Mataupu 84

Le Avega Tauave o le Avea ma Soʻo

I NA ua ia tuumuli ese mai le fale o le Faresaio sili, o lē atonu o se sui o le ʻau Saniterini, ona faaauau lea o le malaga a Iesu i Ierusalema. E toatele le motu o tagata sa mulimuli atu i a te ia. Peitai o ā o latou faanaunauga? O ā mea e aafia ai i le avea ma ona soʻo moni?

A o latou malaga atu, na faliu ane Iesu i le motu o tagata ma atonu na faateia i latou ina ua ia fetalai atu: “Afai e sau se tasi i a te aʻu, ae e lē inoino i lona tamā, ma lona tinā, ma lana avā, ma le fanau, ma uso, ma tuafafine e oo lava i lona ola, e lē mafai ona fai o ia moʻu soʻo.”

O le ā le uiga o le fetalaiga a Iesu? Sa leʻi fetalai atu Iesu i inā e faapea, e ao ona inoino moni ona soʻo i o latou tauaiga. Na i lo lea, e tatau ona latou inoino i a i latou i se uiga e faapea, ia itiiti lo latou alofa i o latou tauaiga na i lo o Iesu. Fai mai le tala e uiga i le augatamā o Iesu o Iakopo, sa “inoino” o ia i a Lea ae alofa i a Rasela, o lona uiga sa itiiti lona alofa i a Lea na i lo o lona uso o Rasela.

Ia manatua foi, na fetalai atu Iesu, e tatau i se soʻo ona inoino i a te ia lava,’ po o lona ola. O le mea lava e tasi, sa faauiga i ai e Iesu, e tatau i se soʻo moni ona alofa atu i a te Ia, ia sili i lona alofa mo lona lava ola. Sa faamamafa ai i inā e Iesu, o le avea ma ona soʻo, o se avega tauave tāua. E lē o se mea e tau ina fai e aunoa ma se iloiloga ma le faaeteete.

E aofia ai faigata ma sauāga i le avea ma soʻo o Iesu, e pei ona ia faaalia atili e faapea: “O sē lē ave lona satauro, ma ua lē mulimuli mai i a te aʻu, e lē mafai ona fai o ia moʻu soʻo.” O lea, e tatau ai i se soʻo moni ona lotomalie e talia avega faigata o le faalumaina ia sa onosaia e Iesu, e aofia ai foi le fasiotia e fili o le Atua, pe afai e tatau ai, lea sa toe o se aga ona oo lea i a Iesu.

O le avea la ma soʻo o Keriso, o se mea sa manaomia ona filifilia ma le faaeteete e le motu o tagata lea sa mulimuli atu i a te ia. Sa faamamafa e Iesu lena mea moni e ala i se tala faatusa. “Mo se faaaoaoga,” na ia fetalai atu, “o ai foi so outou ua fia faia se ʻolo, e lē muai nofo ea i lalo ma faitau tupe e totogi ai, po ua lava ana mea e faauma ai? Auā afai na te tuu le faavae ae lē mafai ona faauma ai, atonu o le a ula ane i a te ia tagata uma o loo matamata ane e faapea, ‘O le tagata lenei, na amata ona fau le ʻolo, ae leʻi mafai ona faauma.”

O i inā na faataitai atu ai e Iesu i le motu o tagata o ē na mulimuli ane i a te ia e faapea, a o leʻi avea i latou ma ona soʻo, e tatau ona latou filifili ma le maumauai pe mafai ona latou faataunuuina mea e aafia ai, e pei foi o se tagata e manao e fau se ʻolo, e manaomia ona ia faamautinoa muamua ua lava mea e faauma ai a o leʻi fausia. Sa faaauau ona fetalai atu Iesu, e ala i le taʻuina atu o se isi tala faatusa e faapea:

“O ai le tupu o le a alu atu e tau ma le tasi tupu, e lē muai nofo ea i lalo e filifili pe mafai i a te ia ma ona tagata e sefuluafe ona tau ma lē ua sau e tau ma ia, ua iai tagata e luasefuluafe? Pe afai e leai, e tuu atu e ia le sāvali, manū o mamao o ia, e faatoga atu mo le filemu.”

Ona faamatilatila atu lea e Iesu o le manatu tāua o ana tala faatusa e faapea: “O lea, e faapea foi so outou e lē lafoai ana mea uma, e lē mafai ona fai o ia moʻu soʻo.” O le mea lena sa tatau ona faia e le motu o tagata na mulimuli atu i a te ia, atoa ma i latou uma lava e iloaina Keriso. E tatau ona latou nofo sauni e faataulagaina mea uma latou te maua—o a latou mea totino uma, e aofia ai ma o latou lava ola—pe afai e fia avea i latou ma ona soʻo. Pe e te lotomalie ea e faia lenei mea?

Sa faaauau ona fetalai atu Iesu: “O le mea lelei le masima.” I lana Lauga i luga o le Mauga, na ia fetalai ai e faapea, o ona soʻo o le “masima o le lalolagi,” o lona uiga sa i a i latou se taaʻiga mo le faasaoina o tagata, e pei lava ona iai i le masima faaletino. Ona fetalai faaiu atu lea o Iesu e faapea: “Peitai afai e magalo le masima, pe se ā se mea e faamāi aʻi? E lē aogā ia i le fanua, e lē aogā foi e fai ma faalelei eleele. Ae lafoina e tagata i fafo. O lē ua iai taliga e faalogo ai, inā faalogo mai ia o ia.”

Na faaalia ai e Iesu, e oo foi i a i latou ua fai si umi o avea ma ona soʻo, e lē tatau ona faavaivai i lo latou maumauai e faaauau pea. Auā afai latou te faavaivai, o le a lē aogā la i latou, o le a avea ai ma autū o tauemuga a lenei lalolagi ma ua lē tonu i latou i le silafaga a le Atua, o le mea moni, o se faalumaina lena i le Atua. O lea, o le a lafoina ai i latou i fafo ia faaumatia, e pei o le masima ua magalo, ma lē aogā. Luka 14:25-35; Kenese 29:30-33; Mataio 5:13.

▪ O le ā le uiga o le “inoino” o se tasi i ona tauaiga, ma ia lava foi?

▪ O ā tala faatusa e lua na taʻu atu e Iesu, ma o ā o la uiga?

▪ O le ā le manatu tāua o faamatalaga faaiu a Iesu e uiga i le masima?