Mataupu 77

Le Fesili e Uiga i le Tofi

SA ILOA lelei lava e tagata sa taumafa Iesu i le fale o se Faresaio. O lea sa faapotopoto ai i fafo le faitau afe o i latou, ma faatalitali seʻi maliu ane Iesu. I le lē pei o le au Faresaio o ē sa tetee i a Iesu ma taumafai e maileia o ia ina ia fetalai atu i se upu sese, sa naunau tagata e faalogologo i a te ia ma talisapaia.

Na faliu muamua Iesu i ona soʻo, ma fetalai atu i ai: “Ia outou matuā aloese i le mea faafefete a le au Faresaio, o le faafiaamiotonu lea.” E pei ona faaalia i le taimi o le taumafataga, sa faatumulia le faiga a lotu atoa a le au Faresaio i le faafiaamiotonu. Ae e ui ina atonu sa natia amioga leaga a le au Faresaio e ala i le faaalia o lo latou faatagā alolofa, ae o le a faaalia lava i se taimi mulimuli. Na fetalai atu Iesu: “E leai se mea e ufiufitia e lē faaalia, e leai foi se mealilo e lē faailoaina.”

Ona fetalai atili atu lea o Iesu i lona toe taʻua o le faalaeiauga na ia tuuina atu i le toʻa 12 ina ua ia aauina atu i latou i se talaʻiga faataamilo i Kalilaia. Ua ia faapea atu: “Aua tou te matatau i a te i latou o ē fasioti le tino; a mavae lea, e leai se mea latou te toe mafaia.” Talu ai e oo lava i se tamai manulele e lē faagaloina e le Atua, sa faamautinoa atu ai e Iesu i ona soʻo e faapea, o le a lē faagaloina i latou e le Atua. Na ia fetalai atu: “Pe a taitaiina atu outou i fono faitele, ma alii o le malo, ma faipule, . . . o le a aʻoaʻo atu le agaga paia i a te outou i lena lava itu aso i upu e tatau ona outou fai atu ai.”

Ua tulai ane foi se tamaloa mai le motu o tagata. Ma aioi atu i a te ia e faapea: “Le aʻoaʻo e, ia e fetalai ane i loʻu uso, ina ia vaelua mai i a te aʻu le tofi.” Sa faamaoti mai i le Tulafono a Mose, e tatau ona maua e le atalii ulumatua vaega e lua o le tofi, e leai la se mafuaaga o le a tupu ai fua se finauga. Ae e foliga mai sa manao tele le tamaloa, e sili atu i lo le vaega o le tofi na tuuina atu i a te ia e tusa ai ma le tulafono.

Ma le saʻo lava, sa leʻi talia e Iesu le aafia ai i lea mea. Sa ia fesili atu: “Sole, o ai ea na tofia aʻu e faamasino ma pule i a te oulua? Ona ia apoapoai atu lea i le motu o tagata e faapea: “Ia outou, ia leoleo outou i a te outou aua le matapeapea; auā e lē ola se tasi i le tele o ana mea ua i a te ia.” Ioe, e tusa lava po o le ā le tele o mea a se tagata, ae o le mea masani, a oti o ia o le a tuua na mea uma. Ina ia faamamafaina lena mea moni, ma ina ia faaalia le valea o le lē atiina aʻe o se talaaga lelei ma le Atua, na faaaogā ai e Iesu se tala faatusa. Fai mai lana faamatalaga:

“Na fua tele mai le fanua o le tasi tagata mauoa. Ona manatunatu ifo lea o ia, ua faapea, ‘Se ā se mea ou te faia, auā e leai saʻu mea e faaputu ai aʻu fua?’ O lea na faapea ifo ai o ia, ‘O le mea lenei ou te faia: Ou te talepeina i lalo oʻu fale saito, ae faia ni fale tetele, Ou te faaputu ai aʻu fua ma aʻu mea lelei uma; ou te fai ifo foi i loʻu agaga: Loʻu agaga e, ua i a te oe mea lelei e tele ua teuina mo tausaga e tele; inā nofo filemu ia, inā ʻai ia ma inu ma ia e olioli.”’ A ua fetalai atu le Atua i a te ia, ‘O oe na le vale, e aamiina atu lou agaga nai i a te oe i le po nanei. Ae fai ma ai mea ua e faaputuina?”

I le faaiuga, na fetalai atu ai Iesu: “O loo faapea foi lē e faaputu oa mo ia, ae lē mauoa i le Atua.” E ui ina atonu sa leʻi maileia le au soʻo i le valea o le faaputuina o oa mo le tausiga o le olaga i aso fai soo, ae sa ono faigofie ona taaina ese i latou mai le auauna atu i a Ieova ma le ola atoa. O lea na faaaogā ai e Iesu lena taimi e toe taʻu atu ai lana fautuaga lelei lea sa tuuina atu pe tusa o se tausaga ma le ʻafa ua mavae, i lana Lauga i luga o le Mauga. Na ia faliu atu i ona soʻo, ma fetalai atu i ai:

“O lea ou te fai atu ai i a te outou, aua tou te popole i lo outou ola, i mea tou te aai ai, po o le tino i mea tou te oofu ai. . . . Ia outou mafaufau i oreva; latou te lē lūlū saito, latou te lē selesele foi, e leai lava so latou afeafe po o se fale saito, ae fagaina i latou e le Atua. . . . Ia outou mafaufau i lautalotalo pe faapefea ona tutupu; latou te lē galulue e lē milo foi; ae ou te fai atu i a te outou, e leʻi ofu lava Solomona ma lona matagofie tele e pei o se tasi o na mea. . . .

“Aua foi tou te saili pe ni ā ni mea tou te aai ai, ni ā ni mea tou te inu ai, aua foi le popolevale o outou loto; auā o mea uma ia ua sailia e nuu o le lalolagi, a ua silafia e lo outou Tamā o mea ia tou te manaomia. A ia outou saili pea le malo o le Atua; ona faaopoopoina ai lea o ia mea uma i a te outou.”

E manaomia ona iloiloina totoʻa na upu a Iesu, ae maise lava i taimi o faigata tau tamaoaiga. O le tagata e soona popolevale i ona manaoga faaletino ma amata ai ona faatalalē i le tuliloaina o mea faaleagaga, o le mea moni e faaalia ai le leai o se faatuatua i le mana o le Atua mo le tausia o Ana auauna. Luka 12:1-31; Teuteronome 21:17.

▪ Aisea, atonu, na fesili atu ai le tagata i a Iesu e uiga i le tofi, ma o le ā le apoapoaiga na avatu i ai e Iesu?

▪ O le ā le tala faatusa na faaaogā e Iesu, ma o le ā lona tāua?

▪ O le ā le fautuaga na toe taʻu atu e Iesu, ma aisea sa talafeagai ai?