Le Autū o Fefinauaiga
Mataupu 41
Le Autū o Fefinauaiga
E LEʻI umi lava talu ona talia o ia i le fale o Simona, ae amata loa e Iesu se talaʻiga faataamilo lona lua i Kalilaia. I lana malaga talu ai i le oganuu, sa latou ō faatasi ai ma ona uluai soʻo, o Peteru, Aneterea, Iakopo ma Ioane. A o le taimi lea, ua latou ō nei faatasi ma aposetolo e toʻa 12, atoa ma nisi o fafine. O i latou ia e aofia ai Maria le Makatala, o Susana, ma Ioana, le avā a se alii ofisa a le tupu o Herota.
A o faateleina le faiva a Iesu, sa faapena foi ona faateleina fefinauaiga e uiga i lana galuega. Na aumaia i a Iesu se tagata ua uluitinoina e temoni, ma e tauaso foi toe gūgū. Ina ua faamaloloina o ia e Iesu, ma faapea ona saoloto ai mai le pulea e temoni, ma ua toe mafai ai ona tautala ma vaai, sa matuā maofa lava le motu o tagata. Ua latou faapea ane: “E lē o le atalii ea lenei o Tavita?”
Ona o le toatele naua o tagata sa lolofi ane i le fale na iai Iesu, sa lē mafai ai ona aai o ia ma ona soʻo. E lē gata ina auai i latou o ē na manatu faapea, masalo o ia lenei o le “Atalii o Tavita” na folafolaina mai, ae sa iai foi le au tusiupu ma Faresaio o ē na ō ane mamao lava mai Ierusalema ina ia taʻuleagaina o ia. Ina ua faalogo le aiga o Iesu i nei mau talafeaveai e uiga i a Iesu, ona latou ō ane ai lea e taofi i a te ia. Mo le ā le mafuaaga?
Ia, e oo lava i uso o Iesu sa latou lē talitonu o ia o le Alo o le Atua. E lē gata i lea, o le vavaō ma le vevesi solo o tagata ona o ia, e matuā ese lava mai le Iesu lea na latou iloa a o tuputupu aʻe i Nasareta. O le mea lea na latou talitonu ai e iai se mea matuiā ua tupu i le mafaufau o Iesu. Ua latou manatu “ua valea o ia” ma sa latou mananao ai e pue ma aveese i a te ia.
Peitai, sa manino lava le faamaoniga, na faamalolo e Iesu le tagata na uluitinoina e temoni. Na iloa lelei lava e le au tusiupu ma Faresaio, e lē mafai ona latou faafitia le moni o lenei mea. O lea, ina ia taʻuleagaina Iesu, na latou fai ane ai i tagata e faapea: “Ana lē seanoa Pelesepulo le alii o temoni, e lē tulia e lena tagata o temoni.”
I lona silafia o o latou manatunatuga, na valaau atu ai Iesu i le au tusiupu ma Faresaio e ō mai i a te ia, ma ua ia fetalai atu i ai e faapea: “O malo uma ua fevaevaeai e faaumatia ia; o aai uma foi po o aiga e fevaevaeai e lē tumau ia. Afai foi e tulia Satani e Satani, ona fevaevaeai lea o ia i a te ia; pe faapefea foi ona tumau o lona malo?”
Maeu se manatu e lē mafaafitia! Talu ai sa faapea mai Faresaio sa mafai e ō latou tagata ona tulia temoni, na fesili atu ai foi Iesu e faapea: “Afai foi o Pelesepulo ou te tulia ai temoni, o ai la ua tulia ai temoni e a outou fanau?” I se isi faaupuga, o la latou tuuaiga i a Iesu, e ao ona matuā faatatauina foi i a te i latou e pei ona faatatau i a te ia. Ona lapatai atu lea o Iesu: “Ae afai o le agaga o le Atua ou te tulia ai temoni, ua oo moni mai lava le malo o le Atua i a te outou.”
Ina ia faaalia e faapea, o lona tulia o temoni e faamaonia ai le malosi o lona mana i lo Satani, na fetalai atu ai Iesu e faapea: “E mafai faapefea e se tasi ona ulu atu i le fale o se tagata malosi, ma vete ana mea? seʻi vaganā ua ia muai fusifusia le tagata malosi ona vete ai lea o lona fale. O sē lē ʻau i a te aʻu, e tetee o ia i a te aʻu; o sē lē faaputu faatasi ma aʻu, e faataapeapeina lea.” Sa manino lava le tetee o Faresaio i a Iesu, ae faaalia i latou lava o ni sui o Satani. Na latou faataapeapeina Isaraelu mai i a Iesu.
Mulimuli ane, sa lapataia e Iesu nei tagata tetee e pei o Satani e faapea, “o le upu leaga i le Agaga, e lē faamagaloina lea.” Fai mai lana faamatalaga: “Ai sē fai upu i le Atalii o le tagata, e faamagaloina lea; a o lē fai upu i le agaga paia, e lē faamagaloina lea i le olaga nei po o lē atalī.” Sa faia e na tusiupu ma Faresaio lena agasala e lē mafaamagaloina, e ala lea i lo latou matuā viia o Satani, i se mea na matuā manino lava o se gaoioiga faavavega a le agaga paia o le Atua. Mataio 12:22-32; Mareko 3:19-30; Luka 8:1-3; Ioane 7:5.
▪ Sa eseese faapefea le malaga faataamilo lona lua a Iesu ma lana uluai malaga?
▪ Aisea na taumafai ai aiga o Iesu e taofi i a te ia?
▪ Sa taumafai faapefea Faresaio e taʻuleagaina vavega a Iesu, ma na faapefea ona taʻuseseina i latou e Iesu?
▪ O le ā sa agasala ai na Faresaio, ma aisea?