E Mafai Ona e Maua se Lumanai Fiafia!
Mataupu 1
E Mafai Ona e Maua se Lumanai Fiafia!
1, 2. O le ā o loo finagalo Lē na Foafoaina oe ina ia e mauaina?
O SE opo mafana atu a se tasi e pele ia te oe. Le taliē fiafia ma uo pele i le taimi o se taumafataga manaia. Le fiafiaga i le vaavaai atu o loo taaalo fiafia mai lau fanau. O taimi mananaia na o le olaga. Ae peitai, e toatele o loo iai i se olaga ua pei e fafa mai le isi faafitauli matuia i luga o le isi faafitauli matuia. Pe afai o le tulaga lena o loo e oo i ai, ia e lototele.
2 O le finagalo o le Atua, ia e olioli i le fiafiaga e tumau i tulaga e sili ona lelei i totonu o ni siomaga matagofie. Ua lē na o se miti lenei mea, auā ua ofoina moni mai e le Atua ia te oe le ki e te ulu atu ai i lena lumanai fiafia. O lena ki, o le poto lea.
3. O le ā le poto lea ua avea ma ki i le mauaina o le fiafia, ma aisea e mafai ai ona tatou mautinoa e mafai e le Atua ona saunia mai lena poto?
3 O loo tatou talanoa i se ituaiga faapitoa o poto e silisili atu nai lo le atamai faaletagata. O le “poto lea e uiga i le Atua.” (Faataoto 2:5, NW) I le toeitiiti 2,000 tausaga ua mavae, na tusi mai ai se tusitala o le Tusi Paia e faapea: “Auā e taitasi fale ma saunia e se tasi; a o le na te saunia mea uma lava o le Atua lea.” (Eperu 3:4) Seʻi mafaufau i le poto lea atonu o loo iai i Lē na Faia mea uma! Ua taʻua i le Tusi Paia le faitauina ma faaigoaina e le Atua fetu uma lava. Maeu se mea e ofo ai, auā e faitau selau piliona fetu i lo tatou lava aniva, ma ua taʻua e tagata suesue, le tusa ma le selau piliona isi aniva! (Salamo 147:4) E silafia foi e le Atua mea uma lava e uiga ia i tatou. O ai la se isi e mafai ona ia aumaia ni tali e sili atu ona lelei i fesili tāua o le olaga?—Mataio 10:30.
4. Aisea e ao ai ona tatou faatalitalia le Atua na te aumaia faatonuga e taʻitaʻia ai i tatou, ma o le ā le tusi ua ia faamalieina lenei manaoga?
4 Seʻi faaāta i lou mafaufau ni tamaloloa se toalua o loo taumafai e toe fai a la taavale ua lē ola. Ona o le fiu o le isi tamaloa, na musu ai e toe galue i lana taavale. O le isi tamaloa o loo toafilemu pea ma taumafai e faasaʻo le mea na faaletonu, ua ia ki le taavale, ma ʻataʻata a o amata ona ola aʻe le afi ma toe ola lelei ai. O le a lē faigata lou mateʻiaina po o ai o tamaloloa nei e toalua sa iai lana tusi faatonu e iloa ai le mea e tatau ona fai, lea sa maua mai i le kamupani na fausiaina le taavale. Pe ua lē talafeagai ea la le saunia e le Atua o faatonuga ina ia taʻitaʻia ai i tatou i le olaga? Atonu ua e iloa, ua faapea mai le Tusi Paia o ia lava o se tusi faapena—o se tusi o faatonuga ma taʻiala mai Lē na Foafoaina i tatou, ua fuafuaina e faaoo mai ai le poto e uiga i le Atua.—2 Timoteo 3:16.
5. O le ā le tāua o le poto lea o loo iai i le Tusi Paia?
5 Pe afai e saʻo le mau a le Tusi Paia, seʻi mafaufau la i le tamaoaiga o le poto lea o loo iai i lena tusi! Ua uunaia i tatou e le Faataoto 2:1-5 ina ia sailia le atamai, ia matuā eli i ai e faapei ona eli i se oloa lilo—e lē o le eliina mai i mafaufauga faaletagata, ae i le Afioga lava a le Atua. Pe afai o i inā tatou te saili i ai, o le a tatou ʻmaua ai le poto e uiga i le Atua.’ Talu ai e malamalama le Atua i o tatou vaivaiga ma o tatou manaoga, ua ia aumaia ai faatonuga o le a aogā mo i tatou ina ia tatou ola ai i ni olaga e filemu ma fiafia. (Salamo 103:14; Isaia 48:17) E lē gata i lea, o le poto e uiga i le Atua e aumaia ai ia i tatou tala lelei e fiafia ai.
LE OLA E FAAVAVAU!
6. O le ā le faamautinoaga na aumai e Iesu Keriso e faatatau i le poto e uiga i le Atua?
6 Sa manino le faamatalaina mai e le tagata taʻutaʻua i talafaasolopito o Iesu Keriso, lenei vala o le poto e uiga i le Atua. Na ia fetalai: “O le uiga lenei o le ola e faavavau, ia latou mauaina pea le poto e uiga ia te oe, le Atua moni e toatasi, ma lē ua e auina mai, o Iesu Keriso lea.” (Ioane 17:3, NW) Seʻi manatunatu i ai—o le poto e taʻitaʻia ai i le ola e faavavau!
7. O ā faamaoniga e iloa ai sa lei finagalo le Atua ina ia tatou feoti?
7 Aua neʻi manatu faatauvaa i le ola e faavavau e faapea ua na o se miti. Nai lo lea, seʻi tagai i le auala ua faia ai le tino o le tagata. Ua matuā ofoofogia le fuafuaina ina ia mafai ona tofo, faalogo, sogisogi, vaai, ma lagona. E anoanoai mea o loo iai i le lalolagi ua faafiafiaina ai o tatou faalogona—o meaʻai susua, le manaia o le tausani mai o manufelelei, le puaina o manogi o fugalaau, o vaaiga matagofie o laufanua, o faigauo e faafiafia loto! Ma lo tatou faiai ofoofogia ua matuā sili atu lona atamai nai lo o se komepiuta maoae, auā i inā ua mafai ai ona tatou talisapaia ma olioli i na mea uma. Pe e te manatu ea la e finagalo Lē na Foafoaina i tatou ina ia tatou feoti ma lē toe maua ai nei mea uma? Pe ua lē sili ea ona talafeagai pe a manatu faapea, o lona finagalo ina ia tatou ola fiafia ma olioli i le ola e faavavau? Ioe, o le mea lena e mafai ona uiga i ai le poto e uiga i le Atua mo oe.
LE OLAGA I LE PARATAISO
8. O le ā ua fai mai ai le Tusi Paia e uiga i le lumanai o tagata?
8 O mea ia o loo taʻua i le Tusi Paia e uiga i le lumanai o le lalolagi ma tagata, e mafai ona taaofai i le upu e tasi—Parataiso! Na taʻua e Iesu Keriso lena mea ina ua ia fetalai atu i se tagata o lē ua lē o toe umi a e oti: “O le a ta iai faatasi i le Parataiso.” (Luka 23:43, NW) O le taʻua o le Parataiso e mautinoa na manatua ai e lena tamaloa le tulaga fiafia sa iai o tatou uluai mātua, o Atamu ma Eva. Ina ua foafoaina i laua e le Atua, sa lelei atoatoa i laua ma sa la ola i se paka sa pei o se faatoaga, lea na fuafuaina ma faatoʻaina e Lē na Foafoaina Mea. Na talafeagai ai le faaigoaina o le faatoaga o Etena, auā ua faauiga lena igoa i fiafiaga.
9. Sa faapeī le olaga na iai i le uluai Parataiso?
9 Maeu le matagofie sa iai lena faatoaga! Sa avea o se parataiso moni lava. I ona laau matagofie, sa iai ma laau e fuaina mai ni fua e susua i le taumafa. A o amata ona tau faamasani atu Atamu ma Eva i lo la siomaga, na la feinu mai vai manino ma le mamā, na la tau mai fua o ona laau ʻaina, sa leai se mafuaaga e tatau ona la soona popole ai pe matataʻu. E oo lava i manuvaefa sa lei taufeai, auā sa fuafuaina e le Atua ina ia puleaina ma le alofa e le tane ma lana avā nei mea uma. E lē gata i lea, sa matuā malaulau le soifua mālōlōina o le uluai ulugalii. Pe ana fai la te tutumau i le usiusitai atu i le Atua, semanū la te mauaina se lumanai fiafia e faavavau. Na tuuina atu ia i laua le galuega faamalieloto o le tausia o lo la aiga Parataiso matagofie. E lē gata i lea, sa tuuina atu e le Atua ia Atamu ma Eva le poloaiga ina ia ʻfaatumuina le lalolagi ma faatoilalo i ai.’ Sa tatau ia i laua ma a la fanau ona faalautele atu tuaoi o le Parataiso seia oo ina avea lo tatou lalolagi atoa ma nofoaga matagofie ma faafiafiaina ai.—Kenese 1:28.
10. Ina ua fetalai Iesu e uiga i le Parataiso, o le ā sa ia manatunatu i ai?
10 Peitai, ina ua fetalai Iesu e uiga i le Parataiso, sa lei fai atu o ia i le tamaloa lea na tāli oti ina ia manatunatu i taimi ua leva ona tuanai. E leai, sa fetalai Iesu e uiga i le lumanai! Sa ia silafia o le a avea lo tatou aiga atoa faalelalolagi ma parataiso. Ona faataunuuina ai lea e le Atua lana uluai fuafuaga mo tagata ma lo tatou lalolagi. (Isaia 55:10, 11) Ioe, o le a toe faafoisia mai le Parataiso! Ma o le a faapeī le tulaga o le a iai? Seʻi tuu atu la e tali mai le Afioga a le Atua, le Tusi Paia.
LE OLAGA I LE PARATAISO UA TOE FAAFOISIA MAI
11. I le Parataiso lea o le a toe faafoisia mai, o le ā o le a tupu i maʻi, le olaga matua, ma le oti?
11 O le a lē toe iai ni maʻi, le olaga matua, ma le oti. “Ona faapupulaina ai lea mata o e tauaso, e faalogoa foi taliga o e tutuli; ona osooso ai lea o le pipili e pei o le aila, e pese foi le laulaufaiva o le gūgū.” (Isaia 35:5, 6) “E ia te i latou [o tagata] le Atua lava. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:3, 4.
12. Aisea e mafai ai ona tatou mautinoa o le a lē toe iai ni solitulafono, ni faiga sauā, ma le amioleaga i le Parataiso i le lumanai?
12 O le a mavae e faavavau solitulafono, o faiga sauā, ma le amioleaga. “Auā e faaumatia o e fai amio leaga . . . E toe itiiti, ona leai lea o le tagata amio leaga; . . . e leai lava. A o e agamalu, e fai mo latou le nuu [le lalolagi].” (Salamo 37:9-11) “A e vavaeeseina o e amio leaga ai le laueleele, e liaiina ai foi o e amio pepelo.”—Faataoto 2:22.
13. O le a faapefea ona aumaia e le Atua le filemu?
13 O le a tumu le lalolagi aoao i le filemu. “Ua faaiua e ia [le Atua] o taua e oo lava i tuluʻiga o le lalolagi; ua gagau e ia le aufana, ma vavae le tao.” (Salamo 46:9) “E tupu olaola mai ai le ua amiotonu; e manuia tele ai, seia leai se masina.”—Salamo 72:7.
14, 15. O le ā ua fai mai ai le Tusi Paia e uiga i fale e nonofo ai, o galuega, ma meataumafa i le Parataiso o le a toe faafoisia mai?
14 O le a saogalemu fale e nonofo ai ma maua galuega e faamalieloto. “Latou te faia fale, ma latou mau ai; . . . Latou te le fai fale ina ia mau ai nisi; latou te le totō ina ia ʻai ai nisi; auā e pei o aso o le laau aso o loʻu nuu; e uma lava i e ua filifilia e aʻu o mea na faia e o latou lima. Latou te le galulue fua, latou te fananau, a e le tupu ai le atuatuvale.”—Isaia 65:21-23.
15 O le a anoanoai meataumafa e maua ai le soifua mālōlōina. “O le a tele taumafa o saito i le lalolagi; o le a fau ma soloi i luga o tumutumu o mauga.” (Salamo 72:16, NW) “Ua fua mai e le laueleele ona lava fua; o le Atua, o lo matou Atua lava na te faamanuia mai i matou.”—Salamo 67:6.
16. Aisea o le a avea ai le olaga i le Parataiso o se mea e fiafia tele ai?
16 O le a iai le fiafia tele i le ola e faavavau i le lalolagi parataiso. “E fai lava le nuu mo tagata amiotonu, e nonofo ai pea i latou.” (Salamo 37:29) “E olioli ona o i latou le vao lafulafua, ma le nuu naumati; e fiafia le toafa, ma fua mai e pei o le aute.”—Isaia 35:1.
LE POTO MA LOU LUMANAI
17. (a) O le ā e ao ona e fai pe a logolelei ia te oe le olaga i le Parataiso? (e) E faapefea ona tatou iloa o le a aumaia e le Atua suiga tetele i le lalolagi?
17 Pe afai e logolelei ia te oe le olaga i le Parataiso, seʻi aua la neʻi faatagaina se mea e taofia oe mai le sailia o le poto e uiga i le Atua. E alofa o ia i tagata, ma o le a ia aumaia suiga o loo manaomia ina ia faaparataisoina ai le lalolagi. Pe e lē moni ea, pe ana iai sou mana e faaiuina ai mea e tiga ai ma le lē faamasinotonu lea o loo tumu ai le lalolagi, pe o le a e lē faia ea faapea? Pe tatou te lē faatalitalia la o le a faia e le Atua mea e sili atu? O le mea moni, e manino lava faaupuga a le Tusi Paia e faatatau i le taimi o le a aveesea ai e le Atua lenei faiga fetauai o loo iai, ae suia i le pulega e atoatoa ona lelei ma amiotonu. (Tanielu 2:44) Ae o loo taʻu atili mai e le Tusi Paia nisi mea nai lo le tau ina faamatala mai ia i tatou nei mea uma. Ua ia faaalia maia ia i tatou le auala e mafai ona tatou sao atu ai i le lalolagi fou ua folafolaina mai e le Atua.—2 Peteru 3:13; 1 Ioane 2:17.
18. O le ā e mafai e le poto e uiga i le Atua ona fai mo oe i le taimi lenei?
18 E mafai foi ona tele se aogā o le poto e uiga i le Atua ia te oe i le taimi lenei. Ua taliina e le Tusi Paia fesili e sili ona loloto ma sili ona lavelave o le olaga. O le taliaina o lana taʻiala o le a aogā ia te oe ina ia faatupuina ai sa oulua faauoga ma le Atua. Maeu se faaeaga matagofie! O le a mafai ai ona e olioli i le filemu lea e na o le Atua e mafai ona ia aumaia. (Roma 15:13, 33) A o amata ona e ave i fale lenei poto e sili ona tāua, ona amata ai lea ona e agaʻi atu i le taumafaiga e sili ona tāua ma faamanuiaina i lou olaga. O le a lē taitai ona e salamō i le mauaina o le poto e uiga i le Atua, lea e taʻitaʻia atu ai i le ola e faavavau.
19. O le ā le fesili o le a tatou talanoaina i le mataupu o loo sosoo mai?
19 Ua tatou taʻua le Tusi Paia o le tusi lea o loo iai le poto e uiga i le Atua. Peitai, e faapefea ona tatou iloa o lea tusi, e lē o se tusi o se atamai faaletagata, ae o se isi atamai e sili atu? O le a tatou talanoaina lenei fesili i le mataupu o loo sosoo mai.
SEʻI TOFOTOFO LOU ILOA
Aisea e mafai ai e le poto e uiga i le Atua ona taʻitaʻia ai oe i le fiafiaga e faavavau?
E faapeī le olaga o le a iai pe a oo mai le Parataiso faalelalolagi?
Aisea o le a aogā ai ia te oe le aveina i fale i le taimi lenei, o le poto e uiga i le Atua?
[Fesili mo le Suʻesuʻega]
