Mataupu 17

Ia Maua le Saogalemu i le Aufaatasiga ma Tagata o le Atua

1, 2. E faapefea ona faatusaina le tulaga o loo iai tagata i aso nei, i se vaipanoa na faatamaʻia e se afā?

SEʻI manatunatu faapea ua faatamaʻia uma i se afā matautia le vaipanoa lea o loo e alaala ai. Ua lē toe iai sou fale, ma ua leiloloa uma ai au meatotino. Ua tau lē lava meataumafa. O le tulaga ua tulai mai e foliga ua leai se faamoemoe o iai. Ae faafuasei loa ona taunuu ane ni uta o fesoasoani laveai. E anoanoai meaʻai ma ofu ua aumai ai. Ua fausia ai foi ma sou fale fou. E mautinoa lava o le a e matuā faafetaia le tagata o lē na ia foaiina mai nei sauniuniga.

² E iai se mea faapena o loo tupu foi i aso nei. Ua pei lena afā o le fouvalega na faia e Atamu ma Eva lea ua faapogaia ai se faatamaʻiaga tele i tagata. Na leiloa ai le aiga Parataiso o tagata. Talu mai lena taimi, ua lē taulau ai faiga malo faaletagata i le puipuia o tagata mai taua, o soligatulafono, ma le leai o se faamasinotonu. Ua lafoaia e lotu le anoanoai o tagata o loo matelaina mo ni meaʻai faaleagaga e aogā. Ae peitai, i le itu faaleagaga, o loo foaiina mai ai nei e Ieova le Atua, o meaʻai, o ofu, ma nofoaga e nonofo ai. E faapefea ona ia faia o lena mea?

“LE AUAUNA FAAMAONI MA LE MAFAUFAU”

3. Ua faapefea ona foai mai e Ieova sauniuniga mo tagata, e pei ona faaalia i ā faaaoaoga?

³ O meaalofa laveai e masani ona tufatufa mai i le lautele i se faiga ua faamaopoopoina, ma ua talitutusa lena ma le auala  o loo tufatufa mai ai e Ieova sauniuniga faaleagaga mo ona tagata. E pei o se faaaoaoga, pe tusa ma le 1,500 tausaga o avea le fanauga a Isaraelu ma “faapotopotoga a Ieova.” Sa iai i lena faapotopotoga i latou o ē na auauna o se auala a le Atua mo le aʻoaʻoina atu o ana Tulafono. (1 Nofoaiga a Tupu 28:8; 2 Nofoaiga a Tupu 17:7-9) I le uluai senituri T.A., na saunia mai ai e Ieova le faalapotopotoga Kerisiano. Na faavaeina faapotopotoga, ma sa latou gaoioi i lalo o le taʻitaʻiga a le vaega pule lea na faia aʻe i aposetolo ma toeaina. (Galuega 15:22-31) Ua faapena foi i aso nei, ua feutagai Ieova ma ona tagata e ala mai i se vaega ua faamaopoopoina. E faapefea ona tatou iloa lenei mea?

4. O ai ua faamaonia mai i aso nei le avea ma “auauna faamaoni ma le mafaufau,” ma ua faapefea ona faaavanoa mai sauniuniga faaleagaga a le Atua ina ia mauaina?

⁴ Na fetalai Iesu e faatatau i le taimi o lona faatasi mai i le mana o le Malo e faapea, o le a ia maua mai “le auauna faamaoni ma le mafaufau” o loo ia saunia “mea e ʻai i ona itu aso” mo Ona soo. (Mataio 24:45-47) Ina ua faatulai mai Iesu e avea ma Tupu faalelagi i le 1914, o ai sa faamaonia le avea ma lenei “auauna”? E mautinoa lava e lē o taʻitaʻi lotu o Kerisinetoma. O le toatele lava o i latou o loo fafagaina a latou lafu mamoe i faufauga na lagolagoina atili ai faiga malo a o latou lava atunuu i le Taua Muamua a le Lalolagi. Ae o meaʻai faaleagaga fetaui sa tufatufaina mai i le taimi tatau e le vaega o Kerisiano moni o ē na faauuina e le agaga paia o le Atua, ma na avea i latou o se vaega o ē na taʻua e Iesu, o “le lafu mamoe itiiti.” (Luka 12:32) O nei Kerisiano faauuina sa latou talaʻiina atu le Malo o le Atua nai lo le talaʻiina atu o ni faiga malo faaletagata. O le iuga, a o faagasolo tausaga, e faitau miliona “isi mamoe” o loo latou naunau atu i le amiotonu ua auaufaatasi atu i le “auauna” faauuina ina ia faatinoina le tapuaiga moni. (Ioane 10:16) I le faaaogaina o le “auauna faamaoni” ma lana Vaega Pule i aso nei, ua taʻitaʻia ai e le Atua ona tagata ua faamaopoopoina, ina ia latou saunia faaleagaga o meaʻai, o ofu ma nofoaga e nonofo ai mo i latou uma o loo latou manaomia nei sauniuniga.

 ʻO MEAʻAI I LE TAIMI TATAU’

5. O le ā le tulaga faaleagaga o loo iai i le lalolagi i aso nei, ae o le ā o loo faia e Ieova i lenei mea?

⁵ Na fetalai Iesu: “E le na o mea e ʻai e ola ai le tagata, a o afioga uma e tulei mai i le fofoga o le Atua.” (Mataio 4:4) Ae peitai e faanoanoa, ona o le aofaiga tele o tagata latou te lē o fia uaʻi atu i tuleiga a le Atua. E pei ona valoia mai e le perofeta a Ieova o Amosa e faapea, e iai “le oge . . . e le se oge i mea e ʻai, po o se gālala i le fia inu vai, a o le oge i le faalogologo i afioga a Ieova.” (Amosa 8:11) E oo lava i tagata e sili atu ona mapolotu, ua oge faaleagaga i latou. Ae peitai, o le finagalo o Ieova ina ia “faaolaina o tagata uma lava, ma ia oo ina iloa lelei le upu moni.” (1 Timoteo 2:3, 4) E tusa ai la o lena mea, ua ia sauniunia ai le anoanoai o meaʻai faaleagaga. Ae o fea e mafai ona maua i ai na meaʻai?

6. Na faapefea ona fafagaina faaleagaga e Ieova ona tagata i taimi ua tuanai?

⁶ I le faagasologa o talafaasolopito, ua aumaia ai e Ieova meaʻai faaleagaga i ona tagata i le avea o i latou o se vaega. (Isaia 65:13) E pei o se faataʻitaʻiga, na faapotopoto e ositaulaga Isaraelu o tane, o fafine, ma tamaiti i se vaega ina ia aʻoaʻoina faatasi ai i latou i le Tulafono a le Atua. (Teuteronome 31:9, 12) I lalo o le taʻitaʻiga a le vaega pule, na faamaopoopoina ai faapotopotoga e Kerisiano o le uluai senituri, ma faia ai a latou sauniga mo le aʻoaʻoina ma le faalaeiauina o i latou uma. (Roma 16:5; Filemoni 1, 2) O loo faataʻitaʻi atu foi Molimau a Ieova i lenei faatulagaga. Ua valaaulia ai ma le faaaloalo oe ina ia e auai atu i a latou sauniga uma.

7. Ua faapefea i le auai e lē aunoa i sauniga faa-Kerisiano ona fesootai atu i le poto ma le faatuatua?

⁷ O le mea moni lava, atonu ua e aʻoaʻoina le tele o mea i lau suesuega totino o le Tusi Paia. Atonu foi ua fesoasoani atu se tasi ia te oe. (Galuega 8:30-35) Ae peitai e ono faatusaina lou faatuatua i se laau o le a ola faalautagitagi ma pē atu pe afai e lē tausia lelei. E tatau ai la ona e mauaina se fafagaina tatau faaleagaga. (1 Timoteo 4:6) O sauniga faa-Kerisiano ua  sauniunia ai se polokalame faifai pea o faatonuga ua fuafuaina mo le fafagaina o oe i le itu faaleagaga ma fesoasoani atu ai ia te oe ina ia e tuputupu aʻe pea i le faatuatua a o faateleina aʻe lou poto e uiga i le Atua.—Kolose 1:9, 10.

8. Aisea ua faalaeiauina ai i tatou ina ia auai atu i sauniga a Molimau a Ieova?

⁸ E iai foi se isi fuafuaga tāua tele o na sauniga. Na tusi mai Paulo e faapea: “Ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou.” (Eperu 10:24, 25) O le upu Eleni ua faaliliuina i le “taufaatupu” e mafai foi ona faauigaina i le “faamaʻai.” Ua faapea mai se faataoto faale-Tusi Paia: “E faamaʻai e le uamea le uamea. E faapea foi ona faamaʻaiina e le tasi tagata le isi.” (Faataoto 27:17, NW) E manaomia e i tatou uma lava ona “faamaʻaiina” pea. O omiga i aso taitasi mai le lalolagi e mafai ona faamatatupaina ai lo tatou faatuatua. Pe a tatou auai la i sauniga faa-Kerisiano, ona iai lea o le fetufaaiga o faalaeiauga. (Roma 1:11, 12) E usitaia e tagata o le faapotopotoga le timaʻiga a le aposetolo o Paulo ina ia latou “feapoapoai ai, ma ia fefaamafanafanai,” ma o mea na e faamaʻaiina ai lo tatou faatuatua. (1 Tesalonia 5:11) O le auai e lē aunoa i sauniga faa-Kerisiano ua faaalia mai ai foi lo tatou alofa i le Atua ma ua tatou maua ai avanoa e vivii atu ai ia te ia.—Salamo 35:18.

“IA OOFU OUTOU I LE ALOFA”

9. Ua faapefea ona faataatia mai e Ieova le faaaoaoga i le faaaliaina atu o le alofa?

⁹ Na tusi mai Paulo e faapea: “A e o le sili i nei mea uma, ia oofu outou i le alofa, auā o le fusi lea e atoatoa ona lelei o le aufaatasiga.” (Kolose 3:14, NW) Ua sauniunia mai ma le agaalofa e Ieova lenei ofu mo i tatou. I le ā le auala? E mafai e Kerisiano ona faaalia le alofa auā o se tasi lea o fua o le agaga paia o Ieova o loo ia foaiina mai. (Kalatia 5:22, 23) Ua faaalia foi e Ieova lava ia le alofa e silisili e ala i lona auina mai o lona Alo pele e toatasi ina ia tatou mauaina ai le ola e faavavau. (Ioane 3:16) O lenei faaaliga silisili o le alofa ua saunia ai se ata mo i  tatou i le faaaliaina atu o lenei uiga. Na tusi mai le aposetolo o Ioane: “Afai ua faapea ona alofa mai o le Atua ia te i tatou, e tatau ai ona tatou fealofani.”—1 Ioane 4:11.

10. E mafai faapefea ona tatou maua aogā mai “le au uso uma”?

¹⁰ O lou auai atu i sauniga i le Maota o le Malo o le a e mauaina ai se avanoa e sili ona lelei e faaalia atu ai lou alofa. O i inā o le a tou feiloai ai ma le toatele o tagata eseese. E mautinoa o le a e lagona ai le mafana atu i le toatele o i latou i lena lava taimi. O le mea moni, e eseese uma lava uiga o tagata e oo lava ia i latou o loo auauna atu ia Ieova. Atonu i le taimi ua mavae, sa e alofia ai tagata o ē e lē tutusa mea tou te fiafia i ai po o tou uiga. Ae peitai, e tatau i Kerisiano ona “alolofa atu i le au uso uma.” (1 Peteru 2:17, NW) O lea la, ia avea ma ou sini le faamasani atu ia i latou o i le Maota o le Malo—e oo foi i tagata taitoatasi, e eseese tou tausaga, o tou uiga, o tou lanu, po o tou tulaga tau aʻoaʻoga. Atonu o le a e iloaina ai e tofu lava le tagata ma ona uiga mananaia e eseese ai.

11. Aisea e lē tatau ai fua ona e gaulemalie i le tele o uiga eseese i totonu o tagata o Ieova?

¹¹ O le matuā eseese o uiga o tagata i le faapotopotoga e lē tatau ona avea ma mafuaaga e te gaulemalie ai fua. E pei o se faataʻitaʻiga, seʻi vaai faalemafaufau i le anoanoai o ni taavale o loo tou faimalaga faatasi i luga o le auala. E lē tutusa le saoasaoa o loo ō ai taavale uma, e lē tutusa uma foi le malolosi o afi o taavale. O nisi taavale e mamao ni mea na amata faimalaga mai ai, ae o nisi e pei o oe, o lea e lei umi se taimi talu ona amata mai le faigamalaga. Ae peitai, e tusa lava la po o ā nei eseesega, ae o loo faimalaga uma lava i luga o le aualatele. Ua talitutusa lena ma tagata taitoatasi o ē o loo faia aʻe ai se faapotopotoga. E lē tutusa le vave e atiina aʻe ai e tagata uma uiga faa-Kerisiano. E lē gata i lea, e lē tutusa tulaga faaletino ma tulaga tau i faalogona o tagata uma. O nisi ua autausagā talu ona tapuai atu ia Ieova; o nisi o lea faatoʻā amata. Peitai ane, o loo agaʻi uma atu lava i latou i le ala i le ola e faavavau, “i le loto e tasi ma le manatu e tasi.” (1 Korinito 1:10) O lea la, seʻi mātau uiga lelei nai lo le mātau o vaivaiga o i latou i le faapotopotoga. O le faia faapea o le a e mauaina ai se  faalogona mafana, auā o le a e iloaina ai o loo iai moni le Atua i le aufaatasiga ma nei tagata. Ma e mautinoa lava o le nofoaga lenei o loo e manao e te iai.—1 Korinito 14:25.

12, 13. (a) Pe a faia e se tasi o le faapotopotoga se mea e tiga ai lou loto, o le ā e mafai ona e faia? (e) Aisea e tāua ai le aua neʻi teulotoina ni faalogona tiga?

¹² Talu ai e lē lelei atoatoa tagata uma, atonu e iai taimi e faia ai e se tasi o le faapotopotoga se tala po o se gaoioiga e faatiga ai i lou loto. (Roma 3:23) Na tusi mai le soo o Iakopo e faatatau i le tulaga moni e faapea: “O mea e tele e sese ai i tatou uma; a lē sese se tasi i le upu, o le tagata lea ua sao.” (Iakopo 3:2) O le a faapefea ona e tali atu pe afai e faatiga mai se tasi ia te oe? Ua faapea mai se faataoto a le Tusi Paia: “O le mafaufau [“faautauta,” NW] o le tagata e faagesegese ai lona ita; o lona viiga foi lea, ina ua le manatua lona agaleagaina.” (Faataoto 19:11) O le iai o le mafaufau lelei o lona uiga ia matuā vaʻili le mataupu, ia malamalama lelei i vala ua māfua ai ona tautala pe gaoioi le tagata i lena auala. O le toatele o i tatou e faaaogā tele le faautauta e faia ai faamolemolega mo a tatou lava mea sese. Aisea la e lē faaaogā ai foi lo tatou faautauta lena e malamalama ai ma faagalo ai uiga lē lelei atoatoa o isi?—Mataio 7:1-5; Kolose 3:13.

¹³ Ia aua foi neʻi galo e tatau ona tatou faamagalo atu i isi pe afai tatou te fia mauaina le faamagaloga a Ieova. (Mataio 6:9, 12, 14, 15) Afai tatou te faatinoina le upu moni, o le a tatou feutagai ai ma isi i se auala alofa. (1 Ioane 1:6, 7; 3:14-16; 4:20, 21) O lea la, pe a oo ia te oe se faafitauli mai se tasi o le faapotopotoga, ia e taumafai malosi e tetee atu i le teulotoina o ni faalogona tiga. Pe afai e faaofuina oe i le alofa, o le a e tauivi ai e foia le faafitauli, ma o le a e lē faatalatū ai e faatoese atu pe afai o oe lea na faapogaia le faaletonu.—Mataio 5:23, 24; 18:15-17.

14. O ā uiga e tatau ona faaofuina ai i tatou?

¹⁴ O o tatou ofu faaleagaga e tatau ona aofia ai isi uiga e sootaga vavalalata atu i le alofa. Na tusi mai Paulo e faapea: “Ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai.” O nei uiga, ua tāaofai  uma e le alofa, o se vaega o le “tagata fou” amio Atua. (Kolose 3:10, 12) Po o le a e faia ea se taumafaiga ina ia faaofuina ai oe i lenei auala? Ae maise lava pe afai e faaofuina oe i le alofa faaleuso, o le a e mauaina ai se faailoga e iloa ai oe o se soo o Iesu, auā na fetalai o ia e faapea: “O le mea lea e iloa ai e tagata uma lava o oʻu soo outou, pe afai ua outou fealofani.”—Ioane 13:35.

O SE NOFOAGA E SAOGALEMU AI

15. Ua faapefea ona faatusaina le faapotopotoga i se nofoaga malupuipuia?

¹⁵ Ua avea foi le faapotopotoga o se nofoaga malupuipuia, o se lafitaga malu e mafai ona e maua ai se faalogona saogalemu. O i inā e te maua i ai tagata e loto faamaoni o ē o loo taumafai malosi ina ia faia le mea ua tonu i le silafaga a le Atua. E toatele i latou ua lafoaia gaoioiga ma uiga leaga atonu o loo e tauivi e manumalo mai ai. (Tito 3:3) E mafai ona latou fesoasoani atu ia te oe, auā ua fautuaina i tatou ina ia “fesui i a outou avega e ave.” (Kalatia 6:2) O le mea moni, o le tuliloaina o le ala e taʻitaʻia atu ai i le ola e faavavau o lau lava lena avega tauave. (Kalatia 6:5; Filipi 2:12) Ae ua saunia e Ieova le faapotopotoga Kerisiano e avea ma auala ofoofogia o fesoasoani ma lagolagosua. E tusa lava po o le ā lou mafatia i ni ou faafitauli o loo iai, ae ua faaavanoa mai mo oe se sauniuniga tāua—o se faapotopotoga agaalofa o le a tu atu e lagolago ia te oe i taimi o mafatiaga po o le lē tagolima.—Faatusatusa i le Luka 10:29-37; Galuega 20:35.

16. O ā fesoasoani ua saunia e toeaina o le faapotopotoga?

¹⁶ E aofia ai ia i latou o ē o loo nofo sauni e lagolago atu ia te oe, o “mea alofa i tagata”—o toeaina tofia ia o le faapotopotoga, po o ovasia, o ē o loo latou leoleoina le lafu mamoe i le agaga o le lotomalie ma le naunautai. (Efeso 4:8, 11, 12; Galuega 20:28; 1 Peteru 5:2, 3) E faatatau atu ia i latou na, sa valoia e Isaia e faapea: “E fai foi le tagata e pei o se lafitaga i le matagi, ma se mea e malu ai i le afā; e pei o vaitafe i le nuu naumati, e pei o le paolo foi o le papa tele i le nuu ua le o i ai se vai.”—Isaia 32:2.

17. (a) O le ā le ituaiga o fesoasoani na manao faapitoa lava Iesu na te tuuina atu? (e) O ā sauniuniga na folafola mai e le Atua o le a ia faia mo ona tagata?

 ¹⁷ A o iai Iesu i le lalolagi, sa avea o se tulaga faanoanoa le lē iai o se vaavaaiga alofa mai taʻitaʻi lotu. Na matuā ootia o ia i le tulaga sa iai tagata, ma ia manao faapitoa ai lava e fesoasoani atu ia i latou i le itu faaleagaga. Na mutimuti vale le alofa o Iesu ia i latou auā “ua lailoa i latou ma tuulafoaiina, e pei o mamoe e leai so latou leoleo.” (Mataio 9:36) Maeu le talafeagai o lenei mea e faamatala ai le tulaga faigata ua iai i aso nei le toatele o ē o loo onosaia faafitauli ua fai ma faatiga loto, ae leai se tasi e liliu atu i ai mo se fesoasoani ma se faamafanafanaga faaleagaga! Peitai ua maua e tagata o Ieova ia fesoasoani faaleagaga, auā na ia folafola mai: “Ou te tofia foi mo i latou o leoleo mamoe e leoleo ia te i latou; latou te le toe fefefe, latou te le matatau foi, e leai so latou e le iloa.”—Ieremia 23:4.

18. Aisea e tatau ai ona tatou faalatalata atu i se toeaina pe a tatou manaomia se fesoasoani faaleagaga?

¹⁸ Ia faamasani atu i toeaina tofia o le faapotopotoga. Ua tele so latou poto masani i le faatatauina o le poto e uiga i le Atua, auā ua latou ausia agavaa mo le avea ma ovasia, ia o loo faatulaga mai i le Tusi Paia. (1 Timoteo 3:1-7; Tito 1:5-9) Aua le faatalatū e faalatalata atu i se tasi o i latou pe afai e te manaomia se fesoasoani faaleagaga ina ia foia ai se masani po o se uiga o loo feteenai ma mea o loo faafinagaloina e le Atua. O le a e iloaina ai o loo usitaia e toeaina le timaʻiga a Paulo e faapea: “Ia faamafanafana i e loto iti, ia fesoasoani i e o vaivai, ia outou onosai i tagata uma lava.”—1 Tesalonia 2:7, 8; 5:14.

IA OLIOLI I LE SAOGALEMU I LE AUFAATASIGA MA TAGATA O IEOVA

19. O ā faamanuiaga ua foaiina mai e Ieova ia i latou o ē sailia le saogalemu i totonu o lana faalapotopotoga?

¹⁹ E ui lava ina ua tatou ola nei i le lotolotoi o tulaga lē lelei atoatoa, ae ua saunia e Ieova mo i tatou i le itu faaleagaga, o meaʻai, o ofu, ma nofoaga e nonofo ai. O le mea moni, e tatau ona tatou faatalitali atu i le lalolagi fou ua folafola mai e le Atua, ina ia mafai ona tatou tofo ai i faamanuiaga o le parataiso  faaletino. Ae o i latou o loo avea ma vaega o le faalapotopotoga a Ieova o loo latou olioli nei i le saogalemu o le parataiso faaleagaga. E faatatau ia i latou na, sa vavalo Esekielu e faapea: “Latou te nonofo fifilemu [“saogalemu,” NW], e leai foi se na te faamatau ia te i latou.”—Esekielu 34:28; Salamo 4:8.

20. O le a faapefea ona toe foaiina mai e Ieova so o se mea atonu ua tatou faataulagaina ona o lana tapuaiga?

²⁰ Maeu so tatou loto faafetai ona o le faia e Ieova o sauniuniga alofa faaleagaga e ala mai i lana Afioga ma lana faalapotopotoga! Ia mafana atu i tagata o le Atua. Aua le faamaamulu i le faia faapea, ona o lou fefe i ni manatu o au uo po o ou tauaiga o le a latou manatu ai ia te oe i lou aʻoaʻoina o le poto e uiga i le Atua. Atonu e lē malilie nisi ona o lou auaufaatasi ma Molimau a Ieova ma le auai i sauniga i le Maota o le Malo. Ae o le a sili atu ona toe foaiina e le Atua ia te oe so o se mea ua e faataulagaina ona o lana tapuaiga. (Malaki 3:10) E lē gata i lea, na fetalai Iesu: “Ai se tasi ua ia tuua le fale, po o uso, po o tuafāfine, po o le tinā, po o le tamā, po o le fanau, po o fanua, ona o aʻu ma le tala lelei, e maua lava e ia taisautuaselau i lenei olaga, o fale, ma uso, ma tuafāfine, ma tinā, ma fanau, ma fanua, atoa foi ma sauaga, a o le ola atali e maua ai le ola faavavau.” (Mareko 10:29, 30) Ioe, e tusa po o ā mea ua e lafoaia po o ni mea o loo e tau onosaia, ae mafai lava ona e maua se faauooga fiafia ma le saogalemu faaleagaga i le aufaatasiga ma tagata o le Atua.

SEʻI TOFOTOFO LOU ILOA

O ai “le auauna faamaoni ma le mafaufau”?

O ā sauniuniga ua faia e Ieova mo le fafagaina faaleagaga o i tatou?

E mafai faapefea e i latou o loo i le faapotopotoga Kerisiano ona fesoasoani ia i tatou?

[Fesili mo le Suʻesuʻega]

 [Ata atoa i le itulau 165]