Mataupu 8

Aisea ua Faatagaina ai e le Atua Puapuaga?

1, 2. E faapeī uiga o tagata e masani ona latou faaalia atu i puapuaga faaletagata?

PE A afatia i mala, ma faaleagaina ai meatotino ma aafia ai ni soifua, e toatele e lē malamalama i le pogai ua tutupu ai na mea matautia. Ua afaina loloto nisi ona o le anoanoai o faiga lē  alofa ma le lē taupulea o soligatulafono ma faiga sauā. E oo foi ia te oe atonu e te tau mānatu, ʻAisea ua faataga ai e le Atua puapuaga?’

² Ona o lo latou lē maua o se tali faamalieloto i lenei fesili, e toatele ua mou atu lo latou faatuatua i le Atua. Ua ia i latou le lagona, e lē o naunau mai o ia i tagata. O isi o ē ua latou manatu faapea o puapuaga o se isi vala o le olaga, ua oo ina matuā feita ma latou tuuaʻia le Atua mo mea leaga uma o loo iai i le faiga o mea a tagata. Pe afai sa ia te oe na faalogona, e mautinoa la o le a e fia iloaina faamatalaga a le Tusi Paia i nei mataupu.

E LĒ FAAPOGAIA E LE ATUA PUAPUAGA

3, 4. Aisea e mafai ai ona tatou mautinoa e lē o Ieova na te faapogaia mea leaga ma puapuaga?

³ Ua faamautinoa mai e le Tusi Paia ia i tatou e faapea, o puapuaga o loo tatou vaaia e lē faapogaia e Ieova le Atua. E pei o se faataʻitaʻiga, na tusi mai le soo Kerisiano o Iakopo e faapea: “A faaosoosoina se tasi, aua le faapea, ʻUa faaosoosoina aʻu mai le Atua,’ auā e le mafai ona faaosoosoina o le Atua i mea leaga, e le faaosooso atu foi o ia i se tasi.” (Iakopo 1:13) Ona o lena mafuaaga, e lē mafai ai ona faapogaia e le Atua le anoanoai o tulaga faigata o loo malaia ai tagata. Na te lē aumaia tofotofoga i tagata ina ia sauniunia lelei ai i latou mo le ola i le lagi. Na te lē faapuapuagatia foi tagata ona o mea leaga atonu sa latou faia i se isi olaga muamua.—Roma 6:7.

⁴ E lē gata i lea, e ui i le tele o mea leaga ua faia i le suafa o le Atua po o le suafa o Keriso, ae aunoa ma se faamatalaga i le Tusi Paia o taʻua ai sa la taliaina na gaoioiga. E leai se sootaga a le Atua ma Keriso ia i latou ua faapea mai o loo auauna ia i laua, ae faitogafiti leaga ma taufaavalea, e fasioti tagata ma faomea, ma faia le tele o isi mea e faapogaia ai puapuaga o tagata. O le mea moni, “e inosia e Ieova le ala o e amio leaga.” “E mamao [le Atua] i e amio leaga.”—Faataoto 15:9, 29.

5. O ā nisi o uiga o Ieova, ma o ā ona faalogona e faatatau i ana foafoaga ola?

 ⁵ Ua faamatala mai e le Tusi Paia, o Ieova o sē e “mutimuti vale tele . . . ma le alofa naunau.” (Iakopo 5:11) Ua faalauiloa mai ai, “e fiafia Ieova i le faamasinoga [tonu].” (Salamo 37:28; Isaia 61:8) E leai sona agaga fia taui ma sui. Na te tausia ma le alofa mutimuti vale ana foafoaga ola, ma foaiina atu ia i latou uma mea e silisili ona lelei mo lo latou tausiga. (Galuega 14:16, 17) O le mea lena na faia e Ieova talu mai le amataga mai o le ola i le lalolagi.

SE AMATAGA LELEI ATOATOA

6. Ua faapefea ona faamatalaina e nisi tala o le vavau, le uluai talafaasolopito o tagata?

⁶ Ua tatou masani uma e vaai atu ma lagonaina le tiga ma puapuaga. Atonu la e faigata ai ona vaai faalemafaufau i se taimi o le a aunoa ai ma ni puapuaga, peitai, o le tulaga lena o mea sa iai i le amataga lava o talafaasolopito o tagata. E oo lava foi i tala o le vavau a nisi atunuu, o loo taʻua ai lena amataga fiafia. I talafatu faa-Eleni, o le uluai augatupulaga mai “Augatupulaga e Lima o Tagata,” sa taʻua o le “Augatupulaga Faaauro.” O lena vaitaimi sa ola fiafia ai tagata, e saʻoloto mai galuega fita, o tiga, ma tulaga faigata o le olaga matua. Ua faapea mai talafatu faa-Saina, i le vaitaimi o le nofoaiga a le Emeperoa Samasama (Huang-Ti) e tusa ai ma talafaafagogo, sa ola filemu tagata, sa olioli i le ola sologalelei e oo lava i le tau, faapea foi ma le fealofani ma manu feai. E iai uma lava tala o le vavau a tagata Peresia, tagata Aikupito, tagata Tibet, tagata Peru, ma tagata Mekisikō, e uiga i se taimi o fiafiaga ma le lelei atoatoa i le amataga o talafaasolopito o tagata.

7. Aisea na foafoaina ai e le Atua le lalolagi ma tagata?

⁷ O talafatu a atunuu ua na ona toe faalogo atu ai i le faamaumauga tusitusia ua autausagā e faatatau i talafaasolopito o tagata, o le Tusi Paia lea. Ua taʻu mai ai ia i tatou e faapea, na tuuina e le Atua le uluai ulugalii faaletagata, o Atamu ma Eva, i se parataiso na faaigoaina o le faatoaga o Etena ma na poloaiina i laua: “Ia fanafanau ia, ma ia uluola,  ma ia tumu ai le lalolagi, ia faatoilalo i ai.” (Kenese 1:28) Sa olioli o tatou uluai mātua i le lelei atoatoa ma na ia i laua le faamoemoe o le vaai atu i le lalolagi atoa ua avea ma parataiso ua ʻaināina i se aiga faaletagata lelei atoatoa, o loo ola i le filemu ma le fiafia e faavavau. O le fuafuaga lena a le Atua ina ua foafoaina le lalolagi ma tagata.—Isaia 45:18.

SE LUʻI FAUFAU LEAGA

8. O le ā le poloaiga sa faatalitalia le usitaia e Atamu ma Eva, peitai o le ā na tupu?

⁸ Ina ia maua pea e Atamu ma Eva le finagalo malie o le Atua, sa tatau ai ona la alofia le ʻaina o “le laau e iloa ai le lelei ma le leaga.” (Kenese 2:16, 17) Pe ana la usiusitai i le tulafono a Ieova, semanū e lē iai ni puapuaga e fai ma ila i le olaga o tagata. I le usitaia o le poloaiga a le Atua, o le a la faaalia ai lo la alofa mo Ieova ma lo la faamaoni ia te ia. (1 Ioane 5:3) Peitai, e pei ona tatou iloa mai i le Mataupu e 6, e lē o le tulaga lena na iu i ai. Ina ua uunaia Eva e Satani, ona ʻai ai lea e ia le fua mai le laau. Mulimuli ane, na ʻai foi e Atamu le fua faasaina.

9. O le ā le finauga e aafia ai Ieova, lea na lāgā e Satani?

⁹ Po ua e iloa ea la le matuia o le mea na tupu? Na osofaia e Satani le tulaga o Ieova i le avea ma Lē Silisili ona Maualuga. I lona fai atu, “Lua te le oti lava,” na faafeteenai ai e le Tiapolo le fetalaiga a le Atua, “E te oti ai lava.” O isi upu a Satani na foliga atu ai o loo taumafai pea Ieova ina ia lē iloaina e Atamu ma Eva le avanoa e avea ai i laua ma Atua, i lea o le a lē manaomia ai e i laua o Ia ina ia filifili mo le mea e lelei ma le mea e leaga. O lea la, o le luʻi a Satani na fesiligia ai le saʻo ma le tonu o le tulaga o Ieova, i lona avea ma Pule Silisili Ese Aoao.—Kenese 2:17; 3:1-6.

10. O ā manatu taufaasese e faatatau i tagata, ia na fai atu e Satani?

¹⁰ Na faauiga atu foi e Satani le Tiapolo se manatu e faapea, e na o le pau le mafuaaga o le a tumau ai pea ona usiusitai tagata ia Ieova, ona o ni o latou lava manuia e maua mai ai. I se isi faaupuga, sa fesiligia ai le faamaoni o tagata. Na finau mai Satani, e leai se tagata o le a loto malie e tumau i le  faamaoni i le Atua. O lenei tuuaʻiga faufau leaga a Satani ua faaalia manino mai i le tala a le Tusi Paia e uiga ia Iopu, o se auauna faamaoni a Ieova, o lē na oo i se tofotofoga matuitui i se vaitaimi a o lei oo i le 1600 T.L.M. Pe afai e te faitauina uluai mataupu e lua o le tusi o Iopu, e mafai ona e maua ai se malamalamaga i le pogai o puapuaga o tagata ma le mafuaaga ua faatagaina ai e le Atua na mea.

11. O le ā le ituaiga o tagata sa iai Iopu, ae o le ā le tuuaʻiga na faia e Satani?

¹¹ Na oo atu osofaiga a Satani ia Iopu, “o le tagata ua sao lana amio ma le amiotonu.” Muamua lava, sa tuuaʻia pepelo e Satani e faapea e leaga uunaiga o le loto o Iopu, e ala i lona fesili atu, “Ua mataʻu fua ea Iopu i le Atua?” Ona taufaaleaga ma le faaʻoleʻole ai lea e le Tiapolo, e lē gata o le Atua, a o Iopu foi, e ala i lona tuuaʻia e faapea na faatau mai e Ieova le faamaoni o Iopu, e ala i le puipuia ma faamanuiaina o ia. Na luʻia e Satani Ieova e faapea: “A e peitai ia e aapa atu lou aao, ma e tago atu i ana mea uma, pe na te le faifai ai ea ia te oe i ou lava luma?”—Iopu 1:8-11.

12. (a) O ā fesili e faatoʻā mafai ona taliina pe a faataga e le Atua Satani na te tofotofoina Iopu? (e) O le ā na iu i ai le tofotofoga o Iopu?

¹² Pe na auauna ea Iopu ia Ieova ona o mea lelei uma na ia maua mai le Atua? Pe na mafai e le faamaoni o Iopu ona ia tumau ai i tofotofoga? Ae i le isi itu, pe sa lava ea le faatuatuaina e Ieova o lana auauna, e faataga ai ona tofotofoina o ia? O nei fesili e ono mafai ona taliina, pe a faataga e Ieova le aumaia e Satani o tofotofoga matuitui ia Iopu. E pei ona faamatalaina i le tusi o Iopu, o le faamaoni o Iopu i le taimi o tofotofoga ia na faatagaina e le Atua, na matuā faamaonia ai le amiotonu o Ieova ma le faamaoni o le tagata.—Iopu 42:1, 2, 12.

13. Ua faapefea ona tatou aafia i le mea na tupu i Etena, ma le mea na tupu ia Iopu?

¹³ Ae peitai, o le mea na tupu i le faatoaga o Etena, ma le mea na tupu i le tagata o Iopu, ua iai sona faauigaina e loloto atu. O finauga na lāgā e Satani e aafia ai tagata uma, o loo  aofia ai ma i tatou i aso nei. Sa taʻuvalea ai le suafa o le Atua, ma luʻia ai lana pule silisili ese. Na fesiligia ai le amiosaʻo o le foafoaga a le Atua, o le tagata lea. O nei finauga sa tatau ona foiaina.

LE AUALA E FOIA AI FINAUGA

14. Pe a fetaiai se tagata ua tuuaʻia ma se luʻi faufau leaga, o le ā atonu na te faia?

¹⁴ Ina ia fai se faataʻitaʻiga, seʻi faapea la o oe o se matua alofa ma o loo tou ola fiafia faatasi ma lau fanau e toatele i lo outou aiga. Seʻi faapea ua faasalalau e se tasi o ou tuaoi ni pepelo, e tuuaʻia ai faapea o oe o se matua leaga. Ae faapefea pe a fai mai lou tuaoi, e lē alolofa lau fanau ia te oe, e na o le pau le mafuaaga o loo tou nonofo faatasi ai pea, ona latou te lē iloa se isi olaga e sili atu ona lelei, peitai o le a latou ō ese pe a faasino i ai e se tasi se isi olaga lelei. Atonu o le a e faapea mai, ʻE matuā sese lava lena manatu!’ E saʻo, peitai o le a  faapefea ona e faamaonia atu le sese o lea manatu? O nisi mātua atonu o le a latou tali atu ma le ita tele. E lē gata o le a faatetele ai faafitauli, ae o lena tali atu ma le sauā o le a lagolagoina atili ai le pepelo. O se auala faamalieloto ina ia fetaiai ai ma lea faafitauli, o le faataga lea o se avanoa i lē na tuuaʻia oe, ina ia faamaonia mai ai lana tuuaʻiga, ma lau fanau ina ia avea ma molimau e faapea, e alolofa moni lava i latou ia te oe.

15. Na faapefea ona filifili Ieova ina ia feutagai ai ma le luʻi a Satani?

¹⁵ Ua pei Ieova o le matua e alofa. E mafai ona faatusatusa atu Atamu ma Eva i le fanau, ae ua fetaui ia Satani le tulaga o le tuaoi talapelo. Na atamai le lē faaumatiaina e le Atua o Satani, Atamu, ma Eva i le taimi lava lena, ae na ia faataga i latou nei na agasala e ola pea mo se vaitaimi. O lenei auala na mafai ai e o tatou uluai mātua ona maua se taimi la te fanaua mai ai ni fanau mo le amataina o le aiga faaletagata, ma na tuuina atu ai foi i le Tiapolo se avanoa e faamaonia ai pe moni lana tuuaʻiga, ina ia mafai ona foia nei finauga. Peitai ane, mai lava i le amataga, na silafia ai e le Atua o le a iai nisi tagata e faamaoni atu ia te ia, ma faamaonia ai le pepelo o Satani. Maeu so tatou loto faafetai, ona ua faaauau ona faamanuia mai Ieova ma fesoasoani mai ia i latou o ē alolofa ia te ia!—2 Nofoaiga a Tupu 16:9; Faataoto 15:3.

O LE Ā UA FAAMAONIA?

16. Ua faapefea ona nofo toilalo le lalolagi i le pulega a Satani?

¹⁶ Toetoe lava i talafaasolopito uma o tagata, ua matuā saʻoloto ai Satani e faatino ana faufauga mo le puleaina o tagata. O nisi o na mea, o le iai lea o sana aafiaga i malo faapolotiki, ma faaauiluma atili lotu o loo taulai atu ma le poto a latou tapuaiga ia te ia nai lo le tapuai atu ia Ieova. Ona avea ai lea o le Tiapolo ma “atua o le lalolagi nei,” ma ua taʻua foi o ia o “le alii o lenei lalolagi.” (2 Korinito 4:4; Ioane 12:31) Ioe, “o le lalolagi uma o loo nofo toilalo i loo leaga.” (1 Ioane 5:19) Po o le uiga ea o lenei manatu, ua faamaonia e Satani lana tuuaʻiga e faapea, e mafai ona ia faaliliueseina tagata uma mai ia Ieova le Atua? E leai lava! A o faatagaina le iai pea o Satani, ae o loo faagasolo ai pea foi e Ieova le faatinoina o ana  fuafuaga. O le ā la ua faaalia mai e le Tusi Paia e faatatau i le faatagaina e le Atua o le amioleaga?

17. O le ā e ao ona tatou manatuaina e tusa ai o le mafuaaga o le amioleaga ma puapuaga?

¹⁷ E lē o Ieova e māfua ai le amioleaga ma puapuaga. Talu ai o Satani o le pule lea o lenei lalolagi ma o le atua o lenei faiga o mea, ua tuuaʻia ai o ia ma isi o loo iai i lana itu, i le tulaga o loo iai le olaga masani o tagata i aso nei, ma mea leaga uma ua puapuagatia ai tagata. E leai se tasi e mafai ona ia faapea mai ma le tonu, o le Atua le pogai o na tulaga faigata.—Roma 9:14.

18. Ona o le faatagaina e Ieova o le amioleaga ma puapuaga, o le ā ua faamaonia ai e faatatau i le manatu o le fia tutoatasi ese mai le Atua?

¹⁸ O le faatagaina e Ieova o le amioleaga ma puapuaga ua faamaonia ai, o le tutoatasi ese mai le Atua ua lē aumaia ai se lalolagi e sili atu lona lelei. Ma le lē mafaafitia, ua iloga talafaasolopito i le faalausosoo mai o mala. O le mafuaaga o lenei mea, ona ua filifili tagata e saili o latou lava ala tutoatasi ma ua leai so latou faaaloalo e faaalia mo le afioga a le Atua ma lona finagalo. Ina ua sailia ma le lē faamaoni e le nuu anamua o Ieova ma o latou taʻitaʻi “le auala taʻutaʻua” ma teena lana afioga, ona oo mai ai lea o iuga faamalaiaina. Na fetalai atu le Atua ia i latou e ala atu i lana perofeta o Ieremia e faapea: “Ua faamāina ē popoto, ua matatau i latou, ma ua maua; faauta, ua latou lafoai le afioga a Ieova; se a foi se poto ua ia te i latou?” (Ieremia 8:5, 6, 9) O le lē taulau ona usitaia o tapulaa a Ieova, ua avea ai tagata i se tulaga lautele e pei o se vaa e aunoa ma se tāpili, ua featofai solo i le sami sousou.

19. O le ā le faamaoniga e iloa ai, e lē mafai e Satani ona faaliliuina tagata uma ina ia tetee atu i le Atua?

¹⁹ O le faatagaina e le Atua o le amioleaga ma puapuaga ua faamaonia ai foi, ua lē mafai e Satani ona faaliliueseina tagata uma mai ia Ieova. Ua faaalia i talafaasolopito le iai pea o nisi o loo tutumau i le faamaoni atu i le Atua e tusa lava po o ā tofotofoga po o mala e oo atu ia i latou. I le tele o senituri, ua faaalia ai le mana o Ieova i lona tulai atu mo  ana auauna, ma le faalauiloaina o lona suafa i le lalolagi atoa. (Esoto 9:16; 1 Samuelu 12:22) Ua taʻu mai e le mataupu e 11 o le Eperu ia i tatou se faasologa umi o ē faatuatua, e aofia ai Apelu, Enoka, Noa, Aperaamo, ma Mose. Ua taʻua i latou nei i le Eperu 12:1, o ʻse faapotopotoga tele o ē matamata’ po o molimau. Sa avea i latou ma faataʻitaʻiga o le faamaoni lē motusia ia Ieova. I nei foi ona po, e toatele ua foaiina atu o latou ola ina ia faamaoni ai ma le lē maluelue i le Atua. O le faatuatua ma le alofa, ua matuā faamaonia aʻiaʻi atu ai e na tagata le lē mafaia e Satani ona faaliliueseina tagata uma mai le Atua.

20. Ona o le faatagaina e Ieova o le amioleaga ma puapuaga ina ia faaauau, o le ā ua faamaonia ai e faatatau i le Atua ma tagata?

²⁰ Ma le manatu faaiu, o le faatagaina e Ieova o le amioleaga ma puapuaga e faaauau, ua faamaonia ai, e na o Ieova, o Lē na Foafoaina Mea, ua iai le tomai ma le aiā e pulea ai tagata, ina ia latou maua faamanuiaga ma le fiafia e faavavau. I le tele o senituri, ua faataʻitaʻia ai e tagata le tele o ituaiga o pulega. Ae o le ā le iuga? O faafitauli lavelave ma mala o loo fesagai ma malo i aso nei o se faamaoniga maʻoti lea o le mea moni, e pei ona taʻua e le Tusi Paia, “e pule ai le tasi tagata i le tasi, e leaga ai o ia lava.” (Failauga 8:9) E na o Ieova e mafai ona faasaoina i tatou, ma faataunuuina lana uluai fuafuaga. O le a faapefea ona ia faia lenei mea, ma o afea foi?

21. O le ā o le a fai ia Satani, ma o ai o le a faaaogā e faataunuuina lenei mea?

²¹ Na uma loa ona paʻūū Atamu ma Eva i le faufauga a Satani, ona fofoga mai loa lea e le Atua Lana fuafuaga e faatatau i le auala e mauaina ai le faaolataga. O le mea lenei na folafola atu e Ieova e faatatau ia Satani: “Ou te faatupuina le feitagai ia te oulua ma le fafine, o lau fanau foi ma lana fanau; na te tuʻimomomoina lou ulu, a o oe e te tuʻimomomoina lona mulivae.” (Kenese 3:15) O lena folafolaga ua fai ma faamaoniga o le lē faatagaina o le Tiapolo e faia pea ana gaoioiga leaga e oo i le faavavau. I le avea o Iesu Keriso ma Tupu o le Malo faa-Mesia, le Fanau folafolaina, o le a ia ʻtuʻimomomoina ai le ulu o Satani.’ Ioe, o le a “le pine,”  ona tuʻimomomoina lea e Iesu, le peresona fouvale o Satani!—Roma 16:20.

O LE Ā O LE A E FAIA?

22. (a) O ā fesili e ao ona e faafesagaia? (e) E ui ina sasao atu le lotoa o Satani ia i latou o loo faamaoni i le Atua, ae o le ā e mafai ona latou mautinoa?

²² I lou iloaina o finauga ia o loo faia, o le itu a ai o le a e tu ai? Pe o le a e faamaonia atu ea i au gaoioiga le avea o oe ma sē o loo lagolago faamaoni ia Ieova? Talu ai ua iloa e Satani le saasaa o lona taimi, o le a ia faia ai mea uma na te mafai ina ia faasasao atu ai lona lotoa ia i latou o loo mananao e faamaoni i le Atua. (Faaaliga 12:12) Peitai e mafai ona e saili atu i le Atua mo se fesoasoani, auā “ua silafia e le Alii [o Ieova] se mea e laveai mai ai i e amio Atua ai le tofotofoga.” (2 Peteru 2:9) O le a ia lē tuuina atu oe i se tofotofoga e sili atu i se mea e te lavatia, ma o le a ia saunia se auala e te sao ai, ina ia mafai ona e onosaia tofotofoga.—1 Korinito 10:13.

23. O le ā e mafai ona tatou faamoemoe atu i ai ma le mautinoa?

²³ I lo tatou mautinoa, seʻi o tatou faamoemoe atu ia i le taimi o le a gaoioi ai le Tupu o Iesu Keriso e faasagatau atu ia Satani ma i latou uma o loo mulimuli ia te ia. (Faaaliga 20:1-3) O le a faaumatia e Iesu i latou uma o ē o loo auai i le faia o mea ua māfua ai le oi ma mala ua puapuagatia ai tagata. A o lei oo atu i lena taimi, o loo iai se tasi o puapuaga e sili ona matuitui, o le maliliu lea o i latou o ē e pele ia i tatou. Ia faitau i le mataupu o loo sosoo mai, ina ia iloa ai le mea e tupu ia i latou na.

SEʻI TOFOTOFO LOU ILOA

E faapefea ona tatou iloa e lē o Ieova o loo faapogaia puapuaga o tagata?

O ā finauga na lāgā e Satani i Etena, ma faamanino mai i ona po o Iopu?

O le ā ua faamaonia ona o le faatagaina o puapuaga e le Atua?

[Fesili mo le Suʻesuʻega]