Mataupu 87

Ia Sauniuni mo le Lumanai Faatasi ma le Atamai Aogā

FAATOʻĀ uma lava ona faamatala atu e Iesu le tala e uiga i le atalii faamaumauoa, i se motu o tagata e aofia ai ona soʻo, o le ʻau ao lafoga lē faamaoni ma isi tagata lauiloa i agasala, atoa ma le ʻau tusiupu ma Faresaio. I lona toe fetalai atu i ona soʻo, na ia faamatala atu ai se tala faatusa e faatatau i se tagata mauoa o lē na ia maua se tala lē manuia e uiga i lē sa pule i lona aiga, po o se auauna tausimea.

E tusa ai ma le faamatalaga a Iesu, na valaau atu le tagata mauoa i lana auauna tausimea ma fai atu i a te ia, o le a tuliesea o ia. Ona manatu ifo lea o le auauna tausimea: “Po o le ā se mea ou te faia, ona ua ou iloa o le a faateaina aʻu e loʻu matai mai le tulaga o le auauna tausimea? Ou te lē lavā ʻeli, ou te mā foi e ʻaisi. Oi! ua ou iloa le mea e ao ona ou faia, ina ia talia ai aʻu e tagata i o latou aiga pe a tuuesea aʻu mai le tofi o le auauna tausimea.”

O le ā le fuafuaga a le auauna tausimea? Na ia valaau atu i a i latou o ē sa aitalafu i lona matai. Ua ia fesili atu i ai e faapea: “E fia mea o e aitalafu ai?”

Ona tali ane lea o lē na muamua, ‘E afe kalone o suāuu olive.’

Ua fai atu o ia i a te ia: ‘Inā tago ia i lau tusi [o le maliega], ia nofo i lalo ma tusi vave ai e lima selau.’

Ua ia fesili atu foi i le tasi: ‘Ae ā oe, e fia mea o e aitalafu ai?’

Na faapea ane o ia, ‘O taga saito e selau.’

ʻInā tago ia i lau tusi, ma tusi e valu sefulu.’

Sa iai i le auauna tausimea le aiā e faaitiitia ai pili o aitalafu i lona matai, ona o loo pule pea o ia i mataupu tau tupe a lona matai. E ala i le faaitiitia o aitalafu, na ia faia ai ni uō ma i latou o ē e mafai ona toe taui ane lona agalelei pe a tuliesea o ia mai lana galuega.

Ina ua faalogo le matai i le mea ua tupu, ona maofa ai lea o ia. O le mea moni, sa ia “faamālō atu i le auauna tausimea, e ui ina amioletonu, ae sa ia gaoioi ma le atamai aogā.” Ioe, na faaopoopo atu Iesu: “E sili le atamamai o tagata o lenei faiga o mea i auala aogā agaʻi i lo latou lava tupulaga, na i lo o tagata o le malamalama.”

O lea, i le taʻuina atu o le lesona mo ona soʻo, na faalaeiau atu ai Iesu: “Ia outou faia ni uō ma outou e ala i ʻoa o le amioletonu, ina ia mafai ai ona laua talia mai outou i nofoaga e faavavau, pe a mavae atu na ʻoa.”

Sa leʻi tauleleia e Iesu le auauna tausimea ona o lana amioletonu, ae ona o lona atamai aogā na vaai mamao ai. E masani lava ona faaaluvale e “tagata o lenei faiga o mea” a latou tupe po o tulaga, e faauō ai ma i latou o ē e mafai ona toe taui ane i a te i latou lo latou agalelei. O lea, e manaomia ai foi e auauna a le Atua, po o “tagata o le malamalama,” ona faaaogā a latou ʻoa faitino, po o a latou “ʻoa o le amioletonu,” i se auala atamai ina ia aogā ai i a i latou.

Ae e pei ona fetalai Iesu, e ao ona latou faaaogā na ʻoa e faauō ai ma i laua o ē atonu o le a taliaina mai i latou “i nofoaga e faavavau.” O na nofoaga o loo iai lea i le lagi mo sui o le lafu mamoe itiiti; ae o le a iai i le lalolagi Parataiso mo “isi mamoe.” Talu ai e na o Ieova le Atua ma lona Alo e mafai ona faatagaina tagata i na nofoaga, e ao ai la ona tatou filigā e atiina aʻe se faauōoga ma i laua, e ala i le faaaogaina o so o se “oa o le amioletonu” o loo tatou maua, ina ia lagolagoina ai manaoga o le Malo. Ma afai e mavae atu pe faaumatia foi ʻoa faitino, e pei ona mautinoa o le a faia faapea, ae ua faamautinoaina lo tatou ola e faavavau i le lumanai.

Ona fetalai atu lea o Iesu, o tagata e faamaoni i le tausia e oo lava i nei mea faitino, po o mea iti, o le a faamaoni foi i le tausia o mea e sili atu ona tāua. “O le mea lea,” e pei ona ia taʻua atili, “afai foi tou te lē faamaoni i ʻoa o le amioletonu, o ai se na te fia tuuina atu i a te outou le ʻoa moni e tausi [o lona uiga, o mea faaleagaga po o manaoga o le Malo]? Ma afai e tou te lē faamaoni i mea a se isi tagata [o manaoga o le Malo ua tuuina mai e le Atua i ana auauna], o ai se na te fia avatu i a te outou se mea e fai mo outou [le taui o le ola i nofoaga e faavavau]?”

E lē mafai ona avea i tatou ma auauna moni a le Atua, a o le taimi lava e tasi o loo avea ai ma pologa i ʻoa o le amioletonu, po o ʻoa faitino, e pei ona fetalai faaiu atu ai Iesu: “E lē mafai e se auauna a le aiga ona auauna i ni matai se toalua; auā e inoino o ia i le tasi ae alofa i le tasi, a lē o lea, e faapipii atu o ia i le tasi ae tuulafoai i le tasi. E lē mafai ona e auauna i le Atua atoa ma ʻoa.” Luka 15:1, 2; 16:1-13; Ioane 10:16.

▪ Sa faapefea ona faauō le auauna tausimea o le tala faatusa a Iesu, ma i laua e mafai ona fesoasoani i a te ia mulimuli ane?

▪ O ā “oa o le amioletonu,” ma e mafai faapefea ona tatou faaaogaina e faia ai ni uō?

▪ O ai e mafai ona faatagaina i tatou “i nofoaga e faavavau,” ma o ā nei nofoaga?