Le Amataga o le Soifuaga Faaleaiga o Iesu
Mataupu 9
Le Amataga o le Soifuaga Faaleaiga o Iesu
A O TUPUTUPU aʻe Iesu i Nasareta, sa na o sina tamai aai lava e faalētaua. Na tu i vaega maugā o se vaipanoa e taʻua o Kalilaia, e lē mamao ese mai le vanu o Isereelu.
Ina ua avane Iesu i inā e Iosefa ma Maria mai Aikupito, ae ua tusa ma le lua ona tausaga, e foliga mai sa na o ia lava le tama a Maria. Ae e leʻi umi ona iai lea tulaga. A o faagasolo le taimi, sa fananau mai Iakopo, o Iose, o Simona, ma Iuta, ma sa iai foi se fanau teine a Maria ma Iosefa. Mulimuli ane, a itiiti mai, e toaono uso ma tuafāfine laiti o Iesu.
E iai foi isi aiga o Iesu. Ua uma ona tatou iloa lona tauusoga e matua atu o Ioane, o lē sa mamao lava i Iutaia le mea na nofo ai. Ae o Salome, o lē atonu o se uso o Maria, sa nofo latalata ane i Kalilaia. Na faaipoipo Salome i a Sepetaio, o lea la, o le la fanau tama e toalua o Iakopo ma Ioane o ni tauusoga o Iesu. Tatou te lē iloa pe tele se taimi na mafuta ai Iesu ma nei tama a o tuputupu aʻe o ia, peitai, na avea mulimuli ane i latou o ni aumea vavalalata.
Sa manaomia ona galue malosi Iosefa ina ia tausia ai lona aiga ua faatoateleina. Ma sa avea o ia ma kamuta. Ona sa tausia e Iosefa Iesu e pei o sona lava atalii, o le mea lea na taʻua ai Iesu o le “atalii o le tufuga.” Na aʻoaʻo foi e Iosefa Iesu ina ia avea ma kamuta, ma sa ia taliaina lelei. O le pogai lena na fai ane mulimuli ai tagata e uiga i a Iesu, “O ia lenei o le tufuga.”
Sa atiina aʻe le olaga o le aiga o Iosefa i le tapuaiga i a Ieova le Atua. I le ogatasi ma Tulafono a le Atua, na avatu ai e Iosefa ma Maria faatonuga faaleagaga i le la fanau ‘pe a latou nonofo i le fale, pe a latou savavali i le ala, pe a latou taooto, ma pe a latou tutū foi.’ Sa iai se sunako i Nasareta, ma tatou te mautinoa sa lē aunoa ona ave e Iosefa lona aiga e tapuai ai i inā. Ae e leai se faaletonu, o lo latou fiafiaga sili o le malaga atu lea e lē aunoa i le malumalu o Ieova i Ierusalema. Mataio 13:55, 56; 27:56; Mareko 15:40; 6:3; Teuteronome 6:6-9.
▪ A itiiti mai, e toafia uso ma tuafāfine laiti o Iesu, ma o ai igoa o nisi o i latou?
▪ O ai tauusoga lauiloa e toatolu o Iesu?
▪ O le ā le galuega masani sa mulimuli ane faia e Iesu, ma aisea?
▪ O ā aʻoaʻoga tāua sa avatu e Iosefa mo lona aiga?