Mataupu 111

Le Faailoga o Aso e Gata Ai

O LE taimi lea, o le afiafi o le aso Lua. A o nofo Iesu i le Mauga o Olive, sa silasila atu i le malumalu o i lalo, ua ō atu loa i a te ia Peteru, Aneterea, Iakopo, ma Ioane ua na o i latou. Sa latou popole e uiga i le malumalu, talu ai na seʻi faatoʻā valoia lava e Iesu faapea o le a lē toe iai se maa i luga o le tasi maa i le malumalu.

Peitai e foliga mai sa iai nisi mea e sili atu i o latou mafaufau a o latou faalatalata atu i a Iesu. I ni nai vaiaso muamua atu, sa fetalai atu ai o ia e uiga i lona “faatasi mai,” i le taimi e “faaalia mai ai le Atalii o le tagata.” Ma i se taimi muamua atu, na ia taʻu atu ai i a te i latou e uiga i le “gataaga o le lalolagi.” O lea na matuā fia iloa ai lava e le au aposetolo.

Na latou fai atu: “Ia e fetalai mai i a te i matou, pe oo afea ia mea [e iu ai i le faaumatiaina o Ierusalema ma lona malumalu]? pe se a foi le faailoga o lou maliu [faatasi] mai, ma le gataaga o le lalolagi?” O le mea moni, e tolu ni vaega o la latou fesili. Muamua, sa latou mananao e fia iloa le iuga o Ierusalema ma lona malumalu, ma e faatatau i le faatasi mai o Iesu i le mana o le Malo, ma le mea mulimuli, e uiga i le iuga o le faiga aoao o mea.

I lana tali umi, na tali atu ai Iesu i vaega uma e tolu o le fesili. Na ia faailoa atu se faailoga e mataulia ai le iuga o le faiga o mea faa-Iutaia; ae sa tele mea na ia faailoa atu. Na ia tuuina atu foi se faailoga e lapataia ai ona soʻo i le lumanai, ina ia mafai ai ona latou iloa, ua latou ola i le taimi o lona faatasi mai ma ua latalata i le iuga o le faiga aoao o mea.

A o faagasolo tausaga, na matauina ai e le au aposetolo le faataunuuga o le valoaga a Iesu. Ioe, o mea tonu lava ia na ia valoia sa amata ona tutupu i o latou aso. O lea, o Kerisiano o ē na soifua i le 37 tausaga mulimuli ane i le 70 T.A., sa leʻi puʻea faamanu i ofaga e le faaumatiaga o le faiga o mea faa-Iutaia ma lona malumalu.

Peitai ane, sa leʻi faataunuuina ai i le 70 T.A. le faatasi mai o Keriso ma le vaitaimi faaiuiu o le faiga o mea. O lona faatasi mai i le mana o le Malo e tupu i se taimi matuā mamao lava mulimuli ane ai. Ae o afea? O le iloiloina o le valoaga a Iesu ua faaalia ai lenei mea.

Na valoia e Iesu faapea o le a iai “taua ma tala o taua.” Na ia taʻua: “E sii le taua e le tasi nuu i le tasi nuu,” o le a iai foi oge, mafuie, ma faamaʻi. O le a inosia ona soʻo ma fasiotia. O le a tutū mai perofeta pepelo ma taʻitaʻi sese e toatele. O le a tupu tele le amio leaga, ma o le a maalili le alofa o le toatele. I le taimi lava e tasi, o le a talaʻiina ai foi le tala lelei o le Malo o le Atua i le atu laulau uma e fai ma molimau i nuu uma.

E ui lava sa iai sina faataunuuga lē atoatoa o le valoaga a Iesu a o leʻi oo i le faaumatiaga o Ierusalema i le 70 T.A., ae o le faataunuuga sili o lena valoaga e faia i le taimi o lona faatasi mai ma le vaitaimi faaiuiu o le faiga o mea. O se autaluga ma le faaeteete o mea tutupu i le lalolagi talu mai le 1914 e faaalia ai faapea, ua faagasolo nei le faataunuuga sili o le valoaga na taʻua e Iesu talu mai lena tausaga.

O se isi vaega o le faailoga na tuuina mai e Iesu, o le aliaʻi mai lea o le “mea e inosia e faatafunaina aʻi.” I le 66 T.A., na aliai mai ai lenei mea inosia o ni “ʻau o le taua” a Roma lea na siomiaina Ierusalema ma faaleagaina ai pa o le malumalu. Na tū “le mea e inosia” i le tulaga sa lē tatau ona tū ai.

I le faataunuuga sili o le faailoga, o le mea inosia, o Malo Sosoo ma lona sui, Malo Aufaatasi. O lenei faalapotopotoga o le filemu i le lalolagi ua manatu i ai Kerisinetoma o se sui o le Malo o le Atua. Pagā le inosia! O le mea lea, i le gasologa o taimi, o le a auaufaatasi ai malo faapolotiki ma Malo Aufaatasi e liliu atu i a Kerisinetoma (le Ierusalema faafaatusa) ma o le a faaumatia o ia.

O lea na valoia ai e Iesu faapea: “Auā o ia ona po e oo ai le puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli.” O le faaumatiaga o Ierusalema i le 70 T.A. o se matuā puapuaga tele, auā sa sili atu i le miliona tagata na lipotia mai na fasiotia ai. O le faataunuuga sili o lenei vaega o le valoaga a Iesu o le a sili atu lona telē.

Mautinoa i Aso e Gata Ai

A o latalata atu le Aso Lua, Nisani 11 i lona iʻuga, ae sa talanoaina pea e Iesu ma ona aposetolo le faailoga o lona faatasi mai i le mana o le Malo ma le iuga o le faiga o mea. Na ia lapatai atu i a i latou e uiga i le mulimuli atu i Keriso pepelo. Sa ia faapea atu, o le a faia ni taumafaiga, “ina ia faasese ai i ē ua filifilia lava, pe afai e mafai ai.” Ae, i le pei o aeto vaai mamao, o le a faapotopoto atu ai nei tagata filifilia i le mea e maua i ai meaʻai faaleagaga, o lona uiga, e faatasi ma le Keriso moni i lona faatasi mai lē vaaia. O le a lē faaseseina ai i latou ma faapotopoto faatasi atu i se Keriso pepelo.

E na o le faaali vaaia mai e mafai ona faia e Keriso pepelo. I le tuufaafeagai, o le faatasi mai o Iesu, o le a lē vaaia. Na fetalai Iesu e sosoo atu ma le amataga o le puapuaga tele: “O le a faapogisaina le la, e lē susulu mai foi le masina.” Ioe, o le a avea lenei ma vaitaimi e sili ona pogisa talu ona iai le tagata. O le a pei ua faapogisaina le la i le taimi o le ao, ma ua pei ua lē susulu le masina i le po.

Na fai atu atili Iesu: “E luluina foi ʻau a le lagi.” I lea, na ia faaalia ai faapea o le a iai se vaaiga mataʻutia i le lagi faitino. O le mataʻu ma le sauā o le a sili mamao atu i so o se mea sa faapea ona tupu i talafaasolopito muamua o tagata.

O le iʻuga, na fetalai atu Iesu, o le a iai le “atuatuvale o nuu i le fememeai; e ū foi le sami ma le sousou; e matapogia foi tagata i le matataʻu ma le faatalitali i mea e oo mai i le lalolagi.” E moni, a o latalata ina uma lena vaitaimi aupito sili ona pogisa talu ona iai le tagata, “ona iloa ai lea i le lagi o le faailoga o le Atalii o le tagata; ona taufaitagituʻi ai lea o ituaiga uma o le lalolagi.”

Ae e lē o tagata uma o le a tagituʻi ‘pe a afio mai le Atalii o le tagata ma le mana’ e faaumatia ai lenei faiga leaga o mea. O “ē ua filifilia,” le 144,000 o ē e aufaatasi ma Iesu i lona Malo faalelagi, o le a lē tagituʻi, e lē faapena foi a latou aumea, o ē na muai taʻua e Iesu o “isi mamoe” o ana mamoe. E ui lava i le vaitaimi aupito sili ona pogisa i talafaasolopito o le tagata, ae na tali atu i latou nei i le faalaeiauga a Iesu: “A afua ona faia o ia mea, ia tepa aʻe outou, ma ia ea i luga o outou ulu; auā e latalata ina faaolaina outou.”

Ina ia mafai e ona soʻo o ē o le a ola i aso e gata ai ona iloa le latalata tele mai o le iuga, na avatu ai e Iesu lenei faataitaiga: “Inā vaai ia i le mati atoa ma laau uma; pe a faatoʻā matala mai lau, ua outou vaai, ona outou iloa ai lea ua latalata le tausaga vevela. Ia faapea foi outou, pe a iloa e outou ia mea ua faia, ia outou iloa ua latalata le malo o le Atua. E moni, ou te fai atu i a te outou, E le mavae atu lenei tupulaga, seia taunuu mea uma.”

O lea, pe a vaaia e ona soʻo le faataunuuina o vala eseese e tele o le faailoga, e tatau ona latou iloa ua latalata le iuga o le faiga o mea, ma e lē toe mamao se taimi ona soloiesea lea e le Malo o le Atua amioga leaga uma. O le mea moni, e oo mai le iuga i le vaitaimi o soifua ai pea tagata o ē e vaai i le faataunuuga o mea uma lava na valoia e Iesu! I le apoapoaia o na soʻo o ē ola i le vaitaimi iloga o aso e gata ai, na faapea atu Iesu:

“Ia outou, neʻi faamamafaina o outou loto, ma le faaniniva, ma le onā, ma le popole i mea a le olaga nei, neʻi faafuaseʻi mai lea aso i a te outou. Auā e pei o se mailei ona oo mai ai i ē nonofo uma lava i le fogāeleele uma. O lea ia outou mataala ai ma tatalo e lē aunoa, ina ia taʻuaogaina outou e sao mai ia mea uma ua tāli oo mai, ma ia tutū i luma o le Atalii o le tagata.”

O Taupou Popoto ma Taupou Vālea

Sa taliina e Iesu le augani ane a ona aposetolo mo se faailoga o lona faatasi mai i le mana o le Malo. A o lea ua ia saunia atili ni vaega o le faailoga i ni faataoto po o ni tala faatusa se tolu.

E tatau ona mātauina le faataunuuga o tala faatusa taitasi e i latou o ē ola i le taimi o lona faatasi mai. Na ia faailoa atu le faailoga muamua i upu nei: “O ia ona po e tusa ai le malo o le lagi ma taupou e toasefulu, o ē na ave a latou lamepa, ma latou ō atu e faafetaiai i le faatoafaiavā. Ua popoto le toalima o i latou, a e vālea le toalima.”

Sa leʻi uiga lenei faaupuga a Iesu “e tusa le malo o le lagi ma taupou e toasefulu,” e faapea ai o le ʻafa o i latou e ō atu i le Malo faalelagi o ni tagata vālea a o le isi ʻafa e popoto! E leai, ae o le uiga o lana fetalaiga e faatatau i le Malo o le lagi, sa iai se vala e pei o na mea, po o mea e faatatau i le Malo o le a pei o na mea.

O taupou e toasefulu sa faaatagia ai Kerisiano uma o ē e mo le malo o le lagi po o le faapea mai foi o latou o le a maua le Malo faalelagi. O le Penetekoso o le 33 T.A. na folafolaina ai faapea o le a faia ai se faaipoipoga a le faapotopotoga Kerisiano ma le Faatoafaiavā faamamaluina ua toe faatūina, o Iesu Keriso. Ae e tatau ona faia le faaipoipoga i le lagi i se taimi e lē o patino i le lumanai.

I le tala faatusa, na ō atu ai taupou e toasefulu ma le fuafuaga e faafeiloaia le faatoafaiavā ma auai i le solo o le faaipoipoga. Pe a taunuu mai o ia, o le a latou faamalamalamaina le auala o le solo i a latou lamepa, i lea e faamamaluina ai o ia a o ia aumaia lana faatoanofotane i le fale ua uma ona saunia mo ia. Ae peitai, na faamatala e Iesu: “O ē vālea ua ave a latou lamepa, ae leʻi avea ma ni suāuu. A o ē popoto ua ave ni suāuu i a latou fagu faatasi ma a latou lamepa. A o tuai mai le faatoafaiavā, ona taufaitulemomoe ai lea o i latou uma, ua momoe lava.”

O le faaumiumi o le tuai mai o le faatoafaiavā na faaalia ai faapea i lea taimi sa mamao i le lumanai le faatasi mai o Keriso e avea o se Tupu e pule. Na ia faatoā afio mai i lona nofoalii i le tausaga e 1914. I le po umi a o leʻi afio mai o ia, sa momoe uma ai taupou. Ae sa leʻi taʻusalaina i latou i lena mea. Na taʻusalaina taupou vālea ona sa leʻi aumaia ni suāuu mo a latou lamepa. Na faamatala e Iesu le feala aʻe o taupou a o leʻi afio mai le faatoafaiavā: “A ua oo i le tulua o po, ona sau ai lea o le alaga, ‘Faauta, ua sau le faatoafaiavā; inā ō ia outou e faafetaiai i a te ia.’ Ona tutū ai lea o ia taupou uma lava, ma teuteu a latou lamepa. Ona fai atu ai lea o ē vālea i ē popoto, ‘Aumai ni a outou suāuu mā matou; auā o le a mamate a matou lamepa.’ A ua tali mai o ē popoto, ua faapea mai, ‘Neʻi lē lava i a i matou ma outou; ae lelei ona outou ō i ē faatau ma faatau mai ai ni a outou.’”

O le suāuu, ua faaatagia ai mea o loo tausia ai le pupula o Kerisiano moni e avea o mea e faamalamalama ai. O lona uiga, o le Afioga faagaeeina lea a le Atua, o loo taofi mau i ai Kerisiano, faatasi ma le agaga paia, o loo fesoasoani i a i latou ina ia malamalama i lena Afioga. O le suāuu faaleagaga lea sa mafai ai e taupou popoto ona faasusulu atu le malamalama i le faafeiloaia o le faatoafaiavā i le taimi o le solo i le tausamaaga o le faaipoipoga. Ae o le vasega o taupou vālea sa lē iai i a i latou lea suāuu i a latou lamepa, le suāuu faaleagaga o loo manaomia. O lea, na faamatalaina e Iesu le mea na tupu:

“A o ō atu [taupou vālea] e faatau [ni a latou suāuu], ona sau ai lea o le faatoafaiavā; o [taupou] ua saunia foi ua latou ulufale atu faatasi ma ia i le tausamaaga, ona pupuni ai lea o le faitotoa. E mulimuli ane, ona ō mai ai lea o isi taupou, ua faapea mai, ‘Le Alii e, le alii e, ia e tatala mai le puipui mo i matou.’ A ua tali atu o ia, ua faapea atu, ‘E moni, ou te fai atu i a te outou, ou te lē iloa outou.’”

Ina ua afio Keriso i lona Malo faalelagi, ona ala mai loa lea o le vasega o taupou popoto o Kerisiano moni faauuina i lo latou faaeaga o le faasusulu atu o le malamalama i lenei lalolagi pogisa, e viia ai le toe foi mai o le Faatoafaiavā. Ae o i latou na faaatagia e taupou vālea sa leʻi sauniuni e avatu lenei viiga o le talileleia. O lea ina ua oo mai le taimi, sa leʻi tatalaina atu e Keriso le faitotoa o le tausamaaga o le faaipoipoga i le lagi i a i latou. Na ia tuua i latou i fafo i le pogisa e sili ona pouliuli o le po i le lalolagi, ina ia faaumatia faatasi ma i latou uma o ē fai amio leaga. Na faaiu faapea e Iesu, “O lea, ia outou mataala ai, auā tou te lē iloa le aso po o le itu aso e sau ai le Atalii o le tagata.”

Le Tala Faatusa i Taleni

Sa faaauau e Iesu le talanoaga ma ona aposetolo i le Mauga o Olive e ala i lona taʻu atu i a te i latou o se isi tala faatusa, o lona lua lea i le faasologa o tala faatusa e tolu. I ni nai aso muamua atu, a o iai o ia i Ieriko, na ia faamatala atu ai le tala faatusa e uiga i mina, e faaalia ai faapea o le Malo sa mamao lava i le lumanai. O le tala faatusa la lea na ia faamatala atu, e ui ina sa iai nisi o vala e tali tutusa, ae sa faamatalaina ai i lona faataunuuga gaoioiga i le taimi o le faatasi mai o Keriso i le mana o le Malo. Na faaalia ai faapea sa tatau i ona soʻo ona galulue a o iai pea i luga o le lalolagi ina ia faateleina “ana mea.”

Na amata faapea e Iesu: “E faapei [o lona uiga, o tulaga e fesootai atu ma le Malo] o le tagata foi na alu malaga, ua valaau i ana auauna, ona tuuina atu ai lea e ia o ana mea i a te i latou.” O Iesu o le tagata o lē, a o leʻi malaga i le mea mamao i le lagi, na ia tuuina atu ana mea i ana auauna—o soʻo e faamoemoe e auai i le Malo faalelagi. O nei mea e lē o ni mea faitino, ae e faaataina ai le fanua sa totōina, lea na ia atiina aʻe ai se tulaga mo le aumaia o nisi soʻo.

Na tuu atu e Iesu ana mea i ana auauna mo sina taimi puupuu a o toetoe lava afio aʻe o ia i le lagi. E faapefea? E ala i le faatonuina o i latou ina ia galulue pea i le atiina aʻe o le fanua e ala i le talaʻia o le feau o le Malo i tuluʻiga aupito mamao o le lalolagi. E pei ona fetalai Iesu: “Ua avatu e ia taleni e lima i le tasi, ae lua a le tasi, ae tasi i le tasi; ua faatatau i le mea ua mafai e le tagata; ona alu loa lea o ia i lana malaga.”

O taleni e valu—o mea a Keriso—sa tufatufaina atu e tusa ma tomai, po o mea faaleagaga e mafaia e ia auauna. Sa faaataina i auauna vasega o soʻo. I le uluai senituri, o le vasega na mauaina taleni e lima, e manino lava na aofia ai le au aposetolo. Sa faaauau le faamatalaga a Iesu e faapea, o auauna o ē na maua taleni e lima ma taleni e lua sa faaluaina mea na latou maua e ala i la latou talaʻiga o le Malo ma le faia o soʻo. Ae peitai, o le auauna o lē na maua le taleni e tasi, na ia natia i le eleele.

Na fai atu atili Iesu: “Ua mavae se taimi umi, ona sau ai lea o le alii o ia auauna, ua faamasino i ana mea ua i a te i latou.” Sa leʻi faia lea mea seia oo i lona 20 senituri, pe ā ma le 1,900 tausaga ua mavae, ina ua toe afio mai ai Keriso ina ia faamasinoina mea, o lea, e moni lava, “ua mavae se taimi umi.” Ma na faamatala e Iesu:

“Ona sau ai lea o lē ua iai taleni e lima, ua aumai isi taleni e lima, ua faapea mai, ‘Le alii e, na e tuuina mai i a te aʻu taleni e lima; faauta, ua ou maua ai isi taleni e lima.’ Ona fai atu ai lea o lona alii i a te ia, ‘Ua lelei ia, le auauna lelei e, ma le faamaoni, ua e faamaoni i nai mea itiiti, ou te tofia oe e pule i mea e tele; inā ulufale mai ia i le fiafia o lou alii.’” Sa faapena foi i le auauna na mauaina taleni e lua ona faaluaina ana taleni, ma na ia maua le faamālō lava lea ma le taui e tasi.

E ui i lea, sa faapefea ona ulu atu nei auauna faamaoni i le olioli o lo la Alii? Ioe, o le olioli o lo la Alii, o Iesu Keriso o le mauaina lea o le Malo ina ua malaga atu o ia i lona Tamā i le lagi. E tusa ai ma auauna faamaoni i ona po nei, ua matuā olioli i latou i le tuuina atu i a i latou o nisi avega tauave o le Malo, ma a o faaiuina la latou auaunaga faalelalolagi, o le a latou maua le iuga olioli, o le toe faatutūina i le Malo faalelagi. Ae faapefea le auauna lona tolu?

Na faitio atu lenei auauna: “Le alii e, na ou iloa o oe o le tagata faigata, Ona ou fefe ai lea, ua ou alu ma ou nā lau taleni i le eleele; faauta, o lau mea lea.” Sa matuā mautinoa lava le musu o le auauna e galue i le atiina aʻe o le laueleele e ala i le talaʻiga ma le faia o soʻo. O lea sa taʻua ai o ia e le matai o “le auauna leaga e, ma le paie” ma faailoa atu i ai lona faamasinoga: “Ia outou fao le taleni nai i a te ia . . . Ia outou tulia foi le auauna lē aogā i le pouliuli i fafo, e iai le taufaitagiaue ma le lilivau o nifo.” O i latou o lenei vasega o le auauna leaga na lafoina i fafo, ua faoa mai i a i latou so o se olioli faaleagaga.

Ua faataatia e lenei mea se lesona aogā mo i latou uma lava o ē ua faapea mai o soʻo o Keriso. Afai latou te mananao e olioli i lana faamālō ma le taui, ma alofia ai le lafoina i le pogisa i fafo ma le matuā faaumatia, e tatau la ona latou galulue mo le faateleina o mea a lo latou Matai faalelagi e ala i le auai atoatoa i le galuega talaʻi. Pe o e filigā e tusa ai ma lenei mea?

Pe a Afio Keriso i le Mana o le Malo

Sa iai pea Iesu ma ona aposetolo i le Mauga o Olive. I le tali atu i la latou fesili mo se faailoga o lona faatasi mai ma le vaitaimi faaiuiu o le faiga o mea, sa ia taʻu atu ai i a i latou le tala mulimuli i le faasologa o tala faatusa e tolu. Na amata e Iesu: “Pe a sau le Atalii o le tagata i lona mamalu, ma le au agelu paia uma faatasi ma ia, ona tietie ai lea o ia i lona nofoālii mamalu.”

E lē mafai e tagata ona vaaia agelu i lo latou mamalu faalelagi. O lea o le faatasi mai o le Atalii o le tagata, o Iesu Keriso, atoa ma agelu, e tatau ona lē vaaia e mata faaletagata. Na tupu lea faatasi mai i le tausaga e 1914. Ae mo le ā le fuafuaga? Na faamatala e Iesu: “E faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe ma ʻoti; ona tuu ai lea e ia o mamoe i lona itu taumatau, a o ʻoti i lona itu tauagavale.”

I le faamatalaina o le mea o le a tupu i a i latou ua tuuese atu i le itu o le finagalo malie, na fetalai Iesu: “Ona fai atu ai lea o le Tupu i ē o i lona itu taumatau, ‘Ō mai ia, o outou ua faamanuiaina e loʻu Tamā, ia fai mo outou tofi le malo ua saunia mo outou a o leʻi faavaeina le lalolagi.’” O mamoe na taʻua i lana tala faatusa, o le a lē pule faatasi ma Keriso i le lagi ae o le a fai ma o latou tofi le Malo i le avea o i latou ma ona tagatanuu i le lalolagi. O le ‘faavaeina o le lalolagi’ na tupu lea ina ua muai fanauina e Atamu ma Eva ni a la fanau o ē sa mafai ona maua aogā mai le sauniuniga a le Atua mo le togiolaina o le fanau a tagata.

Ae aisea ua tuuese atu ai mamoe i le itu taumatau o le finagalo malie o le Tupu? Na tali atu le tupu: “Auā na ou fia ʻai, ona outou avane ai lea ni mea ou te ʻai ai; na ou fia inu, ona outou avane ai lea ni vai ou te inu ai; sa fai aʻu ma tagata ese, ona outou talia lea o aʻu; na ou lē lavalavā, ona outou faaofuina lea o aʻu; na ou maʻi, ona outou asiasia mai lea o aʻu; na ou i le falepuipui, ona outou ō ane ai lea i a te aʻu.”

Talu ai ona o loo iai mamoe i luga o le lalolagi, ua latou mananao ai ina ia iloa pe na faapefea ona latou faia o ia galuega lelei mo lo latou Tupu faalelagi. O lea na latou fesili atu ai, “Le Alii e, o anafea na matou iloa ai oe ua fia ʻai, po o fia inu, ma matou avane e te inu ai? O anafea foi na matou iloa ai oe o le tagata ese, ma matou talia oe? Po o lē lavalavā, ma matou faaofuina oe? O anafea foi na matou iloa ai oe ua maʻi, po o i le falepuipui, ma matou ō atu ai i a te oe?”

Na tali atu le tupu: “E moni, ou te fai atu i a te outou, auā na faia e outou i le tasi o ē aupito itiiti o oʻu uso nei, o aʻu lea na outou faia i ai.” O uso o Keriso, o i latou ia o ē o totoe o le 144,000 i luga o le lalolagi, o ē o le a pule faatasi ma ia i le lagi. Ma na fetalai atu Iesu, o le faia o mea lelei i a i latou, o lo latou faia lava lea o mea lelei i a te ia.

Ona sosoo ai lea ma le fetalai atu o le Tupu i ʻoti. “O outou ua faafanoina, ō ese atu ia i a te aʻu i le afi e faavavau, ua saunia mo le Tiapolo ma ana agelu. Auā na ou fia ʻai, ae tou te leʻi avane ni mea ou te ʻai ai; na ou fia inu, ae tou te leʻi avane ni vai ou te inu ai; sa fai aʻu ma tagata ese, ae leʻi talia aʻu e outou; na ou lē lavalavā, ae tou te leʻi faaofuina aʻu; na ou maʻi, na aʻu i le falepuipui foi, ae tou te leʻi asiasia aʻu.”

Ae peitai, na faitio atu ʻoti: “Le Alii e, o anafea na matou iloa ai oe ua fia ʻai, pe fia inu, po o se tagata ese, pe lē lavalavā, po o maʻi, po o i le falepuipui, ma matou leʻi auauna atu i a te oe?” Na maua e ʻoti se faamasinoga ogoogo i le pogai lava lea e tasi na maua ai le faamasinoga talileleia o mamoe. Na tali atu Iesu: “Auā na outou lē faia i le tasi o ē aupito itiiti o i latou nei [o oʻu uso], o aʻu lea ua outou lē faia i ai.”

O lea o le faatasi mai o Keriso i le mana o le Malo, a o toeitiiti oo atu i le iuga o lenei faiga leaga o mea i le puapuaga tele, o le a avea o se taimi o le faamasinoga. O ʻoti o le a “ō atu . . . i le sala e faavavau; a o ē amiotonu [o mamoe] e ō atu i le ola e faavavau.” Mataio 24:2–25:46; 13:40, 49; Mareko 13:3-37; Luka 21:7-36; 19:43, 44; 17:20-30; 2 Timoteo 3:1-5; Ioane 10:16; Faaaliga 14:1-3.

▪ Aisea na fesili ai le au aposetolo, ae atonu o le ā le isi mea na latou mafaufau i ai?

▪ O le ā le vaega o le valoaga a Iesu na faataunuuina i le 70 T.A., ae o le ā na leʻi faataunuuina ai i lea taimi?

▪ O anafea le uluai faataunuuga o le valoaga a Iesu, ae o afea e oo ai lona faataunuuga sili?

▪ O le ā le mea inosia i lona faataunuuga muamua ma le faataunuuga mulimuli?

▪ Aisea na lē avea ai le faaumatiaga o Ierusalema ma faataunuuga faaiu o le puapuaga tele?

▪ O ā tulaga i le lalolagi ua faailogaina ai le faatasi mai o Keriso?

▪ O afea o le a ‘taufaitagituʻi ai ituaiga uma o le lalolagi,’ ae o le ā o le a faia e soʻo o Keriso?

▪ O le ā le tala faatusa sa saunia e Iesu e fesoasoani ai i ona soʻo i le lumanai ia maua le tofā mamao pe a latalata mai le iuga?

▪ O le ā le apoapoaiga na saunia e Iesu mo i latou o ona soʻo o ē o le a soifua pea i le vaitaimi o aso e gata ai?

▪ O ai na faaatagia e taupou e sefulu?

▪ O anafea na faia ai le folafolaga o le faaipoipoga a le faapotopotoga Kerisiano ma le faatoafaiavā, ae o afea e taunuu ai le faatoafaiavā ina ia ave lana faatoanofotane i le tausamaaga o le faaipoipoga?

▪ O le ā sa faaatagia e le suāuu, ma o le ā sa mafai ona faia e taupou popoto ona sa iai a latou suāuu?

▪ O fea e faia ai le tausamaaga o le faaipoipoga?

▪ O le ā le taui sili sa lē maua e taupou vālea, ma o le ā lo latou iuga?

▪ O le ā le lesona ua aʻoaʻoina mai le tala faatusa i taleni?

▪ O ai auauna, ma o ā mea na tuuina atu i a i latou?

▪ O afea e sau ai le matai ina ia faamasinoina mea, ma o le ā na te maua?

▪ O le ā le olioli e ulu atu i ai auauna faamaoni, ma o le ā e tupu i le auauna lona tolu, lē na amio leaga?

▪ Aisea e tatau ai ona lē vaaia le faatasi mai o Keriso, ma o le ā le galuega na te faia i lea taimi?

▪ I le ā le uiga o le a avea ai le Malo ma tofi o mamoe?

▪ O anafea na amata ai le ‘faavaeina o le lalolagi’?

▪ O le ā le pogai ua faamasinoina ai tagata po o ni mamoe po o ni ʻoti?