Mataupu 14

O le Pule a ai e ao Ona e Amanaia?

1, 2. Pe e leaga ea ituaiga uma o pule? Faamatala.

“O LE PULE” o se upu e matuā lē fiafia i ai le toatele o tagata. E faigofie ona malamalama i ai, auā ua tele ina faaaogā sese le pule—i galuega, i totonu o le aiga, ma i faiga malo. Ua matuā moni ai le faapea mai o le Tusi Paia: “E pule . . . le tasi tagata i le tasi, e leaga ai o ia lava.” (Failauga 8:9) Ioe, e toatele ua latou pulea isi tagata, e ala i ni gaoioiga pule sauā ma faiga mo le sailia o o latou lava lelei.

² Ae e lē o pule uma e leaga. O se faaaoaoga, e mafai ona faapea atu, o loo pule o tatou tino ia i tatou. Ua “faatonuina” e o tatou tino i tatou ina ia mānava, ia ʻaai, ia feinu, ma ia momoe. Pe ua soona fia pule ea? E leai. O le usitai atu i nei faatonuga tatou te manuia ai. E ui e lē o se mea tatou te filifilia lo tatou gauai atu i manaoga o o tatou tino, ae ua iai isi ituaiga o pule ua manaomia ai lo tatou lotomalie e gauai atu. Seʻi manatunatu i nisi o faaaoaoga.

LE PULE E SILI ONA MAUALUGA

3. Aisea ua tonu ai le taʻua o Ieova o le “Alii Silisili Ese”?

³ E silia i le 300 taimi i le Tusi Paia, o loo taʻua ai Ieova o le “Alii Silisili Ese.” O le silisili ese o se tasi lea ua ia maua le pule e silisili ona maualuga. Aisea ua maua ai e Ieova le aiā i lenei tulaga? Ua tali mai le Faaaliga 4:11 e faapea: “Lo matou Alii [Ieova] e, ma lo matou Atua, e tatau lava oe ina ia tuuina atu ia te oe le viiga, ma le faaneeneega, ma le mana; auā na e faia mea uma lava, ona o lou finagalo foi e i ai i latou ma ua faia.”

4. Ua faapefea ona filifilia e Ieova le faatinoina o lana pule?

 ⁴ Ona o ia o Lē na Foafoaina i tatou, ua ia Ieova ai le aiā e faatino ai lana pule i le ala ua ia filifili i ai. Atonu e ono faamataʻuina ai i lenei mea, ae maise pe a tatou iloa, ua iai i le Atua le “tele o lona malosi.” Ua taʻua o ia o “le Atua e ou le malosi uma lava”—o se faaupuga i le faa-Eperu e faamatalaina ai le manatu o le malosi e silisili ona tele. (Isaia 40:26; Kenese 17:1) Peitai, e faaalia e Ieova lona malosi i se auala ua mātaulia i le faia o mea lelei, auā o lona uiga autū o le alofa.—1 Ioane 4:16.

5. Aisea e lē faigata ai ona gauai atu i le pule a Ieova?

⁵ E ui lava sa lapatai mai Ieova o le a ia faasalaina i latou o ē faia mea sese ma le lē salamō, ae na patino le iloa e Mose o ia o “le Atua lava ia, o le Atua faamaoni, o le na te tausi i le feagaiga atoa ma le alofa i e alolofa atu ia te ia ma tausiusi i ana poloaiga.” (Teuteronome 7:9) Seʻi manatunatu i ai! E lē o faamalosia e le Pule Silisili Ese aoao i tatou ina ia auauna atu ia te ia. Nai lo lena, ua tatou tosina atu ia te ia ona o lona alofa. (Roma 2:4; 5:8) O le gauai atu i le pule a Ieova ua avea foi o se fiafiaga, auā o ana tulafono e iu ai pea lava i ni aogā mo i tatou.—Salamo 19:7, 8.

6. Na faapefea ona tupu aʻe le finauga e uiga i le pule i le faatoaga o Etena, faatasi ai ma le ā le iuga?

⁶ Na teena e o tatou uluai mātua le pule silisili ese a le Atua. Sa la mananao e filifilia e i laua lava mea e lelei ma mea e leaga. (Kenese 3:4-6) O le iuga, na tutuliesea ai i laua mai lo la aiga Parataiso. Mulimuli ane, ona faatagaina ai lea e Ieova tagata ina ia faatutūina a latou lava tulaga tau pule, ina ia mafai ai ona latou ola i se sosaiete maopoopo, e ui ina lē lelei atoatoa. O ā nisi o nei pule, ma o le ā le tele o loo faatalitalia e le Atua i tatou e gauai atu ai ia i latou na?

“O FAIPULE SILISILI”

7. O ai “faipule silisili,” ma ua faapefea ona fesootai atu lo latou tulaga i le pule a le Atua?

⁷ Na tusi mai le aposetolo o Paulo e faapea: “Ia usiusitai tagata uma i faipule silisili; auā e leai se pule pe a le mai le Atua.” O ai “faipule silisili”? O upu a Paulo i fuaiupu o  loo sosoo mai e faaalia ai e faapea, o i latou ia o faipule i faiga malo faaletagata. (Roma 13:1-7; Tito 3:1) E lē o Ieova na faavaeina mai faipule o faiga malo faaletagata, ae ua ia faatagaina nei pulega ia faatinoina. O le mea lea na mafai ai e Paulo ona tusi mai e faapea: “O pule uma lava o loo fai nei, ua faatuina e le Atua.” O le ā ua faaalia e lenei mea e faatatau i lena pule faalelalolagi? Ua faaalia ai, e maualalo ifo, pe e itiiti sona tāua nai lo le pule a le Atua. (Ioane 19:10, 11) O lea la, pe a iai se feteenaiga i le va o tulafono a tagata ma tulafono a le Atua, ona tatau ai lea i Kerisiano ona taʻitaʻia i latou e o latou loto fuatia ifo ua uma ona aʻoaʻoina i le Tusi Paia. Ona ʻsili ai lea o lo latou anaana i le Atua nai lo le anaana i tagata.’—Galuega 5:29.

8. E faapefea ona aogā ia te oe faipule silisili, ma e mafai faapefea ona e faaalia lou gauai atu ia i latou?

⁸ E ui i lea, o le tele o taimi ua galulue ai faipule silisili faalemalo e pei o se ʻauauna a le Atua mo lo tatou lelei.’ (Roma  13:4) I ā itu? Ia, seʻi manatunatu i le tele o galuega aogā ua saunia e faipule silisili, e pei o le aumaia o meli, le puipuiga a leoleo ma le tineimu, le tausia o le soifua mālōlōina, ma aʻoaʻoga. Na tusi mai Paulo e faapea: “O le mea foi lea tou te avatu ai taulaga [“lafoga,” NW], auā o auauna i latou a le Atua, o loo finafinau i lenei lava mea.” (Roma 13:6) E tusa ai o lafoga po o so o se isi lava matafaioi faaletulafono, e tatau lava ona tatou “amio lelei” ai.—Eperu 13:18.

9, 10. (a) Ua faapefea ona fetaui faipule silisili i totonu o le faatulagaga a le Atua? (e) Aisea e sese ai le tetee atu i faipule silisili?

⁹ I nisi taimi e faaaogā sese ai e faipule silisili a latou pule. Po o le a avea ea lena ma mafuaaga tatou te lē faia ai la tatou avega tauave o le gauai atu pea ia i latou? E leai, e lē o le tulaga lena. O loo silasila mai Ieova i gaoioiga lē saʻo a nei faipule. (Faataoto 15:3) O lona faapalepale mai i pulega a tagata e lē o uiga faapea, ua ia faatuatuanaia le leaga o loo faia e na pulega; na te lē o faatalitalia foi i tatou ina ia tatou faia faapea. E mautinoa, ua lē pine, ona “tuʻimomomoina [loa lea] ma faaumatia ia malo uma lava” e le Atua, ae suitulaga ai le pulega a lona lava malo amiotonu. (Tanielu 2:44) Peitai, a o lei oo ina tupu lenei mea, ua faia ai e faipule silisili se auaunaga aogā.

¹⁰ Na faamatala mai e Paulo e faapea: “O le na te tetee i le pule, ua tetee e ia i le sauniga [“faatulagaga,” NW] a le Atua.” (Roma 13:2) O faipule silisili o le “faatulagaga” a le Atua ina ia latou puipuia le tulaga maopoopo, auā a aunoa ma lena, o le a salalau atu loa le fenuminumiai ma le lē pulea. O le tetee atu la ia i latou e lē o se mea faale-Tusi Paia ma o se mea valea foi. O se faataʻitaʻiga: Seʻi faapea la sa faia sou taotoga ma na suʻiina ni filo ia te oe ina ia puipui ai le manuʻa. E ui lava e fou le paʻi atu a na filo i le tino, ae o lena ua mafai ona faataunuu ai se mea mo sina taimi. E ono afaina pe afai e vave taseʻi ese filo ae lei pepē ia manuʻa. I se tulaga tutusa, sa lei avea faipule faalemalo ma vaega o le uluai fuafuaga a le Atua. Peitai ane, a o lei oo ina pule atoatoa lona Malo i le lalolagi, o loo faamaopoopoina faatasi ai e faiga malo faaletagata le olaga masani, ma faatinoina ai se fuafuaga o loo talafeagai ma le  finagalo o le Atua mo le taimi lenei. O lea, e tatau ai ona tatou tausisia pea le gauai atu i faipule silisili, ae i le taimi e tasi tatou te faamuamua ai pea le tulafono ma le pule a le Atua.

LE PULE I LE AIGA

11. E faapefea ona e faamatalaina le mataupu silisili tau i le tulagaulu?

¹¹ O le aiga, o le vaega autū lava lea o fesootaiga faaletagata. O totonu i inā e mafai ai e le tane ma le avā ona maua se faauoga tauia, ma e mafai ai ona malupuipuia le fanau ma aʻoaʻoina ina ia avea o ni tagata matutua. (Faataoto 5:15-21; Efeso 6:1-4) O lena faatulagaga mamalu e manaomia ona faamaopoopoina i se auala e mafai ai e sui o le aiga ona ola filemu ma le autasi. E faataunuuina e Ieova lenei mea e auala mai i le mataupu silisili o le tulagaulu, lea ua aoteleina i upu nei, o loo maua i le 1 Korinito 11:3 e faapea: “O le ulu o tane taitoatasi o Keriso lea, o le ulu o le avā o le tane lea, a o le ulu o Keriso o le Atua lea.”

12, 13. O ai le ulu o le aiga, ma o le ā e mafai ona aʻoaʻoina mai i le auala a Iesu na faatinoina ai lona tulagaulu?

¹² O le tane o le ulu lea o le aiga. Peitai, o loo iai lē e ulu ia te ia—o Iesu Keriso lea: “O outou tane, ia outou alolofa atu i a  outou lava avā, faapei o Keriso foi ona alofa mai i le ekalesia, ma foaiina mai o ia e ia e fai mona sui.” (Efeso 5:25) E faaatagia e le tane lona gauai ia Keriso pe a ia feutagai ma lana avā i le auala na masani ona feutagai ai Iesu ma le faapotopotoga. (1 Ioane 2:6) E tele le pule ua uma ona faaee atu ia Iesu, ae sa ia faatinoina i se tulaga e sili ona faautauta, e alofa ma agamalu. (Mataio 20:25-28) I le avea o ia ma tamaloa, sa lē taitai ona ia faaaogaseseina lona tulaga tau pule. Sa ia “agamalu ma le loto maulalo,” ma na ia taʻua foi ona soo o “uo” nai lo le taʻua o “auauna.” Na ia folafola atu ia i latou e faapea: “O aʻu foi e malolo ai outou.” Ma o le mea lena na ia faia.—Mataio 11:28, 29; Ioane 15:15.

¹³ O le faaaoaoga a Iesu ua aʻoaʻoina ai tane ina ia latou iloa, o le tulagaulu faa-Kerisiano e lē o se tofiga e fia pule sauā ai. Nai lo lea, o se tulaga e avatu ai le faaaloalo ma le alofa faataulaga. O le a mautinoa le aveesea ai e lenei mea ni faiga leaga agaʻi i se paaga, a lē o le fasi i lima, po o le fasi i upu. (Efeso 4:29, 31, 32; 5:28, 29; Kolose 3:19) Afai la o loo faia e le tane na faiga leaga i lana avā, o le a lē aogā ai foi isi ana galuega lelei, ma o le a faalavelaveina foi ana tatalo.—1 Korinito 13:1-3; 1 Peteru 3:7.

14, 15. Ua faapefea i le poto e uiga i le Atua ona fesoasoani i se avā ina ia gauai atu ai i lana tane?

¹⁴ Pe a faataʻitaʻi se tane i le faaaoaoga a Keriso, ona faigofie ai lea i lana avā ona faatatauina upu o loo i le Efeso 5:22, 23: “O outou fafine, ia outou usiusitai i a outou lava tane, faapei ona usiusitai i le Alii. Auā o le tane o le ulu ia o le avā, pei o Keriso foi o le ulu ia o le ekalesia.” E pei lava ona tatau ona gauai le tane ia Keriso, e tatau foi i le avā ona gauai atu i lana tane. Ua faamanino mai foi e le Tusi Paia e faapea, ua tatau le faamamaluina o avā lelei, ma ua tatau ona viiviia i latou ona o lo latou atamai faale-Atua ma lo latou galulue maelega.—Faataoto 31:10-31.

¹⁵ E fai faatatau le gauai atu a se avā Kerisiano i lana tane. O lona uiga o lenei mea, e tatau ona usiusitai atu i le Atua nai lo tagata, pe afai o le gauai atu i se mataupu o le a iu ina solia ai le tulafono a le Atua. E oo lava i lena tulaga, e tatau ai  i le maumauai atu a se avā i tulafono a le Atua ona faia i le “loto agamalu ma le filemu.” E tatau ona faamautinoa mai ai e faapea, ona o le poto e uiga i le Atua ua mafai ai ona avea o ia ma avā e sili atu ona lelei. (1 Peteru 3:1-4) O le tulaga tutusa foi lena e tatau ona iai i se tane e lē talitonu lana avā. O lona faatatauina o mataupu silisili o le Tusi Paia e tatau ona avea ai o ia ma tane e sili atu ona lelei.

16. E mafai faapefea e le fanau ona faataʻitaʻi i le faaaoaoga a Iesu a o avea o ia ma talavou?

¹⁶ I le Efeso 6:1 ua otooto mai ai le matafaioi a le fanau, i le faapea mai: “O outou le fanau, ia outou faalogo i outou matua i le Alii, aua o le mea tonu lava lea.” E mulimuli atu le fanau i le faaaoaoga a Iesu, o lē na gauai atu pea i ona mātua a o ia tuputupu aʻe. Ona o ia o se tamaitiiti usitai, na oo ai ina ʻtupu lona poto ma lona tino, ua alofagia o ia e le Atua atoa ma tagata.’—Luka 2:51, 52.

17. O le ā le aafiaga e iai i le fanau ona o le auala e faatinoina ai le pule a mātua?

¹⁷ O le auala e taulimaina ai e mātua a latou avega tauave e ono maua ai ni aafiaga, a lē o le faaaloalogia ai e a latou fanau o le pule, po o lo latou fouvale foi i ai. (Faataoto 22:6) O lea ua lelei ai mo mātua ona fesili ifo ia i latou lava, ʻPo o faatinoina ea laʻu pule, i le alofa po o le sauā? Po o oʻu soona faataga ea le faia o so o se mea?’ Ua faatalitalia se matua amio Atua ina ia alofa ma magafagafa, ae ia maumauai foi e utagia mataupu silisili faale-Atua. Ua talafeagai ai la le tusi atu a Paulo e faapea: “O outou tamā foi, aua neʻi tou faaonoono atu i a outou fanau [i se uiga moni, ʻe faia i latou i se tulaga e oo ai ina lotoa’], a ia tausi atu i ai i aoaiga ma apoapoaiga a le Alii [Ieova].”—Efeso 6:4; Kolose 3:21.

18. E ao faapefea ona tuuina atu le aoaiga faamātua?

¹⁸ E tatau i mātua ona matuā iloiloina totoʻa a latou auala o loo aʻoaʻo atu ai, ae maise lava pe a latou faanaunau ina ia usiusitai atu a latou fanau ma aumaia ai ia i latou le olioli. (Faataoto 23:24, 25) I le Tusi Paia, o le uiga autū o aoaiga, o se vaega o le aʻoaʻo atu. (Faataoto 4:1; 8:33) Ua fesootai atu i le alofa ma le agamalu, ae e lē i le ita ma le faasauā. O lea, e  manaomia ai i mātua Kerisiano ona gaoioi ma le atamai ma ia taofiofi lo latou ita a o aoaia le fanau.—Faataoto 1:7.

LE PULE I LE FAAPOTOPOTOGA

19. Ua faapefea ona saunia e le Atua se tulaga maopoopo i totonu o le faapotopotoga Kerisiano?

¹⁹ Talu ai o Ieova o ia o se Atua maopoopo, ua talafeagai ai ona ia saunia mo ona tagata le taʻitaʻiga ua iai le aiā e pule ai ma ua lelei ona faamaopoopoina. I se tulaga ua talafeagai, ua ia tofiaina ai Iesu e avea ma Ulu o le faapotopotoga Kerisiano. (1 Korinito 14:33, 40; Efeso 1:20-23) I lalo o le taʻitaʻiga lē vaaia a Keriso, ua faatonuina ai e le Atua se faatulagaga, lea e leoleoina ai le lafu e toeaina tofia i faapotopotoga taitasi, i se uiga maelega, e naunautai, ma alolofa. (1 Peteru 5:2, 3) E tele auala o loo fesoasoani atu ai auauna o le faiva ia i latou, ma avatu le auaunaga tāua i totonu o le faapotopotoga.—Filipi 1:1.

20. Aisea e ao ai ona tatou gauai atu i toeaina Kerisiano tofia, ma aisea e aogā ai lenei mea?

²⁰ Na tusi mai Paulo e faatatau i toeaina Kerisiano e faapea: “Ia outou usiusitai i [“ē o loo taʻimua ia te outou,” NW] ma outou gauai i ai; auā o loo leoleo i latou mo o outou agaga, latou te tala atu le tala i ai, ina ia faia ma le olioli, a e aua ma le tiga; auā e le aoga lea ia te outou.” (Eperu 13:17) I se uiga atamai, ua faatuatuaina atu ai e le Atua i ovasia Kerisiano le avega tauave o le tausia o manaoga faaleagaga o i latou i le faapotopotoga. O nei toeaina latou te lē avea ma vasega o taʻitaʻi lotu. O i latou o auauna ma o pologa a le Atua, o loo auauna atu mo manaoga o o latou uso tapuai, e pei lava foi ona sa faia e lo tatou Matai, o Iesu Keriso. (Ioane 10:14, 15) O le iloaina e faapea o loo naunau mai tane agavaa faale-Tusi Paia mo lo tatou agaigai i luma ma le tuputupu aʻe faaleagaga, e faalaeiauina ai i tatou ina ia lagolagosua ma gauai atu i ai.—1 Korinito 16:16.

21. E faapefea ona saili toeaina tofia ina ia fesoasoani faaleagaga atu i uso Kerisiano?

²¹ I nisi taimi, atonu e taasē ai se mamoe pe lamatia foi i ni faiga leaga a le lalolagi. I lalo o le taʻitaʻiga a le Leoleo  Mamoe Silisili, o toeaina ua avea ma leoleo mamoe lagolago e mataala i manaoga o i latou o loo latou tausia, ma ia latou mataalia e uaʻi totino atu ia i latou na. (1 Peteru 5:4) Latou te asiasia sui o le faapotopotoga ma avatu i ai ni upu faalaeiau. I le iloaina e faapea o loo saili le Tiapolo ina ia saveuina le filemu o tagata o le Atua, e faatinoina ai e toeaina le atamai mai lugā i le feagai ai ma so o se faafitauli. (Iakopo 3:17, 18) Latou te galulue mamafa ina ia faatumauina le autasi ma le maopoopo i le faatuatua, o se mea na tatalo i ai Iesu.—Ioane 17:20-22; 1 Korinito 1:10.

22. O le ā le fesoasoani ua saunia e toeaina i ni tulaga ua faia ai le mea sese?

²² Ae faapefea pe afai ua puapuagatia se Kerisiano i se mea leaga pe ua oo foi ina faavaivai ona ua ia faia se agasala? O fautuaga e faamālū ai a le Tusi Paia ma tatalo mai le loto a toeaina mo ia, e mafai ona toe faafoisia ai ia te ia lona mālōlōina faaleagaga. (Iakopo 5:13-15) O nei tane, ua tofia e le agaga paia, ua ia i latou foi le pule e avatu ai se aoaiga ma se faasaʻoga i so o se tasi o loo faaauau i le faia o mea sese po o se tasi ua ia aumaia ni lamatiaga i le mamā faaleagaga ma le mamā tau amio o le faapotopotoga. (Galuega 20:28; Tito 1:9; 2:15) Ina ia tausia le mamā o le faapotopotoga, atonu e manaomia ai ona taʻuina atu ni mea sese matuiā. (Levitiko 5:1) Pe afai o se Kerisiano ua ia faia se agasala matuiā ae ua ia talia aoaiga faale-Tusi Paia ma faasaʻoga, ma faaali mai ni faamaoniga o lona salamō moni, o le a ia maua se fesoasoani. O le mea moni, o ē solia tulafono a le Atua ma faaauau e lē salamō, o le a faateʻaeseina.—1 Korinito 5:9-13.

23. O le ā ua saunia e ovasia Kerisiano mo le lelei o le faapotopotoga?

²³ Na valoia mai e le Tusi Paia e faapea, i lalo o le pulega a Iesu Keriso o se Tupu, o le a tofia ai tane matutua faaleagaga ina ia saunia atu faamafanafanaga, o puipuiga, ma faafouina mo tagata o le Atua. (Isaia 32:1, 2) O le a taʻimua i latou i le avea ma faievagelia, o leoleo mamoe, ma faiaʻoga ina ia faaauiluma ai le tuputupu aʻe faaleagaga. (Efeso 4:11, 12, 16) E ui lava e iai taimi e ono faatonu atu, e aoai atu ma apoapoai atu ovasia Kerisiano i uso talitonu, ae o le faatatauina  o aʻoaʻoga aogā a toeaina lea e faavae mai i le Afioga a le Atua, o le a fesoasoani ina ia faatumauina ai i latou uma i le ala i le ola.—Faataoto 3:11, 12; 6:23; Tito 2:1.

IA TALIA LE SILAFAGA A IEOVA E FAATATAU I LE PULE

24. O le ā le mataupu o loo tofotofoina ai i tatou i aso taitasi?

²⁴ Na tofotofoina le uluai tamaloa ma le fafine i le mataupu o le gauai atu i le pule. E lē o se mea foi la e ofo ai, o le tofotofoga foi lena o loo fesagai ma i tatou i aso taitasi. Ua uunaia atili e Satani le Tiapolo le agaga o le fouvale i tagata. (Efeso 2:2) O le ala o le fia tutoatasi ua aliali mai e sili ona lelei nai lo le agaga o le gauai.

25. O ā aogā o le teena o le agaga fouvale o le lalolagi, ae gauai atu i le pule o loo faatinoina e le Atua po o loo ia faatagaina?

²⁵ E ui i lea, e tatau ona tatou teteeina le agaga fouvale o le lalolagi. O le faia faapea, o le a tatou iloa ai, o le gauai atu i le Atua e tamaoaiga lona taui e maua ai. E pei o se faataʻitaʻiga, o le a tatou alofia ai popolega ma le lagona fiu lea o loo taatele ia i latou o loo faatautee atu i faipule silisili. O le a faaitiitia ai foi ia i tatou vevesi ia o loo taatele i le tele o aiga. Ma o le a tatou olioli ai i aogā o le aufaatasiga mafana ma le alofa ma o tatou uso talitonu Kerisiano. Ae o le sili o na mea uma, o lo tatou gauai atu i le Atua o le a iu ai i se faiā lelei ma Ieova, o ia o le Pule e Silisili ona Maualuga.

SEʻI TOFOTOFO LOU ILOA

Ua faapefea ona faatinoina e Ieova lana pule?

O ai “faipule silisili,” ma e faapefea ona tatou tutumau i le gauai atu ia i latou?

O le ā le avega tauave ua tuu mai e le mataupu silisili tau tulagaulu i sui taitoatasi o le aiga?

E mafai faapefea ona tatou faaalia le gauai atu i le faapotopotoga Kerisiano?

[Fesili mo le Suʻesuʻega]

[Pusa i le itulau 134]

E GAUAI ATU, AE LĒ TETEE ATU

E ala i la latou galuega talaʻi, ua faasino atu ai e Molimau a Ieova i le Malo o le Atua ua na o lea le faamoemoe o tagata mo le mauaina o le filemu moni ma le saogalemu. Ae o nei tagata folafola maelega o le Malo o le Atua, e matuā lē tetee atu lava i faiga malo o loo latou ola ai. I le tuufaafeagai, ua aofia ai Molimau i tagatānuu e sili ona faaaloalo ma usiusitai i tulafono. Na taʻua e se tasi tagata ofisa o le malo i se atunuu o Aferika e faapea: “Pe ana pei uma lotu o Molimau a Ieova, semanu e leai ni a tatou tagata fasioti tagata, talepe fale, faatupu faalavelave, ni pagota, ma ni pomu atomika. Semanu e lē tau lokaina fale i taimi uma.”

I le mātauina o lenei mea, ua faatagaina ai e tagata o loo i pulega i le tele o atunuu le galuega talaʻi a Molimau, ina ia faaauau e aunoa ma le taofiofia. I isi atunuu, ua toe tatalaina ai se faasasaaga po o ni taofiofiga ina ua iloa ane e faipule silisili o loo faia e Molimau a Ieova ni taaʻiga lelei. Ua pei lava ona tusi mai le aposetolo o Paulo e faatatau i le usiusitai i faipule silisili e faapea: “Ia e amio lelei, ona taʻuleleia mai lea o oe e ia.”—Roma 13:1, 3.