Mataupu 18

Ia Fai ma Ou Sini le Auauna Atu i le Atua e Faavavau

1, 2. O le ā e manaomia e ese mai le mauaina o le poto e uiga i le Atua?

SEʻI faaāta i lou mafaufau o loo e tū nei i luma o se potu o loo teu ai le tele o ni oloa tāua, ae o loo loka lona faitotoa. Seʻi faapea la ua tuu atu ia te oe le ki e le tagata o loo puleaina lea potu, ma faapea atu e pule oe i ni oloa tāua e te manao e ave. O le a lē aogā lena ki ia te oe seʻi vaganā ua e faaaogaina. I se tulaga talitutusa, e tatau ona e faaaogaina le poto pe afai o le a e manuia ai.

² Ua sili ona moni lenei mea i le poto e uiga i le Atua. Auā foi, o le uiga o le poto saʻo e uiga ia Ieova le Atua ma Iesu Keriso, o le ola e faavavau lea. (Ioane 17:3) Peitai, o lena faamoemoe e lē mafai ona faataunuu i le tau ina maua o le poto. E pei lava ona e faaaogaina se ki e tāua tele, e faapena foi ona e manaomia ona faatatauina le poto e uiga i le Atua i lou olaga. Na fetalai Iesu, o i latou o ē faia le finagalo o le Atua o le a “sao atu i le malo.” O na tagata taitoatasi o le a faaeaina e auauna atu i le Atua e faavavau!—Mataio 7:21; 1 Ioane 2:17.

3. O le ā le finagalo o le Atua mo i tatou?

³ Pe afai ua iloa po o le ā le finagalo o le Atua, e tāua tele la le faatinoina loa. Faamata e te iloa po o le ā le finagalo o le Atua mo oe? E mafai ona tāaofai lelei i upu nei: Ia faataʻitaʻi atu ia Iesu. Ua taʻu mai e le 1 Peteru 2:21 ia i tatou e faapea: “Na valaauina outou ona o lea lava mea; auā na tigaina Keriso lava mo outou, ua tuuina mai ai e ia le faaaʻoaʻo mo outou, ina ia outou mulimuli atu i ona tulagāaao.” O le faia la  o le finagalo o le Atua, e manaomia ai ona e matuā mulimulituʻi atu i le faaaoaoga a Iesu, i le tele e te mafaia. O le auala lena e te faatatauina ai le poto e uiga i le Atua.

LE AUALA NA FAAAOGĀ AI E IESU LE POTO E UIGA I LE ATUA

4. Aisea ua tele ai le silafia o Iesu e uiga ia Ieova, ma ua faapefea ona ia faaaogaina lenei poto?

⁴ E sili atu le vavalalata o le silafia e Iesu Keriso o le poto e uiga i le Atua nai lo le iloa e isi. Na iai o ia ma galulue faatasi ma Ieova le Atua i le lagi mo le tele o tausaga a o lei afio mai i le lalolagi. (Kolose 1:15, 16) Ma o le ā na fai e Iesu i lena poto? Sa lei faamalieina o ia i le tau ina maua o le poto. Na ola aʻe Iesu ina ia ogatusa ma lena poto. O le mafuaaga lena na sili ai ona agalelei o ia, sa onosai, ma loto alofa i ana feutagaiga ma isi uso a tagata. Sa faataʻitaʻia ai la e Iesu lona Tamā faalelagi ma gaoioi e ogatusa ma lona poto e uiga i ala o Ieova ma ona uiga totino.—Ioane 8:23, 28, 29, 38; 1 Ioane 4:8.

5. Aisea na papatisoina ai Iesu, ma na faapefea ona soifua aʻe o ia e ogatusa ma le uiga o lona papatisoga?

⁵ O le poto foi na iai ia Iesu, lea na uunaia ai o ia e faia se laasaga e sili ona tāua. Na afio atu o ia mai Kalilaia e agaʻi i le Vaitafe o le Ioritana, ma o i inā na papatisoina ai o ia e Ioane. (Mataio 3:13-15) O le ā na faaatagia mai e le papatisoga o Iesu? Ona o ia o se tagata Iutaia, o lona uiga sa fanau mai o ia i se nuu ua uma ona tuuina atu i le Atua. O lea la, mai le taimi o lona fanau mai, ua tuuina atu ai Iesu. (Esoto 19:5, 6) O lona gauai atu e faia le papatisoga, na ia ofoina atu ai o ia lava ia Ieova ina ia faia le finagalo tauatua, lea na faatulagaina na te faia i lea taimi. (Eperu 10:5, 7) Ma sa faataunuuina e Iesu le uiga o lona papatisoga. Sa maelega o ia i le auaunaga ia Ieova, i le faailoa atu i tagata o le poto e uiga i le Atua, i so o se avanoa. Na fiafia Iesu i le faia o le finagalo o le Atua, ma na oo lava ina faapea mai o ia, sa faapei o sana meaʻai lenei mea.—Ioane 4:34.

6. Na faapefea ona faafitia e Iesu o ia lava?

⁶ Na silafia lelei e Iesu o le a sili ona tele ni mea e aafia ai o ia i le faia o le finagalo o Ieova—lea o le a oo lava ina uma ai  lona soifua. E ui i lea, na faafitia e Iesu o ia lava, i le faatulaga lua o ona manaoga totino. Na ia faamuamua pea le faia o le finagalo o le Atua. E tusa ai la ma lenei tulaga, e mafai faapefea ona tatou mulimuli atu i le faaaoaoga lelei atoatoa a Iesu?

O LAASAGA E TAʻITAʻIA ATU AI I LE OLA E FAAVAVAU

7. O ā nisi o laasaga e tatau i se tasi ona uia ina ia agavaa ai mo le papatisoga?

⁷ E lē tutusa i tatou ma Iesu, auā tatou te lē lelei atoatoa, ma e iai nisi laasaga e tāua tele e manaomia ona tatou laasia ona faatoʻā mafai lea ona tatou oo atu i le faiga mataina o le papatisoga. E amata mai lenei mea i le ave i fale i o tatou loto le poto saʻo e uiga ia Ieova le Atua ma Iesu Keriso. O le faia o lenei mea e uunaia ai i tatou e faaalia le faatuatua ma ia maua le alofa loloto mo le Atua. (Mataio 22:37-40; Roma 10:17; Eperu 11:6) O le tausisia o tulafono a le Atua, o ana mataupu silisili, ma ana tapulaa, e tatau ona uunaia ai i tatou e salamō, i le faaali atu o le faanoanoa tauatua ona o ni a tatou agasala sa fai. E taʻitaʻiina atu lenei i le faaliliuina, o lona uiga, o le fulitua mai ma lafoaia so o se ala sese sa tatou uia, a o tatou lei maua le poto e uiga i le Atua. (Galuega 3:19) O le mea moni, afai o loo tatou faia faalilolilo pea ni agasala nai lo le faia o le mea ua tonu, o lona uiga tatou te lē o fulitua moni, ma tatou te lē faavaleaina foi le Atua. E silafia mai e Ieova amioga pepelo uma.—Luka 12:2, 3.

8. O le ā le gaoioiga e tatau ona e faia pe afai ua e faanaunau e auai i le galuega o le talaʻia o le Malo?

⁸ Talu ai o lenei ua e aʻoaʻoina le poto e uiga i le Atua, pe e lē talafeagai ea la ona e iloiloina mataupu faaleagaga i se auala totino? Atonu o loo e naunau e taʻu atu i ou aiga, o au uo, ma isi tagata, mea o loo e aʻoaʻoina. Atonu ua uma ona e faia lenei mea, e oo foi ia Iesu, sa ia tufa atu le tala lelei i isi i ni tulaga sa lei fuafuaina. (Luka 10:38, 39; Ioane 4:6-15) Atonu la o lea ua e manao nei e faia atili nisi mea. O le a fiafia toeaina Kerisiano e talanoa atu ia te oe, ina ia faamautinoa ai pe ua e agavaa ma pe e te mafaia ona fai se sao i le galuega masani a  Molimau a Ieova, o le talaʻia o le Malo. Pe afai ua e agavaa ma e mafai, o le a faia e toeaina ni fuafuaga mo oe ina ia lua galulue faatasi ma se Molimau i le faiva. Sa usitaia e soo o Iesu ana faatonuga, ina ia latou faia ai la latou faiva i se auala e maopoopo. (Mareko 6:7, 30; Luka 10:1) O le ituaiga fesoasoani foi lena o le a aogā ia te oe pe afai e te auai i le faasalalauina atu o le feau o le Malo, mai lea fale i lea fale, ma i isi foi auala.—Galuega 20:20, 21.

9. E faapefea ona faia e se tagata le tuuina atu i le Atua, ma e faapefea i le tuuina atu ona aafia ai le olaga o lea tagata?

⁹ O le talaʻia o le tala lelei i ituaiga uma o tagata o loo i le oganuu a le faapotopotoga, o le auala lea e maua ai i latou o ē loto faamaoni, ma o se tasi foi lea o galuega lelei e faamaonia atu ai o loo e faatuatua. (Galuega 10:34, 35; Iakopo 2:17, 18, 26) O le auai e lē aunoa i sauniga faa-Kerisiano ma le faia o se sao uigā i le galuega talaʻi o ni auala foi na e faaalia atu ai ua e salamō ma liliu ese mai, ma ua e maumauai nei e ola e tusa ai ma le poto e uiga i le Atua. O le ā le isi laasaga fetaui e sosoo ai? O le faia lea o le tuuina atu ia Ieova le Atua. O le uiga o lenei mea, pe a faia sau tatalo mai lou loto, o le a e taʻu atu i le Atua, ua e tuuina atu ma lou loto malie ma lou loto atoa, lou ola ia te ia e faia lona finagalo. O le auala lenei e te tuuina atu ai oe lava ia Ieova, ma talia ai le amo agalelei a Iesu Keriso.—Mataio 11:29, 30.

LE UIGA O LE PAPATISOGA IA TE OE

10. Aisea e tatau ai ona e papatiso pe a uma ona e tuuina atu oe lava ia Ieova?

¹⁰ E tusa ai ma fetalaiga a Iesu, o i latou uma o ē avea ma ona soo e tatau ona papatisoina. (Mataio 28:19, 20) Aisea ua manaomia ai lenei mea pe a maeʻa ona e faia lou tuuina atu i le Atua? Talu ai o lea ua e tuuina atu oe ia Ieova, ua ia silafia ai e te alofa ia te ia. Ae mautinoa o le a e manao e faia atili se isi gaoioiga ina ia iloa ai e isi lou alofa mo le Atua. O le papatisoga la, o le a e maua ai se avanoa ina ia faailoa faalauaitele atu ai lou tuuina atu ia Ieova le Atua.—Roma 10:9, 10.

11. O le ā le uiga o le papatisoga?

¹¹ E anoanoai le tele o uiga faafaatusa o le papatisoga. A o  faatofuina ifo oe, pe “tanumia” i lalo i le vai, ua pei lena ua e oti mai le ituaiga o olaga sa e ola ai muamua. Pe a e ea aʻe nai le vai, ua pei lena ua e ea aʻe i se olaga fou, o se olaga ua pulea e le finagalo o le Atua ae e lē o ou lava manaoga. O le mea moni, e lē o le uiga faapea o le a e lē toe faia ni mea sese, auā o i tatou uma lava e lē lelei atoatoa ma o lea ua tatou agasala ai i aso taitasi. Peitai, i le avea ma auauna a Ieova ua tuuina atu ma papatisoina, ua e ulu atu ai i se faiā faapitoa ma ia. Talu ai ua e salamō ma ua e gauai atu ma le lotomaulalo i le papatisoga, ua finagalo malie ai Ieova e faamagaloina au agasala e faavae mai i le taulaga togiola a Iesu. O le papatisoga la e mauaina ai se loto fuatia ifo mamā i le silafaga a le Atua.—1 Peteru 3:21.

12. O le ā le uiga o le papatisoina (a) “i le suafa o le Tamā”? (e) ʻi le suafa o le Atalii’? (i) ʻi le suafa o le agaga paia’?

¹² Na poloaiina e Iesu ona soo ina ia latou papatiso atu i soo fou “i le suafa o le Tamā, ma le Atalii, ma le Agaga Paia.” (Mataio 28:19) O le ā na uiga i ai le fetalaiga a Iesu? O le papatisoga “i le suafa o le Tamā” e faaalia ai, o le tagata ua papatiso, ua ia ioe ma le loto atoa, o Ieova le Atua o ia Lē na Foafoaina Mea ma o ia tonu o le Pule Silisili Ese aoao. (Salamo 36:9; 83:18; Failauga 12:1) O le papatisoina ʻi le suafa o le Atalii’ o lona uiga ua faamaonia e lea tagata, o Iesu Keriso—ae maise lava i Lana taulaga togiola—ua na o le pau lena o le ala i le faaolataga ua saunia e le Atua. (Galuega 4:12) O le papatisoga ʻi le suafa o le agaga paia’ e taʻu mai ai, ua faamaonia e le tagata o loo papatiso, o le agaga paia o Ieova, po o lona mana galue, o le meafaigaluega lea a le Atua mo le faataunuuina o Ana fuafuaga, ma le tuuina atu o le malosi i Ana auauna ina ia faia ai Lona finagalo amiotonu i le auaufaatasiga ma Lana faalapotopotoga ua taʻitaʻia e Lona agaga.—Kenese 1:2; Salamo 104:30; Ioane 14:26; 2 Peteru 1:21.

PE UA E SAUNI MO LE PAPATISOGA?

13, 14. Aisea e lē tatau ai ona tatou fefefe e filifili ina ia auauna atu ia Ieova le Atua?

¹³ Talu ai o le papatisoga e telē lava sona uiga, ma o se  laasaga e sili ona tāua i le olaga o se tagata, po o se laasaga ea la e tatau ona e mataʻu i ai? E matuā leai lava! E ui o le filifiliga ina ia papatiso e lē tatau ona manatu māmā i ai, ae mautinoa lava o se filifiliga lea ua sili ona atamai ua e faia.

¹⁴ O le papatisoga ua faamaonia atu ai lau filifiliga ina ia auauna ia Ieova le Atua. Seʻi manatu i tagata o ē o loo e masani i ai. I ni auala eseese, pe ua lē o auauna ea i latou taitoatasi i se matai? O nisi ua auauna atu i oa. (Mataio 6:24) O isi ua matuā sulu ma le ulu i a latou galuega po o lo latou auauna ia i latou lava, e ala i le faasilisilia i le olaga, o le faamalieina o o latou lava manaoga. O isi foi o loo auauna atu i atua sese. Ae o lea ua e filifili e auauna atu i le Atua moni, o Ieova. E leai lava se isi e mafai ona ia faaalia mai se tele o le agalelei, ma le alofa mutimuti vale. Ua faamamaluina e le Atua tagata i le tuuina atu ia i latou o galuega aogā e taʻitaʻia atu ai i le faaolataga. Ua ia tauia ana auauna i le ola e faavavau. E mautinoa la, o le mulimuli atu i le faaaoaoga a Iesu ma tuuina atu lou ola ia Ieova, e lē o se laasaga e mataʻu ai. O le mea moni, ua na o lea le auala e faafiafiaina ai le finagalo o le Atua ma ua matuā talafeagai atoatoa.—1 Tupu 18:21.

15. O ā nisi o toʻatugā masani i le papatisoga?

¹⁵ Peitai, o le papatisoga e lē o se laasaga e uia ona o ni uunaiga mai isi tagata. O se mataupu totino i le va o oe ma Ieova. (Kalatia 6:4) A o e agaigai i luma faaleagaga, atonu ua e tau mānatu: “Se a ea se mea e vaoia ai aʻu e aua le papatisoina o aʻu?” (Galuega 8:35, 36) E te ono fesiligia oe lava, ʻPo o taofia ea aʻu ona o teteega mai le aiga? Po o oʻu aafia pea lava i se tulaga e lē faale-Tusi Paia po o le faia o le agasala? Pe lē ona o loʻu fefe ea ina neʻi lē toe fiafia mai tagata o loʻu nuu ia te au?’ O nisi nei o vala e tatau ona iloiloina, ae ia iloiloina i se tulaga e fetaui.

16. O le a faapefea ona aogā ia te oe le auauna atu ia Ieova?

¹⁶ E lē o se tulaga e fetaui le iloiloina na o vala o le a e faaaofia i le auauna atu ia Ieova, e aunoa ma le iloiloina o aogā e maua mai ai. E pei o se faataʻitaʻiga, seʻi manatunatu i le mataupu o teteega mai le aiga. Na folafola mai e Iesu faapea,  e tusa lava pe lē toe faatasia ona soo ma o latou tauaiga ona o le mulimuli atu ia te ia, ae o le a latou maua se aiga toatele faaleagaga. (Mareko 10:29, 30) O le a faaalia atu ia te oe e nei aumea talitonu le alofa faaleuso, e fesoasoani ai ina ia e onosaia sauāga, ma lagolagosua ia te oe i le ala i le ola. (1 Peteru 5:9) Ae maise lava, e mafai e toeaina o le faapotopotoga ona fesoasoani ia te oe ina ia e faafetaiaia faafitauli ma e taulau ai i le foiaina o isi luʻi. (Iakopo 5:14-16) E tusa ai o le lē toe fiafia mai o lenei lalolagi ia te oe, e lelei pe a e fesili ifo ia te oe lava, ʻO le ā lava se isi mea e mafai ona faatusatusa mai i le mauaina o le finagalo malie o Lē na Foafoaina le vateatea, ma fiafia mai ai o ia i le ituaiga o olaga ua ou filifilia?’—Faataoto 27:11.

IA E OLA E OGATUSA MA LOU TUUINA ATU MA LOU PAPATISOGA

17. Aisea e tatau ai ona e manatu i le papatisoga o se amataga lea nai lo o se mutaaga?

¹⁷ E tāua ona manatua, o le papatisoga e lē o le mutaaga lea o lou agaigai i luma faaleagaga. Ua faailogaina ai le amataga o se olaga atoa o le auauna atu i le Atua i le avea o se faifeau tofia ma o se tasi o Molimau a Ieova. E ui lava e matuā tāua tele le papatisoga, ae e lē o se faamautinoaga lea mo le faaolaina. Sa lei fetalai mai Iesu: ʻO tagata uma ua papatiso o le a faasaoina.’ Ae na ia fetalai: “A o lē tumau seia oo i le gataaga, e faaolaina lea.” (Mataio 24:13) O lea la, e tāua tele ai ona e muai sailia le Malo o le Atua, e ala i le avea o le mea e sili ona e manatu mamafa i ai i lou olaga.—Mataio 6:25-34.

18. Pe a mavae le papatisoga, o ā nisi o sini e tatau ona tuliloaina?

¹⁸ Ina ia e tumau i lau auaunaga ia Ieova, o le a e manao ai e faataatitia ni sini faaleagaga mo oe lava. O se tasi o sini e sili ona aogā o le faateleina lea o lou poto e uiga i le Atua e ala i sau suesuega totino e faifai pea i lana Afioga. Ia fuafua e faitau le Tusi Paia i aso taitasi. (Salamo 1:1, 2) Ia auai atu i sauniga faa-Kerisiano e lē aunoa, auā o le aufaatasiga e te maua i inā o le a fesoasoani e avatua ia te oe le malosi faaleagaga. E tusa ai o lau vaega, aisea e te lē sini ai ina ia fai ni au tali i sauniga a le faapotopotoga ma vivii atu ai ia Ieova ma saili e  faalaeiau atu i isi? (Roma 1:11, 12) O le isi sini atonu o le faaleleia o le uigā o au tatalo.—Luka 11:2-4.

19. O ā uiga e mafai e le agaga paia ona fesoasoani atu ia te oe ina ia e faaalia?

¹⁹ Ina ia e ola aʻe e ogatusa ma le uiga o lou papatisoga, e manaomia la ona e manatu mamafa e lē aunoa i mea o loo e faia, ia faataga le agaga paia o le Atua e faatupuina aʻe ia te oe uiga e pei o le alofa, le olioli, le filemu, le onosai, le mataalofa, le agalelei, le faatuatua, le agamalu, ma le pulea totino. (Kalatia 5:22, 23; 2 Peteru 3:11) Ia manatua, e foai atu e Ieova lona agaga paia ia i latou uma o ē tatalo atu i ai ma usiusitai ia te ia i le avea o ni ana auauna faamaoni. (Luka 11:13; Galuega 5:32) Ia tatalo atu i le Atua mo lona agaga ma ole atu ia te ia mo se fesoasoani i le faaalia o uiga e fiafia ai lona finagalo. O na uiga o le a manino atili mai i au upu ma lau amio a o e talia le taʻitaʻiga a le agaga o le Atua. O le mea moni, o tagata taitoatasi uma i le faapotopotoga Kerisiano o loo tauivi ina ia atiina aʻe “le tagata fou” ina ia atili ai ona faapei o Keriso. (Kolose 3:9-14) O i tatou uma lava ua fesagai ma luʻi eseese i le faia o lenei mea, auā e eseese uma tulaga o lo tatou agaigai i luma faaleagaga. Talu ai e te lē lelei atoatoa, e tatau ai ona e galue mamafa ina ia e maua uiga totino e pei o uiga o Keriso. Ia aua lava e te lotovaivai i lenei tulaga, auā e mafaia lena mea i le fesoasoani mai a le Atua.

20. I ā auala e mafai ona e faataʻitaʻi atu ai ia Iesu i le faiva?

²⁰ E tatau ona faaaofia i ou sini faaleagaga, le matuā faataʻitaʻi atili atu lea i le faaaoaoga olioli a Iesu. (Eperu 12:1-3) Sa naunau tele o ia i le faiva. Pe afai ua faaeaina oe ina ia auai i le galuega o le talaʻia o le Malo, ia aua la le tau ina fai e pei o se faiga masani e lē uigā. Saili ina ia e maua le faamalieina i le aʻoaʻo atu o isi e uiga i le Malo o le Atua e pei ona faia e Iesu. Ia faaaogā faatonuga na o loo saunia atu e le faapotopotoga e fesoasoani ina ia faaleleia atili ai lou avea ma faiaʻoga. Ma ia e mautinoa e mafai e Ieova ona avatu ia te oe le malosi e te faaauau ai pea i lau faiva.—1 Korinito 9:19-23.

21. (a) E faapefea ona tatou iloa e tāua ia Ieova tagata faamaoni uma ua papatisoina? (e) O le ā e faaalia ai e tāua le papatisoga mo lo tatou faasaoolaina atu i le sala o le faamasinoga a le Atua i luga o lenei faiga amioleaga o mea?

 ²¹ O le tagata ua tuuina atu ma papatisoina o loo taumafai faamaoni e mulimuli ia Iesu, e tāua o ia i le Atua. E suesueina uma e Ieova le faitau piliona o loto o tagata ma silafia ai le maua gatā o na tagata. E silasila o ia ia i latou o ni oloa tāua, o “mea ua manaomia.” (Hakai 2:7) Ua faaalia e valoaga a le Tusi Paia le silasila o le Atua ia i latou na o ni ē ua faailogaina e faasaoolaina atu i le sala o lana faamasinoga lea ua lē o toe umi ona oo mai lea i lenei faiga amioleaga o mea. (Esekielu 9:1-6; Malaki 3:16, 18) Pe ua ʻsaunia ma le tonu ea oe mo le ola e faavavau’? (Galuega 13:48) Po o lou faanaunauga sili ea ia faailogaina oe o sē o loo auauna i le Atua? O le tuuina atu ma le papatisoga o ni vaega o lena faailoga, ma e matuā manaomia mo le faasaoina.

22. O ā faamoemoe e mafai ona tulimatai e le “motu o tagata e toatele”?

²² Ina ua uma le Lolo tele, ona toe ulufafo lea o Noa ma lona aiga mai le vaa ma latou nofoia se lalolagi ua faamamāina. I le talitutusa ma aso nei, o “le motu o tagata e toatele” o ē o loo faatatauina le poto e uiga i le Atua i o latou olaga ma maua ai le finagalo malie o Ieova, ua ia i latou le faamoemoe o le faasaoola atu i le iuga o lenei faiga amioleaga o mea ma olioli ai i le ola e faavavau i se lalolagi ua faamamāina e faavavau. (Faaaliga 7:9, 14) O le a faapeī lena olaga?

SEʻI TOFOTOFO LOU ILOA

O le ā le auala e finagalo Ieova ina ia e faaaogaina ai lou poto e uiga ia te ia?

O ā nisi o laasaga e taʻitaʻia atu ai i le papatisoga?

Aisea ua lē avea ai le papatisoga o se mutaaga ae o se amataga?

E mafai faapefea ona tatou ola e ogatusa ma lo tatou tuuina atu ma le papatisoga?

[Fesili mo le Suʻesuʻega]

 [Ata i le itulau 172]

Pe ua e faia ea se tuuina atu i le Atua i le tatalo?

 [Ata i le itulau 174]

O le ā o taofia oe mai le papatisoina?