“E Moni Lava, o le Alo Lenei o le Atua”
Mataupu 126
“E Moni Lava, o le Alo Lenei o le Atua”
E LEʻI leva lava ona iai Iesu i luga o le satauro, i le tutonu o le la, ae tupu loa se pogisa uigaese e tolu itula le umi. E leʻi mafua lea mea ona ua gasetoto le la. Lea e mafua ona o le masina, auā o lena mea e tupu i le taimi o le masina faatoʻā vaaia, ae o loo atoa le masina i le taimi lea o le Paseka. E lē gata foi i lea, o le gasetoto o le la e na o ni nai minute le umi. O lea o le pogisa sa iai sona mafuaaga mai le Atua! Ma o lena mea atonu na malōlō ai i latou na tauemu i a Iesu, ma oo ai foi ina taofia ai a latou upu taufaifai.
Ana tupu lenei mea uigaese ae leʻi matuā aʻoaʻia e le tasi pagota lana aumea ma talosaga atu i a Iesu ina ia manatua mai o ia, atonu e avea lea o se mafuaaga o lona salamō. Atonu o le taimi foi lea o le pogisa na faalatalata atu ai i le satauro fafine e toafā, o le tinā o Iesu ma lona uso o Salome, o Maria le Makatala, ma Maria le tinā o le aposetolo o Iakopo le Itiiti. Sa iai ma i latou i inā Ioane, le aposetolo na alofaina e Iesu.
Pagā le ‘tuia’ o le loto o le tinā o Iesu a o ia vaavaai atu i le tama na ia tausia faapelepele ma fafaga, o tautau mai i inā ma le tiga! Peitai, na manatu Iesu, e lē i na o ona lava tiga, ae mo le lelei o lona tinā. I sana taumafaiga malosi, na lue atu ai lona ao i a Ioane ma faapea atu i lona tinā: “Sena e, faauta, o lau tama!” Ona lue atu lea o lona ao i a Maria, ma faapea atu i a Ioane: “Faauta, o lou tinā.”
O lea na tuuina atu ai e Iesu le tausiga o lona tinā, o lē sa mautinoa ua avea o se fafine ua oti lana tane, i lona aposetolo sa sili lona alofa i ai. Na ia faia lena mea ona talu ai o isi fanau a Maria sa leʻi faaalia lava i lea taimi se faatuatua i a te ia. I lea na ia faataatia ai se faaaʻoaʻoga lelei o le faia o sauniuniga e lē mo na o manaoga faaletino o lona tinā, ae faapea foi ma ona manaoga faaleagaga.
I le pe tusa ma le tolu i le afiafi, ae fetalai atu Iesu: “Ua ou fia inu.” Na lagona e Iesu le aveesea e lona Tamā o le puipuiga mai i a te ia, e pei ona sa iai, ina ia mafai ai ona tofotofoina lona faamaoni seia oo i le iuga. O lea, na ia alaga atu ai ma le leotele: “Loʻu Atua e, loʻu Atua e, se ā le mea ua e tuulafoai mai ai aʻu?” Ina ua faalogo ai nisi o ē sa tutū latalata ane, ona latou alalaga ai lea ma faapea ane: “Faauta! O loo valaau atu o ia i a Elia.” Na tamoe faavave atu loa se tasi o i latou ma tago i le omomi ma fufui i le uaina oona ma tuu i le pito o le laau o le isopo, ma faainu i a te ia. Ae ua faapea atu nisi: “Tuu pea ia; seʻi tatou iloa pe sau Elia e ave ifo i a te ia.”
Ina ua tofo Iesu i le uaina oona, ona alaga lea o ia: “Ua taunuu.” Ioe, na ia faaiuina mea uma na aauina mai ai o ia e lona Tamā i le lalolagi e faia. I le iuga na ia fetalai atu: “Loʻu Tamā e, ou te tuuina atu loʻu nei agaga i ou aao.” I lea la, na tuuina atu ai e Iesu i le Atua lona malosi ola i le mautinoa faapea e toe faafoisia mai e le Atua i a te ia. Ona faanoʻunoʻu ifo lea o lona ao ma ua maliu.
I le minute lava na tō ai e Iesu lana toe mānava, ona lūlū ai lea o se mafuie mataʻutia, na mavaevae ai papa. Na matuā malosi le lūlū a le mafuie o lea na mavaevae ai tuugamau i fafo atu o Ierusalema, ma sa salalau mai i fafo tino oti na iai i inā. O ē na ui ane ma latou vaai i na tino oti ua salalau mai i fafo, sa latou ō atu i le aai ma taʻu atu i ai lena mea.
Ae e lē gata i lea, i le taimi lava na maliu ai Iesu, na saeluaina ai le ie pupuni telē lava na vaeluaina ai le Mea Paia ma le Mea e Sili ona Paia i le malumalu o le Atua i Ierusalema, mai i luga e oo i lalo. E foliga o lena ie pupuni sa matagofie lona teuteuina e tusa ma le 60 futu [po o le 18 mita] le umī ma sa matuā mamafa lava! O lena vavega e maofa ai, sa lē gata ina faaalia ai le toasa o le Atua i ē na fasiotia Lona Alo, ae na faamautinoa ai foi faapea o le ulu atu i le Mea Aupito Sili ona Paia, o le lagi lava ia, ua mafai ona o le maliu o Iesu.
Ma, ina ua lagonaina e tagata le mafuie ma vaai i mea na tutupu, ona latou matuā matataʻu ai lea. Na vivii atu i le Atua le taʻitaʻiʻau na pulea le faiga o le faasalaga: “E moni, o le Alo lava lenei o le Atua.” Atonu sa iai o ia ina o talanoaina le tulaga e uiga i le avea o Iesu ma Alo o le Atua i le taimi o lona faamasinoga i luma o Pilato. Ma sa ia mautinoa ai o Iesu o le Alo o le Atua, ioe, o ia moni o le tagata aupito silisili o ē uma na soifua mai.
Sa matuā meia foi isi i na mea faavavega na tutupu, ona amata ai lea ona latou toe foi atu i o latou aiga ma tuʻituʻi o latou fatafata, e pei o se tāga o lo latou matuā faanoanoa ma le masiasi. I le mātau atu mai se mea mamao, sa iai le toatele o soʻo fafine o Iesu o ē na matuā faanoanoa ona o na mea iloga na tutupu. Sa iai foi ma le aposetolo o Ioane. Mataio 27:45-56; Mareko 15:33-41; Luka 23:44-49; 2:34, 35; Ioane 19:25-30.
▪ Aisea na lē mafai ai ona faapea o le gasetoto o le la na pogai ai le pogisa mo le tolu itula?
▪ A o toetoe oo i lona maliu, o le ā le faaaʻoaʻoga lelei na saunia e Iesu mo i latou e iai mātua ua matutua?
▪ O ā fetalaiga mulimuli e lua a Iesu na fai a o leʻi maliu?
▪ O le ā na faataunuuina e le mafuie, ma o le ā na uiga i ai le saeluaina o le ie pupuni o le malumalu?
▪ Sa faapefea ona aafia le taʻitaʻiʻau na pulea le faiga o le faasalaga ona o vavega?