Mataupu 101

I Petania, i le Fale o Simona

INA ua tuua Ieriko e Iesu, sa ia agaʻi atu loa i Petania. E toeitiiti lava atoa le aso o alu le malaga, ona sa aʻeaʻe atu i fanua maualuluga e tusa ma le 12 maila [po o le 19 kilomita] le mamao. O Ieriko o se aai e tusa ma le 820 futu [po o le 250 mita] i luga aʻe o le fogatai, a o Petania e tusa ma le 2,500 futu [po o le 760 mita]. Atonu o e manatua o Petania, o le nuu lea o Lasalo ma ona tuafāfine. O lenei nuu itiiti e tusa ma le lua maila [po o le tolu kilomita] le mamao ese mai Ierusalema, sa tu i le malifa i sasaʻe o le Mauga o Olive.

Ua leva ona taunuu le toatele o tagata i Ierusalema mo le Paseka. Na ala ona latou vave ō atu, ina ia faamamāina ai i latou mo le faamanatuga. Atonu sa latou papaʻi i ni tino oti po o le faia foi o nisi mea ua lē mamā ai i latou. O lea na latou mulimuli ai i taualumaga uma mo le faamamāina o i latou ina ia mafai ai ona talia lo latou faamanatuina o le Paseka. A o faapotopoto i le malumalu i latou sa vave ō atu, e toatele lava sa vaavaai solo po o le a maliu atu Iesu i le Paseka.

Sa avea Ierusalema ma nofoaga na vevela ai fefinauaiga e uiga i a Iesu. Na iloa e le toatele sa mananao taʻitaʻi lotu e puʻe i a te ia ina ia fasiotia. O le mea moni, sa latou tuuina atu ni faatonuga e faapea, afai e iloa e so o se tasi le mea o iai o ia, e tatau ona lipoti ane i a te i latou. E faatolu ona latou faia faapena i masina faatoʻā mavae atu—i le Tausamiga o Faleapitaga, i le Tausamiga o le Faaulufalega, ma ina ua mavae lona toe faatuina o Lasalo—sa taumafai ai na taʻitaʻi e fasioti i a te ia. O lea, sa tau mānatu ai tagata, po o le a toe faailoa atu Iesu i le lautele i se isi taimi? Na latou tuufesili foi le tasi i le isi, “Pe ni a fa outou?”

O le taimi lea, na taunuu atu ai Iesu i Petania, pe tusa toe ono ni aso ona amata loa lea o le Paseka, lea e paʻū i le Aso 14 o Nisani e tusa ai ma le kalena faa-Iutaia. Na taunuu atu Iesu i Petania i se taimi o le afiafi o le Aso Faraile, i le amataga o le Aso 8 o Nisani. Sa lē mafai ona ia malaga atu i Petania i le Aso Toonai auā sa faasa i le tulafono a Iutaia ona malaga i le Sapati—lea e amata i le goto o le la i le Aso Faraile e oo i le goto o le la i le Aso Toonai. Atonu na alu atu Iesu i le fale o Lasalo, e pei ona ia muai faia, ma tofā ai i inā i le po o le Aso Faraile.

Peitai, na valaaulia Iesu ma ana aumea e se isi tagata e nofo i Petania, latou te taumamafa i le po o le Aso Toonai. O ia lea o Simona o lē na lepela muamua, ma atonu sa faamaloloina e Iesu i se taimi ua mavae. Sa auauna atu Mareta i malo valaaulia, e tusa ai ma lona uiga o le galue mamafa. Peitai, e pei ona masani ai, sa auauna atu Maria i a Iesu i se auala na tupu ai se finauga i lea taimi.

Na tatala e Maria le fagu alapasa, po o se tamai fagu ele, sa iai le suauu manogi, o le “uu nato māoi” e tusa ma le pauna lona mamafa. O se suauu taugata tele lena. O le mea moni, e tusa lona tau ma se totogi mo se tagata galue i le tausaga atoa! Ina ua liligi e Maria le suauu i le ao o Iesu ma ona aao ma solo ai i lona lauulu, sa faatumuina le fale atoa i lona manogi lelei.

Sa feitai le ʻau soʻo ma fesili atu: “Se ā le mea ua faamāumau ai lena mea?” Ona fai atu lea o Iuta le Sekara: “Pe se ā le mea na lē faatau ai lena uu manogi i tenari e tolu selau, ma avatu ai i ē matitiva?” Peitai sa lē popole moni Iuta i ē matitiva, auā na ia gaoia ni tupe mai le pusa tupe na teuina e le ʻau soʻo.

Ona lagolago lea e Iesu o Maria. Ua ia faapea atu: “Tuu ai pea o ia. Se ā le mea tou te faalavelave ai i a te ia? O le mea lelei ua faia e ia i a te aʻu nei. Auā tou te nonofo pea lava ma ē matitiva, o aso uma foi tou te loto i ai e mafai ona outou agalelei atu ai i a te i latou; a o aʻu nei, tatou te lē nonofo pea ma outou. Ua faia e ia le mea ua ia mafaia; ua na uuina loʻu tino e fai ma faataimuaga o loʻu tanuga. E moni, ou te fai atu i a te outou, o nuu uma lava i le lalolagi e talaʻiina i ai lenei tala lelei, e taʻua ai foi lenei mea ua faia e ia, e faamanatu ai i a te ia.”

E sili atu i le 24 itula, na nofo ai Iesu i Petania, ma na salalau atu foi le tala e uiga i lona iai i inā. O le mea lea, na ō ane ai le toatele o tagata i le fale o Simona ina ia vāai i a Iesu, peitai sa ō ane foi i latou e vāai i a Lasalo. O lea na tonu ai i le ʻau ositaulaga sili ina ia fasiotia e lē na o Iesu, ae faapea foi ma Lasalo. O le pogai o lena mea, ona e toatele tagata sa faatuatua i a Iesu, ina ua latou vaaia ua ola lē na toe faatuina mai e ia nai le oti! E moni, pagā le leaga o nei taʻitaʻi lotu! Ioane 11:55–12:11; Mataio 26:6-13; Mareko 14:3-9; Galuega 1:12.

▪ O ā talanoaga na faia i le malumalu, ma aisea?

▪ Aisea e fai atu ai na taunuu Iesu i Petania i le Aso Faraile na i lo o le Aso Toonai?

▪ Ina ua taunuu Iesu i Petania, o fea e foliga mai sa ia nofo ai mo le Sapati?

▪ O le ā le gaoioiga a Maria na tupu ai se finauga, ma na faapefea ona lagolago o ia e Iesu?

▪ O le ā e faaalia ai le leaga tele o ositaulaga sili?