I le Tausamiga o Faleapitaga
Mataupu 66
I le Tausamiga o Faleapitaga
TOEITIITI lava atoa le tolu tausaga o logologoā tala e uiga i a Iesu talu mai lona papatisoga. E faitau afe tagata sa vāai i ana vavega, ma sa salalau atu foi i le atunuu atoa tala e uiga i ana galuega. O lea la, ina ua potopoto atu tagata mo le Tausamiga o Faleapitaga i Ierusalema, sa latou saili ai foi o ia i inā. Na latou fia iloa po o “fea o iai o ia.”
Ona fefinauai lea o tagata e uiga i a Iesu. Ua fai mai nisi: “O ia o se tagata lelei.” Ae faapea mai isi, “E leai, a ua ia faasese i le nuu.” E tele tala sa femusuai faapena i aso na amata ai le tausamiga. Ae leai se tasi na lototele e tautala atu e uiga i a Iesu i luma o le lautele. Talu ai ona sa matatau tagata neʻi faasalaina i latou e taʻitaʻi Iutaia.
Ua oo i le ʻafa o le tausamiga, ae taunuu ane loa Iesu. Na maliu atu o ia i le malumalu, ma o i inā na matuā maofa ai tagata i lona tomai ofoofogia i le aʻoaʻo atu. Talu ai sa leʻi auai lava Iesu i aʻoga mo rapi, na tau mānatu ai tagata Iutaia: “Pe faapefea ona poto o lenei tagata, ae leʻi aʻoaʻoina o ia?”
Na faamatala atu e Iesu: “O laʻu aʻoaʻoga, e lē o saʻu lava, a o lana na auina mai aʻu. Ai sē tasi e fia faia Lona finagalo, o le a ia iloaina ai pe mai le Atua le aʻoaʻoga, pe ou te tautala fua lava aʻu.” Sa pipii mau atu aʻoaʻoga a Iesu i le tulafono a le Atua. O lea, e manino mai ai, sa ia saili e avatu le viiga i le Atua, ae e lē mo ia lava. Na fesili atu Iesu: “E leʻi tuuina atu ea e Mose le tulafono i a te outou?” Sa ia faaseā atu foi e faapea: “Ae leai se tasi o outou e anaana i le tulafono.”
Ona fesili atu lea o Iesu: “Pe se ā le mea tou te fia fasioti ai i a te aʻu?”
E leʻi iloa e le motu o tagata, o ē atonu sa asiasi atu i le tausamiga ni taumafaiga faapena. Sa faigata ona latou talitonu o le a manao se tasi e fasioti i lenei aʻoaʻo ofoofogia. O lea sa latou talitonu ai e iai se mea ua faaletonu i a Iesu, fua i lona manatu faapena. Ua fai ane i latou: “O loo i a te oe le temoni. O ai ea e fia fasioti i a te oe?”
Sa mananao taʻitaʻi Iutaia e fasioti Iesu, e ui ina sa leʻi iloa e le motu o tagata. Ina ua faamaloloina e Iesu se tagata i le Sapati, e tusa o le tausaga ma le ʻafa ua mavae, sa taumafai taʻitaʻi e fasioti i a te ia. A o lea la, ua faailoa atu e Iesu lo latou lē magafagafa i lona fesili atu i a te i latou: “Pe afai e peritomeina se tagata i le sapati, neʻi solia le tulafono a Mose, pe se ā le mea tou te ita mai ai i a te aʻu, auā na ou faamaloloina le tino atoa o le tagata i le sapati? Aua tou te faamasino i le vaaiga i fafo, a ia faamasino i le faamasinoga tonu.”
Ona fai ane lea o tagata Ierusalema, o ē sa latou iloa le tulaga e faapea: “E lē o ia ea lenei o loo latou fia fasiotia? Faauta foi, o loo tautala faaaliali lava o ia, ae e lē o fai atu sa latou upu i a te ia; po ua iloa ea e le au faipule o le Keriso moni lava lenei?” Na faamatala atu e nei tagata Ierusalema le pogai sa latou lē talitonu ai o Iesu o le Keriso e faapea: “Ua tatou iloa le mea e sau ai lenei tagata; a o le Keriso, pe a maliu mai o ia, e leai se tasi na te iloa pe mai fea o ia.”
Ua tali atu Iesu: “Ua outou iloa aʻu, ua iloa foi e outou le mea ua ou sau ai. Ou te leʻi sau fua lava aʻu, a ua moni lava o ia ua auina mai aʻu, e leʻi iloa o ia e outou. A o aʻu, ua ou iloa o ia, auā o aʻu e mai i a te ia; o Ia foi ua auina maia aʻu.” Ona latou fia puʻe ai lea i a te ia ona o lenei mea, atonu ina ia tuuina atu o ia i le falepuipui pe ina ia fasiotia o ia. Ae sa leʻi manuia a latou taumafaiga auā e leʻi oo i ona po e maliu ai Iesu.
Peitai, e toatele sa faatuatua pea i a Iesu, e pei ona tatau ai ona latou faia. Auā sa savali o ia i luga o le vai, na ia vaoia matagi, faamalū i sami sousou, na ia fafagaina faavavega le faitau afe o tagata i ni nai areto ma tamai iʻa, na ia faamaloloina maʻi, faasavavali i pipili, faapupula mata o tauaso, faamalolo i lepela, ma na ia faatutuina foi tagata sa feoti. O lea na latou fesili atu ai: “Pe a maliu mai le Keriso, pe lē tele ea faailoga o le a faia e ia na i lo o faailoga ua faia e lenei tagata?”
Ina ua faalogo Faresaio i le femusuai o le motu o tagata i nei mea, ona latou aufaatasi ai lea ma ositaulaga e aauina atu ni auauna e puʻe i a Iesu. Ioane 7:11-32.
▪ O anafea na taunuu atu ai Iesu i le tausamiga, ma o ā tala a tagata e uiga i a te ia?
▪ Aisea atonu na fai ane ai nisi faapea sa i a Iesu se temoni?
▪ O le ā sa manatu ai tagata Ierusalema e uiga i a Iesu?
▪ Aisea na toatele ai ē na faatuatua i a Iesu?