Mataupu 36

Le Faatuatua Tele o se Taitaiau

E TUSA o le ʻafa tonu lava o le vaitaimi o lana faiva i le lautele, na fofoga atu ai e Iesu lana Lauga i luga o le Mauga. O lona uiga, sa na o le tausaga ma masina e iva na totoe ona maeʻa lea o lana galuega i le lalolagi.

Ua maliu atu nei Iesu i le aai o Kapanaumi, le nofoaga sa faamautu i ai mo ana galuega. O inā sa ō ane ai i a te ia toeaina o Iutaia ma se talosaga. Na aauina ane i latou e se taitaiau o le autau a Roma o sē e mai Nuuese, o ia o se tagata e ese mai i Iutaia.

Sa maʻi tigaina le auauna faapelepele a lenei taitaiau ma sa toeitiiti lava oti ai, o lea sa ia manao ai ina ia faamalolo e Iesu lana auauna. Na matuā faatoga atu lava tagata Iutaia mo le taitaiau. Ua latou faapea atu i a te ia: “Ua alagatatau i a te ia lou faia i ai o lenei mea, auā ua alofa mai o ia i lo matou nuu, ua na faia foi le sunako mo i matou.”

E aunoa ma se faatalatū, na maliu atu loa Iesu faatasi ma tagata na ō ane. Peitai, ina ua latou latalata atu i le fale, sa aauina ifo e le taitaiau ana uo ina ia fai atu i a Iesu: “Le Alii e, aua neʻi faalavelaveina oe, auā e lē aogā aʻu ona e maliu mai i loʻu fale. Auā o le pogai lena sa ou manatu ai e lē aogā ona ou alu atu i a te oe.”

Maeu se faaupuga o le loto maulalo mai se taitaiau o lē sa masani i le faia o faatonuga i isi! Ae atonu na ia manatunatu foi i a Iesu, i lona iloa lelei e tusa ai ma le aganuu, sa faasaina tagata Iutaia mai le faia o ni fesootaiga faavafealoai ma tagata e lē o ni Iutaia. E oo lava i a Peteru sa ia faapea mai: “Ua outou iloa lelei lava o se solitulafono mo se tagata Iutaia ona aufaatasi pe faalatalata atu o ia i se tagata o se isi ituaiga.”

Masalo ona o lona lē manao e afaina Iesu i ni iʻuga o le solia o lenei aganuu, na ala ai ona aauina atu e le taitaiau ana uo e talosaga atu i a te ia e faapea: “Ia oo mai sau fetalaiga, e faamaloloina ai laʻu auauna. Auā o aʻu foi o le tagata o loo iai le pule, ua ou pule foi i laʻu autau, a aʻu fai atu i se tasi, ‘Inā alu ia! ona alu ai lea, ma le tasi, ‘Inā sau ia! ona sau ai lea, ma laʻu auauna, ‘Inā faia e oe nei mea! ona fai ai lea.”

Ina ua faafofoga Iesu i na mea, ona ofo ai lea o ia, ma ua fetalai atu: “Ou te fai atu i a te outou le upu moni, ou te leʻi iloa lava i Isaraelu se faatuatua e faapena ona tele.” Ina ua uma ona faamaloloina le auauna a le taitaiau, sa faaaogā loa e Iesu le avanoa e faamatala atu ai le auala o le a mauaina ai e tagata e lē ni Iutaia, faamanuiaga ia sa teena e Iutaia lē faatuatua.

Ona fetalai atu lea o Iesu: “E toatele e ō mai mai sasae ma sisifo, e taooto e aai faatasi ma Aperaamo, ma Isaako ma Iakopo i le Malo o le lagi; a o atalii o le malo o le a lafoina i fafo i le pouliuli. I le mea o iai le taufaitagi auē ma le lilivau o nifo.”

“O atalii o le malo o le a lafoina i fafo i le pouliuli,” o Iutaia faaletino ia, o ē sa lē taliaina le avanoa na muai ofoina atu i a te i latou ina ia avea ai ma pule faatasi ma Keriso. O Aperaamo, Isaako, ma Iakopo, ua fai ma sui o le faatulagaga a le Malo o le Atua. O lea na faamatala atu ai e Iesu le auala o le a taliaina ai tagata o Nuuese ina ia taooto i le laoai faalelagi, e pei ona iai, “i le malo o le lagi.” Luka 7:1-10; Mataio 8:5-13; Galuega 10:28.

▪ Aisea na talosaga atu ai tagata Iutaia e fai ma sui o se taitaiau o Nuuese?

▪ O le ā le mafuaaga na lē valaaulia ai e le taitaiau Iesu e ulu atu i lona fale?

▪ O le ā sa faauiga i ai e Iesu ana fetalaiga faaiu?