Mataupu 16

Le Auala e Mafai Ona e Faalatalata Atu ai i le Atua

1. O ā mea ua manino mai le talitutusa ai o le tele o lotu?

A O ASIASI atu se tamaitai turisi i se atunuu i Asia, na matuā faateʻia o ia i tū masani faalotu na ia vaaia i se malumalu o le Lotu Puta. E ui e lē o faatusa o Maria po o faatusa o Keriso ia sa iai, ae o le tele o tū masani na faia ai, sa tutusa ma tū masani i lana lotu i lona atunuu. E pei o se faataʻitaʻiga, na ia vaaia ai le faaaogaina o rosalio ma tatalo e lagi faapese. E iai foi nisi ua latou faia ni faatusatusaga faapena. I atunuu i Sasae po o atunuu i Sisifo, o auala o loo taumafai tagata lotu e faalatalata atu ai i le Atua pe i mea o loo latou tapuai atu i ai e mataina le talitutusa lava.

2. Ua faapefea ona faamatalaina le tatalo, ma aisea e tatalo ai le toatele o tagata?

² E toatele e taumafai faapitoa e faalatalata i le Atua e ala i le tatalo atu ia te ia. Ua faamatalaina le tatalo e faapea o “se gaoioiga o fesootaiga a le tagata ma le paia—le Atua, o atua, le nofoaga mamana, po o ni malosiaga e sili atu i le malosi o le tagata.” (The New Encyclopædia Britannica) Peitai, pe a faalatalata atu i le Atua i le tatalo, e pau le mea e mafaufauina e nisi, o ni mea e mafai ona latou maua mai ai. E pei o se faaaoaoga, na fesili atu se tasi tamaloa i se Molimau a Ieova e faapea: “Pe afai e te tatalo mo aʻu, pe o le a foia ai ea faafitauli o loo feagai ma aʻu i loʻu aiga, i laʻu galuega, ma faaleleia ai loʻu ola mālōlōina?” E foliga mai o le manatu lena sa iai i le tamaloa, ae toatele o loo tatalo atu ae iloa ane o loo iai pea o latou  faafitauli. Tatou te ono fesili ai la, ʻAe aisea lava e tatau ai ona tatou faalatalata atu i le Atua?’

LE POGAI E AO AI ONA FAALATALATA ATU I LE ATUA

3. Ia te ai e tatau ona taulaʻi atu i ai a tatou tatalo, ma aisea?

³ O le tatalo e lē o se tū masani e leai sona uiga, ua lē o se auala foi e tau ina ia maua mai ai se mea. O se mafuaaga autū lava o le faalatalata atu i le Atua, ina ia maua ai se faiā vavalalata ma ia. O lea, e tatau ai i a tatou tatalo ona taulaʻi atu ia Ieova le Atua. Na faapea mai le faisalamo o Tavita: “E latalata mai Ieova ia i latou uma o e valaau ia te ia.” (Salamo 145:18) Ua valaaulia i tatou e Ieova ina ia tatou faia se faiā filemu ma ia. (Isaia 1:18) O i latou e tali atu i lenei valaaulia ua latou ioe faatasi ma le faisalamo o lē na faapea mai: “A o aʻu nei, ou te faalatalata atu i le Atua ou te lelei ai.” Aisea? Auā o i latou o ē faalatalata atu ia Ieova le Atua o le a olioli i le fiafiaga moni ma le filemu o le mafaufau.—Salamo 73:28.

4, 5. (a) Aisea e tāua ai le tatalo atu i le Atua? (e) O le ā le ituaiga o faiā e mafai ona tatou atiina aʻe ma le Atua e ala i le tatalo?

⁴ Aisea e tatalo ai fua i le Atua mo se fesoasoani pe afai na te ʻmuai silafia mai o tatou manaoga a o tatou lei ole atu ia te ia’? (Mataio 6:8; Salamo 139:4) O le tatalo e faaali atu ai lo tatou faatuatua i le Atua ma tatou te manatu ia te ia o le Puna o “mea lelei uma e foaifuaina mai, atoa ma mea alofa uma e atoatoa ona lelei.” (Iakopo 1:17; Eperu 11:6) E fiafia le finagalo o Ieova i a tatou tatalo. (Faataoto 15:8) E fiafia o ia e faafofoga mai i faaleoga uigā o lagona o le talisapaia ma le viiga, e pei lava ona fiafia se tamā e faalogologo atu i sona atalii laitiiti a o faaleo mai i ana lava upu lona loto faafetai. (Salamo 119:108) Pe afai e lelei le faiā a se tamā ma sona atalii, e faapena foi ona iai se fesootaiga mafana. O se tamaitiiti e alofagia e manao o ia e talanoa atu i lona tamā. E tulaga tutusa lena ma la tatou faiā ma le Atua. Pe afai tatou te matuā talisapaia mea o loo tatou aʻoaʻoina e uiga ia Ieova ma le alofa ua ia faaalia ia i tatou, o le a oo ai ia i tatou se faanaunauga malosi e faaleo atu o tatou lagona ia te ia e ala i le tatalo.—1 Ioane 4:16-18.

 ⁵ Pe a faalatalata atu i le Atua e Sili ona Maualuga, e tatau ona tatou faaalia ni uiga faaaloalo, peitai e leai se pogai e soona popole ai i ni upu patino tatou te faaaogaina. (Eperu 4:16) Ua iai pea lo tatou avanoa e fesootai atu ai ia Ieova. Ma e maeu se faaeaga ua iai o le mafai ona tatou ʻsasaa atu o tatou loto’ i le Atua e ala i le tatalo! (Salamo 62:8) O le talisapaia o Ieova e taʻitaʻiina atu ai i se faiā mafana ma ia, e pei o le faiā lea na olioli ai le tagata faamaoni o Aperaamo i le avea o ia ma uo a le Atua. (Iakopo 2:23) Peitai, pe a tatalo atu i le Alii Pule Silisili Ese aoao, e tatau ona tatou ausia mea o loo ia faafinagaloina ina ia mafai ai ona faalatalata atu ia te ia.

MEA E MANAOMIA INA IA MAFAI AI ONA FAALATALATA ATU I LE ATUA

6, 7. E ui lava e lē o tāpā e le Atua le totogia o se tupe ina ia faafofogaina ai a tatou tatalo, ae o le ā o loo ia faafinagaloina mai ia i tatou pe a tatou tatalo?

⁶ Pe manaomia ea ni tupe ina ia mafai ai ona faalatalata atu i le Atua? E toatele tagata ua latou totogiina se faifeau ina ia tatalo mo i latou. Ua oo lava ina talitonu nisi e faapea, o le a faafofogaina a latou tatalo e fuafua i le telē o le foai latou te faia. Peitai, e lē o faapea mai le Afioga a le Atua, e manaomia ona tatou ofoina atu ni tupe ina ia faalatalata atu ai ia Ieova i le tatalo. O ana sauniuniga faaleagaga ma faamanuiaga e maua mai i se faiā ma ia e ala i le tatalo, ua maua uma e aunoa ma se totogi.—Isaia 55:1, 2.

⁷ Ae o le ā la e manaomia? O se tasi o mea e matuā manaomia o se faanaunauga saʻo o le loto. (2 Nofoaiga a Tupu 6:29, 30; Faataoto 15:11) O o tatou loto, e tatau ona tatou faaalia ai le faatuatua ia Ieova le Atua o ia o “le faafofoga tatalo” ma o lē “na te tauia mai o e matuā saili ia te ia.” (Salamo 65:2; Eperu 11:6) E tatau foi ona ia i tatou se loto maulalo. (2 Tupu 22:19; Salamo 51:17) I se tasi o ana talafaatusa, na faaalia ai e Iesu Keriso e faapea, ina ua faalatalata atu i le Atua se aolafoga faatauvaa i lona loto maulalo, na sili atu ai lona amiotonu nai lo le Faresaio faamaualuga. (Luka 18:10-14) A o tatou faalatalata atu i le Atua i le tatalo, seʻi o tatou manatua, “e inosia e Ieova atoa uma e ua loto faamaualuga.”—Faataoto 16:5.

8. Pe a tatou mananao ina ia tali mai le Atua i a tatou tatalo, o ā la mea e tatau ona tatou faamamā mai ai?

 ⁸ Pe afai tatou te faanaunau ina ia tali mai le Atua i a tatou tatalo, e tatau la ona tatou faamamā mai i a tatou amioga agasala. Ina ua faalaeiauina e le soo o Iakopo isi ina ia latou faalatalata atu i le Atua, na ia fai atu atili: “Tagata agasala e, ina fafano ia o outou lima, o outou e faalotolotolua e, ina faamamā ia o outou loto.” (Iakopo 4:8) E oo lava i ē na fai mea sese e mafai ona latou maua se faiā filemu ma Ieova, pe afai latou te salamō ma lafoai o latou ala tuai o le olaga. (Faataoto 28:13) E lē mafai ona faafofogaina i tatou e Ieova pe afai e na ona tatou faatagā faafoliga atu ua faamamāina o tatou olaga. Ua faapea mai le Afioga a le Atua: “O fofoga o [Ieova] o loo faasaga i e amiotonu, e liliu mai foi ona taliga i a latou faatoga. A o fofoga o [Ieova] o loo faasaga ma le toasa i e fai amio leaga.”—1 Peteru 3:12.

9. E ala atu ia te ai e tatau ona tatou faalatalata atu ai ia Ieova, ma aisea?

⁹ Ua taʻua i le Tusi Paia: “E leai lava se tagata amiotonu i le lalolagi, o le na te faia amio lelei, ma le le agasala.” (Failauga 7:20) O lea atonu e te fesili ai: ʻE mafai la faapefea ona tatou faalatalata atu ia Ieova le Atua?’ Ua tali mai le Tusi Paia: “Pe afai foi e agasala se tasi, o ia te i tatou le fautua i luma o le Tamā, o Iesu Keriso lea, o lē amiotonu.” (1 Ioane 2:1) E ui lava ina tatou agasala, ae mafai pea ona tatou saʻoloto e faalatalata ma talanoa atu i le Atua e ala atu ia Iesu Keriso, o lē na maliu e avea ma togiola mo i tatou. (Mataio 20:28) Ua na o ia lava le ala e mafai ona tatou faalatalata atu ai ia Ieova le Atua. (Ioane 14:6) E lē tatau ona tatou lē amanaia le aogā o le taulaga togiola a Iesu, ma faia ai pea ma le loto i ai le agasala. (Eperu 10:26) Peitai, afai tatou te faia le mea silisili ina ia sola ese mai le leaga, ae teʻi ua toe sasi foi i nisi taimi, e mafai ona tatou salamō ma ole atu i le Atua mo le faamagaloga. Pe a tatou faalatalata atu ia te ia ma le loto maulalo, o le a ia faafofogaina mai i tatou.—Luka 11:4.

AVANOA E TALANOA ATU AI I LE ATUA

10. Pe a oo mai i le tulaga tau i tatalo, e faapefea ona tatou faataʻitaʻi atu ia Iesu, ma o ā nisi o taimi e lelei ai le tatalo totino atu o oe lava ia?

¹⁰ Na matuā faatāua lava e Iesu Keriso le la faiā ma Ieova.  O le mea lea, na faaavanoa ai e Iesu ni taimi e talanoa atu ai i le Atua i ni ana lava tatalo totino. (Mareko 1:35; Luka 22:40-46) E lelei pe a tatou faataʻitaʻia le faaaoaoga a Iesu ma ia faifai pea ona tatalo atu i le Atua. (Roma 12:12) O se mea fetaui le amata o le aso i se tatalo, ma i le taimi foi a o lei moe, e mafai ona tatou faafetai atu ma le tonu ia Ieova mo galuega o lea aso. A o faagasolo foi le aso, ia maumauai e faalatalata atu i le Atua ʻi taimi uma lava.’ (Efeso 6:18) E mafai foi ona tatou tatalo lē leoa i totonu o o tatou lava loto, i le iloaina e mafai ona faafofoga mai Ieova ia i tatou. O lo tatou talanoa patino atu o le tagata lava ia i le Atua e fesoasoani ia i tatou e matuā faamausalī ai la tatou faiā ma ia, ma o le tatalo atu ia Ieova i aso taitasi e fesoasoani lea ia i tatou ina ia atili ai ona tatou faalatalata atu ia te ia.

11. (a) Aisea e tatau ai le fai faatasi o le tatalo a le aiga? (e) O le ā le uiga o lou faapea atu “Amene” pe a faaiu se tatalo?

¹¹ E faafofogaina foi e Ieova tatalo e fai atu mo se vaega o ni tagata. (1 Tupu 8:22-53) E mafai ona tatou faalatalata i le Atua o se aiga, e ala lea i le faia e le ulu o le aiga o le tatalo. O lenei mea e faamalosia ai le liʻo o le aiga, ma o le a matuā moni ai foi Ieova i manatu o le fanau, a o latou faalogo atu i tatalo lotomaulalo o loo fai atu e o latou mātua i le Atua. Ae faapefea pe afai o loo tatalo se tasi e fai ma sui o se vaega atoa, atonu i se sauniga a Molimau a Ieova? Pe afai o loo tatou iai i le aofia, seʻi o tatou faalogologo lelei atu la i ai, ina ia mafai ai ona tatou faapea atu ma le loto atoa pe a faaiu le tatalo “Amene,” o lona uiga “Ia faapena lava.”—1 Korinito 14:16.

O TATALO E FAAFOFOGAINA E IEOVA

12. (a) Aisea e lē tali mai ai le Atua i nisi o tatalo? (e) Aisea e lē tatau ai ona tatou soona uaʻi naʻuā i o tatou lava manaoga a o tatalo?

¹² Atonu e manatu nisi e lē o tali mai le Atua i a latou tatalo e ui lava o loo latou tatalo ia te ia e ala atu ia Keriso. Ae na faapea mai le aposetolo o Ioane: “Pe afai tatou te ole atu ai se mea e tusa ma [le] finagalo [o le Atua], e faafofoga mai o ia ia te i tatou.” (1 Ioane 5:14) O lea la, e manaomia ona tatou ole atu i mea e tusa ma le finagalo o le Atua. Talu ai e naunau mai  o ia i lo tatou manuia faaleagaga, so o se mea lava la e aafia ai lo tatou tulaga faaleagaga e talafeagai ona avea ma mataupu tatou te tatalo atu ai. E tatau ona tatou teena le faaosoosoga o le matuā uaʻi atu lava i na o manaoga faaletino. E pei o se faataʻitaʻiga, e ui e talafeagai ona tatalo atu mo le malamalama ma le lototele e faafetaiaia ai ni maʻi, ae e lē tatau ona avea popolega o le soifua mālōlōina e faalavelavea ai o tatou manaoga faaleagaga. (Salamo 41:1-3) Ina ua iloa ane e se tasi fafine Kerisiano ua tau mātele i le popole i lona soifua mālōlōina, ona ia ole atu ai lea ia Ieova mo se fesoasoani ina ia saʻo lana vaai i lona maʻi. O le iuga, na lē toe avea ai faafitauli tau i lona soifua mālōlōina o se mataupu e soona popole naʻuā i ai, ae na ia manatu, ua foaiina atu ia te ia “le matuā tele o le mana.” (2 Korinito 4:7) Na faateleina lona faanaunauga ina ia avea o ia ma fesoasoani faaleagaga i isi tagata, ma galue ai loa faataimi atoa o sē e folafola atu le Malo.

13. E pei ona faaalia i le Mataio 6:9-13, o ā nisi o mataupu talafeagai e mafai ona tatou faaaofia i a tatou tatalo?

¹³ O ā ni mea tatou te ono faaaofia i a tatou tatalo ina ia fiafia ai Ieova e faafofogaina? Na aʻoaʻo atu e Iesu Keriso i ona soo le auala e tatalo ai. I le tatalo faaaʻoaʻo lea o loo faamauina i le Mataio 6:9-13, na ia faataatia ai se ata o mataupu e mafai ona talafeagai lo tatou tatalo atu ai. O le ā e tatau ona avea ma taulaʻiga autū o a tatou tatalo? E ao ona avea le suafa o Ieova le Atua, ma lona Malo, o mea e sili ona faatāuaina. E talafeagai foi le ole atu mo o tatou manaoga faaletino. E tāua foi le ole atu mo le faamagaloina o a tatou agasala ma le laveaiina o i tatou mai faaosoosoga ma lē o leaga, o Satani le Tiapolo. Sa lei finagalo Iesu e lagi faapese atu lenei tatalo po o le tautū lava i ai i taimi uma e aunoa ma le manatunatu i lona uiga. (Mataio 6:7) O le ā se ituaiga o faiā e iai pe afai e tautū atu pea se tamaitiiti i ana upu ua masani ai i taimi uma e talanoa atu ai i lona tamā?

14. E lē gata i tatalo o olega, ae o ā isi tatalo e tatau ona tatou ofoina atu?

¹⁴ E lē gata i olega ma faatoga mai le loto, ae tatau foi ona tatou ofoina atu tatalo o viiga ma le faafetai. (Salamo 34:1; 92:1;  1 Tesalonia 5:18) E mafai foi ona tatou tatalo atu mo isi. O tatalo e talosia ai o tatou uso ma tuafāfine faaleagaga o ē o loo mafatia po o sauāina, e faaalia ai lo tatou naunau atu ia i latou, ma e fiafia le finagalo o Ieova e faafofoga mai a o tatou faaleo atu na manatu. (Luka 22:32; Ioane 17:20; 1 Tesalonia 5:25) O le mea moni, na tusi mai le aposetolo o Paulo: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma outou mafaufau ia Keriso Iesu.”—Filipi 4:6, 7.

IA FINAFINAU I LE TATALO

15. O le ā e tatau ona tatou manatua pe a foliga ua lē o taliina mai a tatou tatalo?

¹⁵ E ui lava o loo e mauaina le poto e uiga i le Atua, ae atonu e te lagona e iai nisi taimi e lē o taliina ai au tatalo. E ono oo lena tulaga pe afai e lē o le taimi lena o finagalo le Atua e talia mai ai se tatalo. (Failauga 3:1-9) Atonu e faataga e Ieova le faaauau pea o se tulaga e tupu mo sina taimi, peitai e tali mai lava o ia i tatalo ma na te silafia foi le taimi e sili ona talafeagai e faia ai faapea.—2 Korinito 12:7-9.

16. Aisea e tatau ai ona tatou naunautai i le tatalo, ma e faapefea i le faia o lenei mea ona aafia ai la tatou faiā ma le Atua?

¹⁶ O lo tatou naunautai i le tatalo e faaali atu ai le naunau moni o o tatou loto i mea o loo tatou talanoa atu ai i le Atua. (Luka 18:1-8) E pei o se faaaoaoga, atonu tatou te ole atu ia Ieova e fesoasoani mai ia i tatou ina ia manumalo i se vaivaiga patino. O le finafinau la i le tatalo ma le gaoioi e ogatasi ma a tatou olega, e faaalia ai le moni o o tatou faanaunauga. E tatau ona tatou faapatino atu ma ia tatou faamaoni i a tatou olega. E sili ona tāua faapitoa le tatalo atu faatauanau pe a tatou fesagai ma se tofotofoga. (Mataio 6:13) A o tatou faaauau ona tatalo atu ma i le taimi lava e tasi o loo tatou taumafai e pulea o tatou faanaunauga agasala, o le a tatou mātauina ai le auala e fesoasoani mai ai Ieova ia i tatou. O lenei mea o le a faatupuina ai lo tatou faatuatua ma faamalosia ai la tatou faiā ma ia.—1 Korinito 10:13; Filipi 4:13.

17. O le a faapefea ona aogā ia i tatou le iai o se uiga o le fiafia e tatalo, i le auauna atu i le Atua?

 ¹⁷ O le atiina aʻe o se uiga o le fiafia e tatalo i le tuuina atu o le auaunaga paia ia Ieova le Atua, o le a tatou iloa ai tatou te lē o auauna atu ia te ia i so tatou lava malosi. O Ieova o ia o lē faataunuuina mea. (1 Korinito 4:7) O le amanaiaina o lenei mea o le a aogā lea ina ia tatou lotomaulalo ai ma o le a mafana atili ai la tatou faiā ma ia. (1 Peteru 5:5, 6) Ioe, ua ia i tatou ni mafuaaga lelei ina ia tatou finafinau ai i le tatalo. O a tatou tatalo naunautai ma le tautele o lo tatou iloaina o le auala e faalatalata atu ai i lo tatou Tamā alofa faalelagi, o le a matuā faafiafiaina ai o tatou olaga.

E LĒ PITOTASI LA TATOU FESOOTAIGA MA IEOVA

18. E mafai faapefea ona tatou faalogologo atu i le Atua?

¹⁸ Pe afai tatou te mananao e faafofogaina e le Atua a tatou tatalo, e tatau foi la ona tatou faalogo atu i mea o loo ia fetalai mai ai. (Sakaria 7:13) Na te lē o toe auina mai ana feau e ala mai i ni perofeta e faagaeeina e le Atua ma e mautinoa foi lona lē faaaogaina o ni faiga faataulaitu. (Teuteronome 18:10-12) Ae e mafai ona tatou faalogologo atu i le Atua e ala i le suesue i lana Afioga, le Tusi Paia. (Roma 15:4; 2 Timoteo 3:16, 17) E pei lava ona tatou manaomia ona faatupuina se mataʻai i meaʻai faaletino e lelei mo i tatou, ua faapena foi ona uunaia i tatou ina ia “naunau . . . i le suāsusu e le suia o le upu.” Ia faatupuina se faanaunauga mo meaʻai faaleagaga e ala i le faitauina o le Afioga a le Atua i aso taitasi.—1 Peteru 2:2, 3, LT; Galuega 17:11.

19. O ā aogā o le toe mafaufau loloto i mea e te faitau i ai i le Tusi Paia?

¹⁹ Ia toe mafaufau loloto i mea e te faitauina i le Tusi Paia. (Salamo 1:1-3; 77:11, 12) O lona uiga, ia toe manatunatu i le mataupu. Atonu e te faatusaina lenei mea i le faamalūina o meaʻai. E mafai ona e faamalūina meaʻai faaleagaga e ala i lou faafesootai atu o mea o loo e faitau ai i mea ua uma ona e iloa. Ia iloiloina le auala e mafai ai ona aogā le mataupu i lou olaga, po o lou manatunatu i mea ua faaalia mai ai e faatatau i uiga o Ieova ma ana feutagaiga. E ala la i suesuega totino, e te mafai ai ona ave i fale meaʻai faaleagaga o loo saunia e Ieova. O lenei  mea o le a e faalatalata atili atu ai i le Atua ma o le a fesoasoani lena ia te oe i lou faafetaiaia o faafitauli o aso taitasi.

20. Ua faapefea i le auai i sauniga faa-Kerisiano ona fesoasoani ia i tatou ina ia faalatalata atu ai i le Atua?

²⁰ E mafai foi ona e faalatalata atu i le Atua e ala i le faalogologo atu i lana Afioga o loo talanoaina i sauniga faa-Kerisiano, e pei lava ona sa matuā faalologo le fanauga a Isaraelu a o latou faapotopoto e faalogologo atu i le faitauina mai i le lautele o le Tulafono a le Atua. Sa matuā faauigā le faitauina o le Tulafono e i latou na fai ma aʻoaʻo i na taimi, ma o lena auala na fesoasoani ai i tagata sa faalogologo ina ia malamalama ma uunaia ai e faatatauina mea sa latou faalogo i ai. O lenei mea na maua ai le olioli tele. (Neemia 8:8, 12) O lea, ia fai ma au masani le auai i sauniga a Molimau a Ieova. (Eperu 10:24, 25) O le a fesoasoani lenei mea ia te oe ina ia e malamalama ai ma faatatauina le poto e uiga i le Atua i lou olaga ma o le a e maua ai le fiafia. O le avea ma vaega o le auuso Kerisiano i le lalolagi aoao o le a fesoasoani lena ia te oe e te mafana atu ai pea ia Ieova. Ma e pei ona o le a tatou talanoaina, e mafai ona e maua le saogalemu moni i totonu o le aufaatasiga o tagata o le Atua.

SEʻI TOFOTOFO LOU ILOA

Aisea e tatau ai ona e faalatalata atu ia Ieova?

O ā nisi o mea e manaomia ina ia mafai ona faalatalata atu ai i le Atua?

O ā mea e mafai ona e faaaofiaina i au tatalo?

Aisea e tatau ai ona e finafinau i le tatalo?

E mafai faapefea ona e faalogologo atu ia Ieova i aso nei?

[Fesili mo le Suʻesuʻega]

 [Ata atoa i le itulau 157]