Mataupu 5

O le Tapuaiga a ai e Taliaina e le Atua?

1. O le ā na fia iloa e se fafine Samaria e uiga i le tapuaiga?

PE NA iai ea se taimi na e tau mānatu ai, ʻPo o le tapuaiga a ai e taliaina e le Atua?’ Atonu o le fesili lena sa mafaufau i ai se fafine, a o ia talanoa atu ia Iesu Keriso, i tala ane o le Mauga o Keresema i Samaria. I lona faasino atu i le eseesega o le tapuaiga a tagata Samaria ma le tapuaiga a tagata Iutaia, na faapea atu ai le fafine: “O matou tamā sa tapuai i lenei mauga; a ua outou fai mai, o Ierusalema le mea e tusa ai ona tapuai ai.” (Ioane 4:20) Pe na fai atu ea Iesu i le fafine Samaria, e taliaina e le Atua tapuaiga uma? Pe na ia fetalai atu ea e iai ni mea patino e manaomia ina ia finagalo malie ai le Atua?

2. I le tali atu i le fafine Samaria, o le ā na fetalai atu ai Iesu?

² O le tali a Iesu e faateʻia ai na faapea atu: “E oo mai ona aso, tou te lē toe tapuai atu ai i le Tamā, i lenei mauga, po o Ierusalema foi.” (Ioane 4:21, NW) Ua leva ona matataʻu tagata Samaria ia Ieova ma latou tapuai atu i isi atua i le Mauga o Keresema. (2 Tupu 17:33) Ae o lea ua fetalai atu Iesu Keriso, e lē o lena mauga, e lē o Ierusalema foi e tāua lea mo le faia o le tapuaiga moni.

IA TAPUAI ATU I LE AGAGA MA LE UPU MONI

3. (a) Aisea na lē iloa lelei ai e tagata Samaria le Atua? (e) Na mafai faapefea e tagata faamaoni o Iutaia ma isi ona latou iloa le Atua?

³ Na faaauau ona taʻu atu e Iesu i le fafine Samaria: “Tou  te tapuai ma le le iloa; a ua matou tapuai ma le iloa, auā mai ia Iutaia le faaolataga.” (Ioane 4:22) Sa sese manatu faalelotu na iai i tagata Samaria, ma sa na o uluai tusi e lima o le Tusi Paia sa latou taliaina faapea o tusi na faagaeeina—ma e na o le pau foi na o tusi, sa faasaʻosaʻoina e i latou lava e faapea, o le Penetatuka faa-Samaria. O lona uiga la, sa latou lei iloa moni le Atua. Peitai, sa tuuina atu i tagata Iutaia le poto faale-Tusi Paia. (Roma 3:1, 2) Na avatu e le Tusi Paia i tagata faamaoni o Iutaia ma isi o ē na faalogo, mea na latou manaomia ina ia latou iloa ai le Atua.

4. E tusa ai ma fetalaiga a Iesu, o le ā sa manaomia ona fai e tagata Iutaia ma tagata Samaria, pe afai sa mananao ina ia talia e le Atua a latou tapuaiga?

⁴ O le mea moni, na faaalia e Iesu e faapea, sa tatau i tagata Iutaia ma tagata Samaria ona toe fetuutuunai le auala o loo faia ai la latou tapuaiga ina ia finagalo malie mai i ai le Atua. Na ia fetalai atu: “E oo mai ona aso, ua oo nei foi i ai, o e tapuai faamaoni latou te tapuai i le Tamā i le agaga ma le faamaoni [“upu moni,” NW]; auā o loo saili le Tamā i e tapuai faapena ia te ia. O le Atua o le agaga lava ia; o e tapuai ia te ia, e tatau ona tapuai atu ai i le agaga ma le faamaoni [“upu moni”].” (Ioane 4:23, 24) E manaomia ona tatou tapuai atu i le Atua “i le agaga,” ua uunaia e loto o loo tumu i le faatuatua ma le alofa. E mafai ona tapuai atu i le Atua ʻi le upu moni’ e ala i le suesueina o lana Afioga, le Tusi Paia, ma le tapuai atu ia te ia e tusa ai ma ana upu moni ua faaalia mai. Po o e naunautai ea e faia faapea?

5. (a) O le ā le uiga o le “tapuaiga”? (e) O le ā e ao ona tatou fai pe a tatou mananao ina ia talia e le Atua la tatou tapuaiga?

⁵ Na faamamafa mai e Iesu le manaomia e le Atua o le tapuaiga moni. E faaalia ai i lenei mea, e iai nisi ituaiga o tapuaiga e lē taliaina e Ieova. O le tapuai atu i le Atua o lona uiga ia avatu ia te ia le mamalu faaaloalogia ma ia tuuina atu ia te ia le auaunaga paia. Pe afai e te fia faamamalu atu i se tasi o loo iai se pule tele, e mautinoa o le a e naunau e auauna atu ia te ia ma faia mea e faafiafiaina ai  o ia. Ua mautinoa la, tatou te mananao e faafiafia le Atua. Nai lo le tau ina faapea atu, ʻOu te fiafia lava aʻu i laʻu lotu,’ e tatau ona tatou manaomia le faamautinoaina ua talafeagai la tatou tapuaiga ma mea o loo faafinagaloina e le Atua.

IA FAIA LE FINAGALO O LE TAMĀ

6, 7. Aisea na lē amanaia ai e Iesu nisi o ē na faapea mai o ona soo?

⁶ Seʻi o tatou faitau i le Mataio 7:21-23 ma tagai i ai pe mafai ona tatou iloaina le vala e sili ona tāua lena e faamautinoa ai pe taliaina e le Atua tapuaiga uma. Na fetalai Iesu e faapea: “E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o loʻu Tamā o i le lagi. E toatele latou te fai mai ia te au i lea aso, Le Alii e, le Alii e, matou te lei perofeta ane ea i lou igoa, o lou igoa foi na matou tulia ai temoni [foafoaga agaga leaga], o lou igoa foi na matou fai ai vavega e tele? Ona ou taʻutino atu ai lea ia te i latou, Ou te lei iloa lava outou; ina o ese ia outou ia te au, o outou o e fai amio leaga.”

⁷ O le amanaiaina o le avea o Iesu Keriso ma Alii, o se mea e manaomia mo le tapuaiga moni. Ae o le a misia se mea i le tapuaiga a le toatele o i latou o loo faapea mai o soo o Iesu. Na ia fetalai, o le a faia e nisi “vavega,” e pei o mea ua latou manatu o ni faamālōlōga faavavega. Ae peitai, latou te lē taulau ona faia le mea na fetalai atu Iesu e sili ona tāua. Sa latou lei “faia le finagalo o [lona] Tamā.” Pe afai tatou te mananao e faafiafia le finagalo o le Atua, e tatau la ona tatou aʻoaʻoina po o le ā le finagalo o le Tamā, ona faia lea.

LE POTO SAʻO—O SE PUIPUIGA

8. Pe afai e tatau ona tatou faia le finagalo o le Atua, o le ā e manaomia, ma o ā manatu sese e ao ona tatou alofia?

⁸ O le faia o le finagalo o le Atua e manaomia ai le poto saʻo e uiga ia Ieova le Atua ma Iesu Keriso. O le poto lena e taʻitaʻia ai i le ola e faavavau. E mautinoa la, o le a tatou  mananao uma lava e manatunatu mamafa i le mataupu o le mauaina o le poto saʻo mai le Afioga a le Atua, le Tusi Paia. Ua faapea mai nisi, e lē manaomia fua ona popole i ai, o le itu taulia pe afai o loo tatou faamaoni ma maelega i la tatou tapuaiga. O isi ua faapea mai, ʻA itiiti lava mea e te iloa, o le itiiti foi na o mea e manaomia mai ia te oe.’ Peitai, ua faalaeiauina i tatou e le Tusi Paia ina ia faateleina lo tatou poto e uiga i le Atua ma ana fuafuaga.—Efeso 4:13; Filipi 1:9; Kolose 1:9.

9. E faapefea ona puipuia i tatou e le poto saʻo, ma aisea tatou te manaomia ai lena puipuiga?

⁹ O lena poto o se puipuiga lea e tetee atu ai i le faaleagaina o la tatou tapuaiga. Na taʻua e le aposetolo o Paulo se foafoaga agaga o loo faatagā faafoliga mai e pei o se “agelu o le malamalama.” (2 Korinito 11:14) I ni foliga taufaasese, o loo taumafai ai lenei foafoaga agaga—o Satani—e taʻitaʻiseseina i tatou ina ia tatou faia mea e feteenai ma le finagalo o le Atua. O isi foafoaga agaga o loo faifaimea faatasi ma Satani, ua latou faaleagaina foi le tapuaiga a tagata, auā na faapea mai Paulo: “O mea ua fāsia e nuu ese, ua fāsia e i latou mo temoni, a e le o le Atua.” (1 Korinito 10:20) E foliga mai, e toatele sa manatu o loo latou tapuai atu i le auala saʻo, e ui lava sa latou lei faia le mea na finagalo i ai le Atua. Sa taʻitaʻiseseina atu i latou i tapuaiga sese e lē mamā. O le a tatou aʻoaʻoina atili nisi mea e uiga ia Satani ma ana temoni i se taimi mulimuli ane, ae ua faaleagaina moni lava e nei fili o le Atua, le tapuaiga a tagata.

10. O le ā o le a e faia pe afai na faaoonaina ma le loto i ai e se tasi lou vai taumafa, ma o le ā ua faaauupegaina i tatou e fai ona o le poto saʻo i le Afioga a le Atua?

¹⁰ Pe afai sa e iloaina na faaoonaina ma le loto i ai e se tasi lou vai taumafa, po o le a e inuina pea la? E mautinoa, o le a vave ona e gaoioi e saili atu i se isi mea o loo puna ai se suavai lelei ma mamā. Ioe, o le poto saʻo i le Afioga a le Atua ua faaauupegaina ai i tatou ina ia iloa le tapuaiga moni, ma ia teena mea lē mamā na sa māfua ai ona lē taliaina e le Atua le tapuaiga.

 UA AVEA POLOAIGA A TAGATA MA AʻOAʻOGA FAALOTU

11. O le ā na sese ai le tapuaiga a le toatele o tagata Iutaia?

¹¹ A o iai Iesu i le lalolagi, e toatele tagata Iutaia sa latou lē amioai e tusa ma le poto saʻo e uiga i le Atua. O le ala lea na latou misia ai le avanoa mo se tulaga mamā i luma o Ieova. E faatatau ia i latou, na tusi ai Paulo e faapea: “Ou te molimau ia te i latou, ua latou maelega i la le Atua, a e le tusa ma le malamalama [“poto saʻo,” NW].” (Roma 10:2) Sa filifilia lava e i latou le auala e fai ai la latou tapuaiga i le Atua, nai lo le faalogo atu i le mea o fetalai mai ai o ia.

12. O le ā na faaleagaina ai le tapuaiga a Isaraelu, faatasi ma le ā le iuga?

¹² I le amataga, sa faatino ai e le fanauga a Isaraelu le lotu mamā na tuuina atu i ai e le Atua, peitai na oo ina faaleagaina i aʻoaʻoga ma filosofia a tagata. (Ieremia 8:8, 9; Malaki 2:8, 9; Luka 11:52) E ui lava sa manatu taʻitaʻi lotu Iutaia lea na taʻua o Faresaio e faapea, na talia e le Atua la latou tapuaiga, ae na fetalai atu Iesu ia i latou: “Ua tatau lelei le valoaga a Isaia ia te outou tagata faafiaamiotonu, e pei ona tusia, Ua vivii mai lenei nuu i o latou laugutu, a o latou loto ua taumamao ia te au. E tapuai fua mai i latou ia te au i lo latou fai ma mataupu o poloaiga a tagata.”—Mareko 7:6, 7.

13. E ono faapefea ona tatou gaoioi e pei ona sa faia e le ʻau Faresaio?

¹³ Pe ono mafai ea ona tatou faia mea na faia e le ʻau Faresaio? E mafai ona tupu lenei mea pe a tatou mulimuli atu i tū faalotu na tuufaasolo mai e o tatou tuaa, nai lo le iloiloina po o le ā le silafaga a le Atua e faatatau i tapuaiga. I le lapataia o lenei lamatiaga moni, na tusi mai ai Paulo: “O loo taʻutino mai e le Agaga, e o ese nisi i le faatuatua i tausaga amuli, latou te faalogo i agaga e faasese ma aʻoaʻoga a temoni.” (1 Timoteo 4:1) O lea la, e lē lava le tau ina tatou manatu lava i tatou faapea o loo finagalo malie mai le Atua i la tatou tapuaiga. I le pei o le fafine Samaria lea na fetaui ma Iesu, atonu ua tuufaasolo mai e o tatou tuaa ia i tatou le auala e faia ai a tatou tapuaiga. Peitai, e manaomia  ona tatou faamautinoa o loo tatou faia mea e talafeagai ma le finagalo malie o le Atua.

IA FAAETEETE INA NEʻI FAATIGA I LE FINAGALO O LE ATUA

14, 15. E tusa lava pe tatou te iloa sina vaega o le finagalo o le Atua, ae aisea e ao ai ona tatou faaeteete pea?

¹⁴ Pe a tatou lē faaeteete, tatou te ono faia ai se mea e lē taliaina e le Atua. E pei o se faaaoaoga, na faapaʻū ifo le aposetolo o Ioane i vae o se agelu ina ia “ifo ia te ia.” Peitai na lapatai atu le agelu: “Ia oe, aua lava; o aʻu o lou uso a auauna, o so lou au uso foi ua i ai le mau ia Iesu; ia e ifo i le Atua.” (Faaaliga 19:10) Pe ua e mātau mai la le manaoga ina ia faamautinoa e lē o faaleagaina lau tapuaiga e so o se ituaiga o ifoga i tupua?—1 Korinito 10:14.

¹⁵ Ina ua amata ona faia e nisi Kerisiano ni tū faalotu sa lei faafiafiaina ai le finagalo o le Atua, ona fesili atu lea o Paulo: “Pe faapefea ona outou toe liliu i mataupu muamua e vaivai ma faatauvaa, ua outou toe mananao ea ia outou toe nofo pologa i ai? Tou te anaana i aso, ma masina, ma tau, ma tausaga! Ou te fefe ia te outou, ina neʻi iu ina faaleaogaina laʻu galuega na ou faia ia te outou.” (Kalatia 4:8-11) Na maua e na tagata le poto e uiga i le Atua, ae na mulimuli ane latou faia le mea sese, e ala i le tausisia o tū faalotu ma aso paia sa lē taliaina e Ieova. E pei ona fai mai Paulo, e manaomia ona tatou “suesue . . . pe se a se mea e fiafia i ai le Alii.”—Efeso 5:10.

16. Ua fesoasoani mai faapefea le Ioane 17:16 ma le 1 Peteru 4:3 ia i tatou ina ia filifilia pe finagalo malie le Atua i aso mālōlō ma isi tū?

¹⁶ E ao ona tatou faamautinoa ua tatou alofia aso mālōlō faalotu ma isi tū na e solia ai mataupu silisili a le Atua. (1 Tesalonia 5:21) O se faataʻitaʻiga, na fetalai atu Iesu i ona soo: “E le ni o le lalolagi i latou, faapei o aʻu foi, ou te le so le lalolagi aʻu.” (Ioane 17:16) Po o faia ea e lau lotu sana vaega i sauniga faamanatu ma aso mālōlō na e solia ai le mataupu silisili, o le solitu i mataupufai a lenei lalolagi? Po o auai ea tagata o lau lotu i nisi taimi i tū ma faatasiga  faamanatu na atonu e faia ai amioga e tutusa ma mea o loo faamatala mai e le aposetolo o Peteru? Na tusi mai o ia: “Ua lava ia aso ua mavae na fai ai e outou le manao o e faapaupau, o savavali i le faamatāitu ma tuʻinanau, ma le inu tele i uaina, ma poula, ma inugāava, ma le ifo i tupua e soli ai tulafono.”—1 Peteru 4:3.

17. Aisea e ao ai ona tatou alofia so o se mea e atagia mai ai le agaga o le lalolagi?

¹⁷ Na faamamafaina e le aposetolo o Ioane le manaoga ina ia alofia so o se faiga e atagia mai ai le agaga o le lalolagi lē amio Atua o loo siomia ai i tatou. Na tusi mai Ioane: “Aua tou te mananao i le lalolagi, po o mea o i ai i le lalolagi. Pe afai e manao se tasi i le lalolagi, e le o ia te ia le alofa i le Tamā. Auā o mea uma lava o i le lalolagi, o le tuʻinanau o le tino, ma le tuʻinanau o mata, ma le faalialia o lenei olaga, e le mai le Tamā ia, a e mai le lalolagi. E mavae atu foi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.” (1 Ioane 2:15-17) Pe sa e mātauina ea, o i latou o ē ʻfaia le finagalo o le Atua’ o le a ola e faavavau? Ioe, pe afai tatou te faia le finagalo o le Atua ma alofia faiga o loo atagia mai ai le agaga o lenei lalolagi, ona mafai lea ona tatou maua le faamoemoe o le ola e faavavau!

IA USITAIA TAPULAA MAUALULUGA A LE ATUA

18. Na faapefea ona faaseseina manatu o nisi Kerisiano i Korinito e faatatau i amioga, ma o le ā e ao ona tatou aʻoaʻoina mai i lenei mea?

¹⁸ E finagalo le Atua ina ia avea ma ona tagata tapuai i latou o ē usitaia ana tapulaa maualuluga tau i amioga tatau. Na manatu sese nisi tagata i Korinito anamua e faapea, o le a faapalepale mai pea le Atua i amioga lē tatau. Tatou te iloa le sese o o latou manatu na, pe a faitau i le 1 Korinito 6:9, 10. Pe afai tatou te fia tapuai i le Atua i le auala na te taliaina, e tatau la ona tatou faafiafia o ia i a tatou upu ma a tatou gaoioiga. Po o mafai ea e lau tapuaiga ona faalaeiauina ai oe e faia lena mea?—Mataio 15:8; 23:1-3.

19. E faapefea i le tapuaiga moni ona aafia ai le auala tatou te feutagai ai ma isi?

 ¹⁹ O a tatou feutagaiga ma isi tagata e ao foi ona atagia atu ai tapulaa a le Atua. Na faalaeiau mai Iesu Keriso ina ia tatou faia atu i isi tagata ni amioga tatou te mananao foi latou te amioai mai ai ia i tatou, auā o se vaega lenei o le tapuaiga moni. (Mataio 7:12) Seʻi mātau foi lana fetalaiga e uiga i le faaalia o le alofa faaleuso: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) E ao ona fealofani soo o Iesu, ma ia faia mea e lelei i o latou uso tapuai ma isi tagata.—Kalatia 6:10.

LE TAPUAIGA E FAIA MA LE LOTO ATOA

20, 21. (a) O le ā le ituaiga o tapuaiga e manaomia e le Atua? (e) Aisea na teena ai e Ieova le tapuaiga a Isaraelu i ona po o Malaki?

²⁰ Atonu i lou loto, o loo e fia tapuai atu i le Atua i le auala na te taliaina. Afai o lea, e tatau ai ona ia te oe le silafaga a Ieova i tulaga tau tapuaiga. Na faamamafa mai e le soo o Iakopo e faapea, o le silafaga a le Atua e tāua, ae e lē o o tatou manatu. Na faapea mai Iakopo: “O le ituaiga lenei o tapuaiga e mamā ma lē ponā i le silafaga a lo tatou Atua ma o lo tatou Tamā: ia tausi atu i ē mātua oti ma fafine ua oti a latou tane i o latou puapuaga, ma ia leoleo le tagata ia te ia lava ina ia aua neʻi pisia mai i le lalolagi.” (Iakopo 1:27, NW) Pe a iai se faanaunauga e faafiafia le Atua, e manaomia e i tatou taitoatasi ona iloiloina la tatou tapuaiga ina ia mautinoa e lē o faaleagaina e faiga lē amio Atua, ma tatou te lē o tuuesea foi se mea e matuā tāua i lana silafaga.—Iakopo 1:26.

²¹ E na o tapuaiga e mamā, lea e faia ma le loto atoa e finagalo malie i ai Ieova. (Mataio 22:37; Kolose 3:23) Ina ua lē atoa ona avatu e le nuu o Isaraelu i le Atua la latou tapuaiga e tusa ai ma lena tulaga, ona ia fetalai mai lea: “E ava le atalii i lona tamā, e ava foi le auauna i lona alii; afai o aʻu o le tamā, o ifea ni oʻu ava? afai foi o aʻu o le alii, o ifea loʻu matautia?” Sa latou faatiga i le finagalo o le Atua, e ala  i lo latou faaaogā o manu tauaso, manu pipili, ma manu mamaʻi e ofo atu ai taulaga ia te ia, ma na ia teena ai na ituaiga o tapuaiga. (Malaki 1:6-8) Ua onomea mo Ieova le avatu i ai o le tapuaiga e silisili ona mamā, ma na te lē taliaina se mea e itiiti ifo nai lo le tuutoina atu tau o ia lava.—Esoto 20:5; Faataoto 3:9; Faaaliga 4:11.

22. Pe afai tatou te mananao e talia e le Atua la tatou tapuaiga, o le ā o le a tatou alofia le faia, ae o le ā o le a tatou faia?

²² O le fafine Samaria lea na talanoa ma Iesu sa foliga mai na naunau o ia e tapuai atu i le Atua i le auala e faamaonia e le Atua. Pe afai o lo tatou faanaunauga lena, o le a tatou alofia ai la aʻoaʻoga ma faiga uma e faaleagaina ai. (2 Korinito 6:14-18) Nai lo lea, o le a tatou faamalolosi ai ina ia maua le poto saʻo i le Atua ma faia lona finagalo. O le a tatou matuā maumauai ai i le faia o mea o loo ia faafinagaloina mo se tapuaiga na te taliaina. (1 Timoteo 2:3, 4) O loo tauivi Molimau a Ieova ina ia faia lena mea, ma latou te faalaeiauina ma le mafana oe ina ia e auai ma i latou i le tapuai atu i le Atua i “le agaga ma le upu moni.” (Ioane 4:24, NW) Na fetalai Iesu: “O loo saili le Tamā i e tapuai faapena ia te ia.” (Ioane 4:23) E faamoemoe ua avea oe ma lena ituaiga o tagata. I le pei o le fafine Samaria, e mautinoa o le a e fia mauaina le ola e faavavau. (Ioane 4:13-15) Peitai o loo e tagai atu i tagata o loo ola matutua ma feoti. O le mataupu la o loo sosoo mai, o loo faamatalaina ai le mafuaaga.

SEʻI TOFOTOFO LOU ILOA

E pei ona faaalia i le Ioane 4:23, 24, o le ā le tapuaiga e taliaina e le Atua?

E mafai faapefea ona tatou mautinoa pe fiafia le Atua i nisi o tū ma faatasiga faamanatu?

O ā nisi o mea manaomia mo le tapuaiga ina ia taliaina ai?

[Fesili mo le Suʻesuʻega]

 [Ata atoa i le itulau 44]