Mataupu 19

Pe a Faatumulia le Lalolagi i le Poto e Uiga i le Atua

1, 2. Na faapefea ona faaleagaina le foafoaga a Ieova?

SEʻI faapea o lea faatoʻā faamaeʻa lava se ata matagofie na tusia e se tusiata iloga. Ua ia manatu i ai ma le saʻo, ua matuā lelei lava—o se galuega ofoofogia! Ae malama aʻe le aso e sosoo ai, ua faaleaga e se tasi o loo lotoleaga ma faatavā ane i ai. O le mea mautinoa, e matuā ogaoga lagona tiga o le tusiata o le a iai. Maeu lona naunau e fia vaai atu ua faafalepuipui le tagata faaleagamea! E mafai foi ona e faaātaina le faanaunau o le tusiata ina ia toe maua atoatoa e lana ata lona matagofie na iai muamua.

² I le faapei o lena tusiata, na faapena ona foafoaina e Ieova se galuega ofoofogia i le sauniunia o le lalolagi ma tuu i ai tagata. Ina ua uma ona foafoaina le tamaloa ma le fafine, ona ia folafola mai lea o le “matuā lelei lava” o ana galuega uma o i le lalolagi. (Kenese 1:31) O Atamu ma Eva o le fanau a le Atua lava ia, ma sa alofa o Ia ia i laua. Sa ia faaāta atu i ai se lumanai fiafia ma le faamamaluina o le a la maua. E moni, na taʻitaʻia i laua e Satani i le faia o le fouvalega, peitai, o le foafoaga matagofie a le Atua sa lei faaleagaina i se tulaga o le a lē toe mafai ai ona faaleleia.—Kenese 3:23, 24; 6:11, 12.

3. O le ā “le ola moni”?

³ Ua maumauai le Atua ia faasaʻoina mea. O lona faanaunauga sili ina ia silasila mai o loo tatou ola i le olaga na ia muai fuafuaina. O lo tatou iai i se olaga puupuu ma le tumu i faalavelave ua lē o “le ola moni” lea, auā ua sili atu ona leaga  le tulaga ua iai nai lo le mea sa finagalo i ai Ieova. O “le ola moni” na finagalo le Atua tatou te maua o le ʻola e faavavau’ lea i lalo o ni tulaga e atoatoa ona lelei.—1 Timoteo 6:12, 19.

4, 5. (a) O le a faapefea ona iloatino le faamoemoe mo le Parataiso? (e) Aisea e tatau ai ona tatou manatunatu loloto i lo tatou faamoemoe mo le lumanai?

⁴ O le poto e uiga i le Atua e aumaia ai tiute tauave i luma o Ieova. (Iakopo 4:17) Ae seʻi manatunatu i faamanuiaga o le a e olioli ai pe a e faatatauina lena poto ma aapa atu i le ola e faavavau. Ua fofola mai e Ieova le Atua, i lana Afioga, le Tusi Paia, se ata matagofie o foliga o le a iai le olaga i le lalolagi Parataiso lea ua matuā lalata mai lava. O le mea moni, i le avea ma tagata o Ieova, tatou te lē tau ina auauna ai i le Atua ona o se faanaunauga mo se taui. Tatou te auauna i le Atua talu ai tatou te alolofa ia te ia. (Mareko 12:29, 30) E lē gata i lea, tatou te lē maua le ola ona o se totogi i le auauna atu ia Ieova. O le ola e faavavau o se meaalofa a le Atua. (Roma 6:23) O le a tatou maua ai aogā pe a tatou manatunatu loloto i lena ola, auā o le faamoemoe i le Parataiso ua faamanatu mai ai ia i tatou le ituaiga o Atua e iai Ieova—o lē e alofa “na te tauia mai o e matuā saili ia te ia.” (Eperu 11:6) O se faamoemoe o loo matuā olaola i o tatou mafaufau ma loto o le a mafai ai ona tatou onosaia mea faigata o iai i le lalolagi a Satani.—Ieremia 23:20.

⁵ Seʻi taulaʻi atu nei la o tatou mafaufau i le faamoemoe ua faavae mai i le Tusi Paia, o le ola lea e faavavau i le Parataiso faalelalolagi i le lumanai. O ā foliga o le olaga o le a iai pe a faatumulia le lalolagi i le poto e uiga i le Atua?

PE A MAVAE ATU AMAKETO—O SE LALOLAGI PARATAISO

6. O le ā Amaketo, ma o le ā o le a uiga i ai mo tagata?

⁶ E pei ona muai taʻua, o le a lē pine ona faaumatia loa lea e Ieova le Atua le faiga amioleaga o mea o loo iai nei. Ua matuā lalata atu lava le lalolagi i le mea ua taʻua e le Tusi Paia o Amaketo. O nisi tagata pe a taʻua lena upu, latou te manatunatu ai i se faaumatiaga faaniukilia e faaoo mai e ni malo o loo fetauai. Peitai, e matuā leai se uiga faapena o Amaketo. E pei ona faaalia i le Faaaliga 16:14-16, o Amaketo o “le taua i le aso  tele o le Atua e ona le malosi uma lava.” O le taua lea e aofia ai “tupu o le lalolagi ma le atu laulau uma,” po o atunuu. Ua lē o toe umi, ona tietie atu lea o le Alo o Ieova le Atua, le Tupu tofia, ina ia tauina le taua. E matuā mautinoa aʻiaʻi le iuga o le a iai. O ē uma e tetee i le Malo o le Atua ma o loo fai ma vaega o le faiga amioleaga o mea a Satani o le a tafiesea. E na o i latou o loo faamaoni atu ia Ieova o le a faasaoina.—Faaaliga 7:9, 14; 19:11-21.

7. O fea o le a iai Satani ma ana temoni a o faagasolo le Pulega a Keriso i le Afe Tausaga, ma o le a faapefea ona aogā mo tagata lenei mea?

⁷ Seʻi faapea o oe lea ua sao mai ai i lena mala matautia. O le a faapeī le olaga o le a iai i le lalolagi i totonu o lena lalolagi fou ua folafola mai e le Atua? (2 Peteru 3:13) E lē manaomia ona tatou taumateina, auā ua taʻu mai e le Tusi Paia ia i tatou, ma o mea o loo taʻu mai ai e matuā mataina lava. Ua tatou iloa o le a taofia gaoioiga a Satani ma ana temoni, e lokaina i latou i le to e lē gata, e lē toe mafai ai ona gaoioi a o faagasolo le Pulega a Iesu Keriso i le Afe Tausaga. O le a lē toe iai na peresona lē vaaia amioleaga, ma le taufaasese, i le faatupuina o faalavelave ma le taumafai e faaosoosoina i tatou e faia ni gaoioiga lē faamaoni i le Atua. Maeu se mapusaga!—Faaaliga 20:1-3.

8, 9. I le lalolagi fou, o le ā o le a tupu i mafatiaga, o maʻi, ma le soifuaga matua?

⁸ I se taimi, o le a mou atu ai ituaiga uma o maʻi. (Isaia 33:24) Ona tutū ai lea i luga o ē na pipili, o le a savavali, tamomoe, ma sisiva ona ua lelei ma malolosi o latou vae. I le mavae atu o le tele o tausaga sa lē mafai ai e ē na tutuli ona lagona se mea, o lea o le a latou lagonaina leo o le fiafia. O le a taia le vaai a ē na tauaso i le matagofie o le felanulanuai mai o lanu eseese ma foliga o mea o le a manino atu i ai la latou vaai. (Isaia 35:5, 6) O le a iu lava ina latou vaai atu i foliga o ē pele ia i latou! Atonu o le a tau fai sina toe nenefu laitiiti o la latou vaai, ona o le lilofia i loimata o le olioli.

⁹ Seʻi tau lava ina mafaufau! E lē toe iai ni matatioata mo le faaleleia o le vaai, e lē toe iai ni tootoo, e lē toe iai ni fualaau mo faamaʻi, e lē toe iai ni falefaʻinifo po o ni falemaʻi! E lē taitai ona toe iai ni maʻi ma ni mafatiaga tau i faalogona lea e  aveesea ai le fiafia o tagata. E lē toe iai ni faamaʻi e aafia ai olaga o tamaiti. O le a suia tulaga mafatia e māfua mai i le soifuaga matua. (Iopu 33:25) O le a sili atu ona tatou ola mālōlōina, ma malolosi. O le a tatou alafaʻi mai i taeao taitasi mai se mālōlōga lelei i le po, ua toe faafouina le malosi, ua faatumulia i le matuā fiafia ma le mataalia atu i se isi aso fou o le olaga faafouina ma galuega e faamalieloto.

10. O le ā le galuega o le a faatinoina e i latou e faasaoolaina mai ia Amaketo?

¹⁰ O le a tele galuega faafiafia loto e ao ona faia e i latou e faasaoina mai ia Amaketo. O le a latou faaliliuina le lalolagi e avea ma parataiso. So o se māʻila mai le faiga tuai o mea sa faaleagaina o le a matuā faamamāeseina. O laueleele sa faaleagaina ma nofoaga na soona feomaʻi ai tagata ma leaga tulaga na iai, o le a suia i togalaau o fugalaau ma faatoaga. O le a olioli tagata uma i ni fale o le a talafeagai lelei ma fiafia e nonofo ai. (Isaia 65:21) A o faasolo atu taimi, o le a faasolosolo aʻe pea na vaega faaparataiso o le lalolagi ma sosoo faatasia, seia iu ina toe oo le lalolagi atoa i le tulaga matagofie na faataatia ai e Lē na Foafoaina Mea i tuā lava i le faatoaga o Etena. Maeu le faamalieina o le a iai i le faia o se sao i lena galuega o le toe faaleleia!

11. I le lumanai, o le ā le ituaiga o faiā o le a iai i le va o tagata, ma le siosiomaga o le lalolagi ma manu?

¹¹ O nei mea uma o le a faia i le taʻitaʻiga mai le Atua ina ia lē faaleagaina ai le siosiomaga. O le a iai se tulaga filemu i le va o tagata ma manu. O le a faafoeina e tagata lo latou tiute tauave o le vaaia lelei o le lalolagi, ma tausia lelei manu, nai lo le soona faasaunoa i meaola. Seʻi faaāta i le mafaufau le vaai atu o ʻaai faatasi mai luko ma mamoe, o leona ma tamai povi—ma o loo matuā malupuipuia lava meaola lalata. E oo lava i se tamaitiiti laitiiti o le a lē fefe i ni manu feai, o le a lē toe saveʻuina foi le toʻafilemu o le lalolagi fou e ni tagata sauā ma le lē taupulea. (Isaia 11:6-8) Maeu se lalolagi fou filemu o le a iai!

UA SUIA TAGATA

12. Ua faapefea ona faataunuuina i aso nei le mea o fai mai ai le Isaia 11:9, ma o le a faataunuuina faapefea i le Parataiso?

¹² Ua taʻu mai ia i tatou e le Isaia 11:9 (NW) le mafuaaga  o le a lē faia ai ni mea leaga i luga o le lalolagi atoa. Ua faapea mai: “O le a tumu lava le lalolagi i le poto e uiga ia Ieova, e pei ona ufitia o le ilititai i le suāsami.” Ua faatatau lenei manatu i tagata auā e lē mafai e manu ona aʻoaʻoina le “poto e uiga ia Ieova” ma faia ni suiga, auā o manu ua faatonutonuina a latou gaoioiga e ala i ni faailoilo i o latou tino. Ae o le poto e uiga i Lē na Foafoaina i tatou e suia moni ai tagata. E lē taumatea ua e faia ni suiga ia te oe lava ona o lou faatatauina i lou olaga o le poto e uiga i le Atua. E faitau miliona ua latou faia faapea. O lea la, o lenei valoaga ua amata ona faataunuuina ia i latou o loo auauna atu ia Ieova. Peitai, e faasino atu foi i le taimi o le a liaʻi ese ai e tagata o loo i le lalolagi atoa so o se uiga faamanu po o uiga sauā sa latou iai, ae avea o ni tagata fifilemu e faavavau.

13. O le ā le polokalame tau aʻoaʻoga o le a faia i le lalolagi?

¹³ Maeu le ofoofogia o le a iai pe a faatumulia le lalolagi i le poto e uiga i le Atua! O se polokalame tele tau aʻoaʻoga o le a faia e ala i le taʻitaʻiga a le Tupu o Iesu Keriso ma ana pule lagolago e 144,000. O le taimi lena o le a faaaogā ai loa “tusi” fou. E manino mai o nei “tusi,” o faatonuga tusitusia ia a le Atua o le a faaaogā e faavae aʻe ai le aʻoaʻoina o ē o le a ʻaināina le lalolagi. (Faaaliga 20:12) O le a aʻoaʻoina e tagata le filemu, ae lē o taua. O le a mou atu e faavavau auupega uma sa faia ai faatamaʻiaga. (Salamo 46:9) O le a aʻoaʻoina i latou e ʻaināina le lalolagi fou ina ia latou feutagai ma o latou uso a tagata, i le alofa, le faaaloalo, ma le āva.

14. O le a faapeī le eseesega o le a iai le lalolagi pe a oo ina avea tagata uma ua pei o se aiga autasi e tasi?

¹⁴ O tagata uma o le a avea o se aiga autasi e tasi. O le a lē toe iai ni mea e taofiofia ai le iai o le autasi ma le mafana faaleauuso. (Salamo 133:1-3) O le a lē tau manaomia ona loka le fale o se tasi mai le oo atu i ai o le ʻau gaoi. O le filemu o le a pulea ai loto o tagata uma, o aiga uma, o vaega uma o le lalolagi.—Mika 4:4.

LE TOETU OLIOLI

15. O ā vaega e lua o le a toe faatutūina mai i le lalolagi?

¹⁵ A o faagasolo lena Meleniuma, o le a faatinoina ai le toetu.  O i latou na agasala ma le loto i ai i le agaga paia po o le mana galue o le Atua, e ala i lo latou gaoioi ma le lē salamō e tetee atu i le faaalia mai po o taʻitaʻiga a le agaga paia, o le a lē toe faatutūina mai. (Mataio 23:15, 33; Eperu 6:4-6) E moni, o le a filifilia e le Atua po o ai i latou na faapena a latou agasala. Peitai, e lua vaega maʻoti o le a toe faatutūina mai—o “e ua amiotonu atoa ma e ua amioletonu.” (Galuega 24:15) Talu ai o le a iai se faasologa fetaui, ua talafeagai la le faapea atu, o i latou o le a muamua ona toe faafeiloaia mai i le lalolagi, o i latou ia amiotonu, o ē sa auauna ma le faamaoni ia Ieova.—Eperu 11:35-39.

16. (a) O ai o le a aofia ai i “e amiotonu” e toe faatutūina mai i le lalolagi? (e) O ai ē faamaoni o aso anamua o loo e manao patino lava e te fia feiloai atu i ai, ma aisea?

¹⁶ Nai lo le faalogo atu i tala o taua, o mala matautia, ma le oti, o le a faalogo atu auauna a Ieova i ni lipoti matagofie o le toetu. O se tulaga faaoso naunau le faalogo atu ua toe faatutūina mai tane ma fafine faamaoni e pei o Apelu, o Enoka, o Noa, o Aperaamo, o Sara, o Iopu, o Mose, o Raava, o Ruta, o Tavita, o Elia, ma Eseta. Maeu le mataina o ni tala moni o aso anamua o le a latou aumaia, a o latou faamatalatala mai auiliiliga uma o le tele o tala o loo tusia i le Tusi Paia! E lē taumatea o i latou, ma ē amiotonu e lei leva tele ona maliliu atu, o le a faapena foi lo latou naunautai e fia iloa pe na faapeī le iuga o le faiga o mea a Satani, ma fia iloa le auala na faapaiaina ai e Ieova lona suafa paia ma faaeaina ai lana pule silisili ese.

17. O le ā le fesoasoani o le a tuuina atu e ē faamaoni, i isi o le a toe faatutūina mai?

¹⁷ Maeu se fesoasoani o le a faia e nei tagata faamaoni a o faagasolo le vaega e sosoo ai o le toetu, pe a tatalaina mai i saisaitiaga o le oti le faitau piliona o “e ua amioletonu”! O le toatele lava o tagata sa latou lei maua se avanoa e iloa ai Ieova. Sa ʻfaatauasoina o latou mafaufau’ e Satani. (2 Korinito 4:4) Peitai o le a matuā faaleaogaina galuega a le Tiapolo. O le a toe faatutūina mai ē amioletonu i se lalolagi matagofie ma le filemu. O le a faafeiloaia i latou e tagata ua lelei ona faamaopoopoina ina ia aʻoaʻo atu ia i latou e uiga ia Ieova ma lona Alo ua faanofotupuina, o Iesu Keriso. A o faasolo la ina  aʻoaʻoina e le faitau piliona o ē ua toe faatutūina mai mea e uiga i Lē na Foafoaina i latou, ma latou alolofa ai ia te ia, ona tumu ai lea o le lalolagi i le poto e uiga ia Ieova, i se tulaga e lē mafaatusatusaina.

18. E te manatu o ā ni ou faalogona o le a iai a o e faafeiloaia ē pele ia te oe o le a toe faatutūina mai?

¹⁸ Maeu se olioli o le a oo i o tatou loto ona o le toetu! O ai e lei mafatia ona o lo tatou fili o le oti? Ioe, o ai e lei matuā nutimomoia ona faalogona talu ai le motusia o se faatasiga mafana o le alofa po o se faauooga, ona o le maliu o se tasi e pele, talu ai maʻi, o le soifuaga matua, o se faalavelave faafuasei, po o se faiga sauā na oo i ai? Seʻi manatunatu i le olioli o le a iai i ni toe faatasitasiga o le a faia i le Parataiso. O tinā ma tamā, o atalii ma afafine, o uo ma aiga, o le a tau fai feopoopotai solo, ma toē ma maligi loimata ona o le olioli.

UA OO ATU NEI I LE LELEI ATOATOA!

19. O le ā le vavega o le a faatinoina a o faagasolo le Meleniuma?

¹⁹ A o faagasolo le Meleniuma, o le a faia ai se vavega ofoofogia. Mo tagata, atonu o le vala e sili ona mataina lea o le Pulega a Keriso i le Afe Tausaga. O le a faatonuina e Ieova lona Alo ina ia tuuina atu aogā o le taulaga togiola i tane ma fafine uma taitoatasi e faamaoni ma usiusitai. O le faia faapea, o le a aveesea ai agasala uma, ma oo atu ai loa tagata i le lelei atoatoa.—1 Ioane 2:2; Faaaliga 21:1-4.

20. (a) O le ā le uiga o le lelei atoatoa? (e) O afea o le a amata ai e i latou e faasaoolaina mai ia Amaketo ma ē ua toe faatutūina mai, ona ola i se tulaga ua atoatoa ona saunia?

²⁰ Lelei atoatoa! O le ā lona uiga? O le a uiga i le toe foi atu i le olaga lea na olioli ai Atamu ma Eva a o lei agasala ia Ieova le Atua. I le tino, i le mafaufau, i faalogona, i amioga, ma le itu faaleagaga—i so o se auala e ono mafaufauina—o le a matuā ausia ai e tagata lelei atoatoa tapulaa a le Atua. Ae pe o le a foliga tutusa uma la tagata i lena taimi? E leai! O foafoaga a Ieova—o laau, o fugalaau, o manu—o na mea uma ua taʻu mai ai ia i tatou lona fiafia i le matalasi o mea eseese. O le a eseese uiga totino ma taleni a tagata lelei atoatoa. O le a taitoatasi le tagata ma olioli i le olaga e pei ona finagalo i ai le Atua. Ua faapea mai le Faaaliga 20:5: “A o e totoe o e ua oti, e lei toe ola i  latou seia atoa ia tausaga e afe.” I le pei o le motu o tagata e toatele o le a faasaoolaina mai ia Amaketo, o le a faapena foi i ē ua toe faatutūina mai ona matuā atoatoa lo latou ola mai pe a latou oo atu i le lelei atoatoa e aunoa ma le agasala.

21. (a) O le ā o le a tupu i le iuga o le Pulega a Keriso i le Afe Tausaga? (e) O le ā o le a tupu mulimuli ane ia Satani ma ē uma o loo ʻau ma ia?

²¹ E tasi le tofotofoga faaiu o le a toe fesagai ma tagata lelei atoatoa. I le iuga o le Meleniuma, o le a toe tatala mai Satani ma ana temoni mai le to e lē gata mo sina taimi puupuu, ma o le a faatagaina e faia se taumafaiga faaiu e faaliliu ese ai tagata mai ia Ieova. O nisi o le a faasili o latou faanaunauga sese nai lo le latou alofa i le Atua, peitai o le a vave ona aveesea lenei fouvalega. O le a faaoo atu le sala oti e Ieova i nei tagata manatu faapito, faatasi ai ma Satani ma ana temoni uma. Ona mou atu ai lea e faavavau i latou uma o ē sa faia mea sese.—Faaaliga 20:7-10.

O LE Ā O LE A E FAIA?

22. O le ā o loo e tulimatai e faia i le Parataiso?

²² O le a faasalafa atu le ola e faavavau ia i latou o ē alolofa ia Ieova le Atua ma nonofo ai i le lalolagi Parataiso. E faigata ona faaātaina i o tatou mafaufau lo latou olioli o le a iai, ma e mafai foi e oe ona olioli ai. O musika, o ata, o meataulima—ioe, o mea uma e maua i taumafaiga a tagata lelei atoatoa, o le a matuā silisili atu nai lo galuega tetele o loo faia e tagata e sili ona atamamai i lenei faiga tuai o mea! Ae maise ai, o le a lelei atoatoa tagata ma o le a lē toe faatapulaaina le tele o le taimi latou te maua. Seʻi faaāta i lou mafaufau ni mea o le a mafai ona e faia i le avea o oe o se tagata lelei atoatoa. Seʻi mafaufau foi, i mea o le a aʻoaʻoina e oe ma isi ou uso a tagata, e uiga i le foafoaga a Ieova—mai lava i le faitau piliona o aniva i le vateatea seia oo atu i mea e sili ona ninii. O mea uma e ausia e taumafaiga a tagata o le a atili faafiafiaina ai le finagalo o lo tatou Tamā alofa faalelagi, o Ieova.—Salamo 150:1-6.

23. Aisea o le a lē taitai ai ona avea le olaga i le Parataiso o se mea e fiu ai?

²³ O le a lē avea la le ola o se mea e fiu ai. O le a faateleina pea le faafiafiaina ai a o faagasolo taimi. Ia e manatua, e leai se mutaaga o le poto e uiga i le Atua. (Roma 11:33) I le faagasologa  o le ola e faavavau, o le a iai pea le tele o mea e aʻoaʻoina, ma mea fou e sailiilia. (Failauga 3:11) Ma a o aʻoaʻoina pea oe e uiga ia Ieova le Atua, o le a faaauau ai pea ona e ola—e lē mo ni nai tausaga ae faavavau!—Salamo 22:26.

24, 25. Aisea e tatau ai ona e ola nei ina ia ogatusa ma le poto e uiga i le Atua?

²⁴ Pe ua lē avea ea le lumanai fiafia i le lalolagi parataiso, o se mea ua tauia ai so o se taumafaiga po o ni faataulagaina o loo e faia? O le mea moni lena! Ua foai atu la e Ieova ia te oe le ki mo lou ulu atu i lena lumanai ofoofogia. O lena ki o le poto lea e uiga i le Atua. Po o le a e faaaogaina ea?

²⁵ Pe afai e te alofa ia Ieova, o le a avea la ma ou fiafiaga le faia o lona finagalo. (1 Ioane 5:3) A o e tuliloaina lena ala, maeu ni faamanuiaga o le a e tofoina! Pe a e faatatauina le poto e uiga i le Atua, e mafai ona aumaia ai ia te oe se olaga e sili atu ona fiafia, e ui lava o loo iai i lenei lalolagi ua tumu i faalavelave. Ma e ofoofogia taui i le lumanai, auā o le poto lenei e taʻitaʻia atu ai i le ola e faavavau! O le taimi lenei e sili ona lelei mo oe e gaoioi ai. Ia e maumauai e ola ina ia ogatusa ma le poto e uiga i le Atua. Ia faatino lou alofa mo Ieova. Ia faamamaluina lona suafa paia ma faamaonia atu ai le pepelo o Satani. O le iuga, o Ieova le Atua, le Puna o le atamai ma le poto moni, o le a olioli lona finagalo sili ma le alofa ona o oe. (Ieremia 31:3; Sefanaia 3:17) Ma o le a faavavau lona alofa ia te oe!

SEʻI TOFOTOFO LOU ILOA

O le ā “le ola moni”?

Pe a mavae Amaketo, o le ā o le a tupu i luga o le lalolagi?

O ai o le a toe faatutūina mai i le lalolagi?

O le a faapefea ona oo ina lelei atoatoa tagata ma toe tofotofoina mulimuli ai?

O le ā lou faamoemoe e uiga i le Parataiso?

[Fesili mo le Suʻesuʻega]

 [Ata i le itulau 188, 189]

Po o e faamoemoe ea e ola i le Parataiso, pe a faatumulia le lalolagi i le poto e uiga i le Atua?