Mataupu 44

Le Faafilemuina o se Afā Matautia

SA TUMU le aso o Iesu i galuega, e aofia ai le aʻoaʻo atu i le motu o tagata sa i le matafaga, ma le faamatalaina o faataoto i ona soʻo i se taimi mulimuli ane, ina ua na o i latou. Ina ua oo i le afiafi, ona ia fetalai atu lea: “Inā tatou ō atu ia i le tasi itu.”

I le itu i sasae o le matafaga o le Sami o Kalilaia sa iai le nuu e taʻu o Tekapoli, e sau mai le upu Eleni o le deʹka, o lona uiga e “sefulu,” ma le poʹlis, o lona uiga o le “aai.” O aai o Tekapoli o le ogatotonu lea o aganuu faa-Eleni, e ui ina e lē taumatea sa nonofo ai foi le toatele o tagata Iutaia. Peitai, sa itiiti lava se galuega a Iesu na faia i na aai. E oo foi i lenei asiasiga, e pei ona o le a tatou iloa mulimuli, sa leʻi mafai e ia ona nofo umi ai.

Ina ua talosaga atu Iesu ina ia latou ō i le isi matafaga, sa ave loa o ia e le au soʻo i le vaa. Peitai, sa leʻi lilo lo latou ō ese atu. E leʻi pine ae faaee foi ma vaa o isi tagata latou te ō faatasi. E lē mamao tele i le isi itu. O le mea moni, o le Sami o Kalilaia ua na o se vaituloto tele e tusa ma le 13 maila [po o le 21 kilomita] le umi, ae 7 ma le afa maila [po o le 11 kilomita] lona lautele.

E mautinoa sa matuā vāivāi lava Iesu. O lea, e leʻi leva ona latou ō ese, ae taoto loa o ia i le taumuli o le vaa, ua aluga lona ao i se aluga, ma moe gase ai loa. O nisi o le au aposetolo o ni tautai agavaa, ona ua fagogota soo i le Sami o Kalilaia. O lea sa latou tautaiina ai le folauga.

Ae sa lē o se malaga faigofie lenei. Ona o le vevela o le fogatai lea e tusa ma le 700 futu [po o le 210 mita] le maulalo, faatasi ma savili malūlū mai atu mauga sa latalata ane, ma i nisi taimi e agi ifo ai matagi malolosi, ma faapogaia ai ni afā malolosi faafuaseʻi i le vai. O le mea la lena sa tupu. E leʻi pine lava ae fafati ane loa galu tetele ua taia ai le tino o le vaa ma ua lofia ai, ua tāli goto. Peitai, sa tofa pea Iesu!

Na taumafai ma le gatete tautai agavaa e uli le vaa. E mautinoa sa mafai ona latou sao mai i ni afā muamua. Ae i le taimi lea, ua matuā uma lava a latou taumafaiga. Ona o le popole i o latou ola, na latou fafaguina ai Iesu. Ua latou faapea atu: ‘Le Alii e, e te lē manatu mai ea i a te i matou? O le a fano i matou! Laveai mai i a te i matou o le a matou malelemo!’

Ona tulai lea o Iesu, ua vavao atu i le matagi ma le sami e faapea: ‘Soia! Inā toafilemu ia.’ Ona pē ai lea o le matagi tele, ma ua malū foi le sami. Ua liliu atu o ia i ona soʻo, ma fesili atu i ai: ‘Se ā le mea tou te fefefe ai? Pe tou te leʻi faatuatua lava ea?’

O lea, na matuā matatau tele ai le au soʻo. Ua latou tuufesili foi le tasi i le isi, ‘Po o ai lava lenei tagata? Auā ua faalogo lava le matagi ma le vai i a te ia, ina ua ia vaoia.’

Maeu se mana na faaalia e Iesu! Maeu se faamautinoaga i le iloa, o loo iai i lo tatou Tupu le mana e pulea ai mea faalenatura, ma pe a ia liuliualo atoatoa mai i lo tatou lalolagi i le taimi o lana pulega o le Malo, o le a saogalemu uma ai tagata mai mala matautia faalenatura!

Mulimuli ane, ina ua toafilemu le matagi, sa taunuu manuia atu Iesu ma ona soʻo i le matafaga i le itu i sasae. E lē taumatea sa sao foi isi vaa mai le malosi o le afā, ma toe foi saogalemu atu ai i o latou aiga. Mareko 4:35–5:1; Mataio 8:18, 23-27; Luka 8:22-26.

▪ O le ā Tekapoli, ma o fea sa tu ai?

▪ O ā vala faaletino na faapogaia ai afā matautia i le Sami Kalilaia?

▪ O le a na faia e le au soʻo ina ua lē mafai e o latou tomai i folauga ona faasaoina i latou?