Mataupu 21

I le Sunako o le Nuu o Iesu

E LĒ taumatea sa matuā faaosofia le nuu o Nasareta i le fia iloa ina ua toe foi ane Iesu i lona aiga. A o leʻi maliu atu o ia ina ia papatisoina e Ioane, pe tusa o se tausaga ua tuanai, sa lauiloa ai Iesu o se kamuta. Peitai, o lea ua lauiloa nei o ia i nuu uma o se faivavega. Sa matuā naunau tagata o lona nuu e fia vāai, a o ia faia nisi o nei galuega ofoofogia i a te i latou.

Na faateteleina lo latou fia vāai a o ulufale atu Iesu i le sunako o le nuu e tusa ai ma lana masani. A o faagasolo sauniga, sa tulai o ia e faitau, ma ua tuuina atu i a te ia le tusi taai a le perofeta o Isaia. Ua ia maua foi le mea o loo tusia ai e uiga i Lē ua faauuina i le agaga o Ieova, lea o loo i le Isaia mataupu e 61 o la tatou Tusi Paia i aso nei.

Ina ua uma ona faitau e uiga i le auala o le a folafola atu ai e Ia lenei le saolotoga i le tafeaga, le faapupulaina o mata o ē tauaso, ma le tausaga e talileleia mai ai e Ieova, ona toe tuu atu lea e Iesu o le tusi taai i le tautua, ae nofo i lalo. Ua pulatoa uma atu tagata i a te ia. Ona ia fetalai atu lea i a te i latou, mo se taimi umi ma faamatala atu e faapea: “O le aso nei ua taunuu ai lenei mau na seʻi faatoʻā outou faalogologo i ai.”

Na maofa tagata i ana “upu lelei” ma fetautalatalai ai e faapea: “E lē o le atalii ea lenei o Iosefa?” Ae i le silafiaina o lo latou fia vāai a o ia faia ni vavega, na toe fetalai atu ai Iesu: “E lē taumatea o le a outou faatatauina lenei tala faatusa i a te aʻu, ‘Le fomai e, inā faamalōlō ia oe i a te oe; o mea uma na faia i Kapanaumi sa matou faalogo i ai, ia e faia foi i inei i lou nuu moni.’” E foliga mai, sa manatu uluai tuaoi o Iesu, e tatau ona amata lana faamalōlōgā maʻi i lona nuu, ina ia lelei muamua ai ona lava tagata. O lea na latou lagona ai e pei ua lē amanaia i latou e Iesu.

Ina ua ia silafia o latou manatunatuga, ona faamatala atu lea e Iesu se talafaasolopito e fitoi tonu i ai. Ua ia faapea atu, e toatele fafine ua oti a latou tane sa iai i Isaraelu i ona po o Elia, ae sa leʻi auina atu Elia i se tasi o i latou na. Na i lo lea, sa alu atu o ia i se fafine ua oti lana tane e lē o se Isaraelu i Saitonu, ma ia faia ai se vavega faasaoola. Ma e toatele foi lepela sa iai i ona po o Elisaia, ae na o Naamanu mai Suria na faamamāina e Elisaia.

Ona o le lilivau i nei faatusatusaga lē logoleleia o talafaasolopito na faaalialia ai o latou manatu faapito ma le lē faatuatua, o lea na tutū mai ai ē na i le sunako ma tuli i a Iesu i tua o le aai. Ma o i inā i le tuasivi o le mauga lea sa tu ai Nasareta, na latou taumafai ai e faatitō ifo i a te ia. Ae na sola ese Iesu mai i a te i latou ma saogalemu ai. Luka 4:16-30; 1 Tupu 17:8-16; 2 Tupu 5:8-14.

▪ Aisea na matuā faaosofia ai le fiafia i Nasareta?

▪ O le ā le manatu o tagata i le lauga a Iesu, ae o le ā le mea na toe lilivau ai i latou?

▪ O le ā sa taumafai tagata e fai i a Iesu?