Mataupu 120

Faafiti a o Iai i le Lotoā

INA ua la tuulafoaia Iesu i le faatoaga o Ketesemane ma sosola faatasi ma le isi vaega o aposetolo ona o le fefefe, ona tutū ai lea o Peteru ma Ioane i la la solaaga. Atonu na la maua atu Iesu a o avatu i le fale o Ana. Ina ua auina atu o ia e Ana i le Ositaulaga Sili o Kaiafa, sa mulimuli mamao atu ai Peteru ma Ioane, atonu sa fesouaʻina i le mataʻu mo o laua lava ola ma i lo la matuā popole pe o le ā le mea o le a tupu i lo la Matai.

Ina ua oo atu i le fale telē o Kaiafa, sa mafai ona ulu atu Ioane i le lotoā o le fale, talu ai sa iloa o ia e le ositaulaga sili. Ae peitai, sa tu pea Peteru i fafo o le faitotoa. E leʻi pine ae toe foi atu Ioane ma tautala atu i le leoleo faitotoa, o se auauna teine, ma faatagaina ai Peteru e ulu i totonu.

O le taimi lea ua malūlū, ma na tafu ai se afi malala e auauna o le fale ma alii ofisa a le ositaulaga sili. Sa faatasi atu Peteru i a i latou ina ia faamafanafana ai a o faatalitali le iuga o le faamasinoga o Iesu. I inā, i le malamalama o le mumū o le afi, na mafai ai e le leoleo faitotoa o lē na faatagaina mai Peteru i totonu ona vaai lelei atu i a te ia. Na ia alaga atu: “O oe foi, sa oulua faatasi ma Iesu le Kalilaia.”

I le ita ona ua iloa o ia, na faafitia ai e Peteru lona iloa o Iesu i luma o i latou uma. Na fai atu o ia: “Ou te leʻi iloa o ia, ou te lē lagona foi le mea ua e fai mai na.”

Ona alu atu ai lea o Peteru i fafo e ui atu i tafatafa o le ala tatala. I inā, na mātau mai ai foi o ia e se tasi teine ma faapea atu i a i latou sa tutū i ona tafatafa ane: “O lenei tagata foi sa la faatasi ma Iesu le Nasareta.” Ona toe faafiti foi lea o Peteru, ua tauto atu: “Ou te leʻi iloa lea tagata.”

Sa nofo faatali ai pea Peteru i le lotoā, i le taumafai ina ia lē iloa gofie atu o ia. Atonu o le taimi tonu lea na faateʻia ai o ia ina ua vivini se moa i le taeao po, a o leʻi malamalama. O le taimi lea, sa faagasolo pea le faamasinoga o Iesu, e manino lava sa faia i se vaega o le fale i luga aʻe o le lotoā. E lē taumatea na iloa atu ai e Peteru ma isi sa faatali ai i lalo ifo, le ō mai ma le ō atu o molimau eseese sa avatu e fai ma molimau.

Pe tusa lea o le itula talu ona mavae le iloaina mulimuli o Peteru e faapea o se aumea a Iesu. Ona ō atu lea i a te ia o le toatele o i latou na tutū latalata ane ma faapea atu: “E moni, o oe lava lo latou; auā ua iloa oe i lau gagana.” O se tasi o lea vaega e aiga ma Maliko, o lē na tipi e Peteru le taliga. Na ia fai atu: “Ou te leʻi vaai atu ea i a te oe faatasi ma ia i le faatoaga?”

Na fai atu ma le maumauai Peteru: “Ou te leʻi iloa lava lea tagata.” O le mea moni, sa ia taumafai e faamautinoa atu i a te i latou faapea ua latou sese uma, e ala i le augani ma tauto i le mataupu, o lona uiga ia oo i a te ia le leaga pe afai na te lē o tautala i le upu moni.

O le taimi lava na fai ai e Peteru lana faafitiga lona tolu lenei, ae vivini loa se moa. Ma i lena lava taimi, na afio mai ai Iesu i fafo atonu i le faapaologa i luga aʻe o le lotoā, ua faliu ma silasila atu i a te ia. Na vave lava ona manatua e Peteru le mea na fetalai ai Iesu i le na o nai itula muamua atu i le potu i luga: “A o leʻi oo i le vivini faalua o moa, a ua e faafiti faatolu mai i a te aʻu.” I le matuā nutimomoia i le mamafa o lana agasala, na alu Peteru i fafo ma tagi lotulotu ai.

Pe na mafai faapefea ona tupu o lena mea? Ina ua uma ona matuā mautinoa e uiga i lona malosi faaleagaga, sa mafai faapefea e Peteru ona faafitia faatolu lona Matai i se taimi puupuu lava? E lē taumatea ona o na tulaga na puʻea faamanu i ofaga ai Peteru. Sa mimilo sese le upu moni, ma sa pei Iesu o se tagata solitulafono inosia. O le mea e tonu ua taumafai e faafoliga mai e sese, o lē e leai se agasala sa peiseai o se tagata agasala. O lea ona o omiga i lenei mea na tupu, na matuā lē mautonu ai Peteru. Sa faafuasei ona faavevesiina le tulaga saʻo o lona faamaoni; ona o lona faanoanoa sa oo ai ina lē mafesoasoania i le fefe i tagata. Ia aua lava neʻi tupu lena mea i a i tatou! Mataio 26:57, 58, 69-75; Mareko 14:30, 53, 54, 66-72; Luka 22:54-62; Ioane 18:15-18, 25-27.

▪ Sa faapefea ona ulu atu Peteru ma Ioane i le lotoā o le fale o le ositaulaga sili?

▪ A o iai Peteru ma Ioane i le lotoā, o le ā sa faagasolo i totonu o le fale?

▪ Sa faafia ona vivini le moa, ma sa faafia ona faafitia e Peteru lona iloa o Keriso?

▪ O le ā lona uiga faapea na augani ma tauto Peteru i a te ia?

▪ O le ā na faapogaia ai ona faafitia e Peteru lona iloa o Iesu?