Mataupu 132

I le Itu Taumatau o le Atua

O LE liligiina ifo o le agaga paia i le Penetekoso, o le faamaoniga manino lea faapea, ua toe taunuu atu Iesu i le lagi. O le vaaiga sa leʻi pine mulimuli ane ae tuuina atu i le soʻo o Setefano, na faamaonia ai foi faapea ua taunuu atu o Ia i inā. A o leʻi fetogia Setefano i maa ona o lana molimau faamaoni, na ia alaga ai: “Faauta! Ua ou iloa le lagi ua avanoa ma le Atalii o le tagata o loo tu i le itu taumatau o le Atua.”

A o iai i le itu taumatau o le Atua, sa faatali ai Iesu i le poloaiga mai lona Tamā: “Ia pule oe i totonu o ou fili.” Ae i le taimi lena, seia oo atu i le taimi e gaoioi ai o ia e faasagatau i ona fili, o le ā na faia e Iesu? Sa pule o ia i luga o ona soʻo faauuina, taʻitaʻiina i latou i la latou galuega talaʻi ma sauniunia i latou e ala i le toe faatutūina e avea ma tupu lagolago faatasi ma ia i le Malo o lona Tamā.

Mo se faaaʻoaʻoga, sa filifilia e Iesu Saulo (na mulimuli ane iloa i lona igoa faa-Roma, o Paulo) ina ia taʻimua i le galuega o le faia o soʻo i isi atunuu. Sa maelega Saulo i le Tulafono a le Atua, ae sa taʻitaʻiseseina o ia e taʻitaʻi lotu Iutaia. O le iuga la, sa lē gata ina faamaonia e Saulo le fasiotiga o Setefano ae na alu atu o ia i Tamaseko ma le pule mai le ositaulaga sili o Kaiafa ina ia saisai ma aumaia i Ierusalema so o se tane po o fafine na te maua ai i inā o ni soʻo o Iesu. Ae peitai, a o alu atu Saulo i le ala, na faafuasei lava ona faataaliolio ane se malamalama i a te ia ma na ia paʻū ai i le eleele.

Na fesili ane se leo mai se mea e lē o iloa atu: “Saulo, Saulo e, se ā le mea ua e sauā mai ai i a te aʻu?” Na fesili atu Saulo: “Le Alii e, o ai ea oe ua ou sauā i ai?”

Na ia tali mai: “O aʻu o Iesu, o lē o loo e sauā i ai.”

Ona taʻu atu lea e Iesu i a Saulo o lē na tauaso ona o le malamalama faavavega, ina ia alu atu i Tamaseko ma faatali ai mo faatonuga. Ona faaali atu lea o Iesu i se faaaliga i a Anania, o se tasi o lona au soʻo. Na taʻu atu lea e Iesu i a Anania e faatatau i a Saulo: “O lenei tagata o se ipu ua filifilia mo aʻu e ave loʻu igoa i nuu ese atoa ma tupu ma le fanauga a Isaraelu.”

E moni lava, o le lagolagoina e Iesu o Saulo (ua lauiloa nei o Paulo) ma isi faievagelia sa oo ai se taulau ofoofogia i la latou galuega talaʻi ma le aʻoaʻo atu. O le mea moni, pe tusa ma le 25 tausaga ina ua uma ona faaali o Iesu i a te ia i le ala i Tamaseko, ona tusi ai lea o Paulo faapea, “o le tala lelei sa talaʻiina atu i mea uma lava ua foafoaina i lalo o le lagi.”

Ina ua mavae isi tausaga e tele, ona saunia ai lea e Iesu se faasologa o vaaiga i lona aposetolo pele, o Ioane. E ala i na vaaiga sa faamatalaina e Ioane i le tusi o le Tusi Paia o Faaaliga ua faapea atu ai na ola o ia e vaai i le toe afio mai o Iesu i le mana o le Malo. Fai mai Ioane faapea “e ala i le faagaeeina i le agaga” na auina atu ai o ia agaʻi i luma i taimi o le “aso o le Alii.” O le ā lea “aso”?

O se suesueina ma le faaeteete o valoaga o le Tusi Paia, e aofia ai ma le valoaga a Iesu lava ia e faatatau i aso e gata ai, ua faaalia ai “o le aso o le Alii” na amata i le tausaga e 1914 lea ua fai ma tausaga o le talafaasolopito, ioe, i lenei lava tupulaga! O lea, o le 1914 na toe afio lē vaaia mai ai Iesu, e aunoa ma ni faalauiloaga lautele, ma e na o ana lava auauna faamaoni ua iloa lona toe afio mai. I lena tausaga na tuuina atu ai e Ieova le poloaiga i a Iesu ina ia alu atu ma pule i ona fili!

I le usiusitai atu i le poloaiga a lona Tamā, na faamamā ai e Iesu le lagi mai i a Satani ma ana temoni, i le lafoina ifo o i latou i lalo i le lalolagi. Ina ua uma ona vaaia le tupu o lenei mea i le faaaliga, ona faalogoina ai lea e Ioane se leo faalelagi o folafola mai: “O ona po nei ua oo mai ai le olataga ma le mana ma le malo o lo tatou Atua ma le pule a lona Keriso!” Ioe, i le 1914 na amata ai ona pule Keriso e avea o se Tupu!

Maeu se tala lelei lena mo ē tapuai i a Ieova i le lagi! Sa uunaia i latou: “Ia outou olioli ai le lagi e, atoa ma ē o nonofo ai.” Ae o le ā le tulaga mo i latou o ē o nonofo i le lalolagi? Sa faaauau mai le leo: “Oi talofa i a te outou o ē nonofo i le fanua ma le sami auā ua alu ifo i a te outou le Tiapolo ua lotoa tele, auā ua na iloa ua saasaa ona po.”

Ua tatou iai nei lava i lena saasaa o ona po. O lea ua vaevaeina nei tagata a lē o le ulu atu i le lalolagi fou a le Atua ia, po o le puapuagatia i le faaumatiaga. O le upu moni, o lea ua filifilia nei lou lava taunuuga e auala i le faapefea ona e tali atu i le tala lelei o le Malo o le Atua ua talaʻia nei i le lalolagi aoao i lalo o le taʻitaʻiga a Keriso.

Pe a uma ona tuueseeseina tagata, ona auauna loa lea o Iesu Keriso e avea o se Sui o le Atua e tafiesea mai le lalolagi le faiga aoao o mea a Satani ma i latou uma o lagolagoina. O le a faaiuina e Iesu lenei aveesea o ē amio leaga uma i le taua ua taʻua i le Tusi Paia o Ha-Maketo po o Amaketo. Pe a mavae lea, ona puʻe ai lea e Iesu, o ia o le Peresona sili i le vateatea e pito atu i a Ieova le Atua, i a Satani ma ana temoni ma saisaia i latou mo le afe o tausaga i le “to e lē gata,” o lona uiga i se tulaga e lē toe gaoioi ai e pei ua oti. Galuega 7:55-60; 8:1-3; 9:1-19; 16:6-10; Salamo 110:1, 2; Eperu 10:12, 13; 1 Peteru 3:22; Luka 22:28-30; Kolose 1:13, 23; Faaaliga 1:1, 10; 12:7-12; 16:14-16; 20:1-3; Mataio 24:14; 25:31-33.

▪ Ina ua mavae le afio atu o Iesu i le lagi, o fea sa iai o ia, ma o le ā na ia faatali i ai?

▪ I luga o ai na pule ai Iesu ina ua afio atu i le lagi, ma na faapefea ona faaalia lana pule?

▪ O anafea na amata ai le “aso o le Alii,” ma o le ā na tupu i lona amataga?

▪ O le ā le galuega o le tuueseeseina ua faagasolo i aso nei lea ua aafia ai i tatou uma taitoatasi, ma e faavae i le ā o loo faia ai le tuueseeseina?

▪ Pe a uma le galuega o le tuueseeseina, o ā mea o le a tutupu mulimuli ane ai?