Mataupu 2

Le Tusi ua Faaalia Maia le Poto e Uiga i le Atua

1, 2. Aisea tatou te manaomia ai taʻiala mai Lē na Foafoaina i tatou?

UA TALAFEAGAI le faapea atu, ua saunia e Lē na Foafoaina i tatou, o Ia o lē e alofa, se tusi o faatonuga ma taʻiala mo tagata. Ma pe e te lē ioe ea o loo manaomia e tagata ni taʻiala?

² I le silia i le 2,500 tausaga ua mavae, na tusia ai e se perofeta ma o se tusitala i talafaasolopito e faapea: “E le o i le tagata e savali ona faatonuina le mea e ui ai o ia.” (Ieremia 10:23) I aso nei, ua matuā sili atu ona manino mai le moni o lena faamatalaga, nai lo se isi lava taimi. O lea, ua taʻua ai e le tusitala o talafaasolopito o William H. McNeill, e faapea: “O mea ua oo i tagata i lenei lalolagi ua toeitiiti pei o se faasologa e lē motusia o mala ma faiga leaga uma o le olaga masani o tagata lautele ua faavaeina.”

3, 4. (a) E ao faapefea ona tatou amata le suesueina o le Tusi Paia? (e) O le a faapefea ona tatou amataina le iloiloina o le Tusi Paia?

³ Ua faamalieina e le Tusi Paia o tatou manaoga uma mo ni taʻiala atamai. E moni, e toatele ua faateʻia pe a faatoʻā latou iloiloina lava le Tusi Paia. O se tusi e telē, ma o nisi o ona vaega e lē faigofie ona malamalama i ai. Peitai afai e avatu ia te oe se pepa tau tulafono o loo otooto atu ai mea e ao ona e fai mo le mauaina o se taui tāua, pe o le a e lē faaaluina ea se taimi e suesue maeʻaeʻa i ai? Pe afai e faafaigata ona e malamalama i nisi vaega o lea pepa, e masani lava, e te maua fesoasoani mai se tasi ua iai le tomai i na tulaga. Aisea e te lē suesueina ai le  Tusi Paia i se uiga foi faapena? (Galuega 17:11) E iai mea e sili atu ona tāua o loo aofia ai nai lo o se taui faaletino. E pei ona tatou aʻoaʻoina mai i le mataupu ua mavae atu, o le poto e uiga i le Atua e mafai ona taʻitaʻia atu ai i le ola e faavavau.

⁴ Seʻi o tatou iloiloina le tusi o loo faaalia mai ai le poto e uiga i le Atua. O le a seʻi muamua ona tatou aotele puupuu le Tusi Paia atoa. Ona tatou talanoaina ai lea o mafuaaga e talitonu ai le toatele o tagata atamamai e faapea o le Afioga faagaeeina lea a le Atua.

MEA O LOO IAI I LE TUSI PAIA

5. (a) O ā mea o loo iai i Tusitusiga Eperu? (e) O ā mea o loo iai i Tusitusiga Eleni?

⁵ O loo iai i le Tusi Paia tusi e 66 i ni vaega se lua, e masani ona taʻua o le Feagaiga Tuai ma le Feagaiga Fou. E 39 tusi o le Tusi Paia sa tele lava ina tusia i le faa-Eperu ma le 27 i le faa-Eleni. O Tusitusiga Eperu, e aofia ai le Kenese e oo i le Malaki, lea ua talanoaina ai le foafoaga ma uluai tausaga e 3,500 talu ona iai le tagata. I le iloiloina o lenei vaega o le Tusi Paia, ua tatou aʻoaʻoina ai feutagaiga a le Atua ma le fanauga a Isaraelu—mai lo latou faatoʻā faavaeina e avea o se nuu i le 16 senituri T.L.M. e oo atu i le lona 5 senituri T.L.M. O Tusitusiga Eleni, o loo iai tusi mai le Mataio e oo atu i le Faaaliga, lea o loo taulai i aʻoaʻoga ma galuega a Iesu Keriso ma ona soo i le vaitaimi o le uluai senituri T.A.

6. Aisea e ao ai ona tatou suesueina le Tusi Paia atoa?

⁶ Ua manatu nisi tagata e faapea, o le “Feagaiga Tuai” e mo tagata Iutaia, ae o le “Feagaiga Fou” e mo Kerisiano. Peitai e tusa ai ma le 2 Timoteo 3:16, o “Tusi Paia uma lava e mai le Agaga o le Atua ia, e aoga foi ia.” O lea la, o se suesuega talafeagai o le Tusi Paia e ao ona aofia ai le Tusi Paia atoa. O le mea moni, e fesootai lelei vaega e lua o le Tusi Paia, e auaufaatasi ina ia fausia aʻe ai le matua aoao.

7. O le ā le matua o le Tusi Paia?

⁷ Atonu sa e auai i ni sauniga faalelotu mo le tele o ni tausaga ma e faalogo ai i le faitauina leotele o nisi mau o le Tusi Paia. Atonu foi ua e faitauina e oe lava ni vaega eseese o le Tusi Paia. Pe na e iloa ea o loo iai i le Tusi Paia lona matua e  te maua mai lava i le Kenese e oo atu i le Faaaliga? Ioe, ua na o le tasi le matua o loo talanoaina i le Tusi Paia atoa. O le ā lena matua? O le faamaonia o le tonu o le aiā a le Atua e pule ai i tagata, ma le faataunuuina o lana fuafuaga alofa e ala i lona Malo. Mulimuli ane, o le a tatou iloa ai le auala o le a faataunuu ai e le Atua lenei fuafuaga.

8. O le ā ua faaalia mai e le Tusi Paia e faatatau i uiga totino o le Atua?

⁸ E lē gata ina otooto mai e le Tusi Paia le fuafuaga a le Atua, ae ua faaalia mai ai foi ona uiga totino. E pei o se faaaoaoga, ua tatou aʻoaʻoina mai le Tusi Paia, e iai faalogona o le Atua, ma e aafia ona faalogona i ni filifiliga tatou te faia. (Salamo 78:40, 41; Faataoto 27:11; Esekielu 33:11) Ua faapea mai le Salamo 103:8-14, o le Atua e “alofa mutimuti vale ma alofa fua . . . e tele gese lona toasa, a e tele lona alofa.” E na te tausia i tatou i le alofa mutimuti vale i lona manatuaina, o i tatou na ʻfaia mai i le efuefu,’ ma tatou te toe foi atu i ai pe a tatou feoti. (Kenese 2:7; 3:19) Maeu ni uiga ofoofogia o loo ia faaalia! Pe ua lē o le ituaiga Atua ea lenei o loo e fia tapuai atu i ai?

9. Ua faapefea ona aumaia e le Tusi Paia ia i tatou se vaaiga manino i tapulaa a le Atua, ma e mafai faapefea ona tatou maua ni aogā mai lena poto?

 ⁹ Ua aumaia e le Tusi Paia ia i tatou se vaaiga manino o tapulaa a le Atua. O nei tapulaa e faatulaga mai o ni tulafono i nisi taimi. Peitai, e masani ona faaatagia mai ai mataupu silisili ia o loo aʻoaʻoina e ala mai i ni lesona e faatino ma maua ai aogā. Na fuafuaina e le Atua le tusiaina o nisi o mea na tutupu i talafaasolopito o Isaraelu anamua ina ia aogā mo i tatou. O nei faamatalaga aogā ua faaalia ai le mea e tupu pe a galulue tagata e ogatusa ma le fuafuaga a le Atua, faapea foi ma āuga faanoanoa pe a latou fia tutoatasi. (1 Tupu 5:4; 11:4-6; 2 Nofoaiga a Tupu 15:8-15) O le faitauina o na tala i mea moni na tutupu o le a mautinoa le pāʻia ai o o tatou loto. Pe a tatou taumafai e faaāta i o tatou mafaufau nei mea o loo tusia mai, e mafai ai ona tatou faatusatusa atu i tatou i tagata sa aafia ai i na mea na tutupu. O lea, e mafai ona tatou maua ai aogā mai faaaoaoga lelei, ae alofia lamatiaga sa maileia ai ē na faia measese. Peitai, o le fesili tāua lenei e manaomia ona taliina: E mafai faapefea ona tatou mautinoa o mea ua tatou faitauina i le Tusi Paia ua faagaeeina moni lava e le Atua?

PE MAFAI ONA E FAATUATUAINA LE TUSI PAIA?

10. (a) Aisea e manatu ai nisi e faapea ua lē o toe aogā le Tusi Paia ona o se tusi ua leva? (e) O le ā ua fai mai ai le 2 Timoteo 3:16, 17 ia i tatou e faatatau i le Tusi Paia?

¹⁰ Atonu o e mātauina o le tele o tusi e aumaia ai ni fautuaga, e oo ina lē toe aogā pe a mavae ni nai tausaga. Ae ā le Tusi Paia? Ua leva tele, ma ua toeitiiti atoa le 2,000 tausaga ua tuanai talu ona maeʻa lona tusiaina. O le mea lea ua manatu ai nisi e faapea, ua lē o toe faatatauina mai i o tatou vaitaimi. Peitai, afai e faagaeeina e le Atua le Tusi Paia, e tatau la ona aogā pea ana fautuaga e tusa lava pe ua leva ona tusia. E tatau ona tumau pea i le Tusi Paia lona “aoga . . . e aʻoaʻo ai, e aoai ai, e faatonu ai, e faapoto ai foi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava.”—2 Timoteo 3:16, 17.

11-13. Aisea e mafai ai ona tatou faapea atu e aogā le Tusi Paia i o tatou aso?

 ¹¹ O se iloiloga maeʻaeʻa e faaalia mai ai le tele o le aogā o mataupu silisili o le Tusi Paia i aso nei e pei lava ona sa iai i le taimi na uluai tusia ai. E pei o se faataʻitaʻiga, i uiga masani o le tagata, ua faaatagia mai ai i le Tusi Paia se malamalamaga manino lea e faatatau atu i augātupulaga uma lava o tagata. E faigofie ona tatou vaaia lenei mea i le Lauga a Iesu i luga o le Mauga, o loo taʻua i le tusi o Mataio, mataupu e 5 e oo i le 7. O lenei lauga na matuā maofa ai le taʻitaʻi o Initia sa iai muamua, o Mohandas K. Gandhi lea na taʻua mai lona fai atu i se tagata sa avea o se ofisa i le malo o Peretania e faapea: “Pe afai e usitai lou atunuu ma loʻu atunuu i aʻoaʻoga ia na faataatitia mai e Keriso i lenei Lauga i luga o le Mauga, o le a tatou foia faafitauli e lē gata mo o ta atunuu, ae mo le lalolagi atoa.”

¹² E letioa ona maofa tagata i aʻoaʻoga a Iesu! I le Lauga i luga o le Mauga, na ia faaalia mai ai ia i tatou le auala i le fiafiaga moni. Na ia faamatalaina mai le auala e foia ai ni feeseeseaiga. Sa saunia e Iesu faatonuga i le auala e tatalo ai. Na ia faasino mai le vaaiga e sili ona atamai e manatu ai i manaoga faaletino, ma na ia tuuina mai le Tulafono faaauro mo ni faiā tatau ma isi. O isi foi mea na aofia ai i manatu sa taʻua i lenei lauga, o le auala e iloa ai faiga taufaasese faalotu, ma le auala e maua ai se lumanai saogalemu.

¹³ I le Lauga i luga o le Mauga, ma le faasolo mai i isi uma itulau, ua taʻu manino mai ai e le Tusi Paia ia i tatou le mea e fai ma le mea e alofia, ina ia faaleleia ai o tatou tulaga totino i le olaga. E aogā tele ana fautuaga, o le ala lena na faagaeeina ai se tasi tagata faiaʻoga e faapea mai: “E ui o aʻu o se faufautua i aʻoga maualuluga e iai ni oʻu tikeri maualuluga o le bachelor ma le master, ma ua uma foi ona ou faitauina le tele o tusi i suesuega o le mafaufau ma uiga faaletagata, ae ua ou iloa, o fautuaga a le Tusi Paia i mea e pei o le mauaina o se faaipoipoga manuia, le teena o amioga lē taupulea a talavou, ma le auala e maua ma faatumau ai ni faigauo, e matuā sili atu ona aogā nai lo o se isi lava mea na ou faitauina pe  suesueina i kolisi.” E lē gata i le aogā ma le fetaui pea i taimi uma o aʻoaʻoga a le Tusi Paia, ae mafai foi e tagata ona faalagolago atu i ai.

E SAʻO AʻIAʻI MA MAUFAATUATUAINA

14. O le ā e faaalia ai le saʻo aʻiaʻi o le Tusi Paia i mataupu faasaienisi?

¹⁴ E ui lava o le Tusi Paia e lē o se tusi aʻoga faasaienisi, ae saʻo aʻiaʻi lea tusi i mataupu faasaienisi. E pei o se faaaoaoga, i le taimi na tele ai tagata e talitonu e mafolafola le laueleele, sa taʻua ai e le perofeta o Isaia e faapea o le “faataaliolio” (faa-Eperu, chugh, lea e faauiga i inei i le upu “lapotopoto”). (Isaia 40:22) O le talitonuga i le lapotopoto o le lalolagi na faatoʻā taatele mai i le faitau afe o tausaga talu ona mavae atu Isaia. E lē gata i lea, i le Iopu 26:7—na tusia i le silia i le 3,000 tausaga ua mavae—ua taʻua ai o le Atua o loo ia “tautauina le lalolagi, a e leai se tautaulaga.” Na taʻua e se tasi tagata poto i mataupu faale-Tusi Paia e faapea: “O le fesili i le auala na iloa ai e Iopu le upu moni, lea e faataʻitaʻia mai i suesuega i fetu, e faapea o loo tautau le lalolagi e aunoa ma se tautaulaga i le vanimonimo, o se fesili e lē faigofie ona taliina e i latou o ē e mumusu e talia le faagaeeina o le Tusi Paia.”

15. E faapefea ona faamalosia le mautinoa i le Tusi Paia, e ala i le auala o loo faamatala ai ana tala?

¹⁵ O le auala foi o loo faamatalaina ai tala i le Tusi Paia e faalaeiauina ai foi lo tatou mautinoa i lenei tusi ua leva ona iai. I le lē pei o ni tala fatu, ae o tala i mea na tutupu o loo taʻua i le Tusi Paia, ua fesootai tonu atu lava i ni tagata patino ma i ni aso patino foi. (1 Tupu 14:25; Isaia 36:1; Luka 3:1, 2) O tagata tusitala i talafaasolopito anamua sa latou faatele mai le faamatalaina na o manumalo o o latou tupu ae nanā o latou toilalo ma a latou measese. Peitai, o tusitala o le Tusi Paia sa tautala saʻo ma le faamaoni—e oo foi i a latou lava agasala matuia.—Numera 20:7-13; 2 Samuelu 12:7-14; 24:10.

LE TUSI O VALOAGA

16. O le ā le faamaoniga e sili ona malosi e iloa ai le faagaeeina o le Tusi Paia e le Atua?

¹⁶ O valoaga ua faataunuuina e matuā faamautinoa ai le faagaeeina o le Tusi Paia e le Atua. Ua iai i le Tusi Paia valoaga  e tele ua uma ona auiliili mai o latou faataunuuga. E manino lava e lē mafai e tagata faatauvaa ona faia lena mea. O le ā la o loo i tua o nei valoaga? Ua faapea mai le Tusi Paia lava ia, “e le o le loto o tagata na tuu mai ai le valoaga anamua, a o tagata o le Atua na talatalaina mai ina ua osofia mai e le Agaga Paia,” po o le mana galue o le Atua. (2 Peteru 1:21) Seʻi manatu i nisi o faataʻitaʻiga.

17. O ā valoaga na valoia ai le faatoilaloina o Papelonia, ma na faapefea ona faataunuuina nei valoaga?

¹⁷ Le faatoilaloina o Papelonia. Na muai valoia mai e Isaia ma Ieremia le faatoilaloina o Papelonia e Metai ma Peresia. E ofoofogia, auā na tusia le valoaga a Isaia e faatatau i lenei mea pe ā ma le 200 tausaga a o lei faatoilaloina Papelonia! O vala o loo mulimuli mai o le valoaga ua avea nei o ni faamaumauga faatalafaasolopito: le faapapaʻuina o le vaitafe o le Eufirate e ala i le faatafe atu o ona vai i se vaituloto na eliina (Isaia 44:27; Ieremia 50:38); le leai o se leoleoga malu i faitotoa o le vaitafe o Papelonia (Isaia 45:1); ma le faatoilaloina e le tupu e igoa ia Kuresa.—Isaia 44:28.

18. Na faapefea ona faataunuuina le valoaga a le Tusi Paia i le tulai mai ma le faatoilaloina o “le tupu o Iavana” po o Eleni?

¹⁸ Le tulai mai ma le toe faatoilaloina o “le tupu o Iavana” po o Eleni. I se faaaliga, na vaaia ai e Tanielu se ʻoti poa o loo ia osofaia le mamoe poa, ma gauia ona nifo e lua. Ona gau ai lea o le nifo tele o le ʻoti, ma tutupu aʻe ai nisi nifo e fa mai le mea na iai le nifo tele. (Tanielu 8:1-8) Sa faamatala atu ia Tanielu e faapea: “O le mamoe poa na e iloa ua iai nifo e lua, o tupu ia o Metai ma Peresia. O le ʻoti taufulufulu foi, o le tupu lea o Iavana [po o Eleni]; a o le nifo tele o i le va o ona mata, o le tupu muamua lea. Ua gau foi lena nifo, a ua tutū mai ai isi e fa e sui aʻi, e tutū mai malo e fa mai le atu nuu, a e lē o iai lona malosi.” (Tanielu 8:20-22) I le moni o lenei valoaga, pe tusa o le lua senituri mulimuli ane ai, na faatoilalo ai e “le tupu o Iavana [po o Eleni],” o Alesana le Sili, le malo o nifo e lua, o le Emepaea o Metai ma Peresia. Ina ua maliu Alesana le Sili i le 323 T.L.M., na mulimuli ane suitulaga ai le toafā o ona taʻitaʻiʻau. Peitai ane, e leai se isi o i latou nei na tutusa le malosi o sona malo, ma le malosi o le emepaea a Alesana.

19. O ā valoaga na faataunuuina ia Iesu Keriso?

 ¹⁹ Le soifuaga o Iesu Keriso. O loo iai i Tusitusiga Eperu le tele o valoaga na faataunuuina i le fanau mai, le faiva, le maliu, ma le toetu aʻe o Iesu. E pei o se faaaoaoga, e silia i le 700 tausaga na muamua atu, na valoia ai e Mika o le a fanau mai le Mesia, po o Keriso, i Peteleema. (Mika 5:2; Luka 2:4-7) Na ola Mika i le taimi na valoia e Isaia o le a sasaina ai le Mesia ma tuufeanu i ai. (Isaia 50:6; Mataio 26:67) I le 500 tausaga na muamua atu, na valoia ai e Sakaria e faapea, o le a faalataina le Mesia i tupe siliva e 30. (Sakaria 11:12; Mataio 26:15) E silia i le afe tausaga muamua atu, na valoia ai e Tavita ni mea e fesootai atu i le maliu o le a oo ia Iesu le Mesia. (Salamo 22:7, 8, 18; Mataio 27:35, 39-43) Ma i ni senituri e lima muamua atu, na faaali mai ai e le valoaga a Tanielu le taimi o le a aliaʻi mai ai le Mesia, ma le umi o lana faiva ma le taimi o lona maliu. (Tanielu 9:24-27) Ua na o se ata faataʻitaʻi lena o valoaga na faataunuuina ia  Iesu Keriso. O le a e iloa le tauia o le faitauina o nisi mea e tele atu e uiga ia te ia, i se isi taimi mulimuli ane.

20. O le ā le faamautinoaga e ao ona ia i tatou, ona o le saʻo atoatoa o faamaumauga a le Tusi Paia e uiga i valoaga ua uma ona faataunuuina?

²⁰ Ua faataunuuina isi valoaga e tele o le Tusi Paia ia e umi ona faagasolo o latou faataunuuga. Ae atonu e te fesili mai, ʻAe aafia ai la faapefea loʻu olaga i lenei mea?’ Pe afai e tele tausaga sa tautala faamaoni atu ai se tasi ia te oe, po o le a faafuasei ea ona e toe masalosalo i ai pe a ia taʻuina atu se isi mea fou? E leai! Ua fetalai le Atua i le upu moni i vaega uma o le Tusi Paia. Pe ua lē tatau ea la i lenei mea ona e faatuatua ai i folafolaga a le Tusi Paia, e pei o ana valoaga e faatatau i le lalolagi parataiso o loo fotuai mai? O le mea moni, e mafai foi ona ia i tatou le mautinoa lea sa ia Paulo, o se tasi o soo o Iesu i le uluai senituri, o lē na tusi mai e faapea ʻe lē mafai ona talapepelo le Atua.’ (Tito 1:2) E lē gata i lea, pe a tatou faitau i le Tusi Paia ma faatatauina ana fautuaga, ua tatou faatinoina ai le atamai lea e lē mafai e tagata ona maua i ni a latou lava taumafaiga, auā o le Tusi Paia o le tusi o loo faaalia mai ai le poto e uiga i le Atua, e taʻitaʻia ai i le ola e faavavau.

IA FAATUPU SE “NAUNAU” MO LE POTO E UIGA I LE ATUA

21. O le ā e ao ona e fai pe afai e faateʻia oe i nisi o mea o loo e aʻoaʻoina i le Tusi Paia?

²¹ A o e suesueina le Tusi Paia, e foliga mai ua e aʻoaʻoina ni mea e ese mai mea sa e aʻoaʻoina i le taimi ua teʻa. Atonu foi o le a e iloa ai, o nisi o tū masani faalelotu sa pele ia te oe, e lē fiafia i ai le finagalo o le Atua. O le a e iloa ai, e iai tapulaa a le Atua i mea e lelei ma mea e leaga, e maualuluga atu nai lo tapulaa o loo taatele i lenei lalolagi o faiga tuufau. Atonu i le taimi muamua sa e faateʻia ai i lenei mea. Ae, ia onosai! Ia iloilo ma le faaeteete le Tusi Paia ina ia maua le poto e uiga i le Atua. Ia nofo sauni e talia le avanoa atonu o le a manaomia ai e se fautuaga a le Tusi Paia ona toe fetuutuunai ou manatu ma au gaoioiga.

22. Aisea ua e suesueina ai le Tusi Paia, ma e mafai faapefea ona e fesoasoani i isi ina ia latou malamalama i lenei mea?

²² E ono tetee atu au uo ma ou tauaiga i lou suesueina o le  Tusi Paia, ona o ni mafuaaga e foliga e lelei ia i latou, peitai na fetalai Iesu: “Ai se na te taʻutaʻu aʻu i luma o tagata, o aʻu foi ou te taʻutaʻuina o ia i luma o loʻu Tamā o i le lagi. Ai se faafiti foi ia te au i luma o tagata, ou te faafitia foi o ia i luma o loʻu Tamā o i le lagi.” (Mataio 10:32, 33) Atonu e popole nisi ina neʻi e auai i se vaega faalelotu taufaasese po o le oo ina avea oe o se tasi e maelega valea. Peitai ane, i le tulaga moni lava, o lena o loo e tauivi ina ia mauaina le poto saʻo e uiga i le Atua ma le poto e uiga i lana upu moni. (1 Timoteo 2:3, 4) Ina ia fesoasoani i isi ia latou malamalama i lenei mea, ia fefulifulisaʻi ou mafaufauga, aua le faia faafinau, pe a e talanoa atu ia i latou e faatatau i mea o loo e aʻoaʻoina. (Filipi 4:5) Ia manatua, e toatele ua “maua . . . a e leai se upu” pe a latou vaaia faamaoniga o le aogā moni o le poto o le Tusi Paia i tagata.—1 Peteru 3:1, 2.

23. E mafai faapefea ona e faatupu le “naunau” mo le poto e uiga i le Atua?

²³ Ua faalaeiau mai le Tusi Paia ia i tatou: “Faapei o tama meamea faatoa fanau mai, ia naunau outou i le suāsusu faaleagaga e le suia.” (1 Peteru 2:2) E faalagolago atu se pepe i lona tinā mo le fafagaina o ia, ma e maumauai lava ina ia faamalieina lena manaoga. E faapena foi i tatou, tatou te faalagolago i le poto mai le Atua. Ia faatupu le “naunau” mo lana Afioga e ala i le faaauau pea o lau suesuega. Ia fai moni ma ou sini le faitauina o le Tusi Paia i aso taitasi. (Salamo 1:1-3) O le a aumaia e lenei mea ia te oe le anoanoai o faamanuiaga, auā ua faapea mai le Salamo 19:11 e uiga i tulafono a le Atua: “E tele foi le taui pe a tausi i ai.”

SEʻI TOFOTOFO LOU ILOA

O ā auala ua matuā tutasi ai lava le Tusi Paia mai isi tusi?

Aisea e mafai ai ona e faatuatuaina le Tusi Paia?

O le ā ua faamaonia ai ia te oe o le Tusi Paia o le Afioga faagaeeina lea a le Atua?

[Fesili mo le Suʻesuʻega]

[Pusa i le itulau 14]

IA E FAAMASANI LELEI I LAU TUSI PAIA

E lē tatau ona faigata le faamasani atu i le Tusi Paia. Ia faaaogā le faasologa o mataupu o loo iai, e iloa ai le faasologa ma itulau o loo iai tusi o le Tusi Paia.

Ua faatulaga tusi o le Tusi Paia, i mataupu ma fuaiupu ina ia faafaigofie ai ona sueina. O le vaevaeina i mataupu na faaopoopo atu i ai i le vaitaimi o le senituri lona 13, ae i le 16 senituri, na foliga mai sa vaevaeina ai e le tagata lomitusi Falani, mau o loo i Tusitusiga Eleni, i ona fuaiupu o loo iai i aso nei. O le Tusi Paia muamua lava na atoatoa lona faanumeraina i mataupu ma fuaiupu, o le faaopoopoga lea faa-Falani, na lolomia i le 1553.

Pe a taʻu mai mau o le Tusi Paia i lenei tusi, o le numera muamua e faaali mai ai le mataupu, ae o le numera e sosoo ane ai, e faailoa mai ai le fuaiupu. E pei o se faaaoaoga, o le “Faataoto 2:5” o lona uiga, o le tusi o le Faataoto, mataupu e 2, fuaiupu e 5. O le sueina o mau o loo faasino mai, o le a vave ai ona e masani lelei i itulau o loo iai mau o le Tusi Paia.

O le auala e sili ona lelei e faamasani ai i le Tusi Paia o le faitau lea i aso taitasi. Atonu e foliga mai i le taimi muamua o se lui lenei mea. Peitai afai e te faitauina, tau o le tolu i le lima mataupu i aso taitasi, e fuafua i le uumi o na mataupu, o le a maeʻa lelei ona e faitauina ai le Tusi Paia atoa i le tausaga e tasi. Aisea e te lē amata ai loa i le asō?

[Pusa i le itulau 19]

LE TUSI PAIA—O SE TUSI E TUTASI

• O le Tusi Paia “e mai le Agaga o le Atua.” (2 Timoteo 3:16) E ui lava o tagata na latou tusiaina upu o loo iai, ae o le Atua na faatonutonuina o latou manatu, ina ia mautinoa ai o le Tusi Paia o “le upu a le Atua.”—1 Tesalonia 2:13.

• Sa tusia le Tusi Paia i le vaitaimi o le 16 senituri, e ni tagata pe tusa ma le 40 sa faia i ai so latou sao, o ē e eseese uma o latou talaaga. Ae ui i lea, o le Tusi Paia atoa, e ogatasi uma ona faamatalaga mai lava i le amataga e oo atu i lona faaiuga.

• E sili atu ona tele vevesi ua sao mai ai le Tusi Paia nai lo so o se isi lava tusi. I le vaitaimi mai le 500 e oo i le 1,500 T.A., na faatautauina ai tagata i laau ma susunuina, i le na o le pau le mafuaaga ona o le iai o ni a latou Tusi Paia.

• Ua sili le Tusi Paia i le lalolagi aoao i lona alumia. Ua faaliliuina, o se tusi atoa, pe i ni vaega, i le silia i le 2,000 gagana. E faitau piliona kopi ua lolomia, ma e seāseā iai se atunuu i le lalolagi e lē o mafai ona mauaina i ai se Tusi Paia.

• O le vaega o le Tusi Paia e pito sili ona maotua le taimi na tusia ai, o tuā lava i le lona 16 senituri T.L.M. O le taimi lena a o lei aliaʻi mai le Rig-Veda faa-Hinitu (i le tusa o le 1300 T.L.M.), po o le “Kanona o Ato e Tolu” (Canon of the Three Baskets) a le faa-Puta (Buddhist) (i le senituri lona lima T.L.M.), po o le Koran faa-Isalama (Islamic) (i le senituri lona fitu T.A.), faapena foi le Nihongi i le faa-Sinitu (Shinto) (i le 720 T.A.).

 [Ata atoa i le itulau 20]