Mataupu 12

 Ia Tetee Atu i Agaga Leaga

1. Na faapefea ona tali atu Iesu ina ua fetaiai ma agaga leaga?

INA ua faatoʻā mavae lava le papatisoga o Iesu Keriso, ona afio atu loa lea o ia i le vaomatua o Iutaia ina ia tatalo ma manatunatu loloto ai. O i inā na taumafai ai Satani le Tiapolo ina ia solia e Iesu le tulafono a le Atua. Peitai, na teena e Iesu le maunu a le Tiapolo ma sa lei maileia ai o ia. Na fetaiai foi Iesu ma isi agaga leaga i le taimi o lana faiva i le lalolagi. Peitai, sa tele taimi na ia fetalai mamafa atu ai ma teena na agaga leaga.—Luka 4:1-13; 8:26-34; 9:37-43.

2. O ā fesili o le a tatou talanoaina?

² O faamatalaga i le Tusi Paia o loo faamatalaina ai na fetaiaiga, e ao ona faamaonia ai ia i tatou, e iai agaga leaga. Latou te taumafai e taʻitaʻiseseina tagata. E ui i lea, e mafai ona tatou teteeina na agaga leaga. Ae o fea e ō mai ai agaga leaga? Aisea ua latou taumafai ai e faaseseina tagata? Ma o ā auala o loo latou faaaogā ina ia ausia ai a latou faufauga? O le iloaina o tali i fesili e pei o fesili nei, o le a fesoasoani ia te oe ina ia e tetee atu ai i agaga leaga.

AGAGA LEAGA —LO LATOU AMATAGA MAI MA O LATOU FAANAUNAUGA

3. Na faapefea ona māfua mai Satani le Tiapolo?

³ Ua leva ona faia e Ieova le Atua le anoanoai o peresona agaga a o lei foafoaina tagata. (Iopu 38:4, 7) E pei ona faamatalaina i le Mataupu e 6, o se tasi o nei agelu na tupu aʻe sona faanaunauga ina ia tapuai atu tagata ia te ia nai lo le tapuai ia Ieova. I le taumafai e faataunuuina  lena faanaunauga, na tetee ai lenei agelu amioleaga, ma ia taufaaleaga ai i Lē na Foafoaina Mea, na oo lava ina ia taʻu atu i le uluai fafine e faapea e pepelo le Atua. Ua talafeagai ai la le faaigoa o lenei peresona agaga fouvale o Satani (o lē tetee) ma le Tiapolo (o lē taufaaleaga).—Kenese 3:1-5; Iopu 1:6.

4. Na faapefea ona agasala ni agelu i aso o Noa?

⁴ Mulimuli ane, na iai isi agelu na latou auai atu ia Satani le Tiapolo. I ona po o le tagata amiotonu o Noa, na lafoai ai e nisi o nei agelu la latou auaunaga i le lagi, ae na faia ni o latou tino faaletagata ina ia faamalieina ai o latou tuinanauga mo ni feusuaiga faaleituaiga ma fafine i le lalolagi. E mautinoa na faaaafia e Satani na agelu ina ia latou uia lena ala lē usiusitai. Na taʻitaʻiina atu ai i lo latou fanauina mai ai o ni fanau e itu lua sa faaigoaina o Nefelimi, o ē na avea o ni tagata tinoeese ma le faasauā. Ina ua aumaia e Ieova le Lolo tele, ona faaumatia ai lea o tagata amioleaga ma nei fanau ese a agelu lē usiusitai. Na sosola ese agelu fouvale mai le faaumatiaga, e ala i lo latou toe faamataaina o o latou tino faaletino ma toe foi atu i le nofoaga o agaga. Peitai na taofia e le Atua nei temoni, i le faia faapea e lē toe taliaina i latou ma sa tuua ai i latou i le pogisa faaleagaga. (Kenese 6:1-7, 17; Iuta 6) Ae ui i lea, o loo faaauau pea e Satani, “le alii o temoni,” ma ana agelu leaga la latou fouvale. (Luka 11:15) O le ā lo latou sini?

5. O le ā le faanaunauga sa iai ia Satani ma ana temoni, ma o le ā o loo latou faaaogā e maileia ai tagata?

⁵ O le faanaunauga leaga a Satani ma ana temoni o le faaliliueseina o tagata mai ia Ieova le Atua. O lea, ua faaseseina, faamataʻuina, ma sauāina ai e nei peresona amioleaga, tagata i le gasologa mai o talafaasolopito o tagata. (Faaaliga 12:9) O faaaoaoga faaonaponei ua faamautinoa mai ai, o uiga malolosi o temoni o loo sili atu ona feai i le taimi lenei nai lo se isi lava taimi. Ina ia latou maileia tagata, e masani ona faaaogā e temoni faiga faataulaitu i ona vala uma lava. Ua faapefea ona faaaogā e temoni lenei maunu, ma e te mafai faapefea ona e puipuia mai ai oe?

 LE AUALA O LOO TAUMAFAI AI AGAGA LEAGA E FAASESEINA OE

6. O le ā le faiga faataulaitu, ma o ā nisi o ona vala?

⁶ O le ā le faiga faataulaitu? O le fesootai lea ma temoni, po o agaga leaga, a lē i ni faiga tuusaʻo, po o le auala mai i se tagata e fesootai ma agaga. O le aogā o faiga faataulaitu i temoni, ua tutusa lea ma le aogā o le maunu i tagata tulimanu: E faatosina atu ai le manu ina ia maileia. Ma e pei lava ona faaaogā e se tagata tulimanu le anoanoai o ana maunu ina ia lavevea ai ni manu i lana mailei, e faapena foi i agaga leaga ona uunaia ni vala eseese o faiga faataulaitu ina ia latou puleaina ai tagata. (Faatusatusa i le Salamo 119:110.) O nisi o nei vala e aofia ai le faia o valovaloga, o faiga faataulaitu, o le saili i fetu o le lagi, e tuufaatasi ma faiga faafaipelē, o le faamalaiaina o isi tagata, o le saili atu i tagata o loo fesootai ma aitu, ma le fesili atu i tagata oti.

7. O le ā le taatele ua salalau atu i ai faiga faataulaitu, ma aisea ua lauolaola ai na mea e oo lava i atunuu o loo faapea mai o atunuu Kerisiano?

⁷ Ua matuā taulau le maunu, auā ua faatosina e faiga faataulaitu tagata i le lalolagi atoa. O i latou o loo nonofo i vaomatua e saili atu i latou i tamaloloa e fai a latou fofō faataulaitu, ma o tagata o loo galulue i ofisa i le taulaga e saili atu i latou i ē o loo saili i fetu. Ua oo lava foi i atunuu o loo faapea mai o i latou o Kerisiano, ua matuā olaola ai faiga faataulaitu. Ua faamaonia mai i suesuega e faapea, i le Iunaite Setete lava ia, pe tusa ma le 30 mekasini i lona aofaiga tuufaatasi e masani ona faasalalau atu e silia i le 10,000,000 kopi ua matuā faamatalaina ai ituaiga eseese o faiga faataulaitu. Ua faaaluina e tagata Pasili le silia i le 500 miliona tālā i faiga faataulaitu i tausaga taitasi. Ae o le 80 pasene o i latou o loo auai atu i nofoaga o tapuaiga faataulaitu i lena atunuu o ni tagata papatiso o le Lotu Katoliko o ē o loo auai atu foi i le Misasā. Ona o le faia e nisi taʻitaʻi lotu o faiga faataulaitu, ua toatele ai foi tagata lotu ua manatu, o le faatinoina o na mea ua taliaina lea e le Atua. Ae pe o le tulaga ea lena?

 LE POGAI UA TAʻUSALAINA AI E LE TUSI PAIA LE FAIA O FAIGA FAATAULAITU

8. O le ā le vaaiga faale-Tusi Paia i faiga faataulaitu?

⁸ Pe afai sa aʻoaʻoina oe e faapea, e iai nisi ituaiga o faiga faataulaitu o loo avea ma ni auala e fesootai atu ai i ni agaga lelei, atonu la o le a faateʻia oe e iloa le mea ua fai mai ai le Tusi Paia e uiga i faiga faataulaitu. Na lapataia tagata o Ieova e faapea: “Aua tou te faasaga atu ia i latou o i ai aitu vavalo, aua foi e te saili i taulāitu e leaga ai outou.” (Levitiko 19:31; 20:6, 27) Ua aumaia i le tusi o le Tusi Paia o le Faaaliga le lapataiga e faapea, o “e faataulāitu” o le a iu i latou i “le lepa e mu i le afi ma le teio, o le oti faalua [le oti e faavavau] lea.” (Faaaliga 21:8; 22:15) E lē taliaina e Ieova le Atua ia ituaiga uma o faiga faataulaitu. (Teuteronome 18:10-12) Aisea ua faapea ai?

9. Aisea e mafai ai ona tatou faapea atu, o feau o loo iai i aso nei mai le nofoaga o agaga, e lē o ni feau mai ia Ieova?

⁹ Na auina mai e Ieova agaga lelei, po o agelu amiotonu, ina ia fesootai ma ni nai tagata a o lei faamaeʻaina le tusiaina o le Tusi Paia. Talu mai ona maeʻa, ua saunia ai e le Afioga a le Atua taʻiala o loo manaomia e tagata ina ia o latou auauna atu ai ia Ieova i le tulaga na te taliaina mai. (2 Timoteo 3:16, 17; Eperu 1:1, 2) Na te lē lafoaia lana Afioga paia e ala i le tuu atu o ana feau e faaauala mai i taulaitu. O feau uma lava faapena i aso nei mai le nofoaga o agaga, e maua uma mai i agaga leaga. O faiga faataulaitu e mafai ona faataumaoi ai e temoni po o le oo lava ina uluitinoina e agaga leaga. O lea la, ua lapataia ma le alofa ai i tatou e le Atua ina ia aua neʻi o tatou aafia i so o se faiga faataulaitu. (Teuteronome 18:14; Kalatia 5:19-21) E lē gata i lea, pe afai tatou te faaauau pea ona fai mea faataulaitu, ae ua uma ona tatou iloa le silafaga a Ieova i lea mataupu, o le a tatou faaituau ai la ma agaga leaga fouvale, ma avea ai i tatou ma fili o le Atua.—1 Samuelu 15:23; 1 Nofoaiga a Tupu 10:13, 14; Salamo 5:4.

10. O ā valovaloga, ma aisea e ao ai ona tatou alofia na mea?

¹⁰ O se tasi o vala taatele o faiga faataulaitu, o valovaloga—o se taumafaiga ina ia iloa ni mea e uiga i le lumanai po o ni mea e lē o iloa, e ala i le fesoasoani mai a agaga. O nisi vala  o faiga faavalovaloga, o le saili atu lea i fetu, le sioa atu i se polo tioata manino, le faamatalaina o ni miti, le suʻeina o uiga o se tagata po o lona lumanai e ala i le faitau o laina tositosi o ona alofilima, ma le sailia o le lumanai e faaaogā ai pepa o se pelē ua faapitoa mo faiga faataulaitu. E manatu le toatele e lē leaga faiga faavalovaloga ae mālie, peitai ua faaalia i le Tusi Paia, o i latou o loo vavaloina le lumanai o loo faifai mea faatasi ma agaga leaga. E pei o se faaaoaoga, i le Galuega 16:16-19 o loo taʻua ai e faapea sa iai se “aitu vavalo” na mafai ai e se teine ona faia ana ʻvalovaloga.’ Ae peitai, o lona tomai i le vavaloina o mea i le lumanai na toe mou ese ina ua tuliesea le aitu. E mautinoa, o valovaloga o se maunu lea ua faaaogā e temoni e faalata atu ai tagata i la latou mailei.

11. E faapefea i taumafaiga ina ia fesootai atu i ē ua maliliu, ona maileia ai se tasi?

¹¹ Pe afai o loo e faavauvau ona o le maliu o sē e pele o lou aiga, po o se uo mamae, e faigofie ona ono faatosina ai oe i le isi maunu. E ono taʻu atu ia te oe e se tasi e faataulaitu se faamatalaga faapitoa po o le talanoa atu foi i se leo e foliga tonu lava i le leo o le tagata ua maliu. Ia faaeteete! O taumafaiga ina ia fesootai ma ē ua maliliu e ono maileia ai. Aisea? Auā e lē mafai e i latou ua maliliu ona tautatala. E pei ona atonu o loo e manatua, ua manino le faapea mai o le Afioga a le Atua, pe a maliu le tagata, “e foi atu i le eleele na i ai o ia; e faaumatia i lea lava aso ona manatunatu.” O ē ua maliliu, latou “te le iloa se mea.” (Salamo 146:4; Failauga 9:5, 10) E lē gata i lea, o le mea moni ua lauiloa temoni i lo latou faataʻitaʻia o le leo o lē ua maliu, ma avatu i lē faataulaitu ni faamatalaga e uiga i lē ua maliu. (1 Samuelu 28:3-19) O lea la, so o se tasi e “saili atu i e ua oti” ua maileia o ia e agaga leaga, ma ua gaoioi ai e tetee atu i le finagalo o Ieova le Atua.—Teuteronome 18:11, 12; Isaia 8:19.

UA UMA LE FAATOSINA AE UA OSOFAI

12, 13. O le ā le faamaoniga o iai e faapea, e maumauai pea temoni e tofotofoina ma faataugāina tagata?

¹² Pe a e usitaia le fautuaga a le Afioga a le Atua e faatatau i  faiga faataulaitu, o le a e teteeina ai le maunu a temoni. (Faatusatusa i le Salamo 141:9, 10; Roma 12:9.) Po o le uiga ea o lenei mea o le a lē toe taumafai atu agaga leaga e pueina oe? E matuā leai lava! Ina ua uma ona tofotofoina faatolu Iesu, ona “alu ese ai lea [o Satani] ia te ia seia i se aso.” (Luka 4:13) I se tulaga tutusa, o na agaga loto maaa, ua lē gata ina faatosina mai i tagata, ae ua latou osofaia foi i latou.

¹³ Seʻi toe manatu i la tatou uluai talanoaina o le osofaiga a Satani i le auauna a le Atua o Iopu. O le Tiapolo na faapogaia ai ona faatamaʻia ana lafumanu ma maliliu le toatele o ana auauna. Na oo lava ina fasiotia e Satani le fanau a Iopu. Ona sosoo ai lea ma lona taiaina o Iopu i se faamaʻi na sili ona tiga. Peitai sa tausisi pea Iopu i lona faamaoni i le Atua ma na matuā faamanuiaina ai o ia. (Iopu 1:7-19; 2:7, 8; 42:12) Talu mai lena taimi, ua faapogaia ai e temoni le faagūgūina ma faatauaso nisi tagata, ma ua faaauau pea ona latou matuā fiafia i le faapuapuagatiaina o tagata. (Mataio 9:32, 33; 12:22; Mareko 5:2-5) I aso nei, ua faaalia e lipoti e faapea, ua faataugāina i faiga faaleituaiga e temoni nisi tagata, ma matuā faaleagaina lava mafaufau o isi. Latou te uunaia foi isi ina ia fasioti i isi tagata ma ia pule i o latou lava ola, ma o na mea o ni agasala i luma o le Atua. (Teuteronome 5:17; 1 Ioane 3:15) Ae ui i lea, e faitau afe tagata na iai se taimi na maileia ai e nei agaga leaga, ae ua mafai ona saʻoloto mai ai. Na mafai faapefea ona latou faia lenei mea? Na latou mafaia e ala i le uia o ni laasaga e matuā tāua.

LE AUALA E TETEEINA AI AGAGA LEAGA

14. Ina ia ogatusa ma le faaaoaoga a Kerisiano Efeso o le uluai senituri, e mafai faapefea ona e teteeina agaga leaga?

¹⁴ O le ā se tasi o auala e mafai ona e teteeina ai agaga leaga ma puipuia ai oe ma lou aiga mai a latou mailei? Sa faia gaoioiga maumauai e Kerisiano i Efeso o le uluai senituri, o ē sa latou faia faiga faataulaitu a o lei avea ma tagata talitonu. Tatou te faitau i ai e faapea, “e toatele foi o e na fai togafiti faataulāitu, na faapotopoto e i latou a latou tusi, ma susunu ai i  luma o tagata uma.” (Galuega 19:19) E tusa pe e te lē o faia ni faiga faataulaitu, ae ia e lafoaia lava so o se mea e faaaogā i faiga faataulaitu po o ni mea e fesootai ma faiga faataulaitu. E aofia ai i nei mea tusi, o mekasini, o vitiō, o ata, o musika, ma isi mea ua fuafuaina mo faiga faataulaitu. E aofia ai foi ni faatagata e tāina, o tapui ma isi mea e ʻulaina mo se puipuiga, ma meaalofa e maua mai ia i latou o loo faia faiga faataulaitu. (Teuteronome 7:25, 26; 1 Korinito 10:21) Seʻi fai se faataʻitaʻiga: Na umi ona faataugā e temoni se ulugalii faaipoipo i Taialani. Ona la lafoaia ai lea o mea sa iai ni o latou fesootaiga ma faiga faataulaitu. O le ā le iuga? Ona la mapu ai lea mai osofaiga a temoni, ma mulimuli ane sa matuā la agaigai ai i luma i le itu faaleagaga.

15. O le ā le isi laasaga manaomia e faia, ina ia tetee ai i agaga leaga?

¹⁵ Ina ia teteeina agaga leaga, o se isi laasaga manaomia o le faatatauina lea o le fautuaga a le aposetolo o Paulo, ina ia ofuina le ofutau atoatoa faaleagaga na tuuina mai e le Atua. (Efeso 6:11-17) E tatau i Kerisiano ona faamalosia a latou puipuiga e tetee atu ai i agaga leaga. O le ā e aofia ai i lenei laasaga? Na faapea mai Paulo: “Ia faaopoopo i na mea uma ona tago atu i le talipupuni o le faatuatua, tou te mafai ai ona tinei o u fanafana mu uma lava a lē o loo leaga.” O le mea moni lava, o le tele o le malosi o lou faatuatua, o le tele foi lena o lou tomai i le teteeina atu o agaga leaga.—Mataio 17:14-20.

16. E mafai faapefea ona e faamalosia lou faatuatua?

¹⁶ E mafai faapefea ona e faamalosia lou faatuatua? E ala i le faaauau pea ona e suesueina le Tusi Paia ma faatatauina ana fautuaga i lou olaga. O le malosi o le faatuatua o se tasi e faalagolago tele i le mausalī o lona faavae—le poto lea e uiga i le Atua. Pe e te lē ioe ea, o le poto saʻo lea ua e mauaina ma ave i fale a o e suesueina le Tusi Paia, o lea ua atiina aʻe ai lou faatuatua? (Roma 10:10, 17) E lē taumatea la, a o e faaauauina lenei suesuega, ma faia ma au masani le auai i sauniga a Molimau a Ieova, o le a faamalosia atili ai lou faatuatua.  (Roma 1:11, 12; Kolose 2:6, 7) O le a avea o se puipuiga e sili ona malosi e tetee atu ai i osofaiga a temoni.—1 Ioane 5:5.

17. O ā isi laasaga atonu e manaomia i le teteeina o agaga leaga?

¹⁷ O ā nisi laasaga e ono faia foi e se tagata o loo maumauai e tetee atu i agaga leaga? Sa manaomia e Kerisiano Efeso se puipuiga auā sa latou nonofo i se aai sa taatele ai faiga faatemoni. O lea, na taʻu atu ai e Paulo ia i latou e faapea: “Ia faaauau pea i tatalo i le agaga i taimi uma lava.” (Efeso 6:18, NW) Talu ai o loo tatou ola i se lalolagi ua taatele ai faiga faatemoni, ua matuā manaomia ai le tatalo faatauanau atu mo le puipuiga a le Atua i le teteeina o agaga leaga. (Mataio 6:13) E aogā i lenei tulaga, le fesoasoani faaleagaga ma tatalo a toeaina tofia i le faapotopotoga Kerisiano.—Iakopo 5:13-15.

IA E TAU PEA E TETEE ATU I AGAGA LEAGA

18, 19. O le ā e mafai ona fai pe a toe faataugāina e temoni se tagata?

¹⁸ Peitai o nisi tagata, e tusa lava pe ua uma ona latou laasia nei laasaga autū, ae faataugā lava e agaga leaga. O se faataʻitaʻiga, na fai le suesuega faale-Tusi Paia a se tasi tamaloa i Côte d’Ivoire ma Molimau a Ieova, ma ia faatamaʻia uma ai ana tapui sa iai. Na uma lena, ona sologa lelei ai lea o lona agaigai i luma, ma tuuina atu lona ola ia Ieova, ma papatisoina. Peitai i le tasi le vaiaso talu ona uma lona papatisoga, ae amata foi ona toe faataugā o ia e temoni, ma sa taʻu atu e ni leo ia te ia, ina ia lafoai lona talitonuga fou lea ua iai. Pe afai e tupu lenei mea ia te oe, po o le uiga ea e faapea ua lē o puipuia oe e Ieova? Atonu e leai.

¹⁹ E ui lava sa iai le puipuiga a le Atua i le tagata lelei atoatoa o Iesu Keriso, ae na ia lagonaina lava le leo o le peresona agaga leaga o Satani le Tiapolo. Na faaalia mai e Iesu le mea e fai pe a fetaiai ma lena tulaga. Na ia taʻu atu i le Tiapolo: “Ina alu ese ia oe Satani!” (Mataio 4:3-10) E faapena foi la, ona tatau ona e teteeina le faalogologo atu i leo mai le nofoaga o agaga. Ia tetee atu i agaga leaga, e ala i lou valaau atu ia Ieova mo se fesoasoani. Ioe, ia tatalo leotele ma faaaogā le suafa o le Atua. Ua faapea mai le Faataoto 18:10: “O le suafa o  Ieova, o le ʻolo malosi lea; e sola atu i ai lē amiotonu, ona sao ai lea o ia.” Na faia e le tamaloa Kerisiano i Côte d’Ivoire lenei mea, ma na taofia ai loa e agaga leaga lo latou faataugāina o ia.—Salamo 124:8; 145:18.

20. I le aotelega, o le ā e mafai ona e faia ina ia teena ai agaga leaga?

²⁰ Ua faatagaina e Ieova agaga leaga ina ia iai pea, peitai ua ia faaalia lona mana, ae maise lava ina ia puipuia ai ona tagata, ma ua faalauiloaina atu ai lona suafa i le lalolagi atoa. (Esoto 9:16) Pe afai e te mafuta vavalalata atu pea i le Atua, o le a lē manaomia ai la ona e mataʻu i agaga leaga. (Numera 23:21, 23; Iakopo 4:7, 8; 2 Peteru 2:9) E faatapulaa mai lo latou mana. Sa faasalaina i latou i aso o Noa, sa lafoeseina i latou mai le lagi i se taimi e lei leva tele atu, ma o loo faatalitali nei mo lo latou faamasinoga faaiu. (Iuta 6; Faaaliga 12:9; 20:1-3, 7-10, 14) O le mea moni, o loo latou gatete i lo latou faaumatiaga lea o loo fotuai mai. (Iakopo 2:19) O lea la, e tusa lava pe taumafai agaga leaga e faatosina oe i sa latou maunu, po o le osofaia foi o oe i so o se auala lava, e mafai lava ona e teteeina i latou. (2 Korinito 2:11) Ia matuā teena so o se ituaiga o faiga faataulaitu, ia faatatauina le fautuaga a le Afioga a le Atua, ma ia saili atu mo le finagalo malie o Ieova. Ia aua neʻi faatuai i le faia o lenei mea, auā o lou ola e faalagolago i lou tetee atu i agaga leaga!

SEʻI TOFOTOFO LOU ILOA

Ua faapefea ona taumafai agaga leaga e taʻitaʻiseseina tagata?

Aisea ua taʻusalaina ai e le Tusi Paia faiga faataulaitu?

E mafai faapefea e se tagata ona saʻoloto mai agaga leaga?

Aisea e ao ai ona e teteeina pea agaga leaga?

[Fesili mo le Suʻesuʻega]

 [Ata i le itulau 110]

O le ā lau vaaiga i faiga faataulaitu i ona vala e tele?