Mataupu 130

I le Sami o Kalilaia

A TOE foi atu loa le au aposetolo i Kalilaia, e pei ona uluai faatonuina ai i latou e Iesu ina ia faia. Ae sa latou lē mautonu po o le ā sa tatau ona latou faia i inā. Ina ua mavae sina taimi, ona fai atu lea o Peteru i a Toma, Natanielu, Iakopo ma lona uso o Ioane, ma isi aposetolo e toalua: “Ou te alu, ou te fagota.”

Na tali atu le toaono lea: “Matou te ō foi ma oe.”

Latou te leʻi maua se mea e tasi i le po atoa. Ae ina ua ao, na tu atu ai Iesu i le matafaga, ae sa leʻi iloa e le au aposetolo o Iesu lea. Na ia alaga atu: “Le fanau e, pe iai ea ni a outou mea e ʻai?”

Na latou alalaga atu mai le sami: “E leai!”

Ona ia fetalai atu lea: “Inā lafo ia le upega i le itu taumatau o le vaa ona outou maua ai lea.” Ma ina ua latou faia faapea, sa lē mafai ona latou toso aʻe lo latou upega auā na tumu i iʻa.

Na alaga atu Ioane: “O le Alii!”

Ina ua faalogo atu i lenei mea, ona fusi aʻe lea e Peteru lona ofutino, ma oso i le sami, ma aau atu pe tusa ma le selau iata [po o le 90 mita] i le matafaga. Sa mulimuli atu isi aposetolo i le vaa laitiiti, sa toso atu ai le upega ua tumu i iʻa.

Ina ua latou taunuu i le matafaga, sa tafu ai se afi malala, sa taatitia ai ni iʻa, na iai ma areto. Na fetalai atu Iesu: “Aumaia ni iʻa na seʻi faatoʻā outou maua.” Ona alu atu lea o Peteru ma toso ane le upega i le matafaga. E 153 iʻa lapopoa sa iai!

Na valaaulia i latou e Iesu: “Inā ō maia inā aai.”

Sa leai se tasi o i latou na lototele e fesili atu, “O ai ea oe?” auā sa latou iloa lava o Iesu lea. O le faafitu ai lea ona ia faaali atu talu ona mavae lona toetu mai, ae o le faatolu lea ona ia faaali i se faapotopotoga o le au aposetolo. Sa ia laulau atu nei le mālū o le taeao, i le avatua lea i a i latou taitoatasi o areto ma iʻa.

Ina ua uma ona latou aai, sa foliga na silasila atu Iesu i iʻa e tele na maua ma fesili atu ai i a Peteru: “Simona e, le atalii o Iona, e te alofa mai ea i a te aʻu e sili i nei mea?” E mautinoa o le uiga o lana tala e faapea, Pe sili atu ea lou naunau i le galuega o le fai faiva na i lo le galuega ua ou saunia ai oe e te faia?

Na tali atu Peteru: “Ua e silafia ou te alofa i a te oe.”

Na tali Iesu: “Ia e fafaga i aʻu tamai mamoe.”

Na ia toe fesili atu foi, o lona faalua lea: “Simona e, le atalii o Iona, e te alofa mai ea i a te aʻu?”

Na tali naunautai atu Peteru: “Ioe le Alii e, ua e silafia ou te alofa i a te oe.”

Na toe poloai atu Iesu: “Ia leoleo i aʻu tamai mamoe.”

Peitai, sa ia toe fesili atu faatolu: “Simona e, le atalii o Iona, pe e te alofa mai ea i a te aʻu?”

Ae i le taimi lea sa tiga ai Peteru. Atonu sa ia tau mānatu ai na masalomia e Iesu lona faamaoni. E moni lava, a o faamasinoina pe faasala Iesu i le oti, sa faatolu lava ona faafiti Peteru faapea na te lē iloa o ia. O lea na faapea atu Peteru: “Le Alii e, ua e silafia mea uma lava; ua e silafia ou te alofa i a te oe.”

Na poloai faatolu atu Iesu: “Ia e fafaga i aʻu tamai mamoe.”

I lea, sa faaaogā ai e Iesu Peteru e avea o se auala e tā mau ai i mafaufau o isi le galuega na ia finagalo i a latou faia. Sa leʻi toe umi ona ia tuua lea o le lalolagi, ma na ia manao ina ia latou taʻimua i le auauna atu i a i latou o ē e aoaoina mai i le lotoā mamoe a le Atua.

E pei lava ona fusifusia ma faaooina le sala i a Iesu ona o lona faia o le galuega na tofia ai o ia e le Atua e faia, o lea, sa ia faailoa atu faapea o le a tigaina Peteru ona o se mea faapena e oo i a te ia. Na taʻu atu e Iesu i a te ia: “A o e itiiti lava, sa masani ona fusi lou sulugatiti ma e alu i le mea sa e manao e te alu i ai. Ae a oo ina e toeaina, o le a e faaloaloa atu ou lima ma o le a fusi aʻe oe e se tasi tagata ma taʻitaʻiina atu oe i le mea e te lē o manao i ai.” E ui lava i le oti faamaturo sa faatalia mo Peteru, ae na uunai atu Iesu i a te ia: “Ia e mulimuli mai pea i a te aʻu.”

I le faliu atu, na iloa ai e Peteru Ioane ma fesili atu: “Le Alii e, o le ā o le a faia e lenei tagata?”

Na tali atu Iesu: “Afai ou te loto ina ia faatali pea o ia seia ou sau, o le ā la le mea e te popole ai fua i lena mea? Ia e mulimuli mai pea oe i a te aʻu.” O na fetalaiga a Iesu sa oo ina malamalama i ai le toatele o le au soʻo, faapea o lona uiga, o le a lē oti lava le aposetolo o Ioane. Ae peitai e pei ona faamatalaina mulimuli ane e le aposetolo o Ioane, sa leʻi fetalai atu Iesu faapea o le a lē oti o ia, ae sa na ona faapea atu Iesu: “Afai ou te loto ina ia faatali pea o ia seia ou sau, o le ā la le mea e te popole ai fua i lena mea?”

Mulimuli ane ona fai foi lea e Ioane lenei molimau mataʻina: “O isi mea foi e tele na faia e Iesu, afai e tusia uma lava, o loʻu taofi e lē mafai ona ofi i le lalolagi ia tusi pe a tusia.” Ioane 21:1-25; Mataio 26:32; 28:7, 10.

▪ O le ā na faaalia ai sa lē mautonu le au aposetolo i le mea e ao ona latou faia i Kalilaia?

▪ Sa faapefea ona iloa lelei e le au aposetolo Iesu i le Sami o Kalilaia?

▪ O le faafia ai lea ona faaali ane Iesu talu lona toetu mai?

▪ Na faapefea ona faamamafa atu e Iesu le mea sa ia manao e faia e le au aposetolo?

▪ Na faapefea ona faaalia e Iesu le auala o le a maliu ai Peteru?

▪ O ā faamatalaga a Iesu e uiga i a Ioane sa lē malamalama i ai le toatele o le au soʻo?