Mataupu 102

Le Afio Manumalo atu o Keriso i Ierusalema

I LE taeao na sosoo ai, o le Aso Sa lea, le aso 9 o Nisani, na tuua ai Petania e Iesu ma ona soʻo, ae malaga atu i le Mauga o Olive agaʻi i Ierusalema. E leʻi umi lava, ae latou latalata atu i Petefake, le nuu sa tu i le Mauga o Olive. Ona faatonuina lea e Iesu o le isi toalua o ona soʻo:

“Inā ō ia oulua i le aai o loo i o oulua luma atu, o le a lua maua ai le asini o nonoa, ma le tamai asini o loo faatasi ma ia; ia oulua tatalaina ma aumai i laua i a te aʻu. Ma afai e fai ane se tasi i a te oulua, ia oulua fai atu i ai, ‘O loo manao i ai le Alii.’ Ona ia tuuina mai loa lea o asini.”

E ui ina sa leʻi iloa muamua e le ʻau soʻo, e iai se fesootaiga a nei faatonuga ma le faataunuuga o le valoaga a le Tusi Paia, peitai sa latou iloa mulimuli ane e iai. Na valoia e le perofeta o Sakaria e faapea, o le a afio atu le Tupu folafolaina a le Atua i Ierusalema i se asini, ioe, “o loo tietie atu i le asini, o le tamai asini foi.” Sa faapena foi ona tietie atu le tupu o Solomona i le tamai asini i le aso o lona faauuga.

Ina ua oo atu soʻo i Petefake e aumai le tamai asini ma lona tinā, na faapea ane nisi o ē na tutū latalata ane: “O le ā le mea o oulua faia?” Peitai ina ua faailoa atu o loo manao i ai le Alii i manu, sa latou tuu ane loa i soʻo e ave i a Iesu. Na fofola foi e soʻo o latou ofu i le tua o le asini fafine ma lana tama, ma ua tietie Iesu i le tamai asini.

A o tietie atu Iesu i Ierusalema, sa lolofi ane i ai le motu o tagata. O le toatele o i latou sa fofola o latou ofu i luga o le auala, a o isi sa latou fati ane lālā o laau ma folasia ai. Ua latou alalaga foi e faapea: “Ia manuia Lē maliu mai o le Tupu i le suafa o Ieova! . . . O le manuia i le lagi, ma le viiga i mea aupito maualuluga!”

Sa feitai nisi o le ʻau Faresaio na iai i le motu o tagata, ona o na folafolaga ma faitio atu ai i a Iesu e faapea: “Le aʻoaʻo e, ia e aʻoaʻi atu i ou soʻo.” A ua tali atu Iesu: “Ou te fai atu i a te outou, Afai e fifilemu i latou nei, o le a alalaga mai lava maa.”

A o latalata atu Iesu i Ierusalema, ua silasila atu o ia i le aai, ona ia tutulu ai lea, ua faapea ane: “Ana e iloa, e oe lava i lenei aso, o mea e te manuia ai! A o lenei ua lilo i a te oe.” Ona o le lē usiusitai ma le loto i ai, sa tatau ai ona faasalaina Ierusalema, e pei ona valoia faapea e Iesu:

“E oo mai i a te oe ona aso e tanu ai le mea mautietie e sio ai i a te oe e i latou ua ita i a te oe [autau a Roma ua pulea e le Taitaiau o Tito], latou te sioina lava i a te oe, e puipui i a te oe i itu uma; latou te faagatasi foi i a te oe ma le eleele, atoa ma lau fanau i totonu i a te oe, latou te lē tuua foi se maa i luga o le tasi maa i totonu i a te oe.” O lenei faaumatiaga o Ierusalema sa valoia e Iesu, na taunuu moni lava i le 37 tausaga mulimuli ane ai, i le tausaga e 70 T.A.

I ni nai vaiaso muamua atu, na vāai ai le toatele o le motu o tagata i le toe faatuina e Iesu o Lasalo. Ma sa taʻutaʻu atu pea e i latou na i isi e uiga i lena vavega. O lea, ina ua oo atu Iesu i Ierusalema, sa vavaō le aai atoa. Na fia iloa e tagata, “Po o ai lava lenei?” Ae na taʻu atu pea e le motu o tagata: “O Iesu lenei, le perofeta mai Nasareta i Kalilaia.” I le matauina o lenei mea, sa faanoanoa ai le ʻau Faresaio ona ua leai sa latou mea e mafai, auā e pei ona latou faapea mai: “Ua mulimuli atu le lalolagi i a te ia.”

E tusa ai ma lana masani pe a asiasi atu i Ierusalema, na maliu atu ai Iesu i le malumalu e fai ai ana aʻoaʻoga. O i inā na ō atu ai i a te ia ē tauaso ma ē mumutu, ma sa ia faamaloloina i latou! Ina ua vāai le ʻau ositaulaga sili ma le ʻau tusiupu i mea ofoofogia na faia e Iesu, ma ina ua latou faalogo o alalaga mai tamaiti na i le malumalu e faapea, “Osana i le alo o Tavita,” ona matuā tiga ai lea o i latou. Ua latou faapea atu: “Ua e lagona ea a latou upu?”

Na tali atu Iesu: “Ioe. Tou te leʻi faitau e faapea, ‘Ua e saunia le viiga mai gutu o tama meamea ma tama fesusui?’”

Sa faaauau aʻoaʻoga a Iesu, ma sa ia silasila solo i mea na iai i le malumalu. Ua latalata le taimi, a ua fai si tuai. O lea na latou tuumuli ese ai ma le toʻa 12, ae toe foi atu e tusa ma le lua maila [po o le tolu kilomita] i Petania. O inā, sa ia tofā ai i le po o le Aso Sa, atonu i le fale o lana uō o Lasalo. Mataio 21:1-11, 14-17; Mareko 11:1-11; Luka 19:29-44; Ioane 12:12-19; Sakaria 9:9.

▪ O anafea ma o le ā le auala na afio atu ai Iesu i Ierusalema o se Tupu?

▪ Sa faapeī le tāua o le vivii atu o le motu o tagata i a Iesu?

▪ O le ā le lagona na i a Iesu ina ua ia silasila atu i Ierusalema, ma o le ā le valoaga na ia fetalai atu ai?

▪ O le ā na tupu ina ua maliu atu Iesu i le malumalu?