Mataupu 5

Le Fanau mai o Iesu—I Fea ma o Anafea?

NA POLOAIINA e le emeperoa o le emepaea o Roma, o Kaisara Aokuso e faapea, e tatau i tagata uma ona toe foi atu i le aai na fanau ai mo le tusigā igoa. O lea, sa malaga atu ai Iosefa i le nuu na ia fanau ai, le aai o Peteleema.

Sa tumutumu tagata i Peteleema ina ia tusia o latou igoa, ma na pau lava le nofoaga sa mafai ona maua e Iosefa ma Maria e api ai, o le fale o manu. O i inā, i le nofoaga e tuu ai asini ma isi manu, na fanau mai ai Iesu. Na aui o ia e Maria i le ie ma faataoto i a te ia i le pusa e tuu ai meaai a manu.

E mautinoa lava o le taitaiga a le Atua na faia ai e Kaisara Aokuso lana poloaiga o le tusigā igoa. O le mea lea na mafai ai ona fanau mai Iesu i Peteleema, le aai ua leva ona valoia e le Tusi Paia o le a avea ma nuu e fanau mai ai le pule folafolaina.

Maeu le tāua o lena po! I fafo i le fanua sa pupula faataliolio atu ai se malamalama tele i luga o le au leoleo mamoe. O le mamalu lena o Ieova! Ma na taʻu atu e le agelu a Ieova i a i latou: “Aua tou te matataʻu, auā, faauta! ou te folafola atu i a te outou le tala lelei e olioli tele ai tagata uma, auā ua fanau mai mo outou i le aso nei i le aai a Tavita se Faaola, o le Alii ia o Keriso. O se faailoga foi lenei mo outou: e iloa e outou le tamameamea ua aui i le ie, o loo taoto i le pusa e tuu ai meaai a manu.” Ona faafuasei lea ona faatasi ane le au agelu e toatele ma ua vivii atu e faapea: “O le viiga i le Atua i mea aupitoaluga, ma le manuia i tagata ua ia alofagia o loo i le lalolagi.”

Ina ua mou atu le au agelu, ona fetautalatalaai lea o leoleo mamoe e faapea: “Inā tatou ō ia i Peteleema, tatou te vaavaai i lenei mea ua faia, ua faailoa mai i a te i tatou e Ieova.” Ona latou faataalise atu lea ua maua Iesu i le mea na fai mai ai le agelu. Ina ua faamatala atu e leoleo mamoe le mea na taʻu atu e le agelu i a te i latou, ona taufai ofo ai lea o i latou uma na faalogo i ai. Ua taofi foi ma faatauaina e Maria nei mea uma i lona loto.

E toatele tagata i aso nei ua talitonu faapea na fanau mai Iesu i a Tesema 25. Ae o Tesema o se vaitau o timuga ma le malulu i Peteleema. Sa lē taitai ona iai leoleo mamoe ma a latou lafu manu i le fanua, i se po i lena vaitaimi o le tausaga. O le a lē mafai foi e le Kaisara Roma ona poloaiina tagata o ē sa tele ina fouvale i a te ia, ina ia malaga atu i le maatiati o le tau malulu e tusia o latou igoa. E foliga mai la, na fanau mai Iesu i se vaitaimi o le amataga o le tau e afu ai mea i lena tausaga. Luka 2:1-20; Mika 5:2.

▪ Aisea na malaga atu ai Iosefa ma Maria i Peteleema?

▪ O le ā le mea ofoofogia na tupu i le po na fanau mai ai Iesu?

▪ E faapefea ona tatou iloa sa leʻi fanau mai Iesu i a Tesema 25?