O ai le Atua Moni?
Mataupu 3
O ai le Atua Moni?
1. Aisea ua toatele ai e ioe i upu amata lava o le Tusi Paia?
PE A e tagai atu i le vanimonimo i se po maninoa, faamata e te lē ofo i lou vaai atu i le anoanoai o fetu? E faapefea ona e faamatalaina lo latou tupuaga mai? Ae faapefea meafaiola i le lalolagi—o fugalaau felanulanuai, o manufelelei ma a latou pesega mālie, o tafola tetele o loo fepuna aʻe i le sami? E lē taitai ona gata mai le lisi o nei mea. O nei mea uma e lei teʻiteʻi oo mai. E letioa ona ioe le toatele i upu amata o le Tusi Paia ua faapea mai: “Na faia e le Atua le lagi ma le lalolagi i le amataga”!—Kenese 1:1.
2. O le ā ua fai mai ai le Tusi Paia e uiga i le Atua, ma o le ā ua ia faalaeiauina i tatou e fai?
2 Ua matuā fevaevaeai tagata i le mataupu e uiga i le Atua. Ua manatu nisi o le Atua ua na o se uiga, ae e lē o se peresona. E faitau miliona o loo tapuai atu i tuaa ua maliliu, ona latou te talitonu faapea, ua mamao tele le nofoaga o loo iai le Atua, ma e lē mafai ona latou oo atu i ai. Ae ua faaalia e le Tusi Paia, o le Atua moni, o se peresona moni lava na te faaalia mai lona naunau mafana ia i tatou taitoatasi. O le pogai lena ua faalaeiauina ai i tatou e le Tusi Paia ina ia tatou “saili i le [Atua],” i le faapea mai: “E le mamao o ia ma i tatou taitoatasi.”—Galuega 17:27.
3. Aisea e lē mafai ai ona faia se faatusa o le Atua?
3 E faapeī foliga o le Atua? E toaitiiti nisi o ana auauna ua latou vaaia ni faaaliga o lona afioaga mamalu. I nei faaaliga, ua ia faaatagia mai ai lona tietie i se nofoalii, o loo pupula mai ia te ia se malamalama ofoofogia. Peitai, e lei faamatalaina lava e i latou na vaai i na faaaliga, se foliga patino. (Tanielu 7:9, 10; Faaaliga 4:2, 3) O le mafuaaga, auā o le “Atua o le agaga lava ia”; e leai sona tino faaletagata. (Ioane 4:24) O le mea moni, e lē mafai ona faia se faatusa faaletino e saʻo aʻiaʻi o Lē na Foafoaina i tatou, auā “e lei vaaia lava le Atua e se tasi.” (Ioane 1:18; Esoto 33:20) Peitai, ua aʻoaʻo mai e le Tusi Paia ia i tatou le tele o mea e uiga i le Atua.
E IAI LE SUAFA O LE ATUA MONI
4. O ā nisi o taʻu uigā o loo faaaogā i le Tusi Paia mo le Atua?
4 I le Tusi Paia, ua faamatalaina ai le Atua moni i faaupuga e pei o le ʻAtua e Ona le Malosi Uma Lava,’ “Le Silisili ese,” “Lē Sili na Foafoaina Mea” “Le Aʻoaʻo Sili,” “Le Alii silisili,” ma le “Tupu o le vavau.” (Kenese 17:1; Salamo 50:14; Failauga 12:1, NW; Isaia 30:20, NW; Galuega 4:24; 1 Timoteo 1:17) O le manatunatu loloto i na taʻu e mafai ona fesoasoani ia i tatou ina ia tutupu aʻe ai i le poto e uiga i le Atua.
5. O ai le suafa o le Atua, ma o le ā le tele o loo aliaʻi mai ai i Tusitusiga Eperu?
5 Ae peitai, ua iai i le Atua se suafa e tutasi lava, lea e aliaʻi mai toetoe 7,000 taimi i na o Tusitusiga Eperu—e sili atu ona taʻua soo lenei suafa nai lo isi taʻu o loo faasino atu ia te ia. I tausaga e 1,900 ua tuanai, na faia ai e tagata Iutaia ni faiga taufaafefe ina ia taofia ai le toe faaleoina o le suafa o le Atua. Sa tusia le Tusi Paia faa-Eperu e aunoa ma ni vaueli. O le pogai lena e lē mafai ai ona iloa lelei pe na faapefea e Mose, Tavita, po o isi foi i aso anamua, ona latou faaleoina konesane e fa (יהוה) na o loo faia aʻe ai le suafa o le Atua. Ua faapea mai nisi tagata popoto, atonu sa faaleoina le suafa o le Atua e faapea, “Iauē,” peitai e lē o mautinoa foi e i latou. O le faaleoga o le upu faa-Peretania “Jehovah” ua au senituri ona faaaogaina, ma ua tele foi ina faaaogaina i aso nei i le tele o gagana le upu lea e tutusa lona faaleoga i ai.—Tagai i le Esoto 6:3 ma le Isaia 26:4 i Le Tusi Paia faa-Samoa, Lomiga 1884, ma le Esoto 33:14, LF.
LE POGAI E AO AI ONA E FAAAOGĀ LE SUAFA O LE ATUA
6. O le ā ua fai mai ai le Salamo 83:18 e uiga ia Ieova, ma aisea e ao ai ona tatou faaaogā lona suafa?
6 O Ieova, o le suafa tutasi lea o le Atua, ua faaesea ai o ia mai isi atua uma. O le pogai lena ua aliaʻi soo mai ai lena suafa i le Tusi Paia, ae maise lava i lona vaega faa-Eperu. E toatele tagata faaliliu ua latou lē faaaogaina le suafa o le Atua, ae i le Salamo 83:18 ua taʻua manino mai e faapea: “O oe, e ou le suafa o IEOVA, na o oe lava o le Silisili ese i le lalolagi uma.” Ua talafeagai ai la mo i tatou ona faaaogā le suafa totino o le Atua pe a tatou talanoa e uiga ia te ia.
7. O le ā ua aʻoaʻo mai e le uiga o le suafa o Ieova ia i tatou e faatatau i le Atua?
7 O le suafa o Ieova o se vaega o le veape Eperu lea e faauigaina e faapea, “ina ia iai.” O lea la, o le uiga o le suafa o le Atua, “O Ia Lava ua Māfua ai ona Iai.” Ona faailoa mai ai lea e Ieova le Atua, o ia lava o Lē Sili na Fuafuaina Mea. O ia lava e māfua ai ona faataunuuina moni mea ua ia fuafuaina. E na o le Atua moni e mafai ona tauaveina ma le tonu lenei suafa, auā e lē taitai ona mafai e tagata ona mautinoa pe faataulauina o latou mafaufauga. (Iakopo 4:13, 14) Ua na o Ieova lava ia e mafai ona faapea mai: “E faapea foi laʻu upu e alu atu ai loʻu gutu, e le foi mai fua ia te au . . . e manuia foi i le mea ou te auina atu ai.”—Isaia 55:11.
8. O le ā le fuafuaga na faasilasilaina e Ieova e ala mai ia Mose?
8 O augātamā faatuatua o sa Eperū, o Aperaamo, Isaako, ma Iakopo, o i latou uma na “valaau atu . . . i le suafa o Ieova,” peitai sa latou lei iloa le uiga atoatoa o le suafa o le Atua. (Kenese 21:33; 26:25; 32:9; Esoto 6:3) Ina ua faaali mulimuli ane e Ieova lana fuafuaga ina ia faasaoina ē na tupuga mai ia i latou, o le fanauga lea a Isaraelu, mai le faapologaina i Aikupito, ma tuuina atu ia i latou “le nuu o loo tafe ai le suāsusu ma le meli,” atonu sa foliga e lē mafai ona faataunuuina lenei mea. (Esoto 3:17) Ae ui i lea, na faamamafa atu e le Atua le uiga e faavavau o lona suafa e ala i lona taʻu atu i lana perofeta o Mose: “Ia faapea ona e fai atu i le fanauga a Isaraelu, Ua auina mai aʻu ia te outou e Ieova, le Atua o outou tamā, o le Atua o Aperaamo, o le Atua o Isaako, o le Atua foi o Iakopo, o loʻu igoa lena e faavavau, o laʻu faamanatuga lena i lea tupulaga ma lea tupulaga.”—Esoto 3:15.
9. O le ā le manatu o Farao sa iai e uiga ia Ieova?
9 Na talosaga atu Mose ia Farao, le tupu o Aikupito, ina ia tuu atu le fanauga a Isaraelu e ō e tapuai ia Ieova i le vaomatua. Peitai, sa manatu Farao o ia foi o se atua ma sa ia tapuai atu foi i isi atua o Aikupito, ona ia tali atu ai lea: “O ai ea Ieova ou te faalogo ai i lana upu, ma ou tuuina atu ai o Isaraelu e o? Ou te lei iloa Ieova, ou te le tuuina atu foi Isaraelu e o.”—Esoto 5:1, 2.
10. I Aikupito anamua, o ā gaoioiga na faia e Ieova ina ia faataunuu ai lana fuafuaga lea e aafia ai le fanauga a Isaraelu?
10 Ona faasolosolo loa lea e Ieova ona aaoina atu isi ana gaoioiga e faataunuu ai lana fuafuaga, ma gaoioi ai e tusa ma le uiga o lona suafa. Na ia aumaia mala e sefulu i tagata o Aikupito anamua. O le mala mulimuli lava na fasiotia ai ulumatua uma a Aikupito, e aofia ai ma le atalii o le tupu faamaualuga o Farao. Ona naunau ai lea o tagata Aikupito ina ia ō ese atu Isaraelu. Peitai, sa matuā maofa nisi tagata Aikupito i le mana o Ieova, o lea na latou aufaatasi atu ai i tagata Isaraelu ma latou tuua ai Aikupito.—Esoto 12:35-38.
11. O le ā le vavega na faia e Ieova i le Sami Ulaula, ma o le ā na faamalosia ona fili e faailoa mai?
11 Na toe tuliloa atu e le tupu loto maaa o Farao ma lana autau ma ana kariota o taua e faitau selau, ina ia toe pue mai ana pologa. A o latalata atu tagata Aikupito, na vaeluaina ai faavavega e le Atua le Sami Ulaula, ina ia mafai e le fanauga a Isaraelu ona sopo atu i le ilititai mātūtū. Ina ua taunuu atu le ʻau osofai i le ilititai o le sami, ona faapaʻūū ese ai lea e Ieova “o mea e taavalevale aʻi o latou kariota, ona toso gata ai lea.” Ona alalaga lea o fitafita a Aikupito: “Ina tatou sosola ese ia ia Isaraelu; auā o Ieova o loo tau ma Aikupito mo i latou.” Peitai na fai si tuai. Na toe tatafe mai i lalo ituvai tetele o le sami ma “ufitia ai kariota, ma ʻau na tietie i solofanua, o le itu taua atoa uma a Farao.” (Esoto 14:22-25, 28) Ona faia ai lea e Ieova le suafa silisili mo ia lava, ma e oo mai lava i aso nei o loo manatua pea lena mea na tupu.—Iosua 2:9-11.
12, 13. (a) O le ā le uiga ua iai i le suafa o le Atua mo i tatou i aso nei? (e) O le ā ua manaomia vave lava i tagata ona latou aʻoaʻoina, ma aisea?
12 O le suafa ua faia e le Atua mo ia lava ua iai sona uiga e sili mo i tatou i aso nei. O lona suafa o Ieova, ua tulai mai o se faamautinoaga e faapea, o mea uma ua ia fuafuaina, o ia lava o le a māfua ai ona faataunuu moni. E aofia ai i lena mea le faataunuuina o lana uluai fuafuaga ina ia avea lo tatou lalolagi ma parataiso. (Kenese 1:28; 2:8) Ona o lena mafuaaga, o le a tafiesea ai e le Atua i latou uma o loo tetee atu i lana pule silisili ese i aso nei, auā ua ia fetalai: “E iloa ai lava e i latou o aʻu lava o Ieova.” (Esekielu 38:23) Ona faataunuuina ai lea e le Atua lana folafolaga ina ia faasaoina atu ona tagata tapuai, i se lalolagi fou amiotonu.—2 Peteru 3:13.
13 O ē uma latou te fia maua le finagalo malie o le Atua, e ao ona latou aʻoaʻoina ina ia valaau atu i lona suafa i le faatuatua. Ua folafola mai e le Tusi Paia: “E faaolaina i latou uma o e valaau i le suafa o le Alii [Ieova].” (Roma 10:13) Ioe, e telē le uigā o le suafa o Ieova. O le valaau atu ia Ieova o lou Atua ma o Lē e Laveai ia te oe, e mafai ona taʻitaʻiina atu ai oe i fiafiaga e lē gata mai.
O UIGA O LE ATUA MONI
14. O ā uiga faavae o le Atua ua faamatilatila mai i le Tusi Paia?
14 O le talanoaina o le faasaoina o Isaraelu mai Aikupito ua faamatilatila ai uiga faavae e fa ua iai i le Atua ma ua faapaleni lelei. O ana feutagaiga ma Farao ua faaalia mai ai lona malosi uigaese. (Esoto 9:16) O le auala autū na tauaaoina ai e le Atua lena tulaga lavelave ua faaalia mai ai lona atamai e lē mafaatutusalia. (Roma 11:33) Sa ia faaalia lona faamasinotonu e ala i le faasalaina o ē sa matuā tetee ma faasauā i ona tagata. (Teuteronome 32:4) O le uiga silisili lava o le Atua o le alofa. Na faaalia e Ieova se alofa mataina e ala i le faataunuuina o lana folafolaga e faatatau i ē na tupuga mai ia Aperaamo. (Teuteronome 7:8) Na ia faaalia foi le alofa i lona faatagaina o nisi tagata Aikupito e lafoaia atua sese ma maua ai le tele o aogā e ala i lo latou auai atu i le Atua moni e toatasi.
15, 16. O ā auala ua faaalia ai e le Atua lona alofa?
15 A o e faitauina le Tusi Paia, o le a e iloa ai o le alofa, o le uiga autū lea o le Atua, ma e tele auala ua ia faataʻitaʻia mai ai. Mo se faataʻitaʻiga, o lona alofa na avea ai o ia o Lē na Foafoaina Mea, ma ia muai foaiina atu le olioli i le ola i ana foafoaga agaga. O lena faitau selau miliona o agelu e alolofa i le Atua ma latou te viiviia o ia. (Iopu 38:4, 7; Tanielu 7:10) Na faaalia foi e le Atua lona alofa i le foafoaina o le lalolagi ma sauniunia le lalolagi ina ia ola ai tagata ma le fiafia.—Kenese 1:1, 26-28; Salamo 115:16.
16 E lē mafaitaulia le tele o auala ua aogā ai ia i tatou le alofa o le Atua. O se tasi o mea na faia ma le alofa e le Atua, o o tatou tino i se auala e sili ona ofoofogia ina ia mafai ai ona tatou olioli i le ola. (Salamo 139:14) Ua faaalia lona alofa e ala i lona foai mai o ʻuaga mai le lagi ma tausaga o fuata a le tau, ua matuā faamalieina ai o tatou loto i meaʻai ma faatumulia i le olioli.’ (Galuega 14:17) Ua faia foi e le Atua ina ia “faaoso i lona la i e ua amio leaga atoa ma e ua amio lelei; ua ia faatotō ifo foi le ua i e ua amiotonu, atoa ma e ua amioletonu.” (Mataio 5:45) O le alofa foi ua uunaia ai Lē na Foafoaina i tatou ina ia fesoasoani mai i lo tatou mauaina o le poto e uiga i le Atua ma auauna atu ma le fiafia o ni ona tagata tapuai. Ioe, “o le Atua, o le alofa lava ia.” (1 Ioane 4:8) Peitai e iai le tele o isi vala o ona uiga.
“O LE ATUA ALOFA MUTIMUTI VALE MA LE ALOFA FUA”
17. O le ā ua tatou aʻoaʻoina e uiga i le Atua, i le Esoto 34:6, 7?
17 Ina ua mavae le sopoiaina e le fanauga a Isaraelu o le Sami Ulaula, sa latou manaomia atili pea ona iloa lelei le Atua. Na iloa e Mose lena manaoga ma ia tatalo ai: “Afai ua alofagia aʻu e oe, ia e faailoa mai ia te au lou ala, ina ia ou iloa oe, ina ia alofagia aʻu e oe.” (Esoto 33:13) Na mafai ona iloa lelei e Mose le Atua, ona o lona faalogo atu i le fetalaiga a le Atua lava ia e faapea: “O Ieova, o Ieova, o le Atua alofa mutimuti vale ma le alofa fua, e telegese lona toasa, a e tele le alofa ma le faamaoni; o lē tausi le alofa e oo atu i afe o tupulaga; o lē faamagalo foi i le amioletonu ma le solitulafono ma le agasala, a e le faasaoina lava e ia o e agasala [“mai le faasalaga,” NW].” (Esoto 34:6, 7) E faapaleni e le Atua lona alofa ma lana faamasinoga tonu, i lona lē puipuia o tagata e agasala ma le loto i ai mai āuga o a latou amioga leaga.
18. Ua faapefea ona faamaonia mai le alofa mutimuti vale o Ieova?
18 E faaalia e Ieova le alofa mutimuti vale, e pei ona aʻoaʻoina e Mose. O se tagata e alofa mutimuti vale e na te lagona le tiga alofa ia i latou ua mafatia, ma taumafai ai e avatu ia i latou se mapusaga. O lea ua faaalia ai e le Atua le alofa mutimuti vale mo tagata, i lona faia lea o sauniuniga mo le mapusaga tumau mai mafatiaga, o maʻi, ma le oti. (Faaaliga 21:3-5) Atonu e oo i tagata tapuai o le Atua ni mala ona o tulaga o lenei lalolagi amio leaga, pe ona o ni a latou gaoioiga lē atamai e oo ai i ni faalavelave. Peitai, pe afai latou te liliu atu ma le lotomaulalo ia Ieova mo se fesoasoani, o le a ia faamafanafana ma fesoasoani mai ia i latou. Aisea? Auā ua ia faaalia mai ma le mutimuti vale lona alofa mo ona tagata tapuai.—Salamo 86:15; 1 Peteru 5:6, 7.
19. Aisea e mafai ai ona tatou faapea atu e alofa fua mai le Atua?
19 E toatele tagata o loo i tulaga pule, latou te soona faia isi tagata. Ae maeu le ese, ona o le alofa fua mai o Ieova i ana auauna faatauvaa! E ui lava o ia o lē silisili ona maualuga lana pule i le aoao o mea, ae ua matilatila lona faaalia mai o le agalelei i se tulaga lautele i tagata uma. (Salamo 8:3, 4; Luka 6:35) E alofa fua foi Ieova i tagata taitoatasi, i le tali mai i a latou olega patino mo lona finagalo malie. (Esoto 22:26, 27; Luka 18:13, 14) O le mea moni, e lē o se avega tauave a le Atua le faaalia o lona finagalo malie po o lona alofa mutimuti vale i so o se tasi. (Esoto 33:19) O lea la, e manaomia ai ona tatou faaalia le talisapaia loloto mo le alofa mutimuti vale ma le alofa fua o le Atua.—Salamo 145:1, 8.
E TELEGESE LONA TOASA, E LĒ FAAILOGATAGATA, MA E AMIOTONU
20. O le ā ua faaalia ai e lē gata ina telegese le toasa o Ieova, ae e lē faailogatagata foi o ia?
20 E telegese le toasa o Ieova. Peitai, e lē o le uiga o lenei mea e faapea, o le a ia lē faia se gaoioiga, auā sa ia faia faapea i le faaumatiaina o le tupu loto maaa o Farao ma lana autau i le Sami Ulaula. E lē faailogatagata foi Ieova. O lea, o le fanauga a Isaraelu, lea sa avea ma nuu na ia fiafia i ai, na mulimuli ane mou ese mai ai lona fiafia, ona o lo latou faaauau pea i le faia o amioga leaga. E talia e le Atua tagata mai atunuu uma e avea ma ona tagata tapuai, peitai e na o i latou lava o ē tausisi atu i ona ala amiotonu.—Galuega 10:34, 35.
21. (a) O le ā ua aʻoaʻo mai e le Faaaliga 15:2-4 ia i tatou e uiga i le Atua? (e) O le ā o le a faafaigofie ai ia i tatou ona faia mea o loo fetalai mai le Atua e tonu?
21 Ua faamatilatila mai i le tusi o le Tusi Paia, o Faaaliga, le tāua o le aʻoaʻoina o “faamasinoga tonu” a le Atua. Ua taʻu mai ai ia i tatou le pepese atu o foafoaga i le lagi e faapea: “Le Alii [Ieova] e, le Atua e ou le malosi uma lava, Ua tetele au galuega e ofo ai! E tonu ma faamaoni ou ala, Le Tupu o augātupulaga e! Le Alii e, o ai se le mataʻu ma vivii atu i lou suafa? Auā ua na o oe e paia; Auā e o mai nuu uma lava, ma latou ifo i ou luma; auā ua faaalia au faamasinoga tonu.” (Faaaliga 15:2-4) Tatou te faaalia le mataʻu lelei ia Ieova, po o le faaaloalo ia te ia, e ala i le tausisi atu i mea o loo ia fetalai mai e tonu. E faafaigofie lenei mea e ala i lo tatou faamanatu pea ia i tatou lava le atamai ma le alofa o le Atua. O ana poloaiga uma lava e mo lo tatou lelei.—Isaia 48:17, 18.
ʻO IEOVA LO TATOU ATUA, E TOATASI LAVA IA’
22. Aisea ua lē tapuai ai i le Tolutasi i latou o ē taliaina le Tusi Paia?
22 Sa tapuaia e tagata Aikupito anamua le tele o atua, ae o Ieova “o le Atua e na o ia lava e manaomia ona tuutoina atu i ai.” (Esoto 20:5, NW) Na faamanatu atu e Mose i le fanauga a Isaraelu e faapea, “o Ieova lo tatou Atua, o Ieova e toatasi lava ia.” (Teuteronome 6:4) Na toe fetalaia foi e Iesu Keriso upu lava na. (Mareko 12:28, 29) O le mea lea, o i latou o ē taliaina le Tusi Paia e avea o le Afioga a le Atua, latou te lē tapuaia se Tolutasi lea o loo iai peresona po o atua e toatolu i le atua e tasi. Ae maise foi, o le upu “Tolutasi” e lē o taʻu maia i le Tusi Paia. O le Atua moni ua na o se Peresona e toatasi, e ese mai ia Iesu Keriso. (Ioane 14:28; 1 Korinito 15:28) E lē o se peresona le agaga paia o le Atua. O le mana galue lea o Ieova, e faaaogaina e Lē Ona le Malosi Uma Lava mo le faataunuuina o ana fuafuaga.—Kenese 1:2; Galuega 2:1-4, 32, 33; 2 Peteru 1:20, 21.
23. (a) O le a faapefea ona tuputupu aʻe lou alofa i le Atua? (e) O le ā na fetalai i ai Iesu e uiga i le alofa i le Atua, ma o le ā e manaomia ona tatou aʻoaʻoina e uiga ia Keriso?
23 Pe a e manatunatu i le ofoofogia o Ieova, pe e te lē ioe ea la ua onomea ma tatau ona e tapuai atu ia te ia? A o e suesueina lana Afioga, le Tusi Paia, o le a atili ai ona e iloa lelei o ia, ma e aʻoaʻoina ai mea o loo ia moomia mai ia te oe mo lou lelei ma lou fiafiaga e faavavau. (Mataio 5:3, 6) E lē gata i lea, o le a tuputupu aʻe ai lou alofa mo le Atua. Ua fetaui lena, auā na fetalai Iesu: “Ia e alofa foi ia Ieova lou Atua ma lou loto atoa, ma lou tagata atoa, ma lou manatu atoa, ma lou malosi atoa.” (Mareko 12:30, NW) Ua manino mai la, o le alofa lena sa iai ia Iesu mo le Atua. Ae o le ā ua faaalia mai e le Tusi Paia e uiga ia Iesu Keriso? O le ā lana matafaioi i fuafuaga a Ieova?
SEʻI TOFOTOFO LOU ILOA
O ai le suafa o le Atua, ma o le ā le tele o loo faaaogā ai lena suafa i Tusitusiga Eperu?
Aisea e ao ai ona e faaaogaina le suafa o le Atua?
O ā uiga o Ieova le Atua e sili ona e fiafia i ai?
[Fesili mo le Suʻesuʻega]
[Ata i le itulau 29]
O le ā le tele o lou iloa o Lē na Foafoaina mea uma?
