Mataupu 118

Le Faalataina ma le Puʻea

UA MAVAE le tulua o po ma ao a o taʻitaʻiina atu e Iuta se vaega tele o fitafita, o ositaulaga sili, o Faresaio ma isi i le faatoaga i Ketesemane. Na ioe ositaulaga e totogi atu i a Iuta tupe siliva e 30 ina ia faalataina ai Iesu.

Muamua atu, ina ua alu ese Iuta mai le tausamiga o le Paseka, e foliga mai sa alu atu saʻo loa o ia i ositaulaga sili. Sa vave loa ona faapotopotoina atu a latou auauna, faapea ma se vaega o fitafita. Atonu sa muai taʻitaʻiina i latou e Iuta i le mea sa faamanatu ai e Iesu ma ona aposetolo le Paseka. Ina ua iloa ua latou ō ese, na mulimuli atu ai i a Iuta se motu o tagata e toatele sa tauaveina auupega ma sulu ma molī, i tuapa o Ierusalema ma ui atu i le Vanu o Ketarono.

A o taʻitaʻiina atu e Iuta le solo i le Mauga o Olive, na ia lagona ma le mautinoa na te iloa le mea e maua i ai Iesu. I le vaiaso ua mavae, a o femalagaai Iesu ma ona aposetolo i le va o Petania ma Ierusalema, sa masani lava ona latou malōlō i le faatoaga o Ketesemane ma talanoa ai. Ae i lea taimi, atonu sa lilo Iesu i le pogisa o le po i lalo ifo o le togāolive, o le a faapefea la ona iloa o ia e fitafita? Atonu latou te leʻi vaai muamua lava i a te ia. Ona saunia ai lea e Iuta se faailoga, i lona faapea atu: “O lē ou te sogi atu i ai, o ia lea; tou te pue i a te ia, ma taʻitaʻiina atu, ma taofimauina.”

Na taʻitaʻi e Iuta le motu o tagata i le faatoaga, ua iloa atu Iesu ma ona aposetolo, ona alu atu saʻo loa lea i a te ia. Na ia fai atu ma sogi lemū atu i a te ia: “Rapi e, si oʻu alofa.”

Na tetee atu Iesu: “Sole, se ā le mea ua e sau ai?” O lea, i le taliina o lana lava fesili, na ia fetalai atu ai: “Iuta e, e te faalataina ea le Atalii o le tagata ma le sogi?” Ae tuaia lē na faalataina o ia! Na savali atu Iesu i luma i le malamalama o sulu ma molī ma fesili atu: “O ai ea tou te saili na?”

Fai mai la latou tali: “O Iesu le Nasareta.”

Na tali atu Iesu a o ia tu atu ma le lototele i o latou luma: “O aʻu lenei.” I le matuā maofa i lona lototele ma le lē iloa o se mea e fai, na solomuli ai tagata ma ua paʻūū i le eleele.

Na fai atu ma le toʻafilemu Iesu: “Ua uma ona ou fai atu i a te outou, o aʻu lenei. O lenei, afai tou te saili mai i a te aʻu, tuu pea i a i latou nei, ia latou ō.” I sina taimi lava faatoʻā mavae atu i le potu i luga, na taʻu atu ai e Iesu i lona Tamā i le tatalo faapea sa ia tausia ona aposetolo faamaoni ma e leai foi se tasi o i latou na fano seʻi vaganā “le tagata o le malaia.” O lea, ina ia faataunuuina ana upu, na talosaga atu ai o ia ina ia tuu atu ona soʻo e ō.

Sa toe maumanatu fitafita, na tutū i luga, ma amata ona fusifusi i a Iesu, ona iloa atu lea e le au aposetolo le mea o le a tupu. Na latou fesili atu: “Le Alii e, pe matou te taia ea i le pelu?” A o leʻi tali atu Iesu, na seʻi e Peteru se tasi o pelu e lua a le au aposetolo na aumai, ma osofai ai Maliko, o le auauna a le ositaulaga sili. Na misi le ta a Peteru mai le ulu o le auauna ae motu ese ai lona taliga taumatau.

Na faasalavei atu Iesu: “Tuu mai ia, seia faia lenei mea.” I le paʻi atu i le taliga o Maliko, sa ia faamalōlō ai le manuʻa. Ona ia aʻoaʻo atu lea o se lesona tāua, i le faatonu atu i a Peteru: “Inā toe sulu ia o lau pelu i lona faamoega; auā o i latou uma o ē tago i le pelu, e oti i latou i le pelu. Fa te oe ea ou te lē mafaia ona aioi atu nei i loʻu Tamā, ona aauina mai ai lea e ia i a te aʻu o agelu e sili ona toatele i lekeona e sefulu ma le lua?”

Na lotomalie Iesu ina ia puʻea o ia, auā na ia faamatala atu: “Ona faapefea lea ona taunuu o Tusi, e tatau ona oo ia mea?” Ma sa ia faaopoopo atu: “Ou te lē inu ea i le ipu ua aumai i a te aʻu e loʻu Tamā?” Sa matuā malie atoatoa o ia i le finagalo o le Atua mo ia!

Ona fetalai atu lea o Iesu i le motu o tagata. Na ia fesili atu: “Ua outou ō mai ea ma pelu ma uatogi e pue mai ai i a te aʻu, peiseai o se fao mea? Sa tatou nonofo ma outou i le malumalu, ma ou aʻoaʻo atu ai i aso fai soo, ae tou te leʻi pueina ai aʻu. A ua oo ia mea ina ia taunuu ai Tusi a le au perofeta.”

Ona pue ai loa lea o Iesu e le au fitafita ma le taʻitaʻiʻau ma alii sili o Iutaia, ma fusifusi i a te ia. I le vaai atu i lenei mea, na lafoai ai loa e le au aposetolo Iesu ae sosola. Peitai, o se taulealea—e foliga mai o le soʻo o Mareko—na nofo ai pea faatasi ma le motu o tagata. Atonu sa iai o ia i le fale sa faamanatu ai e Iesu le Paseka ma mulimuli ane sa mulimuli atu i le motu o tagata mai i inā. Ae peitai, na iloa ane nei o ia, ma sa faia ai se taumafaiga ina ia puʻea o ia. Peitai sa tiaʻi lona ie lino na pulupulu ai ae sola ese atu ai i a te i latou. Mataio 26:47-56; Mareko 14:43-52; Luka 22:47-53; Ioane 17:12; 18:3-12.

▪ Aisea na mautinoa ai e Iuta faapea o le a ia maua Iesu i le faatoaga i Ketesemane?

▪ Sa faaalia faapefea e Iesu le manatu mamafa mo ona aposetolo?

▪ O le ā le gaoioiga na faia e Peteru e puipuia ai Iesu, ae o le ā na fetalai atu ai Iesu i a Peteru e uiga i lea mea?

▪ Na faaalia faapefea e Iesu, lona matuā malie atoatoa i le finagalo o le Atua mo ia?

▪ Ina ua lafoaia e le au aposetolo Iesu, o ai na nofo ai pea, ma o le ā na tupu i a te ia?