Le Fesili e Uiga i Lo Latou Tamā
Mataupu 69
Le Fesili e Uiga i Lo Latou Tamā
A O FAIA pea le tausamiga, sa oo ina faifai tetele le talanoaga a Iesu ma taʻitaʻi Iutaia. Sa faailoa atu e Iesu: “Ua ou iloa o le fanau outou a Aperaamo, a ua outou fia fasioti i a te aʻu, auā ua lē iai laʻu upu i totonu i a te outou. Ou te tautala atu i mea ua ou iloa mai loʻu Tamā; o outou foi tou te faia mea ua outou iloa mai lo outou tamā.”
E ui ina sa leʻi faailoaina atu e Iesu lo latou tamā, ae na ia faamanino atu e faapea e ese lo latou tamā mai lona tamā. I lo latou lē malamalama po o ai lea sa manatu i ai Iesu, na tali ane ai taʻitaʻi Iutaia: “O Aperaamo lo matou tamā.” Sa latou manatu e tutusa lo latou faatuatua ma Aperaamo, o lē na avea ma uō a le Atua.
Peitai, na faateia i latou i le tali atu a Iesu e faapea: “Afai o fanau outou a Aperaamo, po ua faia e outou le amio a Aperaamo.” Ioe, o le atalii moni e faaaoao o ia i lona tamā. Na fetalai atu foi Iesu: “A ua outou fia fasioti i a te aʻu le tagata ua tautala atu i a te outou i le upu moni, na ou faalogo ai mai le Atua. Sa leʻi faia lea e Aperaamo.” O lea na toe fetalai atu ai Iesu: “Ua faia lava e outou amio a lo outou tamā.”
Ae latou te leʻi malamalama lava i lē na fetalai atu ai Iesu. Sa latou manatu pea o i latou o fanau moni a Aperaamo e faapea: “E lē ni tama toifale i matou.” O lea, i le faapea mai o i latou o ni tagata tapuai moni e pei o Aperaamo, na latou taʻutino ane ai: “E tasi lo matou Tamā, o le Atua lea.”
Ae pe sa moni ea o le Atua lo latou Tamā? Na tali atu Iesu: “Afai o lo outou Tamā le Atua, po ua outou alofa mai i a te aʻu, auā ua ou sau mai le Atua, ma ou sau i inei. Auā foi ou te leʻi sau fua, a o Ia lava na auina mai aʻu. Se ā le mea tou te lē iloa ai laʻu nei upu?”
Sa taumafai Iesu e faailoa atu i na taʻitaʻi lotu, iʻuga o lo latou teena o ia. A o lea la ua ia fetalai saʻo atu e faapea: “O outou nai lo outou tamā le Tiapolo, tou te fia faia foi mea e tuinanau i ai lo outou tamā.” O le ā le ituaiga o tamā e iai le Tiapolo? Sa faailoa atu e Iesu, o ia o le fasioti tagata ma na ia fetalai atu foi: “O le pepelo ia ma o le tamā o le pepelo.” O lea na fetalai faaiʻu atu ai e Iesu: “O lē mai le Atua, e faalogo ia i afioga a le Atua. O le mea lea tou te lē faalogo ai, auā e lē mai le Atua outou.”
Ona o lo latou feitai ina ua tausalaina i latou e Iesu, na tali ane ai tagata Iutaia: “E lē ua tonu ea la matou upu, O le Samaria oe, o loo i a te oe foi le temoni?” O le upu “Samaria” sa faaaogā e faaalia ai manatu faatauvaa ma le faalumaina, ona sa inosia tagata Samaria e tagata Iutaia.
I lona lē amanaia o manatu faatauvaa i le avea o ia ma Samaria, na tali atu ai Iesu: “E lē o i a te aʻu se temoni; ae ou te āva lava aʻu i loʻu Tamā; tou te lē āva mai foi i a te aʻu.” Sa faaauau ona fetalai atu Iesu i lona taʻua o se folafolaga faamaniti tino e faapea: “Ai sē tausi i laʻu upu, e lē oo le oti i a te ia e faavavau.” O le mea moni, e lē o le uiga o le fetalaiga a Iesu e faapea, o i latou uma lava e mulimuli i a te ia, o le a lē oo i ai le oti faaletino. Ae o lona uiga, o le a lē oo i a i latou le faaumatiaga e faavavau, po o le “oti faalua,” lea e lē toe iai se toetu.
Peitai, sa faauiga faaletino e tagata Iutaia upu a Iesu. O lea na latou fai ane ai e faapea: “O lenei ua matou iloa ua i a te oe le temoni; ua oti Aperaamo ma le au perofeta, a ua e fai mai oe, ‘Ai sē tausi i laʻu upu e lē oo le oti i a te ia e faavavau.’ Ua sili ea oe i lo matou tamā o Aperaamo, ua oti o ia? Ua feoti foi le au perofeta; a o ai ea oe?”
I lenei talanoaga atoa, e manino mai ai, sa faasino atu e Iesu nei tagata, i le mea moni e faapea o ia o le Mesia folafolaina. Ae na i lo le tali saʻo atu i la latou fesili e uiga i a te ia, na fetalai atu ai Iesu: “Afai ou te vivii aʻu i a te aʻu, e lē aogā loʻu viiga; o loʻu Tamā o ia na te viia mai aʻu, ua outou fai mai, o lo outou Atua lea. E leʻi iloa foi o ia e outou, a ua ou iloa lava o ia. Afai foi ou te fai atu, ua ou lē iloa lava o ia, ona avea lea o aʻu ma pepelo, e pei o outou.”
Sa faaauau ona fetalai atu Iesu, e ala i lona toe taʻua o le tagata faamaoni o Aperaamo e faapea: “O Aperaamo lo outou tamā, sa matuā fiafia o ia e fia iloa loʻu nei aso, na ia iloa foi ma olioli ai.” Ioe, ona o lona faatuatua, sa tepa taulai atu ai Aperaamo i le oo mai o le Mesia folafolaina. I lo latou lē talitonu, na tali ane ai tagata Iutaia: “E leʻi oo i le limasefulu o ou tausaga, po ua e iloa ea Aperaamo?”
Na tali atu Iesu: “E moni, e moni, ou te fai atu i a te outou, sa aʻu iai a o leʻi iai se Aperaamo.” O le mea moni, sa faasino atu e Iesu i lona soifuaga muamua o se peresona agaga malosi i le lagi a o leʻi avea ma tagata.
Ona o lo latou toatamai i le fetalai atu o Iesu sa iai o ia a o leʻi iai se Aperaamo, na fetagofi ai tagata Iutaia i maa o le a tauai o ia. Ae na lafi o ia ma maliu ese mai le malumalu e leʻi afaina. Ioane 8:37-59; Faaaliga 3:14; 21:8.
▪ Na faaalia faapefea e Iesu, e eseese lona tamā ma le tamā o ona fili?
▪ O le ā le uiga o le taʻua o Iesu e tagata Iutaia o se Samaria?
▪ O le ā le uiga o le fetalaiga a Iesu e faapea, e lē oo lava le oti i ona soʻo?