Le A‘oa‘oina o Nikotemo
Mataupu 17
Le Aʻoaʻoina o Nikotemo
A O AUAI atu Iesu i le Paseka o le 30 T.A., sa ia faia ai ni faailoga po o ni vavega mataina. O le iuga, e toatele tagata na faatuatua ai i a te ia. Sa matuā maofa foi Nikotemo, le sui o le au Saneterini po o le faamasinoga maualuga a Iutaia, ma sa manao ai e fia iloa atili. O lea, sa ia asiasi ane ai i a Iesu i se po pogisa, atonu ona o le fefe neʻi taʻuvalea lona igoa i le va feagai ai ma isi taʻitaʻi Iutaia pe a iloa o ia.
Sa fai atu o ia, “Rapi e, ua matou iloa o oe o le aʻoaʻo ua maliu mai mai le Atua; auā e leai se tasi e mafai ona faia o nei faailoga ua e faia pe ana lē i a te ia le Atua.” I lana tali atu, sa taʻu atu ai e Iesu i a Nikotemo e faapea, ina ia ulu atu se tagata i le Malo o le Atua, e tatau ona “toe fanaufouina” o ia.
Ae, e mafai faapefea ona toe fanaufouina se tagata? Fai mai le fesili a Nikotemo: “E mafai ea ona toe ofi o ia i le manava o lona tinā, e fanau mai ai?”
E leai, e lē o le faauigaina lena o le toe fanaufouina. Sa faamatala atu e Iesu: “Afai e lē fanau se tasi i le vai ma le agaga, e lē mafai ona sao o ia i le malo o le Atua.” Ina ua papatisoina Iesu ma ua afio ifo le agaga paia i ona luga, sa faapena ona fanauina ai o ia i le “vai ma le agaga.” E ala i le siufofoga mai le lagi e faapea, ‘O loʻu Atalii pele lena ua ou faamaonia,’ sa faalauiloa mai ai e le Atua e faapea, ua ia auina ifo se atalii faaleagaga o loo iai le faamoemoe o le ulu atu i le Malo faalelagi. Mulimuli ane, i le Penetekoso o le 33 T.A., na maua ai foi e isi tagata papatisoina le agaga paia, ma faapena ona toe fanaufouina ai i latou e avea ma atalii faaleagaga o le Atua.
Ae e matuā tāua foi le vaega a le Atalii faapitoa faaletagata o le Atua. Na fetalai atu Iesu i a Nikotemo: “E pei ona siitia i luga e Mose o le gata i le vao, e faapea foi ona siitia i luga o le Atalii o le tagata, ina ia maua e i latou uma o ē faatuatua i a te ia le ola e faavavau.” Ioe, e pei ona manaomia ona vaavaai atu na tagata Isaraelu na utia e gata uogo, i le gata apamemea ina ia faaolaina ai i latou, e faapena foi ona manaomia e tagata uma lava ona faaalia le faatuatua i le Alo o le Atua ina ia faaolaina ai mai lo latou aafiaga i le oti.
I le faamamafaina o le gaoioiga alofa a Ieova i lena mea, sa toe fetalai atu ai Iesu i a Nikotemo e faapea: “Ua alofa tele mai le Atua i le lalolagi, ua ia aumai ai lona Atalii pele e toatasi, ina ia lē fano i latou uma e faatuatua i a te ia, a ia maua le ola e faavavau.” O lea, i inā i Ierusalema ina ua faatoʻā ono masina talu ona amata o lana faiva, sa faamanino atu ai e Iesu faapea o le a faaaogā o ia e Ieova le Atua mo le faaolaina o tagata.
Sa faamatala atili atu e Iesu i a Nikotemo e faapea: “Auā e leʻi auina mai e le Atua lona Atalii i le lalolagi ina ia faamasino i le lalolagi,” o lona uiga e lē faamasino ina ia faamalaiaina, pe taʻusalaina le lalolagi, ma iu ai i le faaumatiaina o tagata. Ae na i lo o lea, e pei ona fetalai Iesu, na auina mai o ia “ina ia faaolaina le lalolagi i a te ia.”
Na alu ane ma le fefe Nikotemo i a Iesu, i le pogisa o le po. O lea, sa manaia ai ona faaiuina e Iesu le la talanoaga i lona fetalai atu e faapea: “O le faavae foi lenei o le faamasinoga, ina ua oo mai le malamalama [o Iesu lea e pei ona faaalia i lona olaga ma ana aʻoaʻoga] i le lalolagi, a o tagata, e sili lo latou mananao i le pouliuli i lo le mananao i le malamalama; auā sa leaga a latou amio. Auā o i latou uma o ē fai mea leaga e inoino i latou i le malamalama, e lē ō mai foi i le malamalama, neʻi faailoa a latou amio. A o lē ua faamaoni ana mea e fai, e sau lava o ia i le malamalama, ina ia faaalia ana galuega ina ua tatau i le Atua.” Ioane 2:23–3:21; Mataio 3:16, 17; Galuega 2:1-4; Numera 21:9.
▪ O le ā sa uunaia ai le asiasiga a Nikotemo, ma aisea na alu ane ai o ia i le po?
▪ O le ā le uiga o le “toe fanaufouina”?
▪ Sa faapefea ona faataitaia e Iesu lana vaega mo lo tatou faaolataga?
▪ O le ā le uiga o le faaupuga, e leʻi sau Iesu ina ia faamasino le lalolagi?