Aisea ua Tatou Ola Matutua ai ma Feoti?
Mataupu 6
Aisea ua Tatou Ola Matutua ai ma Feoti?
1. O le ā ua lē mafai e saienitisi ona faamatala mai e uiga i le olaga o le tagata?
E LĒ iloa e saienitisi le mafuaaga ua ola matutua ai ma feoti tagata. E foliga mai e tatau ona faaauau pea ona toe faafouina sela o o tatou tino, ma e tatau ai ona tatou ola e faavavau. Ua faapea mai le tusi Hyojun Soshikigaku (Faavae o Suesuega i Laau ma Manu): “O se matuā mealilo le faapefea i le umi o le iai o ni sela, ona fesootai atu i le olaga matua ma le oti o se tagata.” E toatele saienitisi e talitonu, o loo iai se tapulaa “masani, ua tuufaasolo” mai o le olaga. Pe e te manatu ea e saʻo i latou?
2. O le ā ua faia e nisi tagata ona o le masani o le puupuu o le olaga?
2 E masani ona moomoo tagata ina ia faafualoaina o latou olaga ma ua oo ai ina taumafai e maua se olaga e lē mafai ona oti. Talu mai le senituri lona fa T.L.M., o vailaau sa gaosia mo se fuafuaga ina ia mafai ona ola ai e aunoa ma le oti, sa matuā uaʻi atu i ai manatu o alii tāualoa i Saina. Na taumafai nisi na avea mulimuli ane ma emeperoa o Saina e inu nei mea ua taʻua o vailaau e ola ai pea le tagata—sa faia mai i le vailaau oona o le mercury—peitai na latou feoti ai! I le lalolagi aoao, ua talitonu tagata, e lē faamutaina e le oti o latou olaga. O tagata o le Lotu Puta, tagata Hinitu, tagata Musalimi, ma isi, ua iai ni o latou faamoemoe pupula i se isi olaga pe a feoti. I lotu Kerisinetoma, e toatele ua faaāta i o latou mafaufau le olaga o fiafiaga atoatoa i le lagi pe a feoti.
3. (a) Aisea ua moomoo ai tagata mo le ola e faavavau? (e) O ā fesili e faatatau i le oti e manaomia ona taliina?
3 O manatunatuga i le fiafiaga pe a mavae le oti ua atagia mai ai se moomooga mo le ola e faavavau. E faatatau i le manatu o le faavavau lea na tuuina e le Atua i totonu o o tatou loto, ua faapea mai le Tusi Paia: “Ua tuuina foi e ia le faavavau i o latou loto.” (Failauga 3:11, Byington) Na ia foafoaina uluai tagata ma le faamoemoe e mafai ona la ola e faavavau i le lalolagi. (Kenese 2:16, 17) Ae aisea la e feoti ai tagata? Na faapefea ona oo mai le oti i le lalolagi? O le poto e uiga i le Atua ua faasusulu mai ai le malamalama i nei fesili.—Salamo 119:105.
SE FAUFAUGA LEAGA
4. Na faapefea ona faailoa mai e Iesu le peresona solitulafono ua māfua ai ona feoti tagata?
4 E taumafai se tagata solitulafono e nanā ona ala leaga. Ua moni foi lenei manatu i lē o loo tuuaʻia i se soligatulafono lea ua māfua ai ona feoti le faitau piliona o tagata. Ua ia faatogafitia mea ina ia matuā lilo ai le mafuaaga o le feoti o tagata. Na faailoa mai e Iesu Keriso lenei peresona solitulafono ina ua Ia fetalai atu ia i latou na saili e fasiotia o Ia e faapea: “O outou nai lo outou tamā le tiapolo, tou te fia faia foi mea e tuʻinanau i ai lo outou tamā. O le fasioti tagata ia talu le amataga, e le tu lava ia i le upu moni, auā e le o i totonu lava ia te ia le upu moni.”—Ioane 8:31, 40, 44.
5. (a) Na amata mai faapefea lē ua avea ma Satani le Tiapolo? (e) O ā uiga o upu o “Satani” ma le “Tiapolo”?
5 Ioe, o le Tiapolo o se “fasioti tagata” e sili ona faufau leaga. Ua faaalia e le Tusi Paia e faapea, o ia o se peresona moni, ae ua lē na o se uiga leaga i le loto o le tagata. (Mataio 4:1-11) E ui sa foafoaina o ia o se agelu amiotonu, ae ʻlei tumau o ia i le upu moni.’ Maeu la le fetaui ona faaigoa o ia, o Satani le Tiapolo! (Faaaliga 12:9) Ua taʻua o ia o “Satani,” po o “lē tetee,” auā ua fouvale ma tetee atu o ia ia Ieova. Ua taʻua foi lenei peresona solitulafono o le “Tiapolo” o lona uiga o “lē taufaaleaga,” auā ua ia suitulaga sese ma le faalumaina le Atua.
6. Aisea na fouvale ai Satani i le Atua?
6 O le ā na uunaia ai Satani e fouvale i le Atua? O le matapeapea. Sa ia tuʻinanau ma le matapeapea i le tapuaiga sa maua e Ieova mai tagata. Sa lei teena e le Tiapolo le tuʻinanauga mo le mauaina o lena tapuaiga, lea sa na o Lē na Foafoaina Mea e onomea ona tuu atu i ai. (Faatusatusa i le Esekielu 28:12-19.) Nai lo lea, sa teuloto e le agelu lea na avea ma Satani lenei tuʻinanauga matapeapea, seia oo ina ua fanau mai ai le agasala.—Iakopo 1:14, 15.
7. (a) O le ā ua faapogaia ai ona feoti tagata? (e) O le ā le agasala?
7 Ua tatou mātauliaina le peresona amioleaga lea e ana le gaoioiga solitulafono ua māfua ai ona feoti tagata. Ae o le ā le mafuaaga patino o le feoti o tagata? Ua taʻua e le Tusi Paia: “O le tui o le oti, o le agasala lea.” (1 Korinito 15:56) Ma o le ā le agasala? Ina ia malamalama i lenei upu, seʻi o tatou iloiloina le uiga lea na iai i uluai gagana na tusia ai le Tusi Paia. O veape faa-Eperu ma le faa-Eleni ua masani ona faaliliuina i le “ua agasala” o lona uiga, “ua misia” i le uiga e faapea ua misia se taulaʻiga pe ua lē ausia se sini. O le ā le taulaʻiga lea ua misia e i tatou uma lava? O le taulaʻiga o le usiusitai atu atoatoa i le Atua. Ae peitai, na faapefea ona oo mai le agasala i le lalolagi?
LE AUALA NA FAATINOINA AI LE FAUFAUGA
8. Na faapefea ona taumafai Satani ina ia tapuai atu tagata ia te ia?
8 Na faataatia ma le faaeteete e Satani le faufauga lea na ia manatu o le a iu i lona puleaina ai o tagata uma lava, ma latou tapuai mai ai ia te ia. Sa ia filifili e faapogaia le uluai ulugalii faaletagata, o Atamu ma Eva, ina ia la agasala i le Atua. Na tuu atu e Ieova i o tatou uluai mātua le poto lea e mafai ai ona la maua le ola e faavavau. Sa la iloa le lelei o Lē na Foafoaina i laua, auā na ia tuuina i laua i le faatoaga matagofie o Etena. Ae maise lava, o Atamu na ia iloa le lelei o lona Tamā faalelagi, ina ua foaiina atu i ai e le Atua se avā lalelei e fesoasoani ia te ia. (Kenese 1:26, 29; 2:7-9, 18-23) O le faaauau pea ona ola o le uluai ulugalii faaletagata sa faalagolago lea i lo la usiusitai i le Atua.
9. O le ā le poloaiga na avatu e le Atua i le uluai tagata, ma aisea na talafeagai ai?
9 Na poloai atu le Atua ia Atamu: “O laau uma o i le faatoaga e te ʻai ai. A o le laau e iloa ai le lelei ma le leaga, aua e te ʻai ai; auā o le aso e te ʻai ai e te oti ai lava.” (Kenese 2:16, 17) Ona o Ieova le Atua o ia o Lē na Foafoaina Mea, sa ia te ia le aiā e faataatitia atu ai tapulaa o amioga tatau ma filifilia atu mea e lelei ma mea e leaga mo tagata sa ia faia. Sa talafeagai lana poloaiga, auā sa saʻoloto Atamu ma Eva e aai i fua mai isi laau uma i le faatoaga. Sa mafai ona la faaalia lo la talisapaia o le tulaga pule ma le tonu a Ieova, e ala i lo la usitaia o lenei tulafono, nai lo le faia ma le faamaualuga o ni a laua lava tapulaa tau amio.
10. (a) Na faapefea ona faalatalata atu Satani i tagata ina ia tataʻi i laua i lana itu? (e) O ā uunaiga na tuuaʻia sese ai Ieova e Satani? (i) O le ā sou manatu e faatatau i le osofaiga a Satani i le Atua?
10 Sa faufau le Tiapolo ina ia tataʻi ese uluai tagata mai le Atua. Ina ia faaosoosoina i laua e avatu i lana itu, na pepelo ai Satani. I lona faaaogaina o se gata, e pei o le faatautala mai o se faatagata, na fesili atu ai le Tiapolo ia Eva: “E moni ea, na fetalai mai le Atua, lua te le aai i laau uma o le faatoaga?” Ina ua taʻu atu i ai e Eva le poloaiga a le Atua, ona folafola atu lea i ai e Satani: “Lua te le oti lava.” Ona ia tuuaʻia loa lea o Ieova i ni uunaiga leaga i le faapea atu: “Ua silafia e le Atua, o le aso lua te aai ai, e pupula ai o oulua mata; ona avea ai lea o oulua e pei [o le Atua] o loo iloa le lelei ma le leaga.” (Kenese 3:1-5) O lea sa tuuaʻia ai e le Tiapolo e faapea o loo taofiofia e le Atua se mea lelei. Pagā se osofaiga e taufaaleaga ai ia Ieova, le Tamā faalelagi, o lē e faamaoni ma alofa!
11. Na faapefea ona avea Atamu ma Eva o nisi e auaufaatasi ma Satani i le faia o mea leaga?
11 Sa toe vaavaai atu Eva i le laau, ma na sili ona faatosina ane fua o le laau i lena taimi. Ona ia tau ai lea o le fua ma ʻai. Mulimuli ane, na aufaatasi atu ma le loto i ai ia te ia lana tane i lenei gaoioiga agasala o le lē usiusitai i le Atua. (Kenese 3:6) E ui lava o Eva lea na faaseseina, ae o i laua uma ma Atamu na la lagolagoina le faufauga a Satani ina ia pule i tagata uma. O le iuga, na avea ai i laua ma ē e auaufaatasi ma ia i le faia o mea leaga.—Roma 6:16; 1 Timoteo 2:14.
12. O le ā na iu i ai le fouvalega a tagata i le Atua?
12 Sa tatau ona tofo Atamu ma Eva i āuga o a la gaoioiga. Sa lei avea i laua e pei o le Atua, i le iai o so la poto faapitoa. Ae nai lo lea, na la mamā ma lalafi ai. Na faamasino e Ieova Atamu ma fofogaina mai i ai le faasalaga lenei: “E te ʻai foi au mea e ʻai ma le afu o ou mata, seia e toe foi atu i le eleele; auā na faiina aʻi lava oe; auā o le efuefu oe, e te toe foi atu lava i le efuefu.” (Kenese 3:19) “O le aso” na ʻaina ai e o tatou uluai mātua le fua o le laau e iloa ai le lelei ma le leaga, na faasalaina ai i laua e le Atua, ma i lana silafaga, ua feoti i laua. Ona tutuli ese ai lea o i laua mai le Parataiso ma amata mai ai ona la faasolo ifo i le oti faaletino.
LE AUALA NA SALALAU ATU AI LE AGASALA MA LE OTI
13. Na faapefea ona salalau atu le agasala i tagata uma?
13 E foliga mai sa taulau Satani i lana faufauga ina ia matuā faamamalu mai tagata ia te ia. Peitai, e lē mafai ona ia faasaoina ana tagata tapuai mai le oti. Ina ua sao atu le agasala i le uluai ulugalii faaletagata, sa lē mafai loa ona la tuufaasolo atu le lelei atoatoa i a la fanau. I le pei o se tusitusiga ua vaneina i se papa, sa faapena le matuā loloto o le ulu atu o le agasala i sela faafanautama o o tatou uluai mātua. Ona la fanaua mai ai lea na o fanau ua lē lelei atoatoa. Talu ai o a la fanau uma lava na afuafuaina ae ua iai Atamu ma Eva i le tulaga agasala, ona tuufaasolo mai ai lea i a la fanau le agasala ma le oti.—Salamo 51:5; Roma 5:12.
14. (a) O ai tatou te ono faatusa i ai i latou o ē faafitia a latou agasala? (e) Na faapefea ona faamanino atu i le fanauga a Isaraelu lo latou tulaga agasala?
14 Ae peitai, i aso nei, e toatele o loo manatu e lē o i latou o ni tagata agasala. I nisi vaega o le lalolagi, e lē iloa ai e le toatele e faapea ua tuufaasolo mai le agasala. Peitai ua lē avea lena o se faamaoniga o le lē iai o se agasala. Atonu e faapea mai se tama itiiti o loo palapalā ona foliga, o loo mamā o ia, peitai e faatoʻā talitonu lava ina ua vaavaai atu i le faʻata. Sa faapei le fanauga a Isaraelu anamua o lena tama itiiti, ina ua latou maua le Tulafono a le Atua e ala mai i Lana perofeta o Mose. Na faamanino atu ai e le tulafono le iai o le agasala. Ua faamatala mai e le aposetolo o Paulo e faapea: “E moni lava, ana le se anoa le tulafono, po ua ou le iloa le agasala.” (Roma 7:7-12) O le tilotilo atu o le tama itiiti i le faʻata, ua pei lena o le faaaogaina e le fanauga a Isaraelu o le Tulafono ina ia latou tilofaia ai i latou lava, ma latou iloa ai lo latou lē mamā i luma o le silafaga a Ieova.
15. O le ā ua faailoa mai pe a vaavaai atu i le faʻata o le Afioga a le Atua?
15 O le vaai atu i le faʻata o le Afioga a le Atua, ma mātauina ana tapulaa, e mafai ai ona tatou iloa lo tatou lē lelei atoatoa. (Iakopo 1:23-25) E pei o se faaaoaoga, seʻi manatu i le mea na fetalai atu ai Iesu Keriso i ona soo e uiga i le alofa i le Atua ma o latou tuaoi, e pei ona tusia i le Mataio 22:37-40. Pagā le misia soo e tagata o le taulaʻiga i nei itu! E toatele ua matuā lē lagona sina minoi laitiiti o le loto fuatia ifo, pe a lē taulau ona faaalia le alofa i le Atua po o le alofa mo o latou tuaoi.—Luka 10:29-37.
IA NOFOUTA I TOGAFITI A SATANI!
16. O le ā e mafai ona tatou fai ina ia tatou lē aafia ai fua i faufauga leaga a Satani, ma aisea e faigata ai lenei mea?
16 E saili Satani ina ia faapogaia i tatou e faia ni agasala ma le loto i ai. (1 Ioane 3:8) Pe iai ea se auala e alofia ai le avea ma se tasi e aafia fua i ana faufauga? Ioe, ae o lenei mea e manaomia ai lo tatou tetee atu i faanaunauga i le faia o le agasala ma le loto i ai. E lē faigofie lenei mea auā e malolosi tele o tatou faanaunauga i le agasala lea na fananau mai ma i tatou. (Efeso 2:3) Sa tatau ia Paulo ona ia faia se tauiviga tele. Aisea? Auā sa iai le agasala i totonu ia te ia. Pe afai tatou te fia maua le finagalo malie o le Atua, e tatau foi ona tatou tau e tetee atu i faanaunauga agasala o loo i totonu o i tatou.—Roma 7:14-24; 2 Korinito 5:10.
17. Aisea ua atili faigata ai le taua ina ia teena o tatou faanaunauga agasala?
17 Talu ai o loo tulimataia pea e Satani ni avanoa e faaosoosoina ai i tatou ina ia solia tulafono a le Atua, ua lē faigofie ai la tatou taua ina ia tetee atu i le agasala. (1 Peteru 5:8) Ona o le manatu mamafa o Paulo i ona uso Kerisiano, na ia faapea mai ai: “Ou te fefe, ina neʻi pei ona faaseseina o Eva e le gata i lana togafiti, e faapea ona faaleagaina o outou manatu ina ia le tonu ia Keriso.” (2 Korinito 11:3) E tai faapena foi mailei o loo faaaogā e Satani i aso nei. Na te taumafai e faatupu le lagona masalosalo agaʻi i le agalelei o Ieova atoa ma aogā e maua mai i le usiusitai i poloaiga a le Atua. E taumafai le Tiapolo e faaaogā o tatou faanaunauga agasala na tuufaasolo mai, ina ia uunaia ai i tatou e faatupu se uiga faamaualuga, le matapeapea, le feainai, ma le faailogatagata.
18. Ua faaaogā faapefea e Satani le lalolagi, ina ia faatupu atili ai le agasala?
18 O se tasi o mailei ua faaaogā e le Tiapolo ia i tatou, o le lalolagi, lea o loo nofo toilalo ia te ia. (1 Ioane 5:19) Pe afai tatou te lē faaeteete, e mafai e tagata amiopiopio ma le lē faamaoni o loo i le lalolagi lenei i o tatou autafa, ona uunaia malosi i tatou e ola i se olaga agasala e solia ai tapulaa o amio tatau a le Atua. (1 Peteru 4:3-5) E toatele ua latou lē amanaia tulafono a le Atua ma ua oo lava ina mumusu e amanaia o latou loto fuatia ifo, ma mulimuli ane ua lē toe lagona se mea i o latou loto fuatia ifo. (Roma 2:14, 15; 1 Timoteo 4:1, 2) O nisi ua faasolosolo mālie ona ola i nisi vaega o o latou olaga, sa lei faatagaina ai foi muamua i latou e ola ai e o latou loto fuatia ifo lē lelei atoatoa.—Roma 1:24-32; Efeso 4:17-19.
19. Aisea e lē lava ai le tau ina ola i se olaga mamā?
19 O le ola i se olaga mamā o se mea sili lea ua ausia i lenei lalolagi. Peitai, ina ia faafiafia Lē na Foafoaina i tatou, e manaomia ai nisi mea e sili atu. E tatau foi ona tatou faatuatua i le Atua ma ia iai se lagona o le faia o mea uma ua ia faafinagaloina. (Eperu 11:6) Na tusi mai le soo o Iakopo: “O le ua iloa e fai le mea lelei, a e le faia, o le agasala lea ia te ia.” (Iakopo 4:17) Ioe, o le lē uaʻi atu ma le loto i ai i le Atua ma ana poloaiga o se agasala foi lena.
20. E ono taumafai faapefea Satani ia taofia oe mai lou faia o le mea ua tonu, ae o le ā e fesoasoani ia te oe ina ia teena ai na omiga?
20 E mautinoa lava o loo uunaia e Satani teteega ina ia oo mai ia te oe a o e sailia le poto e uiga i le Atua, e ala i lou suesueina o le Tusi Paia. E iai le faamoemoe maualuga o le a e lē faatagaina na omiga e taofia ai lou faia o le mea ua tonu. (Ioane 16:2) E ui ina toatele pule na faatuatua ia Iesu i le taimi o lana faiva, ae latou te lei taʻutino atu lena mea e uiga ia te ia, ona o lo latou matataʻu ina neʻi teena i latou e lo latou nuu. (Ioane 12:42, 43) E taumafai ma le faasauā Satani ina ia faafefe so o se tasi o loo saili atu i le poto e uiga i le Atua. Peitai, e ao pea ona e manatua ma talisapaia mea ofoofogia ua faia e Ieova. Atonu e te mafai ai foi ona fesoasoani atu i ē o loo tetee mai, ina ia maua ai e i latou lea lagona talisapaia.
21. E mafai faapefea ona tatou manumalo i le lalolagi, ma o tatou lava faanaunauga agasala?
21 O le umi tatou te iai i le tulaga lē lelei atoatoa, o le umi foi lena o le a tatou agasala ai. (1 Ioane 1:8) Ae ui i lea, ua tatou maua se fesoasoani i le tauina o lenei taua. Ioe, e mafai ona tatou manumalo i la tatou taua e tetee atu i lē o leaga, o Satani le Tiapolo. (Roma 5:21) Ina ua faaiu le faiva a Iesu i le lalolagi, na ia faalaeiau atu ai i ona soo i fetalaiga nei: “E maua outou e le puapuaga i le lalolagi, a ia outou loto tetele, ua ou manumalo i le lalolagi.” (Ioane 16:33) E oo lava i tagata lē lelei atoatoa, e mafai ona latou manumalo i le lalolagi e ala i le fesoasoani a le Atua. E lē mafai e Satani ona pule i ē o loo tetee atu ia te ia, ae ʻgauai atu i latou i le Atua.’ (Iakopo 4:7; 1 Ioane 5:18) E pei ona o le a tatou iloa ai, ua saunia e le Atua se auala e sao ese ai mai le nofo pologa i le agasala ma le oti.
SEʻI TOFOTOFO LOU ILOA
O ai Satani le Tiapolo?
Aisea ua ola matutua ai tagata ma feoti?
O le ā le agasala?
Ua faapefea ona tataʻi e Satani tagata ina ia agasala ma le loto i ai i le Atua?
[Fesili mo le Suʻesuʻega]
[Ata atoa i le itulau 54]
