Mataupu 91

Ina ua Toetu mai Lasalo

UA TAUNUU atu Iesu ma ē na faatasi ai ma ia i le tuugamau o Lasalo. E mautinoa o se ana, sa pupuni i se maa. Ua fetalai atu Iesu: “Inā fuli ese ia le maa.”

Na tetee ane Mareta, ona e leʻi malamalama i le mea sa finagalo Iesu e fai. Ua faapea ane o ia: “Le Alii e, ai ua manogi o ia auā o lona po fa lenei.”

A ua fesili atu Iesu: “Ou te leʻi fai atu ea i a te oe, afai e te talitonu mai o le a e vaai i le mamalu o le Atua?”

O lea na aveese ai loa le maa. Ua tepa aʻe foi fofoga o Iesu ma tatalo atu e faapea: “Loʻu Tamā e, ou te faafetai atu i a te oe ina ua e faafofoga mai i a te aʻu. E moni, ua ou iloa e te faafofoga mai pea i a te aʻu e lē aunoa; ae ona o le motu o tagata o loo tutū mai a o oʻu tautala atu, ina ia talitonu i latou ua e auina mai aʻu.” Sa tatalo Iesu i luma o le lautele ina ia iloa ai e tagata, o le mea o le a ia faia o le a faataunuuina lea i le mana mai le Atua. Na ia alaga atu foi ma le leotele: “Lasalo e, inā sau ia i fafo!”

Ona sau ai lea i fafo o Lasalo. O loo fusifusia pea ona vae ma ona lima i fusi na tanu ai, ma o loo ufiufi ona mata i se ie. Ua fetalai atu Iesu: “Tatala ia i a te ia ma tuu atu e alu.”

Ina ua latou vaaia lenei vavega, na faatuatua ai i a Iesu le toatele o tagata Iutaia o ē na ō ane e faamafanafana i a Maria ma Mareta. Peitai, na ō atu nisi i le ʻau Faresaio, ma taʻu i ai le mea sa tupu. Ona latou fuafuaina ai lea ma le ʻau faitaulaga sili, o se fono a le faamasinoga maualuga a Iutaia, le ʻau Saniterini.

Sa aofia ai i le ʻau Saniterini le ositaulaga sili i lena taimi, o Kaiafa, atoa ma le ʻau Faresaio ma le ʻau Satukaio, o ositaulaga sili, ma isi o ē na avea muamua ma ositaulaga sili. Na faapea ifo i latou ma le gatete: “Se ā se mea tatou te faia, ona ua faia e lenei tagata faailoga e tele? Afai foi tatou te tuu ai pea o ia, o le a faatuatua uma ai i latou i a te ia, ona ō mai ai lea o Roma ma aveesea o tatou tulaga ma lo tatou nuu.”

E ui lava ina sa ioe le ʻau taʻitaʻi lotu e faapea, sa faia e Iesu “faailoga e tele,” ae na pau le mea sa latou popole i ai o o latou lava tulaga ma la latou pule. Na avea le toe faatuina o Lasalo o se mea e masiasi ai le ʻau Satukaio, talu ai sa lē talitonu i latou i le toetu.

Na tulai foi Kaiafa, o lē atonu o se Satukaio, ua faapea atu: “Tou te lē iloa lava se mea e tasi, tou te lē o mafaufau foi e aogā i a te i tatou ona oti o le tagata e toatasi e sui aʻi le nuu, ina ia lē fano le nuu uma lava.”

Na faagaeeina e le Atua Kaiafa ina ia tautala atu i na upu, auā na tusia e le aposetolo o Ioane i se taimi mulimuli e faapea: “O lenei, e leʻi mafua mai i a [Kaiafa] ona fai atu o na upu.” O le uiga moni o upu a Kaiafa, e tatau ona fasiotia Iesu ina ia taofia ai Lona faia o mea e tauvaleaina atili ai o o latou tulaga pule, atoa ma la latou taaʻiga. Ae e tusa ai ma upu a Ioane, ‘sa valoia faapea e Kaiafa, o le a maliu Iesu e lē gata e sui ai le nuu, ae ina ia faapotopoto faatasi ai le fanau a le Atua.’ Ma, o le mea moni, o le fuafuaga a le Atua, ia maliu lona Alo e fai ma togiola mo tagata uma.

Na taulau Kaiafa i le taaʻina o le ʻau Saniterini ina ia faia ni fuafuaga e fasiotia ai Iesu. Ae atonu sa silafia e Iesu na fuafuaga e ala i a Nikotemo, o se sui o le ʻau Saniterini o lē sa alofa i a te ia, ma alu ese mai ai i inā. Ioane 11:38-54.

▪ Aisea na tatalo leotele ai Iesu i le lautele a o leʻi faatuina Lasalo?

▪ Sa faapefea ona tali atu i latou o ē na vāai i lenei toetu?

▪ O le ā e faaalia ai le amioleaga o sui o le ʻau Saniterini?

▪ O le ā le faanaunauga o Kaiafa, ae o le ā le mea na faaaogā i ai o ia e le Atua ina ia valoia?