Mataupu 33

Le Faataunuuina o le Valoaga a Isaia

INA ua silafia e Iesu le fuafuaga a le au Faresaio ma le au Herotiano e fasiotia o ia, ona latou ō atu ai lea ma ona soʻo i le Sami o Kalilaia. O inā sa lolofi ane ai i a te ia le motu o tagata mai vaega uma o Palesitina, ma e oo foi i tala atu o ona tuaoi. Sa ia faamaloloina le toatele, ma iu ai ina fetuleni uma atu i latou na iai maʻi tiga ina ia papaʻi atu i a te ia.

Ona o le toatele naua o le motu o tagata, na fetalai atu ai Iesu i ona soʻo ina ia faaaogā pea se vaa i lana auaunaga. E ala i le ālo ese o le vaa mai le matafaga, na taofia ai le motu o tagata mai le fetaomi atu i a te ia. Sa mafai ai ona ia aʻoaʻo atu i a te i latou mai le vaa pe malaga atu foi i se isi vaipanoa i luga lava o le matafaga ina ia fesoasoani atu ai i tagata o iai i inā.

Na matauina e le soʻo o Mataio, le faataunuuina o “upu a le perofeta o Isaia,” i le galuega a Iesu. O lea, na toe sii mai ai e Mataio le valoaga na faataunuuina e Iesu e faapea:

“Faauta! O laʻu auauna na ou filifilia, o laʻu pele, o lē ua faamaonia e loʻu loto! Ou te tuuina atu loʻu agaga i ona luga, e faailoa atu e ia le faamasinoga tonu i nuu ese. E lē finau ia, e lē alaga foi o ia, e lē lagona foi lona leo e se tasi i le ala tele. E lē gagau e ia le ū ua gapēpē, e lē tinei foi e ia le vavae ua mu itiiti; seia ona tuuina atu le faamasinoga tonu ma le manuia. O lona igoa foi e faamoemoe i ai nuu ese.”

O le mea moni, o Iesu, o ia o le auauna pele ua faamaonia e le Atua. Ma na faamanino atu e Iesu le uiga o le faamasinoga tonu, lea sa faalavelavea i uputuu a lotu sese. Ona o le lē tonu o lo latou faatatauina o tulafono a le Atua, sa lē mafai ai ona fesoasoani le au Faresaio i se tagata, e tusa lava pe maʻi i le Sapati! I le faamaninoina o le faamasinoga tonu a le Atua, na faasaolotoina ai e Iesu tagata mai avega mamafa o uputuu, ma o le mafuaaga lena na taumafai ai taʻitaʻi lotu e fasiotia o ia.

O le ā le uiga ‘o lona lē finau, e lē lagona foi lona leo i le ala tele’? Ina ua ia faamaloloina tagata, sa matuā fai atu lava Iesu ‘i a te i latou ina ia aua neʻi faailoaina atu o ia i se tasi.’ Sa leʻi manao o ia e pisapisaō le faalauiloaina atu o ia i le ala tele, pe soona feaveai foi ni tala sese e uiga i a te ia.

E lē gata i lena, sa avatu foi e Iesu lana feau faamafanafana loto i tagata o ē sa pei o ni ū ua gapēpē faafaatusa, ua paūū ma ua solia i vae. Sa pei i latou o vavae ua mū itiiti, ua lē o toe mamao ae uma. E lē nutililiia e Iesu le ū ua gapēpē pe tapē foi le vavae ua mu itiiti. Ae i le agamalu ma le alofa, na te faatulai aʻe ai ma le tomai ē e loto maulalo. E moni lava, o Iesu o ia lea e mafai ona faamoemoe i ai nuu ese! Mataio 12:15-21; Mareko 3:7-12; Isaia 42:1-4.

▪ Sa faapefea ona faamanino atu e Iesu le faamasinoga tonu e aunoa ma le finau pe alaga foi i le ala tele?

▪ O ai sa pei o ni ū ua gapēpē ma vavae ua mū itiiti, ma sa faapefea ona tausia i latou e Iesu?