Mataupu 78

Ia Nofo Sauni Pea!

I NA ua uma ona lapataia e Iesu le motu o tagata e uiga i le matapeapea, ma apoapoai atu i ona soʻo e uiga i le soona pupū i mea faitino, ona faalaeiau atu lea o Iesu e faapea: “Aua e te fefe oe le lafu mamoe itiiti e, auā ua finagalo lo outou Tamā e foaiina mai le malo i a te outou.” Sa ia faaalia ai i inā, e na o se aofaiga itiiti (sa iloa mulimuli ane e 144,000) o le a iai i le Malo faalelagi. O le toatele o i latou o ē maua le ola e faavavau, o le a fai i latou ma tagatanuu faalelalolagi o le Malo.

Maeu se meaalofa ofoofogia, o “le malo”! I le faamatalaina o le manatu saʻo e ao ona iai i le au soʻo pe a latou mauaina le malo, na uunaia e Iesu i latou e faapea: “Ia outou faatau atu a outou mea, ma avatu ai ni meaalofa.” Ioe, e ao ona latou faaaogāina a latou alagāoa ina ia maua ai e isi aogā faaleagaga, ma atiina aʻe ai “le oa e lē uma i le lagi.”

Ona sosoo ai lea ma le apoapoai atu o Iesu i ona soʻo ina ia nofo sauni pea mo lona toe afio mai. Na ia fetalai atu: “Ia fusia o outou sulugatiti, ma ia mumū a outou lamepa; o outou foi, ia outou faapei o tagata e faatali mo lo latou matai, seia foi mai o ia mai le tausamaaga; latou te tatalaina atu le puipui i a te ia pe a sau ma tuʻituʻi mai. Amuia ia auauna pe a sau lo latou matai e maua i latou, o mataala pea. E moni, ou te fai atu i a te outou, e fusi e ia ona ofu, ma fai atu i a te i latou ia taooto e aai, a ua alu ane ma auauna i a te i latou.”

I lenei tala faatusa, o le nofo sauni o auauna mo le toe foi mai o lo latou matai, e faaalia lea i lo latou ofuina o o latou ofu talaloa ma faamau ai i o latou fusi, atoa ma le faaauau pea ona faia o o latou tiute seia oo i le po, e ala i le malamalama o lamepa sa tutumu i suauu. Na faamatala atu e Iesu: ‘Afai e taunuu mai le matai i le leoleoga lona lua [mai le tusa o le iva i le po e oo i le vaeluaga o le po], pe taunuu mai foi i le leoleoga lona tolu [mai le vaeluaga o le po e oo i le pe ā ma le tolu i le vaveao], ma maua mai i latou o mataala, amuia i latou!’

Na tauia e le matai ana auauna i se auala uigaese. Ua ia valaaulia i latou ina ia taooto i le laulau ae ia tautuaina i latou. Sa ia feagai ma i latou e pei o ni uō faamaoni, ae e lē pei o ni auauna. Maeu se taui lelei mo le faaauau pea ona latou galulue mo lo latou matai i le po atoa, a o faatalitali mo lona toe foi mai! Na fetalai faaiu atu Iesu: “Ia outou nofo sauni, auā o le itu aso tou te lē manatunatu ai, e sau ai le Atalii o le tagata.”

Na fesili atu foi Peteru: “Le Alii e, ua e fetalai mai ea lena tala faatusa i a te i matou, po o tagata uma?”

Na i lo le tali saʻo atu i ai, na toe taʻu atu foi e Iesu se isi tala faatusa. Ua ia fesili atu: “O ai foi le auauna tausimea faamaoni, ua tofia e lona alii e pule i ana auauna, ina ia avatu pea i a te i latou o meaai i ona itu aso e tatau ai? Amuia lea auauna pe a sau lona alii e maua o ia o loo faapea ona fai! E moni, ou te fai atu i a te outou, na te tofia o ia e pule i ana mea uma.”

E manino lava o Iesu Keriso, o ia lea o le “matai.” O le “auauna tausimea” ua faaatagia ai le “lafu mamoe itiiti” o soʻo o ē ua pei o se tino e tasi, ma “o auauna” e faatatau foi i lena vaega o le 144,000 o ē e maua le Malo faalelagi, peitai o lenei faaupuga e faamatilatila mai ai a latou galuega o ni tagata taitoatasi. O “mea” ua tofia i ai le auauna tausimea faamaoni na te tausia, o mea totino ia a le matai o loo i le lalolagi, e aofia ai tagatanuu faalelalolagi o le Malo.

I le faaauauina o le tala faatusa, na taʻu atu ai e Iesu e faapea, e lē o sui uma o lena vasega o le auauna tausimea po o auauna, o le a faamaoni, i lona faamatala atu: “Ae afai e fai ifo lea auauna i lona loto, ‘E faatuai mai loʻu alii,’ ona fasi ai lea e ia o auauna tane ma auauna fafine, ua ʻai ma inu, ma onā; e sau lava le matai o lea auauna i se aso na te leʻi faatalitalia, . . . ona matuā faasala ai lea i a te ia.”

Na matauina faapea e Iesu, ua avea lona afio mai ma itu na matuā fevaevaeai ai Iutaia, auā sa talia ana aʻoaʻoga e nisi ae teena e isi. E sili atu i le tolu tausaga ua mavae, na papatisoina ai o ia i le vai, a o lea ua matuā lalata ane lava lona papatisoga i le oti, ma e pei ona ia fetalai: “Ua ou matuā tiga lava seia faaiuina!”

Ina ua uma ona taʻu atu nei faamatalaga i ona soʻo, ona toe fetalai atu foi lea o Iesu i le motu o tagata. Sa faanoanoa o ia ona o lo latou teena ma le faauamaaa o le faamaoniga manino e iloa ai o ia ma lona uiga. Ua ia fetalai atu: “Pe a outou iloa le ao o loo alu aʻe i sisifo, ona outou fai ane lea, ‘A nei e afā,’ ona taunuu ai lea. A agi mai le toga, ua outou fai ane, ‘O le a la,’ ona taunuu foi lea. O outou tagata pepelo, ua outou iloa ona matauina faailoga i le lagi ma le lalolagi, ae aisea tou te lē iloa ai mātau lenei taimi patino?” Luka 12:32-59.

▪ E toafia ua faia aʻe ai le “lafu mamoe itiiti,” ma o le ā latou te maua?

▪ Sa faamamafa faapefea e Iesu le manaoga mo ana auauna ina ia nofo sauni pea?

▪ I le tala faatusa a Iesu, o ai le “matai,” le “auauna tausimea,” “o auauna,” ma ana “mea”?