemu. O le a pagatia pea aiga ma fale o tagata amiotonu. Ae peitai, ua folafolaina mai e lana Afioga faagaeeina faapea: “Auā e faaumatia o e fai amio leaga; a o e faatalitali ia Ieova, o i latou lava ia e fai mo latou le nuu. E toe itiiti, ona leai lea o le tagata amio leaga; . . . A o e agamalu, e fai mo latou le nuu.” Vagana ua faataunuuina atoatoa e le Atua lana fuafuaga ua tusia i le Salamo 37:9-11 [36:9-11, Dy] ona faatoā mafai ai lea e tagata faasaoina ona “faafiafia foi i latou ia te i latou ona o le manuia e tele,” e pei ona folafolaina mai e le Tusi Paia. O le a faataunuuina e le Atua lenei mea, e pei lava ona faaalia mai e tala tusia o mea sa tutupu anamua, i taimi na faaoo mai e le Atua le faafanoga ona o le amioleaga a tagata.
FAAAʻOAʻOGA ANAMUA O LE FAASAOINA
4-6. (a) Po o ā mea ua fai ma faamaoniga o le faaumatiaga o Ierusalema i le tausaga e 70 T.A. o se mea moni i le tala faasolopito? (e) Pe ai se ā na oo mai ai lena faaumatiaga? (i) Pe ai se ā sa mafai ai e soo o Iesu ona sosola ese?
4 I le aai o Roma o loo tu ai i ona po nei se maa faamanatu faataaliolio mai le uluai senituri o Tausaga Lautele, ua taʻua o le Maa Faamanatu Faataaliolio o Tito (Arch of Titus). O puipui i le itu i totonu o lenei maa faamanatu ua togitogia ai se ata o le aveeseina o mea mai le malumalu i Ierusalema ina ua uma ona faaumatia lena aai i le tausaga e 70 T.A. O lena faaumatiaga o se mea faamaonia i le tala faasolopito. O se mea mautinoa foi i le tala faasolopito, faapea i tausaga e tele a e lei oo mai lena faaumatiaga sa valoia mai e Iesu Keriso lena mea, ma sa ia faaalia mai foi pe faapefea ona faasaoina tagata.
5 Sa liliu ese tagata Iutaia mai le Atua; sa latou mulimuli atu i tagata ma uputuu faalelotu a tagata, a e le o i le Atua ma lana Afioga. (Mataio 15:3-9) Sa latou faatuatua i taʻitaʻi o malo faaletagata, ae le o i le malo folafolaina o le Atua. (Ioane 19:15) E le gata i lea, sa latou teena ma faasaga tau i le upu moni sa folafolaina e le Alo o le Atua ma lana au aposetolo. Sa lapatai atu Iesu i le fua e maua ma le mautinoa i le mulimuli atu i se ala faapena.—Mataio 23:37, 38; 24:1, 2.
6 O mea sa tutupu sa tutusa lelei lava ma le valoaga a le Tusi Paia. I le tausaga e 66 T.A., sa fouvale ai tagata Iutaia i le Malo o Roma. Sa amata ona osofaia e le ʻautau Roma le aai o Ierusalema, ae mulimuli ane sa faafuasei ona latou tuumuli ese. O le faailoga lenei ma le avanoa mo tagata e talitonu i le Afioga a le Atua ia latou faia e pei ona fetalai mai ai lona Alo: Sosola ese—o ese mai le aai ua faafanoina, atoa ma le itumalo uma o Iuta, e tusa lava po o a mea o le a tuua e se tasi. O soo moni o Iesu Keriso sa latou faia lena lava mea. Mulimuli ane, i le tausaga e 70 T.A., sa toe foi mai le ʻautau Roma ma vagaia ma faaumatia Ierusalema. O se tasi sa vaai tino i nei mea, o se tagata Iutaia, o se tagata tusitala faasolopito, o Josephus, fai mai o ia e tusa o le 1,100,000 tagata sa maliliu i totonu o le aai o Ierusalema i le oge, ma faamaʻi, ma le fetauai o tagata lava o le aai, po o le pelu a Roma. Ae peitai, o na Kerisiano sa faia gaoioiga maotioti, ma faaalia lo latou faatuatua i le usiusitai, sa faasaoina i latou mai lena faaumatiaga.—Luka 19:28, 41-44; 21:20-24; Mataio 24:15-18.
7. Po o le ā le mea sa tatau ona faia e tagata ina ia faasaoina mai le faatafunaga o le nuu o Isaraelu e Papelonia?
7 Sa faapena foi se mea sa tupu e toetoe lava atoa le fitu senituri i tua atu o lena faalavelave. Sa faatagaina e Ieova le Atua i lena taimi le ʻautau Papelonia i lalo o le taʻitaʻiga a le Tupu o Nepukanesa (II) ia faatafunaina le nuu o Isaraelu. O lena faaumatiaga ua avea ma tala faasolopito. E tele tausaga a e lei oo mai, o le Atua e ala mai i ana perofeta, sa ia lapatai atu i tagata ua tuulafoaia le tapuaiga moni, faapea, o latou ala e taʻitaʻiina ai i latou i le malaia. Sa faapea atu le valaau a le Atua, “liliu ia outou, ina outou liliu ese ia i o outou ala leaga; auā pe se a ea le mea tou te fia oti ai?” (Esekielu 33:11) O le toatele, sa latou le faatuatua i lenei lapataiga sa logologo atu. E oo foi i le taimi na vagaia ai le aai o Ierusalema e ʻautau Papelonia, o na tagata Isaraelu sa latou faamoemoe pea o le a lē oo mai se faaumatiaga. E ui i lea, sa taunuu e pei ona muai taʻua. Peitai, sa faataunuuina foi e le Atua lana folafolaga e uiga i le faasaoina o i latou o ē sa faaalia lo latou faatuatua i le usiusitai i a te ia.—Ieremia 39:15-18; Sefanaia 2:2, 3 [Sopohonias 2:2, 3, Dy].
8-10. (a) Pe ai se ā na faaoo mai ai e Ieova le faaumatiaga i le lalolagi aoao i ona po o Noa? (e) Pe ai se ā sa faasaoina ai Noa ma lona aiga?
8 I ona po anamuā i tua i lea i le tala faasolopito faaletagata, tatou te maua ai le uluai faamatalaga e uiga i se faaaʻoaʻoga tau atua mo le faasaoina. O lenei mea, e aafia ai, e le o se faaumatiaga o se atunuu, a o se faaumatiaga o faiga o mea i le lalolagi aoao, ua avea foi lena ma mea mautinoa i le tala faasolopito. Sa tupu lenei mea ina ua oo mai le lolo i le lalolagi atoa i le tausaga e 2370/2369 T.L.M., i ona po o Noa. Fai mai le tala faasolopito e uiga i mea sa faia a e lei oo mai le faaumatiaga o faiga o mea i le lalolagi aoao: “Ua silafia e Ieova ua leaga tele lava tagata i le lalolagi, o manatu uma ua mafaufau ifo ai i o latou loto ua na ona leaga ia i aso uma lava. Ua leaga lava le lalolagi i luma o le Atua, ma ua tumu le lalolagi i le saua.”—Kenese 6:5, 11.
9 Ona o le amioleaga ma sauaga, sa tatau ai i le Atua ona faia se fuafuaga i ai. Sa na o Noa ma lona aiga i luga o le lalolagi sa faaalia le faatuatua ma usiusitai. Ona o lona alofa mutimutivale i a te i latou ma le faatumauina o faamasinoga tonu ma le amiotonu i luga o le lalolagi, sa “lei faasaoina foi le lalolagi tuai . . . le lalolagi [po o tagata] faalematau” e Ieova le Atua. O le mea sa tupu “sa faaumatia ai le lalolagi tuai ina ua lofia i le vai.”—2 Peteru 2:5; 3:5-7.
10 E ui i lea, sa faasaoina Noa ma lona aiga. Ai se a? Muamua lava, o Noa ma lona aiga sa lei au faatasi ma le “lalolagi o tagata faalematau” i a latou amioga leaga. Sa lei faamamafaina o latou loto i mea a lenei olaga pei ona masani ai, o le aai, ma inu ma faaipoipoga, ina ia latou lē faalogo i le finagalo o le Atua pe faataliga tutuli i lana lapataiga. O Noa sa ‘feoai ma le Atua’ i le amiotonu. E le faapea o ia ma lona aiga sa na o le alo ese mai amioga leaga. Sa latou faia ni galuega; sa latou faia ni mea, o galuega tonu. Sa latou talitonu ma le faamaoni i mea na fetalai mai ai le Atua, ma sa latou faaalia le usiusitai i le fauina o se vaa, e pei o se pusa e tolu ona fogāvaa, e sili atu i le fa selau futu lona umi e pei ona faatonuina mai i le poloaiga tau atua. O Noa foi o sē na “talaʻi le amiotonu” o lona uiga sa ia logologo atu le fuafuaga a le Atua, ma tausisi ma sapasapaia le ala o le amiotonu.—Kenese 6:9, 13-16; Mataio 24:37-39; Eperu 11:7.
11. E pei ona faaalia mai e nei faaaʻoaʻoga ua fai ma lapataiga, po o le a le mea e tatau ona tatou faia ina ia faasaoina i tatou i le faaumatiaga o faiga o mea i le lalolagi aoao?
11 Sa faasaoina nei tagata e toavalu ona o le faatuatua ma galuega o le faatuatua sa faia. Talu ai, o le Alo lava o le Atua ma lana au aposetolo sa latou faaaogā lena faaumatiaga o faiga o mea i le lalolagi aoao e fai ma faaaʻoaʻoga faavaloaga o le mea ua feagai nei ma tagata i lenei “taimi o le iuga,” ua manino lelei e tatau foi ona tatou alo ese mai le ala sese o lenei lalolagi o le fanau a tagata, ua tumu i le amio faalematau pei lava o ona po o Noa. E tatau foi ona tatou galulue e tusa ma le finagalo o le Atua. E le mafai lava ona taʻitaʻiina i tatou e tusa ma o tatou lava manatu, ma maua foi le faamoemoe o le a faasaoina. Fai mai le Afioga a le Atua: “O i ai le ala ua tonu i le manatu o le tagata; a o lona taunuuga, o ala ia e oti ai.” (Faataoto 16:25) E le faapea foi, o foliga faatagā amiotonu e maua ai le faaolataga. Auā e silafia e Ieova le Atua le mea i totonu o le loto.—Faataoto 24:12; Luka 16:15.
O MEA I LE LOTO O TAGATA E SILASILA I AI IEOVA
12, 13. (a) Po o le a le mafuaaga ua mananao ai tagata e toatele ia faia se suiga i se tulaga e sili ona lelei? (e) Pe ai se a e lē lava ai lenei mea e avea ma faamaoniga, o le a faasaoina ma ola i latou i le faiga fou a le Atua? (i) Ina ia avea ma e o le a faasaoina, po o le a le mea e tatau ona avea ma faavae o lo tatou loto faanoanoa i tulaga leaga o mea i aso nei?
12 E toatele tagata ua le fiafia i tulaga o faiga o mea i aso nei. Ua latou faaalia lenei mea i faameo ma le loto tiga, ma faiga tetee, ma faatuiesega, ma i isi atunuu ua latou faia fouvalega malosi ma le saua. E toatele ua latou tetee ma le loto tiga lafoga maualuga ma le alu i luga o tau o mea. O loo tagi aue le tele o alaalafaga ona o le mataʻutia o le solitulafono. Ona o le mataʻu ma le fefe, ua latou mananao i se suiga. Ae peitai, po ua lava ea lea mea, e avea ma faamaoniga ma le mautinoa o le a faasaoina i latou ia ola i le faiga fou a le Atua. E leai lava. Pe ai se a?
13 Talu ai, e mafai ona lē fiafia se tasi i tulaga o nei mea, a ua i a te ia lava se loto manatu faapito mo ia lava. Atonu ua loto gatasi o ia ma isi faiga lē tonu ma isi amioga leaga—pe afai lava e lē afaina ai o ia. Ae peitai, afai e maua e se tasi le poto o le Tusi Paia, o le a mafai ona ia iloa o nei tulaga leaga o mea, o ni faailoga vaaia o le maʻi moni ua maua ai lenei lalolagi. O le a na iloa le uiga lilo i tua o nei faailoga, e faailoa mai ai le lē taualoaina o aʻoaʻoga faavae ma le tonu, atoa foi ma le Atua, ua leai foi o se loto naunau ia iloa ma faia le finagalo o Ieova le Atua ma le fia anaana ma mulimuli i ana tulafono amiotonu. Na i lo mafuaaga muamua ua loto tiga ma le loto faanoanoa, ona ua latou lē maua nisi mea faaletino, po o nisi āiā tau le va fealoaʻi, pe talu ai ona o mea faigata e tutupu ona o le solitulafono, ma le faaleagaina o mea i le lalolagi, ma le mataʻu i taua, o tagata loto faamaoni ua latou loto faanoanoa ae maise lava, ona o le vaai atu i le taufaaleaga o le suafa o le Atua e le fanau a tagata, i o latou ala leaga. Ua loto faanoanoa foi i latou e lē faapea mo na o i latou lava, ae talu ai ona o isi ua matuā mafatia ona o na mea ua faia.
14. Po o ai sa ‘faailogaina’ ia faasaoina i le taimi na faaumatia ai Ierusalema e Papelonia.
14 Ina ia avea ma ē o le a faasaoina i le faaumatiaga o faiga o mea i le lalolagi aoao, e tatau lava ona avea i tatou pei o tagata sa faasaoina e le Atua i le taimi sa faatagaina ai e Ia autau Papelonia ia faaumatia le aai o Ierusalema. O nei tagata sa faailogaina ia faasaoina, ua faamatalaina faapea: “O e mapuitiga, ma feoi ona o mea inosia uma” ua faia i totonu o le aai. (Esekielu 9:4) Sa matuā leaga tele tulaga o mea i lena taimi; sa faasauaina tagata matitiva, o nisi sa faatau atu e lē tusa ma le tulafono e o latou lava tagata e fai ma pologa. (Ieremia 34:13-16) Sa sili atu ona amio leaga Ierusalema ma le malo o Iuta i lo le malo i le itu i matu o Isaraelu ma lona laumua o Samaria, o lea sa uluai tusi faatatau i ai e le perofeta o Hosea: “O loo o tauto, ma tala pepelo, ma fasioti tagata, ma gaoi, . . . ua fepaiaʻi toto.” (Hosea 4:2; Esekielu 16:2, 51) Na o ē sa loto faanoanoa ona o amioga leaga ma le faaletaualoa o le Atua sa ‘faailogaina’ mo le faasaoina.—Esekielu 9:2, 4-6.
15. Po o le a le ala ua lē faia ai e nisi tagata suiga e tatau ona faia ina ia faasaoina mai le faaumatiaga o faiga o mea i le lalolagi aoao?
15 E i ai toatele tagata i aso nei, latou te mananao ia ola i se olaga filemu, ma le lelei, ma le manuia, e aunoa ma se mea e fefe ai. Ae peitai, latou te le mananao ia suia o latou olaga i le aʻoaʻoina o mea o loo fai mai ai le Afioga a le Atua ma ia mulimuli i lana faaaʻoaʻoga o le olaga amiotonu. O le mea moni, latou te le naunau i le amiotonu pe manatu alofa ma le faamaoni i tagata. Talu ai, o le faiga fou a le Atua e fua mai ai se sosaiete fou i le lalolagi, “e mau ai le amiotonu,” na o ē naunau i le amiotonu o le a avea lena tala lelei ma mea fiafia; a o isi, ona o lea tala lelei, ua latou iloa ai ma lagona ua nofo sala i latou.—2 Peteru 3:13; 2 Korinito 2:14-17.
MEA E MAFAI ONA E FAIA NEI
16-18. (a) Pe faapefea ona ‘faailogaina’ se tasi mo le faasaoina i le faaumatiaga o faiga o mea i le lalolagi aoao o loo sau? (e) O le mea lea, po o le a le mea e tatau ona faia, muamua e uiga i le tapuaiga pepelo, ma mulimuli ane e uiga i le tapuaiga moni?
16 O le a faasaoina e Ieova le Atua tagata ua naunau ma le faamaoni ia ola i lalo o lana pulega amiotonu. Na te le faamalosia se tasi ia ola i lana faiga fou folafolaina i se olaga latou te le mananao i ai. Ae peitai, o lo latou le naunau, o le a lē taofia ai le Atua mai le faamanuiaga o ē naunau i le amiotonu. O le mea lea, na o ē ua faaalia ua latou talia nei ma le faamaoni lana pulega tau atua, o le a faasaoina e Ia mai le faaumatiaga o faiga o mea i le lalolagi aoao. Ua ‘faailogaina’ i latou mo le faasaoina, ina ua latou faaofuina i latou i le “tagata fou,” ma mulimuli i ala o le Atua ma faaalia mai ma le faamaoni o i latou o soo o le Alo o le Atua, ua tuuina atu o latou ola ma ua papatisoina. Ua latou maelega i le faia o le finagalo o le Atua. Ona ua faia na mea, ua latou “filifili i le ola” ma le manuia, ae lē o le oti. (Kolose 3:5-10; Teuteronome 30:15, 16, 19) O lenei, pe e te filifilia ea i lea auala ia maua le ola?
17 O le faamaoni ma le usiusitai i le Atua e ao lava ona faia, ma ua aofia nei mea i le faiga o le tapuaiga. Sa fetalai mei Iesu Keriso faapea: “A e oo mai ona aso, ua oo nei foi i ai, o e tapuai faamaoni latou te tapuai i le Tamā i le agaga ma le faamaoni; auā o loo saili le Tamā i e tapuai faapena ia te ia.” (Ioane 4:23) O le mea lea ina ia faasaoina mai le faaumatiaga o faiga o mea i le lalolagi aoao o loo sau, e tatau ona tatou tuulafoai ma o ese ma tapuaiga pepelo uma lava, ae liliu atu ma le maelega, ma le filigā e auai i le tapuaiga moni.
18 O loo faatali mai le manuia lē motusia mo i latou, o e ua mulimuli i lenei ala mo le faaolataga. Sei tatou manatunatu ma iloiloina nei i ni isi mea e sili ona lelei ua folafola mai e le Atua mo ē ua faatuatua i lana Afioga ma faamaonia lena faatuatua i galuega mautinoa.
[Fesili mo le Suʻesuʻega]
