Mataupu 11

O Aso Nei o Aso e Gata Ai!

1. Aisea ua toatele ai nisi e iai le faalogona e pei ua lē mautonu pe a vaai atu i le tulaga o le lalolagi, ae o fea e mafai ona maua i ai se faamatalaga e maufaatuatuaina o mea o loo tutupu i le lalolagi?

NA OO mai faapefea lo tatou lalolagi lē taupulea i le tulaga lea ua iai nei? O le ā o loo faatalitalia mai mo i tatou i le lumanai? Pe na iai ea se taimi na e fesili ai i na fesili? E toatele nisi atonu e iai le lagona e pei ua lē mautonu, pe a latou vaai atu i le tulaga o le lalolagi. O mea moni e pei o taua, o faamaʻi, ma solitulafono, ua faapogaia ai le tau mānatu o tagata po o le ā o le a tupu i le lumanai. E itiiti se faamoemoe o loo maua mai i taʻitaʻi o malo. Peitai, o loo iai se faamatalaga maufaatuatuaina e faatatau i nei aso o popolega, o loo maua mai le Atua i lana Afioga. O le moni o le Tusi Paia ua fesoasoani ia i tatou ina ia iloa ai po o fea tonu o loo tatou iai i le faagasologa o taimi. Ua faaalia mai ai ua tatou iai i “aso e gata ai” o lenei faiga o mea.—2 Timoteo 3:1.

2. O le ā le fesili na fesiligia ai Iesu e ona soo, ma o le ā lana tali atu i ai?

² O se faaaoaoga, ia manatunatu i le tali a Iesu i nisi o fesili na lāgā e ona soo. A o toe tolu aso oo i le maliu o Iesu, na latou fesiligia ai o ia: “O le ā o le a avea ma faailoga o lou faatasi mai ma le vaitaimi faaiuiu o le faiga o mea?” * (Mataio 24:3, NW) I lana tali atu, na taʻua ai e Iesu ni mea patino e tutupu ma tulaga o le a iai i le lalolagi, o le a faaalia manino ai e faapea, ua ulu atu lenei faiga faalemataʻu o mea i ona aso e gata ai.

3. Aisea na faateteleina ai le leaga o tulaga o mea i le lalolagi, ina ua amata le pulega a Iesu?

 ³ E pei ona faaalia i le mataupu na faatoʻā teʻa atu, o le faasologa o tausaga a le Tusi Paia ua taʻitaʻia atu ai i le faaiuga e faapea, o le Malo o le Atua ua uma ona amataina lana pule. Ae mafai faapefea lena mea? Ua faasolo ina leaga tele le tulaga o mea, e lē o faaleleia. O le mea moni, o le faamaoniga malosi lenei e iloa ai ua amata le pulega a le Malo o le Atua. Aisea ua manatu ai faapea? I le Salamo 110:2 ua taʻu mai ai ia i tatou e faapea, o le a pule Iesu mo se vaitaimi ʻi totonu o ē ita ia te ia.’ Ioe, o lana uluai gaoioiga ina ua avea ma Tupu faalelagi o le lafo ifo lea o Satani ma ana agelu faatemoni i le lalolagi. (Faaaliga 12:9) O le ā le iuga? O le mea tonu lava lea na taʻua e le Faaaliga 12:12 e faapea: “Oi talofa ia te oulua le fanua ma le sami, auā ua alu ifo ia te oulua le tiapolo ua lotoa tele, auā ua na iloa ua saasaa ona po.” Ua tatou ola nei i lena vaitaimi ʻe saasaa ai ona po.’

4. O ā nisi o vala o aso e gata ai, ma o le ā ua latou faasino atu i ai? (Tagai i le pusa.)

⁴ Ua lē o se itu la e ofo ai, ina ua fesiligia Iesu e uiga i le faailoga o lona faatasi mai ma le vaitaimi faaiuiu o le faiga o mea, o lana tali na faatupuina ai manatunatuga loloto. Ua iai i le pusa i le itulau e 102, vala eseese o le faailoga. E pei ona e tagai i ai, ua saunia e aposetolo Kerisiano o Paulo, o Peteru, ma Ioane, ni auiliiliga atili e faatatau i aso e gata ai. O le mea moni, o le tele o vala o le faailoga ma vala o aso e gata ai e aofia ai ni tulaga e mafatia ai. Ae o le faataunuuga o nei valoaga e ao ona faamautinoa ai ia i tatou, ua lata mai le iuga o lenei faiga amioleaga o mea. Seʻi o tatou tagai totoʻa atu i nisi o vala autū o aso e gata ai.

VALA O ASO E GATA AI

5, 6. Ua faataunuuina faapefea valoaga e faatatau i faiga taua ma oge?

⁵ “E sii le taua e le tasi nuu i le tasi nuu, ma le tasi malo i le tasi malo.” (Mataio 24:7; Faaaliga 6:4) Ua faaigoa e le tusitala o Ernest Hemingway le Taua Muamua a le Lalolagi o “le fasigātagata ua sili ona tele, ua sili ona matautia, ma sili ona lē taupulea ua tupu i le lalolagi.” E tusa ai ma le tusi The World in the Crucible—1914-1919, ua taʻua ai e faapea, o “se faasologa fou lenei o faiga taua, o le taua atoatoa muamua lava lea ua  molimauina e tagata. O lona umi, lona matautia, ma lona telē ua sili atu nai lo so o se isi mea na muai iloa pe sa faatalitalia e le lautele.” Ona oo mai lea ma le Taua Lona Lua a le Lalolagi, lea na faamaonia le sili atu o faatamaʻiaga na faia ai, nai lo le Taua Muamua a le Lalolagi. Ua taʻua e le polofesa o talafaasolopito, o Hugh Thomas: “O le senituri lona luasefulu ua matilatila mai i fanataavili, o fanafanua, o le B-52 [vaalele laʻupomu], o pomu faaniukilia, ma le missile [pomu faatonutonu alu mamao]. Ua matuā mātaulia i ana taua o loo tele ai le faamasaatoto ma faatamaʻiaga, e sili atu ona matautia nai lo o se isi augātupulaga.” E moni, sa tele talanoaga na faia e faatatau i le lafoaia o auupega ina ua uma le Taua Faaupufai a Malo. Peitai, ua taʻua e le fua faatatau a se tasi lipoti, pe a uma ona faatinoina le faaitiitiga lea sa fuafuaina, o le a totoe pea nisi meatau faaniukilia pe tusa ma le 10,000 i le 20,000—e silia i le faaivaselau e tele ai  nai lo le malosi o pomu uma sa faaaogā i le taimi o le Taua Lona Lua a le Lalolagi.

⁶ “Ona oo mai ai lea o oge.” (Mataio 24:7; Faaaliga 6:5, 6, 8) Talu mai le 1914, sa iai oge tetele a itiiti mai e 20. O atunuu na aafia ai, e aofia ai Aitiope, Eleni, Initia, Nigeria, Saina, Somalia, Sutana, Rusia, Rwanda, Bangladesh, Burundi, ma Cambodia. Ae e lē faapea o le lē lava o meaʻai e māfua ai oge i taimi uma lava. Na taʻua mai le manatu a se vaega o saienitisi i mea tau faatoaga e faapea: “I le faitau sefulu o tausaga e lei leva tele atu, na sili atu ai ona vave le faateleina o le faasoaina atu o meataumafa a le lalolagi, nai lo o lona faitau aofai. Peitai, talu ai a itiiti mai e 800 miliona tagata o loo iai pea i se tulaga e sili ona matitiva, . . . ua lē mafai ai ona latou faatauina ia lava ni mea e faasaoina ai i latou mai le matuā vaivai ona o le lē lava o meataumafa.” O nisi tulaga, e māfua ona o le aafia fua o faiga faapolotiki. Ua taʻu mai e Dr. Abdelgalil Elmekki o le Iunivesite o Toronto, ni faaaoaoga se lua o ni atunuu o loo matelaina ai le faitau afe o tagata, ae o loo faatau atu e na atunuu i isi atunuu le anoanoai o meataumafa. E foliga mai o loo sili atu ona manatu mamafa na malo i le tele o tupe e maua mai i atunuu i fafo ina ia faatupe ai  a latou faiga taua, nai lo le fafagaina o o latou tagatānuu. O ā la manatu faaiu o Dr. Elmekki? Fai mai a ia, o oge e masani “o se mataupu e māfua mai i le faasoasoaina ma aiaiga a le malo.”

7. O ā mea moni e uiga i faamaʻi i aso nei?

⁷ O “faamai.” (Luka 21:11; Faaaliga 6:8) O le fulū Sepania lea na iai i le 1918-1919 na maliliu ai tagata a itiiti mai e 21 miliona. Ua tusia e A. A. Hoehling i le tusi The Great Epidemic: “E lei iai muamua se taimi i talafaasolopito o le lalolagi na mafai ai e se fasioti tagata ona ia fasiotia se aofaiga tele o nisi i se taimi e sili ona vave” e pei o lea na tupu i le fulū Sepania. I aso nei, ua faateleina faamaʻi. I tausaga taitasi, ua maliliu ai le lima miliona o tagata i le kanesa, e silia i le tolu miliona pepe ma tamaiti laiti ua feoti i le manava tatā, ma le māmāpala ua maliliu ai le tolu miliona o tagata. O faamaʻi o le āla ea, ae maise le niumonia, ua maliliu ai i tausaga taitasi le 3.5 miliona tamaiti e i lalo ifo o le lima tausaga le matutua. Ma le aofaiga matautia e 2.5 piliona—o le ʻafa o le faitau aofai o le lalolagi—ua aafia i maʻi e māfua mai i le lē lava po o le lē mamā o vaiinu, ma le lē lelei o le puipuiga o le soifua mālōlōina. O le faamaʻi o le AIDS ua faamanatu atili mai ai, po o ā lava ni mea mataina faafomaʻi ua mafaia ona fai e le tagata, ae na te lē mafai ai lava ona aveesea atoatoa faamaʻi.

8. Ua faapefea ona faamaonia le avea o tagata ma “e mananao i tupe”?

⁸ “E avea tagata ma e . . . mananao i tupe.” (2 Timoteo 3:2) I atunuu o le lalolagi aoao, e foliga mai o loo iai i tagata se tuinanauga lē faamalieina mo le faateleina o oa. O le “taulau manuia” o se tagata e masani ona fuafua i le telē o lona totogi, o ana “mea ua faataunuuina” e fuafua i le tele o ana mea e maua. Na folafola mai e le sui peresitene o se kamupani e faalauiloaina oloa e faapea: “O le a avea pea le faamuamuaina o meafaitino, o se tasi o uunaiga malosi i Amerika . . . ma o se uunaiga foi o loo faateleina lona tāua i isi atunuu o loo faatauina maia le tele o oloa.” Po o tupu ea le mea lenei i le atunuu o loo e nofo ai?

9. O le ā e mafai ona fai atu ai e faatatau i le lē usiusitai i mātua lea na valoia mai?

⁹ “E le faalogo i mātua.” (2 Timoteo 3:2) O mātua i aso nei, o faiaʻoga, ma isi foi tagata, ua latou faamaonia, mai mea na tutupu ia i latou e faapea, o le toatele o tamaiti ua lē faaaloalo ma lē usiusitai. O nisi o nei talavou a lē o le gaoioi e tali atu i amioga lē lelei a o latou mātua, po o le faataʻitaʻi foi i ai i na amioga lē  lelei. Ua faateleina le aofai o tamaiti ua lē toe talitonu—ma ua fouvale atu—i le aʻoga, i tulafono a le malo, i lotu, ma i o latou mātua. Ua taʻua e se tasi ua leva ona faiaʻoga: “Ua pei o se āʻega, e foliga mai e itiiti lava so latou faaaloalo o iai i so o se mea.” E ui lava i lea, o se mea e fiafia ai, ona o le toatele o tamaiti e matataʻu i le Atua, ua avea i latou ma faaaoaoga lelei i amio.

10, 11. O le ā le faamaoniga o loo iai e faapea, ua faasauā tagata ma ua lē toe iai se lotoaiga?

¹⁰ “Faasaua.” (2 Timoteo 3:3) O le upu Eleni ua faaliliuina i le “faasaua” o lona uiga ʻe lē lata, e feai, e leai se lagona alofa faaletagata.’ Pagā le fetaui o lenei mea i le toatele o tagata o loo faia faiga sauā i aso nei! Na faapea mai se tagata faatonu: “Ua matuā matautia le tulaga o le olaga, ua tumu i faiga leaga faamasaatoto, lea e manaomia ona malosi le loto o se tasi a o ia faitau i ai i tala o aso taitasi.” Na mātauina e se tagata e leoleoina ni falemautotogi e faapea, e toatele tagata talavou e foliga mai e matuā lē o mafaufau lava i āuga o a latou gaoioiga o loo fai. Na ia faapea mai: “O loo iai se lagona e faapea, ʻOu te lē iloa le mea e tupu a taeao. O le a ou maua le mea ou te manao i ai i lenei aso.’”

¹¹ “E le lotoaiga.” (2 Timoteo 3:3) Ua faaliliuina lenei fuaitau mai le upu Eleni o lona uiga, “e leai se loto mafana, e leai ni lagona alofa faaletagata” ma ua faaalia ai le “leai o se lotoaiga.” (The New International Dictionary of New Testament Theology) Ioe, ua masani ona lē maua le alofa mafana i le nofoaga tonu sa tatau ona matuā olaola ai—i le aiga. Ua fai ma mea e faateʻia ai i le tele o lipoti e uiga i faiga sauā o loo fai i paaga faaipoipo, i tamaiti, ma e oo lava foi i mātua ua matutua. Na taʻua mai e se tasi vaega o ni tagata suesue e faapea: “O faiga sauā a tagata—pe ua na o se po atu po o se tūlei atu, se faaoolima i naifi po o fana—ua sili atu ona tutupu soo i totonu o le lio o le aiga nai lo se isi nofoaga i lo tatou sosaiete.”

12. Aisea e mafai ai ona faapea atu, o tagata ua na ona peiseai e amio Atua?

¹² “Ua peiseai e amio Atua ae e lē faamaoni i lona mana.” (2 Timoteo 3:5, NW) Ua iai i le Tusi Paia le mana e suia ai olaga ina ia faaleleia. (Efeso 4:22-24) Ae toatele tagata i aso nei ua latou faaaogā lotu e fai ma o latou ʻalofaga lea o loo latou faaauau ai pea i amioga lē tonu e lē finagalo malie i ai le Atua. O le pepelo, le gaoi, ma amioga lē tatau faaleituaiga ua masani ona  talia e taʻitaʻi lotu. E tele lotu ua latou talaʻia le alofa ae lagolago i faiga taua. Ua faapea mai se lipoti mai le faatonu a le mekasini o le India Today: “I le suafa o Lē Sili na Foafoaina Mea, ua fai ma auala e faia ai e tagata ia faiga faasauā e sili ona inosia i isi o latou uso a tagata.” Ae maise foi, o fetauaiga e lua na sili ona faamasaa ai le toto i ni taimi e lei leva atu—le Taua Muamua ma le Taua Lona Lua a le Lalolagi—na māfua mai i le lotolotoi o Kerisinetoma.

13. O le ā le faamaoniga o iai e faapea, ua faafanoina le lalolagi?

¹³ ʻUa faafanoina le lalolagi.’ (Faaaliga 11:18) E silia i le 1,600 saienitisi mai le lalolagi aoao, e aofia ai le toʻa 104 o ē na latou maua le faailoga Nobel, ua faaalia lo latou lagolagoina o se lapataiga na aumaia e se faalapotopotoga o saienitisi e taʻua o le Union of Concerned Scientists (UCS), ua taʻua ai e faapea: “Ua iai tagata ma le siosiomaga o le lalolagi, i se tulaga ua fetoʻai faatasi ai. . . . I totonu o ni nai sefulu tausaga o sosoo mai, o le a mou atu ai le avanoa lea e mafai ona taofia ai ni taufaamataʻu o loo fotuai mai.” Na faapea mai le lipoti, o mea o loo faia e tagata e faamataʻuina ai le ola “atonu o le a suia ai le lalolagi ina ia lē mafai ai ona tausia le olaga i le tulaga lea tatou te iloa.” Sa taʻua le tatau ona uaʻi atu faanatinati i faafitauli e pei o le faaitiitia o le kasa ozone, le faaoonaina o le vai, le tāina o le vaomatua, le tafia o le palapala lafulemū, ma le tele o ituaiga o manu ma laau ua lē toe mafai ona maua. Ua faapea mai le UCS: “O lo tatou taumafai fua e suia le galuega o le foafoaga lea e felagolagomai mo le mauaina o le ola, e mafai ona matala mai ai le salalau tele atu o aafiaga, e aofia ai le faaleagaina o le tulaga o ola o meafaiola, lea e lē atoatoa ona tatou malamalama i o latou malosi.”

14. E mafai faapefea ona e faamaonia, ua faataunuuina le Mataio 24:14 i o tatou aso?

¹⁴ “E talaʻiina atu foi lenei tala lelei o le malo i le atu laulau uma.” (Mataio 24:14) Na valoia mai e Iesu e faapea, o le a talaʻia le tala lelei o le Malo i le lalolagi aoao, e fai ma molimau i atunuu uma. I le fesoasoani mai ma le faamanuia a le Atua, e faitau miliona Molimau a Ieova o loo faaaluina le faitau piliona o o latou itula i lenei galuega talaʻi ma le faia o soo. (Mataio 28:19, 20) Ioe, ua iloa e Molimau lo latou nofosala i le toto pe afai latou te lē faalauiloa atu le tala lelei. (Esekielu 3:18, 19) Ae ua latou fiafia,  talu ai i tausaga taitasi, e faitau afe o loo tali faafetai mai i le feau o le Malo, ma latou tutū atu o ni Kerisiano moni, o lona uiga, i le avea o ni Molimau a Ieova. O se faaeaga e lē mafaatusatusalia le auauna atu ia Ieova ma faalauiloa atu le poto e uiga i le Atua. Ma pe a uma ona talaʻia atu lenei tala lelei i le lalolagi ʻainā uma, ona oo mai ai lea o le iuga o lenei faiga amioleaga o mea.

IA GAOIOI E TUSA AI MA FAAMAONIGA

15. O le a faapefea ona faaiuina le faiga amioleaga o mea lea o loo iai i le taimi nei?

¹⁵ O le a faapefea ona faaiuina lenei faiga o mea? Ua valoia mai e le Tusi Paia le “puapuaga tele” lea o le a amataina i le faia e malo faapolotiki o lenei lalolagi o sa latou osofaiga ia “Papelonia le aai tele,” le emepaea o lotu sese i le lalolagi. (Mataio 24:21; Faaaliga 17:5, 16) Na fetalai mai Iesu e faapea, a o faagasolo lena vaitaimi, ʻo le a faapogisaina le la, ma o le a lē susulu mai foi le masina, e paʻūū foi fetu mai le lagi, ma o le a luluina foi ʻau a le lagi.’ (Mataio 24:29) O lenei mea atonu ua faaalia mai ai se mea moni uigaese o le a tupu i le lagi. E tusa lava pe faia faapena pe leai, ae o le a faaalialia ai ma mou atu i latou o loo pei o ni malamalama o loo susulu mai a lotu o le lalolagi. Ona faaaogā loa lea e Satani, o lē ua igoa ia “Koku, o le nuu o Makoku,” tagata faalemataʻu ina ia latou faia mai se osofaiga tele i tagata o Ieova. Ae o le a lē taulau Satani, auā o le a laveaiina i latou e le Atua. (Esekielu 38:1, 2, 14-23) O le a oo atu “le puapuaga tele” i lona tumutumuga ia Amaketo, o “le taua i le aso tele o le Atua e ona le malosi uma lava.” O le a tafiesea ai vaega mulimuli uma lava sa mātaulia ai le faalapotopotoga faalelalolagi a Satani, ma e tatalaina ai le auala e solo mai ai faamanuiaga e lē gata mai i tagata o le a faasaoina.—Faaaliga 7:9, 14; 11:15; 16:14, 16; 21:3, 4.

16. E faapefea ona tatou iloa, o loo faatatauina i o tatou aso, vala na valoia mai o aso e gata ai?

¹⁶ O nisi vala o valoaga ia o loo faamatalaina ai aso e gata ai, atonu e foliga mai o loo faatatau atu i nisi vaitaimi o talafaasolopito. Peitai pe a tuufaatasia loa, ona iloa ai lea o loo faasino uma mai faamaoniga faavaloaga i o tatou aso. Ina ia faataʻitaʻi: O laina tositosi ia e iloa ai le faailoga o le lima o se tagata, ua maua ai se ata o le faailoga o le lima e lē mafai ona tutusa atu  ma le faailoga o le lima o se isi tagata. E faapena foi la, ua iai se ata o vala tutasi o aso e gata ai, ua mātaulia ai ona faailoga, po o mea na tutupu ai. O nei vala ua faia aʻe ai se “faailoga” e lē mafai ona tutusa fua i se isi vaitaimi. Pe a talanoaina faatasi ma faamaoniga a le Tusi Paia e faapea o lea ua pule nei le Malo faalelagi o le Atua, ona saunia ai lea e faamaoniga se faavae mausalī mo se manatu faaiu e faapea, o aso moni lava nei e gata ai. E lē gata i lea, o loo iai le faamaoniga manino faale-Tusi Paia e iloa ai, ua toeitiiti ona faaumatia lea o lenei faiga amioleaga o mea.

17. O le iloaina o aso e gata ai nei ua tatou ola ai, e tatau ona uunaia ai i tatou e faia le ā?

¹⁷ O le a faapefea ona e gaoioi e tusa ai ma le faamaoniga e iloa ai o aso nei e gata ai? Seʻi manatu i le mea lenei: Pe afai o loo lalata mai se āfa e sili ona matautia, tatou te lē toe faatali loa ae faia ni fuafuaga e puipuia ai. O lea la, o mea ua valoia mai i le Tusi Paia e uiga i le faiga o mea o iai nei, e tatau ona uunaia ai i tatou e faia se gaoioiga. (Mataio 16:1-3) E mafai ona tatou iloa ma le manino lo tatou ola ai i aso e gata ai o le faiga o mea a lenei lalolagi. O lenei mea e tatau ona uunaia ai i tatou e faia so o se fetuunaiga e manaomia, ina ia tatou maua ai le finagalo malie o le Atua. (2 Peteru 3:3, 10-12) I le iloaina e Iesu o ia o le ala mo le faaolataga, ua ia fofoga mai ai se feau faanatinati e faapea: “Ia outou, neʻi mafatia o outou loto i le soona ulavale, ma le onā, ma le popole i mea a le olaga nei, neʻi faafuasei mai lea aso ia te outou e pei o se mailei; auā e oo mai ai i e nonofo uma lava i le fogāeleele uma. O lea ia outou mataala e le aunoa ma tatalo ina ia outou maua le malosi e sao mai ia mea uma ua tāli oo mai, ma ia tutū i luma o le Atalii o le tagata.”—Luka 21:34-36.

[Faaopoopoga i lalo]

SEʻI TOFOTOFO LOU ILOA

O le ā na valoia e le Tusi Paia e faatatau i mea o le a tutupu aʻe i le lalolagi, i le amataga o le pulega a Keriso?

O ā nisi o vala o aso e gata ai?

O le ā ua faamautinoaina ia te oe e faapea, o aso nei e gata ai?

[Fesili mo le Suʻesuʻega]

[Pusa i le itulau 102]

O NISI O VALA O ASO E GATA AI

● Taua e lē mafaatusalia.—Mataio 24:7; Faaaliga 6:4.

● Oge.—Mataio 24:7; Faaaliga 6:5, 6, 8.

● Faamaʻi.—Luka 21:11; Faaaliga 6:8.

● Faateleina soligatulafono.—Mataio 24:12.

● Faafanoina le laueleele.—Faaaliga 11:18.

● Mafuie.—Mataio 24:7.

● Aso faigata e lē faigofie ona faafetaiaia.—2 Timoteo 3:1.

● Manao tele i tupe.—2 Timoteo 3:2.

● Lē usitai i mātua.—2 Timoteo 3:2.

● Leai se lotoaiga.—2 Timoteo 3:3.

● Manao i mea faafiafia nai lo le Atua.—2 Timoteo 3:4.

● Leai se pulea totino.—2 Timoteo 3:3.

● Leai se alofa i tagata amiolelei.—2 Timoteo 3:3.

● Lē amanaia lamatiaga o loo lalata mai.—Mataio 24:39.

● Tetee ē o fāifai i faamaoniga o aso e gata ai.—2 Peteru 3:3, 4.

● Talaʻiga o le Malo o le Atua i le lalolagi aoao.—Mataio 24:14.

 [Ata atoa i le itulau 101]