Mataupu 13

Le Pogai e Maua ai le Fiafia pe a Ola i se Olaga Amio Atua

1. Aisea e mafai ai ona tatou faapea atu e maua le fiafiaga i ala o Ieova?

O IEOVA o “le Atua fiafia,” ma o lona finagalo ia e olioli i le olaga. (1 Timoteo 1:11, NW) O lou savali la i ona ala, e mafai ona aogā ia te oe ma e tofo ai i le filemu e matuā tele ma e faavavau, e pei o se vaitafe e tafe pea. O le savali i ala o le Atua e uunaia ai foi se tasi ia faia galuega faifai pea o le amiotonu, “e tusa lea ma peau o le sami.” O lenei mea e maua ai le fiafiaga moni.—Isaia 48:17, 18.

2. E mafai faapefea ona fiafia Kerisiano e ui lava ina faileagaina i latou i nisi taimi?

² O nisi ua tetee mai e faapea, ʻO nisi taimi e pagatia ai tagata ona o le faia o le mea ua tonu.’ E moni, ma o le mea lena na tupu i aposetolo o Iesu. Peitai, e ui ina sauāina, ae sa latou olioli ma faaauau pea ona ʻtalaʻi atu le tala lelei e uiga ia Iesu Keriso.’ (Galuega 5:40-42) E mafai ona tatou aʻoaʻoina ni lesona tāua mai lenei mea. O se tasi o na lesona, o lo tatou ola i se olaga amio Atua e lē fai ma faamautinoaga e faapea o le a faia lelei pea i tatou i taimi uma. Na tusi mai le aposetolo o Paulo: “O i latou uma foi o e loto ina nonofo ma le amio Atua ia Keriso Iesu, e sauaina i latou.” (2 Timoteo 3:12) O le mafuaaga mo lenei mea, ona o loo tetee atu Satani ma lana lalolagi ia i latou o ē o loo ola i se olaga amio Atua. (Ioane 15:18, 19; 1 Peteru 5:8) Peitai e lē faalagolago le mauaina o le fiafiaga moni i mea o loo i fafo atu o le tagata. Nai lo lea, e maua mai i le talitonu maumauai e faapea, o loo tatou faia se mea e saʻo ma ua tatou maua ai le finagalo malie o le Atua.—Mataio 5:10-12; Iakopo 1:2, 3; 1 Peteru 4:13, 14.

3. E tatau faapefea ona aafia le olaga o se tagata i lana tapuaiga ia Ieova?

 ³ O loo iai tagata o ē manatu, e mafai ona latou maua le finagalo malie o le Atua i le faia o le tapuaiga mai lea taimi i lea taimi, ae mafai ona latou faagalo o ia i isi taimi. E lē faapena le tapuaiga moni ia Ieova le Atua. E aafia ai le amio a le tagata i vaega uma o lona olaga, mai lea aso i lea aso, mai lea tausaga i lea tausaga. Ona o lena mafuaaga ua taʻua ai foi lea tapuaiga o “Le Ala.” (Galuega 19:9; Isaia 30:21) O le ola i se olaga amio Atua, e manaomia ai ona tatou tautala ma gaoioi e ogatusa ma le Afioga a le Atua.

4. Aisea e aogā ai le faia o ni suiga ina ia mafai ona ola e tusa ma ala o le Atua?

⁴ Pe afai e iloa e tagata aʻoga fou o le Tusi Paia le manaomia ona faia ni suiga i o latou olaga ina ia faafiafia ai Ieova, atonu o le a latou tau mānatu, ʻPe aogā moni ea le ola i se olaga amio Atua?’ E mafai ona e mautinoa e aogā moni. Aisea? Auā o “le Atua, o le alofa lava ia,” o ona ala la ua fuafua mo lo tatou manuia. (1 Ioane 4:8) E atamai foi le Atua ma na te silafia mea e sili ona lelei mo i tatou. Ona o Ieova le Atua o ia o lē e ona le malosi uma lava, e mafai ona ia faamalosia ai i tatou e faataunuu o tatou faanaunauga e faafiafia o ia e ala i le lafoaia o se faiga leaga. (Filipi 4:13) Seʻi o tatou talanoaina nisi o mataupu silisili ua aofia ai i le olaga amio Atua ma tilofaia le auala e mafai e nei mea ona tatou fiafia ai pe a faatatauina.

O LE FAAMAONI E IU I LE FIAFIAGA

5. O le ā ua fai mai ai le Tusi Paia e faatatau i le pepelo ma le gaoi?

⁵ O Ieova o “le Atua faamaoni.” (Salamo 31:5) E mautinoa e te faanaunau e mulimuli i lana faaaoaoga ma e te manao ina ia lauiloa oe o se tagata e tautala faamaoni. O le faamaoni e maua ai e se tasi lagona o lona faaaloalogia ma lona taʻuleleia o ia lava. E ui i lea, ona o le taatele o le lē faamaoni i lenei lalolagi agasala, ua manaomia ai ona faamanatu atu i Kerisiano le mea lenei: “Ia tautalatala faamaoni taitasi ma le la te tuaoi . . . O lē gaoi aua neʻi toe gaoi, a e lelei ina faamalosi o ia i galuega . . . ia maua e ia se mea e avatu i e ua matitiva.” (Efeso 4:25, 28) O Kerisiano o ni tagata galulue latou te faia galuega faamaoni i aso taitasi. E lē mafai ona latou aveina se mea e patino i lo latou pule, seʻi vaganā ua ia avatu sana faatagaga. Po o le galuega, po o le aʻoga,  po o le aiga, e tatau i se tagata tapuai a Ieova ona ʻfaamaoni i mea uma lava.’ (Eperu 13:18) So o se tasi e fai ma ana masani le pepelo po o le gaoi e lē mafai ona ia maua le finagalo malie o le Atua.—Teuteronome 5:19; Faaaliga 21:8.

6. E ono mafai faapefea e le faamaoni a se tagata amio Atua ona aumaia ai le viiga ia Ieova?

⁶ O le faamaoni e iu i faamanuiaga e tele. O Selina o se fafine mativa mai Aferika ua oti lana tane, o lē e alofa ia Ieova le Atua ma ana mataupu silisili amiotonu. I se tasi aso, na ia maua ai se ato o loo iai se tusitupe ma se aofaiga tele o se tupe. Ona ia suʻe lea i le tusi telefoni ma maua ai le tagata e ana le ato—o se tagata e iai sona faleoloa, ma na gaoia e se tagata ana mea. Sa lē talitonu le vaai a le tamaloa, ona e ui ina sa faamaʻimaʻi Selina, ae na ia asiasi atu i le tamaloa ma toe faafoi i ai le ato ma mea uma na iai. Na faapea mai le tamaloa: “O le ituaiga o faamaoni lenei e tatau ona tauia.” Ona ia tuuina atu lea o se tupe mo le fafine. O le mea na sili ona tāua, auā sa viiviia ai e lenei tamaloa le lotu a Selina. Ioe, o gaoioiga faamaoni ua faamatagofieina ai le aʻoaʻoga a le Tusi Paia, e faamamaluina ai Ieova le Atua, ma e aumaia ai le fiafia i ona tagata tapuai.—Tito 2:10; 1 Peteru 2:12.

O LE LIMAFOAI E IU I LE FIAFIAGA

7. O le ā ua sese ai le taalo tupe?

⁷ E iai le fiafiaga i le limafoai, ae o tagata matapeapea o le a lē “fai mo latou tofi le malo o le Atua.” (1 Korinito 6:10) O le faiga taatele o le matapeapea, o le taalo tupe, o se taumafaiga ia maua ni tupe faasili ae matitiva ai isi. E lē talia e Ieova ē “matapeapea ina ia maua mea ma le lē faamaoni.” (1 Timoteo 3:8, NW) E oo lava i atunuu e faataga ai faaletulafono le taalo tupe, ma o loo tau ina taaloalo ai se tagata e aunoa ma se manao ia maua mai ai ni tupe, e mafai lava ona oo ina puleaina o ia ma ia lagolago atili ai lea faiga, ua faaleagaina ai le tele o ola. E masani ona aumaia e le taalo tupe tulaga faigata i le aiga o lē o loo taalo ai, atonu o le a itiiti ai se tupe e totoe ia i latou mo le faatauina o mea manaomia e pei o meaʻai ma lavalava.—1 Timoteo 6:10.

8. Na faapefea ona faataatia e Iesu se faaaoaoga lelei o le limafoai, ma e mafai faapefea ona tatou limafoai?

⁸ Ona o le limafoai o Kerisiano, ua latou olioli i le fesoasoani atu i isi, ae maise lava uso talitonu o loo iai le manaomia.  (Iakopo 2:15, 16) A o lei afio mai Iesu i le lalolagi, sa ia mātauina ai le aaofoai o le Atua i tagata. (Galuega 14:16, 17) Na foai mai e Iesu lava ia lona taimi, o ona tomai, e oo lava i lona soifua, e sui aʻi tagata. Ua matuā agavaa ai la o ia e faapea mai: “E sili le manuia [“fiafia,” NW] o le na te foai atu, i lo le na te talia mai.” (Galuega 20:35) Na viiviia foi e Iesu le fafine mativa ua oti lana tane, o lē na ia limafoai ma tuu i le pusa teutupe i le malumalu nai tupe iti e lua, auā na ia foai atu “ana mea uma e ola ai.” (Mareko 12:41-44) Ua saunia e tagata Isaraelu anamua ma Kerisiano o le uluai senituri ni faaaoaoga o le limafoai e faia ma le olioli, i le lagolagosua atu faaletino i le faapotopotoga ma le galuega o le Malo. (1 Nofoaiga a Tupu 29:9; 2 Korinito 9:11-14) E lē gata i le faia o meaalofa foai faaletino mo nei fuafuaga, ae ua ofo atu foi ma le fiafia e Kerisiano o aso nei, la latou viiga i le Atua ma faaaogā o latou ola i lana auaunaga. (Roma 12:1; Eperu 13:15) Ua faamanuia i latou e Ieova mo le faaaogaina o o latou taimi, lo latou malosi, ma isi alamanuia, e aofia ai a latou tupe, mo le lagolagoina o le tapuaiga moni ma le faaauilumaina o le galuega o le talaʻia o le tala lelei o le Malo i le lalolagi aoao.—Faataoto 3:9, 10.

O ISI VALA E FAATUPUINA AI LE FIAFIA

9. O le ā e sese ai le soona inutele i le ʻava malosi?

⁹ Ina ia fiafia, e tatau foi i Kerisiano ona ʻleoleo i o latou tomai faalemafaufau.’ (Faataoto 5:1, 2) O lenei mea e manaomia ai lo latou faitau ma mafaufau loloto i le Afioga a le Atua ma lomiga faale-Tusi Paia e aogā. Peitai e iai mea e tatau ona alofia. O se tasi o na mea, o le inutele i le ʻava malosi e mafai ona lē puleaina ai le mafaufau o se tagata. O le iai i lena tulaga o le mafaufau, ua toatele tagata e aafia ai i amioga lē tatau faaleituaiga, latou te faia gaoioiga faasauā, ma latou faapogaia ni faalavelave matautia. E letioa ona faapea mai le Tusi Paia, o le a lē maua e ē onanā se tofi i le Malo o le Atua! (1 Korinito 6:10) O le maumauai e tumau i le “faautauta,” e alofia ai e Kerisiano moni le onā, ma o le a aogā lenei ina ia faatupu ai le fiafia ia i latou.—Tito 2:2-6.

10. (a) Aisea ua lē faaaogā ai e Kerisiano le tapaa? (e) O ā aogā e maua mai i le taofia o na masani ua puleaina ai?

¹⁰ E maua foi le fiafia pe a mamā le tino. Peitai, e toatele ua puleaina i latou i mea e faaleagaina ai le tino. O se faaaoaoga,  seʻi manatunatu i le faaaogaina o le tapaa. Ua lipotia mai e le Faalapotopotoga o le World Health Organization (Soifua Mālōlōina a le Lalolagi) e faapea, o le ulaula tapaa “ua fasiotia ai le tolu miliona tagata i tausaga taitasi.” O le taofia o le masani o le ulaula tapaa e faigata, ona o āuga o le a oo i ai mo sina taimi ona ua taofia le masani. Ae i se isi foi itu, ua iloa e le toatele o tagata o ē sa ulaula tapaa muamua, ua sili atu nei ona mālōlōina lo latou soifua ma ua tele atu a latou tupe ua maua mo le faatinoina o manaoga o o latou auaiga. Ioe, o le foiaina o le masani o le ulaula tapaa po o le puleaina e isi vailaau e faaleagaina ai le tino, o le a fesoasoani i le mauaina o se tino e mamā, se loto fuatia ifo e mamā, ma le fiafiaga moni.—2 Korinito 7:1.

LE FIAFIAGA I LE FAAIPOIPOGA

11. O le ā e manaomia ina ia maua ai se faaipoipoga faamamaluina e faaletulafono ma e tumau?

¹¹ O ē o loo nonofo faatasi o se tane ma se avā e ao ona la faamautinoa ua uma ona lesitala faaletulafono mai pule faalemalo la laua faaipoipoga. (Mareko 12:17) E ao foi ona la manatu i le lio o le faaipoipoga o se tiute tauave e tāua. E moni, e ono talafeagai se teteaga i ni tulaga ua iai le matuā musu e lagolagosua i mea tautupe, ni faiga faasauā e sili ona leaga, po o le matuā faamataʻuina o le itu faaleagaga. (1 Timoteo 5:8; Kalatia 5:19-21) Ae o upu a le aposetolo o Paulo i le 1 Korinito 7:10-17 ua faalaeiau ai paaga faaipoipo ia latou nonofo faatasi pea. O le mea saʻo lava, ina ia fiafia moni, e ao ona ia fefaamaoniaʻi. Na tusi mai Paulo: “Ia faamamaluina le faaipoipoga e tagata uma, o le moega foi o le ulugalii ia leai sona leaga; aua e faamasinoina e le Atua o e faitaaga ma e mulilulua.” (Eperu 13:4) O le faaupuga “moega o le ulugalii” o loo faasino atu i feusuaiga faaleituaiga a le tamaloa ma le fafine ua uma ona faaipoipo faaletulafono. E leai se isi faiā faaleituaiga, e pei o le toe faaipoipo atu i nisi fafine e ese mai i le avā e toatasi, e mafai ona faamatala e faapea e “faamamaluina . . . e tagata uma.” Ua taʻusalaina foi e le Tusi Paia ni feusuaiga faaleituaiga e faia a o lei faaipoipo, ma le tauatane ma tauafafine.—Roma 1:26, 27; 1 Korinito 6:18.

12. O ā nisi o iuga leaga o le faitaaga?

¹² O le faia o le faitaaga e ono faafiafiaina ai le tino mo na o ni nai minute, ae e lē fiafia moni ai. E lē fiafia i ai le finagalo o le Atua ma e mafai ona faaleagaina ai le loto fuatia ifo o  se tagata. (1 Tesalonia 4:3-5) O āuga faanoanoa o faiga faaleituaiga lē faaletulafonoina e mafai ona maua ai i le AIDS ma isi faamaʻi pipisi ona o faiga faaleituaiga. Ua taʻua e se lipoti faafomaʻi e faapea: “Ua iai se fua faatatau e tusa e silia i le 250 miliona tagata i le lalolagi aoao ua aafia i tausaga taitasi i le maʻiafi (gonorrhoea), ma e tusa ma le 50 miliona ua aafia i le sifili (syphilis).” Ua iai foi le faafitauli o maʻitō sa lei manaomia. Ua lipotia mai e le faalapotopotoga o le International Planned Parenthood Federation e faapea, i le lalolagi atoa, e silia i le 15 miliona teine i le va o le 15 ma le 19 tausaga, ua totō i tausaga taitasi, ma o le tasi vae tolu o lo latou aofai ua faia ni faapaʻū tama. Na faaalia i se suesuega e faapea, i se tasi o atunuu Aferika, o faafitauli e māfua mai i le faapaʻū tama ua iu i le 72 pasene o oti o teine talavou. O nisi o loo faia le faitaaga atonu e lē aafia i ni faamaʻi ma lē totō, ae latou te lē sao mai i le faamanuʻalia tau i faalogona ootia. E toatele ua lē toe iai so latou faaaloalo ia i latou lava ma ua oo ina latou inoino ia i latou lava.

13. O ā faafitauli faaopoopo e māfua mai i le mulilua, ma o le ā le lumanai o loo fotuai mai mo ē o loo faia pea le faitaaga ma le mulilua?

¹³ E ui e ono mafai ona faamagaloina le mulilua, ae o se faavae tonu lea faale-Tusi Paia e mafai ai e le paaga o loo mamā ona ia faia se talagā faaipoipoga. (Mataio 5:32; faatusatusa i le Hosea 3:1-5.) Pe a oo atu na amioga lē tatau i le malepe ai o se faaipoipoga, atonu e iu i ni aafiaga e sili ona leaga tau i faalogona i le paaga o loo mamā atoa foi ma le fanau. Ina ia maua e le aiga faaletagata le manuia, ua faasino mai e le Afioga a le Atua, o le a oo mai lana faamasinoga e faasalaina ai ē o loo faia le faitaaga ma le mulilua ae lē salamō. E lē gata i lea, ua faaalia manino mai ai, o i latou o ē faia amioga lē tatau faaleituaiga, o le a “le fai le malo o le Atua mo latou tofi.”—Kalatia 5:19, 21.

“E LE NI O LE LALOLAGI”

14. (a) O ā nisi ituaiga vala o le ifo i tupua e alofia e se tagata amio Atua? (e) O ā taʻiala ua saunia i le Ioane 17:14 ma le Isaia 2:4?

¹⁴ O i latou o loo faanaunau ina ia faafiafia le finagalo o Ieova ma olioli i faamanuiaga o le Malo, ua latou alofia le ifo i tupua i so o se ituaiga vala. Ua faaalia i le Tusi Paia, e sese le faia o ni faatusa ma ifo atu i ai, e aofia ai ni faatusa o Keriso, po o le tinā o Iesu, o Maria. (Esoto 20:4, 5; 1 Ioane 5:21) O lea la, e lē ifo Kerisiano moni i ni ata faalelotu, o koluse, ma faatusa. Latou te  alofia foi isi ituaiga o ifoga i tupua e lē faigofie ona iloa, e pei o ni ifoga i fuʻa ma le peseina o pese e faaviiviia ai atunuu. Pe a fetaiai ma omiga ina ia faatino na gaoioiga, ona latou toe manatua lea o fetalaiga a Iesu ia Satani e faapea: “E te ifo atu i le Alii [o Ieova] lou Atua, ua na o ia lava e te auauna i ai.” (Mataio 4:8-10) Na fetalai Iesu o ona soo ʻe lē ni o le lalolagi.’ (Ioane 17:14) O le uiga o lenei mea e ao ona solitu mai faiga faapolotiki ma ia toʻafilemu ina ia ogatusa ma le Isaia 2:4, lea ua faapea mai: “E faamasino foi o ia [Ieova le Atua] i nuu ese, ma aoai atu i nuu e tele; ona latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine; e le sii atu le pelu e le tasi nuu i le tasi nuu, latou te le toe aʻoaʻo foi i taua.”

15. O ai Papelonia le Aai Tele, ma o le ā ua faia e le toatele o tagata aʻoga fou o le Tusi Paia, ina ia latou sosola ese mai ai?

¹⁵ O le ʻlē avea ma ni o le lalolagi’ e uiga foi i le motusia o auaufaatasiga uma lava ma “Papelonia le Aai Tele,” o le emepaea o lotu sese i le lalolagi aoao. O tapuaiga lē mamā ua salalau  atu mai lava ia Papelonia anamua seia oo ina ua ia maua se pulega faaleagaga ua faaleagaina ai tagata o le lalolagi aoao. E aofia ia “Papelonia le Aai Tele” lotu uma o loo lē talafeagai o latou talitonuga ma a latou gaoioiga, ma le poto e uiga i le Atua. (Faaaliga 17:1, 5, 15) E lē auai se tagata tapuai faamaoni a Ieova i ni gaoioiga faalotu e palu faatasi, e ala i lo latou auai i le tapuaiga a nisi lotu ese po o le iai o se faatasitasiga faaleagaga ma so o se vaega lava o Papelonia le Aai Tele. (Numera 25:1-9; 2 Korinito 6:14) O le iuga, e toatele tagata aʻoga fou o le Tusi Paia ua tusi faamavae atu i faalapotopotoga faalotu sa latou muai iai. O lenei mea ua atili vavalalata ai i latou i le Atua moni, e pei ona ia folafola mai: “Ia o mai ai outou nai totonu ia te i latou, ma ia outou vavae mai, ua fetalai mai ai le Alii [o Ieova], aua foi tou te papai atu i se mea leaga; ona ou talia ai lea o outou.” (2 Korinito 6:17; Faaaliga 18:4, 5) Pe e lē o le taliaina ea lena e lo tatou Tamā faalelagi o le mea o loo e matuā faanaunau i ai?

 ILOILOINA O FAAMANATUGA FAALETAUSAGA

16. Aisea e lē faamanatuina ai e Kerisiano moni le Kirisimasi?

¹⁶ O se olaga amio Atua e faasaʻoloto ai i tatou mai le avega mamafa ua masani ai o le faamanatu o aso mālōlō faalelalolagi. O se faataʻitaʻiga, e lē o taʻua i le Tusi Paia le aso moni na fanau ai Iesu. Ua fai mai nisi, ʻFaapea lava aʻu na fanau Iesu i le aso 25 o Tesema!’ E lē talafeagai auā na maliu o ia i le tau e totogo ai mea o le 33 T.A. ina ua 33 1/2 ona tausaga. I le taimi foi o lona fanau mai, o le taimi lea sa ʻnonofo ai pea leoleo mamoe i fafo ma leoleo i a latou lafu mamoe i le po.’ (Luka 2:8, NW) I le nuu o Isaraelu, o aso faaiuiu o Tesema, o le vaitaimi mālūlū lea ma timuga, e tuu ai mamoe i totonu o ni fale i le po e puipuia ai i latou mai le taumālūlū. O le mea moni, na faatulagaina e tagata Roma le aso 25 o Tesema e fai ma aso fanau o lo latou atua o le la. I ni nai senituri ina ua mavae le taimi sa iai Iesu i le lalolagi, na faatoʻā talia ai e Kerisiano aposetate lenei aso e faamanatu ai le fanau mai o Keriso. O le iuga, ua lē faamanatu ai e Kerisiano moni le Kirisimasi po o se isi aso mālōlō e faavae aʻe i talitonuga a lotu sese. Talu ai latou te tuutoina atoatoa atu ia Ieova, latou te lē faamanatu ai foi aso mālōlō o loo tapuaia ai tagata agasala po o atunuu.

17. Aisea e lē faia ai e tagata amio Atua ni pātī e faamanatu ai aso fanau, ae aisea e fiafia ai pea fanau Kerisiano e ui ina lē faia na mea?

¹⁷ Ua taʻua faapitoa lava e le Tusi Paia na o faamanatuga o ni aso fanau se lua, o na aso fanau uma e aofia ai ni tagata o ē sa lē auauna i le Atua. (Kenese 40:20-22; Mataio 14:6-11) Talu ai e lē o faaalia i le Tusi Paia le aso fanau o le tagata lelei atoatoa o Iesu Keriso, aisea la e ao ai ona tatou soona uaʻi fua i aso fanau o tagata e lē lelei atoatoa? (Failauga 7:1) O le mea moni, e lē faatalitali mātua amio Atua mo se aso faapitoa e faaali atu ai i a latou fanau lo latou alofa. Na taʻua e se tasi teineitiiti Kerisiano ua 13 ona tausaga: “E tele mea mālie matou te faia faatasi ma loʻu aiga. . . . Ou te mafana tele i oʻu mātua, ma pe a fesili mai isi tamaiti pe aisea ou te lē faamanatuina ai aso mālōlō, ou te taʻu atu ia i latou e faapea, ou te faamanatuina aso uma lava.” Na faapea mai se talavou Kerisiano e 17 ona tausaga: “E tele taimi o le tausaga e feaveai ai a matou meaalofa i totonu o lo matou aiga.” E faateleina le fiafia pe a faafuasei ona foai atu ni meaalofa.

18. O le ā le faamanatuga e tasi faaletausaga na poloaiina e Iesu ona soo ina ia faamanatu, ma o le ā ua faamanatu mai e lena faamanatuga ia i tatou?

 ¹⁸ Mo i latou o loo tuliloaina se olaga amio Atua, e tasi le aso i tausaga taitasi e ao ona latou faamanatuina faapitoa. O le Tausamiga Afiafi lea a le Alii, e masani ona faaigoaina o le Faamanatuga o le maliu o Keriso. E tusa ai ma lea aso, na poloai atu ai Iesu i ona soo e faapea: “Tou te faia [“pea,” NW] le mea nei e fai ma faamanatuga ia te au.” (Luka 22:19, 20; 1 Korinito 11:23-25) Ina ua faavaeina e Iesu lenei tausamiga i le po o Nisani 14, 33 T.A., na ia faaaogā ai se areto lē faafefeteina ma le uaina mūmū, e faaatagia ai lona tino faaletagata e aunoa ma se agasala, ma lona toto lelei atoatoa. (Mataio 26:26-29) O nei areto ma le uaina ua tagofiaina e Kerisiano ua faauuina e le agaga paia o le Atua. Ua aveina i latou i le feagaiga fou ma le feagaiga mo le Malo, ma ua ia i latou se faamoemoe faalelagi. (Luka 12:32; 22:20, 28-30; Roma 8:16, 17; Faaaliga 14:1-5) E ui i lea, ua aogā foi ia i latou uma o ē e auai i le afiafi lea e talafeagai tonu ma Nisani 14 i le kalena anamua faa-Iutaia. Ua faamanatu atu ai ia i latou le alofa na faaalia e Ieova le Atua ma Iesu Keriso i le taulaga togiola lea ua faamagaloina ai agasala, ma mafai ai ona maua le ola e faavavau e i latou o ē ua latou maua le finagalo malie o le Atua.—Mataio 20:28; Ioane 3:16.

GALUEGA MA FAAFIAFIAGA

19. O le ā le luʻi ua fesagai ma Kerisiano a o faigaluega i galuega e maua mai ai tupe?

¹⁹ Ua iai se matafaioi a Kerisiano moni ina ia latou galulue mamafa ma saunia mea e tatau ona latou maua. O le faataunuuina o lenei mea e maua ai e ulu o aiga le lagona o le faamalieina. (1 Tesalonia 4:11, 12) O le mea moni, pe afai e feteenai le galuega a se Kerisiano ma le Tusi Paia, o le a aveesea ai la e lenei mea lona fiafiaga. Ae iai nisi taimi e faigata ai mo se Kerisiano ona maua se galuega e talafeagai ma tapulaa a le Tusi Paia. O se faataʻitaʻiga, o nisi tagata faigaluega ua faatonu e o latou pule ina ia latou faia ni faiga taufaavalea i tagata ia o loo latou faia i ai ni galuega. I se isi foi itu, e toatele pule o galuega o le a latou faataga a latou tagata faigaluega faamaoni e faia galuega e tusa ma o latou loto fuatia ifo, auā e  lē mananao e māumau atu se tagata faigaluega e maufaatuatuaina. Ae po o le ā lava e tupu, e mafai ona e mautinoa o le a faamanuia e le Atua au taumafaiga i le sueina o se galuega o le a tumau ai ona e maua se loto fuatia ifo mamā.—2 Korinito 4:2.

20. Aisea e ao ai ona tatou filifili lelei i faafiafiaga?

²⁰ Talu ai e finagalo le Atua ina ia fiafia ana auauna, e manaomia ai ona tatou faapaleniina galuega mamafa, i ni vaitaimi faafouina o faafiafiaga ma faiga mālōlōga. (Mareko 6:31; Failauga 3:12, 13) Ua uunaia atili mai e le lalolagi a Satani faafiafiaga e lē amio Atua. Ae, ina ia faafiafiaina le finagalo o le Atua, e tatau ona tatou filifili lelei i tusi tatou te faitau ai, o polokalame o leitio ma musika tatou te faalogologo i ai, ma koneseti, o tifaga, o tala faatino, o polokalame o televise, ma vitiō tatou te matamata i ai. Pe afai o faafiafiaga ia sa tatou filifilia i taimi ua tuanai e feteenai ma lapataiga o loo i mau e pei o le Teuteronome 18:10-12, Salamo 11:5, ma le Efeso 5:3-5, o le a tatou faafiafiaina la Ieova ma o le a tatou fiafia ai foi pe a tatou faia ni fetuutuunaiga.

FAAALOALO I LE OLA MA LE TOTO

21. E ao faapefea i le faaaloalo i le ola ona aafia ai la tatou vaaiga i le faapaʻū tama, faapea foi i a tatou faiga ua masani ai ma a tatou amio?

²¹ Ina ia maua le fiafiaga moni, e manaomia ona tatou manatu i le ola o le tagata e paia, e pei foi ona silasila i ai Ieova. Ua faasāina i lana Afioga i tatou ina ia lē faia le fasioti tagata. (Mataio 19:16-18) O le mea moni, ua faaalia mai i le Tulafono a le Atua ia Isaraelu e faapea, o lana silafaga i se pepe e lei fanau, o se ola e tautele—e lē o se mea e tatau ona faatamaʻiaina. (Esoto 21:22, 23) E tusa ai ma lenei tulaga, e lē tatau ai ona tatou manatu faatauvaa i le ola, e ala i le faaaogā o le tapaa, le faaleagaina o o tatou tino i vailaau oona po o le ʻava malosi, po o le faia o nisi mea e soona lamatia ai le ola. E lē tatau foi ona auai i le faia o so o se mea e lamatia ai le ola ma e lē tatau foi ona tatou lē amanaiaina lapataiga mo le saogalemu, lea atonu e iu ina tatou nofosala ai i le toto.—Teuteronome 22:8.

22. (a) O le ā le silafaga faaleatua i le toto ma lona faaaogaina? (e) Ua na o le toto lava o ai e mafai moni ona faasaoina ai le ola?

²² Na taʻu atu e Ieova ia Noa ma lona aiga, o le toto ua fai lea ma sui o le solu, po o le ola. Na faasāina ai la e le Atua i latou  ina ia aua le ʻaia so o se ituaiga o toto. (Kenese 9:3, 4) Talu ai ua tatou tupuga mai ia i latou, ua saisaitia uma ai foi la i tatou i lena tulafono. Na taʻu atu e Ieova i le fanauga a Isaraelu, sa tatau ona sasaa ese le toto i le eleele ma e lē tatau ona faaaogā mo ni fuafuaga a le tagata lava ia. (Teuteronome 12:15, 16) Ma na toe taʻua foi le tulafono lena a le Atua e faatatau i le toto, ina ua faatonuina Kerisiano o le uluai senituri e faapea: “Ia faamamao . . . ma le toto.” (Galuega 15:28, 29) Talu ai le faaaloalo i le paia o le ola, ua lē talia ai e tagata amio Atua ni tuiga toto, e tusa pe maumauai mai nisi, o lena faiga e mafai ona faasaoina ai le ola. E tele isi togafitiga faafomaʻi e talia e Molimau a Ieova, ua aogā tele, ma e lē oo atu ai se tasi i ni lamatiaga ona o tuigā toto. Ua iloa e Kerisiano, e na o le toto masaa o Iesu e mafai moni ona faasaoina ai le ola. O le faatuatua i ai e mafai ona maua ai le faamagaloga ma le faamoemoe o le ola e faavavau.—Efeso 1:7.

23. O ā nisi o taui o le ola i se olaga amio Atua?

²³ E manino lava, o le ola i se olaga amio Atua e manaomia ai ni taumafaiga. Atonu e iu ai i ni tauemuga mai tauaiga po o ē foi tou te masani. (Mataio 10:32-39; 1 Peteru 4:4) Ae sili atu le tāua o taui o le ola i lena olaga nai lo le faigata o so o se tofotofoga. E maua mai ai se loto fuatia ifo mamā ma saunia ai se faauoga e mamā ma isi uso tapuai ia Ieova. (Mataio 19:27, 29) O lea la, seʻi vaai faalemafaufau i le ola ai e faavavau i le lalolagi fou amiotonu a le Atua. (Isaia 65:17, 18) Ma maeu se olioli o le usitaia o fautuaga a le Tusi Paia ma e faafiafiaina le finagalo o Ieova! (Faataoto 27:11) E letioa ona maua fiafiaga pe a ola i se olaga amio Atua!—Salamo 128:1, 2.

SEʻI TOFOTOFO LOU ILOA

O ā nisi o mafuaaga e ala ai ona maua le fiafiaga pe a ola i se olaga amio Atua?

O ā ni suiga atonu e manaomia mo le olaga amio Atua?

Aisea e te fia ola ai i se olaga amio Atua?

[Fesili mo le Suʻesuʻega]

[Ata i le itulau 124, 125]

O gaoioiga faaleagaga e faapaleni i taimi o mālōlōga, e maua mai ai le fiafia o i latou o ē o loo ola i se olaga amio Atua