Mataupu 13

Aʻoaʻoina Mai Faaosoosoga o Iesu

INA ua maeʻa lona papatisoga, ona taitaiina loa lea o Iesu e le agaga o le Atua i le vaomatua o Iutaia. E tele ni mea sa ia mafaufau i ai, auā i lona papatisoga sa “faaavanoa ifo ai le lagi i a te ia” ina ia mafai ai ona ia iloa mea faalelagi. Ioe, e tele ni mea sa ia mafaufau loloto i ai!

E 40 ao, 40 po na iai Iesu i le vaomatua, ae sa leʻi taumafa o ia i lena taimi. Ma, ina ua matuā fia taumafa tele Iesu, sa faalatalata ane loa le Tiapolo e faaosooso i a te ia, e faapea: “Afai o oe le Alo o le Atua, inā fetalai atu ia ia liu areto nei maa.” Peitai sa silafia e Iesu, o se mea sese le faaaogāina o lona mana faivavega e faamalieina ai ona manaoga faaletino. O lea sa ia teena ai le faaosoosoga.

Ae e leʻi fiu ai le Tiapolo. Sa ia toe taumafai foi i se isi auala. Na ia luia Iesu ina ia oso ifo mai le malumalu ae faasaoina o ia e agelu a le Atua. Peitai sa leʻi faaseseina Iesu e faia sea uiga faaalialia vale. I lona siiina mai o le Tusi Paia, sa faaalia ai e Iesu le sese ona tofotofoina o le Atua i se auala faapena.

I le faaosoosoga lona tolu, na faaali atu ai e le Tiapolo i a Iesu malo uma lava o le lalolagi i se auala faavavega ma faapea atu: “Ou te avatua nei mea uma i a te oe, pe afai e te faapaʻū ma ifo mai i a te aʻu.” Peitai, sa toe teena foi e Iesu le faaosoosoga e faia le mea sese, ae filifili ina ia tumau ma le faamaoni i le Atua.

E mafai ona aʻoaʻoina i tatou mai nei faaosoosoga o Iesu. Mo se faaaoaoga, ua faailoa mai ai, o le Tiapolo e lē na o se uiga leaga e pei ona manatu ai nisi tagata, ae peitai o ia o se peresona moni e lē vaaia. Ua faaalia foi i faaosoosoga o Iesu, o malo uma lava o le lalolagi, o mea totino ia a le Tiapolo. Auā e faapefea ona avea o se faaosoosoga moni le ofoina atu o nei mea i a Keriso pe ana fai e lē o ni mea totino a le Tiapolo?

Ma seʻi manatu i le mea lenei: Na faapea atu le Tiapolo sa lotomalie o ia e tauia Iesu mo se gaoioiga e tasi tau tapuaiga, e oo lava i le avatua i a te ia o malo uma o le lalolagi. E mafai foi ona taumafai le Tiapolo e faaosoosoina i tatou i se auala faapena, atonu i le ofoina mai i a i tatou o ni avanoa e faatosina ai ina ia maua le tamaoaiga faalelalolagi, le pule, po o se tulaga maualuga. Peitai, maeu le atamai o lo tatou mulimuli i le faaaoaoga a Iesu, e ala i le tumau ma le faamaoni i le Atua e tusa lava po o le ā le faaosoosoga e oo mai! Mataio 3:16; 4:1-11; Mareko 1:12, 13; Luka 4:1-13.

▪ O ā mea e foliga mai sa manatunatu loloto i ai Iesu i aso e 40 a o iai o ia i le vaomatua?

▪ Sa taumafai faapefea le Tiapolo e faaosoosoina Iesu?

▪ O ā mea e mafai ona tatou aʻoaʻoina mai faaosoosoga o Iesu?