Mataupu 29

Le Faia o Galuega Lelei i le Sapati

O LE tau lea e totogo ai mea i le 31 T.A. Ua mavae ni nai masina talu ona talanoa atu Iesu i se fafine i le vaieli i Samaria a o faimalaga ane mai Iutaia agaʻi i Kalilaia.

O lea, ina ua uma ona ia aʻoaʻo atu i Kalilaia atoa, ona toe malaga atu foi lea o Iesu i Iutaia, ma ua ia talaʻi atu ai i sunako. Pe a faatusatusa atu i le fiafia ua taʻua e le Tusi Paia na faaalia i lana faiva i Kalilaia, e itiiti lava ni mea o taʻu mai ai e uiga i le galuega a Iesu i Iutaia i le taimi o lana asiasiga lea, atoa ma masina sa iai o ia i inā ina ua mavae le Paseka talu ai. E foliga mai sa leʻi talileleia lana faiva i Iutaia e pei ona i ai i Kalilaia.

E leʻi pine ae agaʻi atu Iesu i le aai autū o Iutaia, o Ierusalema lea, mo le Paseka o le 31 T.A. I inā, e lata ane i le Faitotoa o Mamoe o le aai, sa iai le vaitaele e taʻua o Petesa, e ō atu i ai le toatele o tagata mamai, o tauaso, ma pipili. Sa latou talitonu e mafai ona faamaloloina tagata pe a taeele i le vai i le taimi e gaepu aʻe ai.

I le Aso o le Sapati, na iloa atu ai e Iesu se tamaloa ua 38 tausaga talu ona maʻi, o loo i autafa o le vaitaele. Ina ua silafia e Iesu le umi tele ona maʻi o le tamaloa, na ia fesili atu ai e faapea: “E te fia malōlō ea?”

Ua tali ane o ia i a Iesu: “Le Alii e, e leai lava se tagata na te tuuina ifo aʻu i le vaitaele pe a gaepu le vai; a ou alu ane foi, ae oso ifo se tasi ma muamua i a te aʻu.”

Ona fetalai atu lea o Iesu i a te ia: “Inā tu ia i luga, ave ia lou moega, ma ia e savali.” Sa faafuasei loa ona malōlō le tamaloa, ua ave i lona moega, ma ua savali!

Ae ina ua vaaia e Iutaia le tamaloa, ona latou fai ane lea: “O le Sapati lenei, e sa ona ave ai o lou moega.”

Ua tali atu le tamaloa i a te i latou: “O lē na faamalolo mai i a te aʻu, ua fetalai mai o ia i a te aʻu, ‘Ave ia lou moega ma ia e savali.’”

Fai mai la latou fesili: “O ai ea le tagata na fai atu i a te oe, ‘Ave ia lou moega ma ia e savali’?” Sa maliu ese Iesu ona o le motu o tagata, ma e leʻi iloa foi e lē na faamaloloina le igoa o Iesu. Peitai, na toe feiloai Iesu ma le tamaloa i le malumalu i se taimi mulimuli ane, ma na iloa ai loa e le tamaloa lē na faamaloloina o ia.

O lea na alu atu ai le tamaloa na faamaloloina ma taʻu i tagata Iutaia, o Iesu na faamaloloina o ia. Ina ua latou iloaina lenei mea, sa ō atu ai loa tagata Iutaia i a Iesu. O le ā le mafuaaga? Pe ina ia iloa ai ea le auala na mafai ai ona ia faia nei mea ofoofogia? E leai. Ae ina ia saili i sona sese ona o lona faia o nei mea lelei i le Sapati. Ma sa oo lava ina latou faasaua i a te ia! Luka 4:44; Ioane 5:1-16.

▪ E tusa o le ā nei le umi talu mai le asiasiga mulimuli a Iesu i Iutaia?

▪ Aisea sa lauiloa ai le vaitaele o Petesa?

▪ O le ā le vavega na faia e Iesu i le vaitaele, ma o ā uiga o tagata Iutaia sa faaalia i ai?