Le Faamoemoe o le Toetu
Mataupu 90
Le Faamoemoe o le Toetu
MULIMULI ane sa taunuu atu Iesu i tuaoi o Petania, o se nuu e tusa ma le lua maila le mamao ese mai Ierusalema. Faatoʻā mavae atu lava ni nai aso, talu le maliu ma le tanuga o Lasalo. Ma o loo faanoanoa pea ona tuafāfine o Maria ma Mareta, e toatele foi na ō ane i lo la aiga e faamafanafana i a i laua.
A o la fetagisi, na faailoa atu e se tasi i a Mareta e faapea o le la ua maliu mai Iesu. O lea, na ia faavave atu ai e faafeiloai i a te ia, e aunoa ma le taʻuina atu i lona uso. Ina ua alu atu i a Iesu, na toe fai atu ai e Mareta ni upu, atonu sa la faia soo ma lona uso i aso e fa ua mavae e faapea: “Ana e i inei, po ua lē oti loʻu tuagane.”
Peitai, na faaalia e Mareta le faamoemoe, i le faaataata atu faapea atonu o le a faia e Iesu se mea mo lona tuagane. Na ia faapea atu: “Ua ou iloa, o mea uma lava e te faatoga atu ai i le Atua, e foaiina mai e le Atua i a te oe.”
Ona folafola atu lea e Iesu: “O le a toetu lou tuagane.”
Sa malamalama Mareta o loo fetalai atu Iesu i le toetu faalelalolagi i le lumanai, lea foi sa faatalitali i ai Aperaamo ma isi auauna a le Atua. O le mea lea na ia tali ane ai: “Ua ou iloa o le a toetu mai o ia i le toetu i le aso gataaga.”
Peitai, na avatu e Iesu se faamoemoe mo le mapusaga i lena lava taimi, i lona tali atu: “O aʻu nei o le toetu ma le ola.” Na ia faamanatu atu foi i a Mareta, ua tuuina mai e le Atua i a te ia le pule i le oti e faapea: “O lē faatuatua mai i a te aʻu, e ui lava ina oti, ae toe ola mai; o tagata ola uma foi o ē faatuatua mai i a te aʻu, e lē taitai ona oo i ai le oti.”
Sa leʻi taʻuina atu e Iesu i a Mareta faapea o ē faamaoni sa ola i lena taimi, o le a lē taitai ona oti. E leai, ae o le manatu na ia faatū atu e faapea, o le faatuatua i a te ia e mafai ona iu ai i le ola e faavavau. O le a maua lena olaga e le toatele pe a toe faatutuina mai i latou i le aso gataaga. Ae o isi o ē faamaoni, o le a faasaoina atu i le iuga o lenei faiga o mea i le lalolagi, ma mo i latou nei, o le a taunuu moni ai afioga a Iesu i se itu faaletino. O le a lē taitai ona oti i latou! Ina ua uma atu lenei faamatalaga uigaese, ona fesili atu lea o Iesu i a Mareta, “E te talitonu ea i lenei mea?”
Na tali atu o ia: “Ioe, le Alii e, ou te talitonu o oe lava o le Keriso le Alo o le Atua, o Lē ua maliu mai i le lalolagi.”
Ona faanatinati atu lea o Mareta e valaau i lona uso, ua na o i laua e faapea: “Ua i inei le Aʻoaʻo ma o loo valaau o ia i a te oe.” O le taimi lava lena na tuua ai e Maria le fale. Ina ua iloa atu e isi ua alu o ia, ona latou mulimuli atu lea i a te ia, i le manatu o loo alu atu o ia i le tuugamau.
Ina ua oo atu i a Iesu, sa tootuli atu loa Maria i ona aao ma tagi. Ua ia faapea atu: “Le Alii e, ana e i inei, po ua lē oti loʻu tuagane.” Sa matuā ootia Iesu ina ua ia silasila atu i a Maria ma le motu o tagata na mulimuli mai i a te ia o loo fetagisi. Ua fesili atu o ia: “O i fea na outou tuuina ai o ia?
Na tali ane i latou: “Le Alii e, maliu mai ia inā silasila.”
Ua tagi foi Iesu, ma ua faapea ane ai tagata Iutaia: “Faauta, maeu le tele o lona alofa i a te ia!”
Na manatua e nisi faapea, i ni nai masina muamua atu i le taimi o le Tausamiga o Faleapitaga, na faamalolo ai e Iesu se tagata talavou na fanau mai o tauaso, ma ua latou tuufesili ai: “Pe lē mafai ea e lenei tagata o lē na faapupulaina mata o le tagata tauaso, ona taofia foi lenei tagata ina ia lē oti?” Ioane 5:21; 6:40; 9:1-7; 11:17-37.
▪ O anafea sa mulimuli ane, taunuu atu ai Iesu i tuaoi o Petania, ma o le ā le tulaga sa iai i inā?
▪ O le ā le faavae na talitonu ai Mareta i le toetu?
▪ Sa faapefea ona aafia Iesu i le oti o Lasalo?