Mataupu 105

Le Amataga o se Aso Mataina

INA ua tuua e Iesu Ierusalema i le afiafi o le Aso Gafua, na toe foi atu o ia i Petania i le malifa i le itu i sasae o le Mauga o Olive. Na faaiʻuina ai aso e lua o lana faiva mulimuli i Ierusalema. E lē taumatea na toe tofā foi Iesu i le po faatasi ma lana uō o Lasalo. O lona fa ai lea o po o iai i Petania, talu ona taunuu atu mai Ieriko, i le Aso Faraile.

O lea, i le taeao po o le Aso Lua, Nisani 11, na toe ō malaga ai o ia ma ona soʻo. Sa faamaonia o se aso faigata lena o le faiva a Iesu, sa o se aso aupito sili atu ona pisi. O le aso mulimuli lena na ulu atu ai o ia i le malumalu. Ma na avea foi ma aso mulimuli o lana faiva i le lautele a o leʻi oo i lona faamasinoga ma faasalaina.

Na uia e Iesu ma ona soo le auala lava lea e tasi, i le Mauga o Olive ma agaʻi atu i Ierusalema. I lena auala mai Petania, na mātauina ai e Peteru le laau na fetuuina e Iesu i le taeao o le aso na tuanai atu. Na ia fai atu ma le ofo: “Rapi e, faauta! i le mati na e fetuuina ua mago.”

Ae aisea na tapē ai e Iesu le laau? Na ia faailoaina atu le pogai ina ua ia fetalai atili: “E moni, ou te fai atu i a te outou, Afai ua i a te outou le faatuatua, ma outou le masalosalo, ona faia lea e outou e lē na o le mea ua faia i le mati, ae afai tou te fai atu i lenei mauga, [le Mauga o Olive lea sa latou tutū ai], ‘Ia siitia oe, ma lafoina i le sami,’ ona faia lava lea. O mea uma foi tou te ole mai ai i le tatalo ua iai le faatuatua, e maua lava e outou.”

O lea e ala i le faamagoina o le laau, na saunia ai e Iesu mo ona soʻo se lesona vaaia i le manaomia ona latou faatuatua i le Atua. E pei ona ia taʻua: “O mea uma foi tou te ole mai ai i tatalo ua iai le faatuatua, e maua lava e outou.” Maeu se lesona tāua sa tatau ona latou aʻoaʻoina, ae maise lava i le manatu i tofotofoga mataʻutia na leʻi mamao ae oo ane! Peitai, e iai se isi fesootaiga i le va o le mago o le laau o le mati ma le faatuatua.

Na avea le nuu o Isaraelu e pei o lenei laau o le mati, sa iai se foliga taufaasesē. E ui lava sa iai le nuu i se faiā faalefeagaiga ma le Atua ma atonu na foliga mai i fafo na usiusitai i ana tulafono, ae sa faamaonia le leai o se faatuatua, lē taulau ona fua mai o ni fua lelei. Ona o le leai o se faatuatua, na oo ai i le tulaga o le teena o le Alo o le Atua! O lea, e ala i le faamagoina o le laau o le mati ona o le lē fua mai, na faataitaia ai ma le tonu e Iesu le iuga o lenei nuu lē faatuatua lea e leai ni fua.

Sa leʻi pine, ae oo atu loa Iesu ma ona soʻo i Ierusalema, ma e tusa ai o la latou tū, sa latou ō atu i le malumalu, ma amata ona aʻoaʻo atu ai Iesu i inā. E lē taumatea sa manatua pea e ositaulaga sili ma toeaina o le nuu le gaoioiga a Iesu na faia i le aso na faatoa tuanai atu faasaga i tagata suitupe, ona latou luʻia ai lea o ia: “O le ā ea le pule e te fai ai na mea? O ai foi na tuuina atu i a te oe lenei pule?”

I le tali atu, na fetalai ai Iesu: “Ou te fesili atu foi aʻu i a te outou i se upu e tasi; afai tou te taʻu mai lea i a te aʻu, ona ou taʻuina atu lea o le pule ou te faia ai nei mea. Se papatisoga ea a Ioane maifea? Mai le lagi ea, pe mai tagata?”

Ona felafolafoai lea o faitaulaga ma toeaina po o le a faapefea ona latou tali atu. “Afai tatou te fai atu, ‘Mai le lagi,’ ona fai mai ai lea o ia i a te i tatou, ‘Se ā foi le mea tou te leʻi talitonu ai i a te ia?’ Afai foi tatou te fai atu, ‘Mai tagata,’ ua tatou fefefe i le motu o tagata; auā o la latou lea taofi uma i a Ioane, o le perofeta ia.”

Na lē iloa e taʻitaʻi po o le ā sa latou tali atu. O lea na latou tali atu ai i a Iesu: “Matou te lē iloa.”

Ona tali atu ai lea o Iesu: “Ou te lē taʻu atu foi i a te outou le pule ou te faia ai nei mea.” Mataio 21:19-27; Mareko 11:19-33; Luka 20:1-8.

▪ O le ā le mea sa mataʻina ai le Aso Lua, Nisani 11?

▪ O ā lesona na saunia e Iesu ina ua ia faamagoina le laau o le mati?

▪ O le ā sa tali atu ai Iesu i a i latou o ē na fesili ane po o le pule a ai na ia faia ai ia mea?