Mataupu 34

Le Filifilia o Ona Aposetolo

UA TUSA nei o le tausaga ma le ʻafa talu ona faailoa atu e Ioane le Papatiso e faapea, o Iesu o le Tamai Mamoe a le Atua, ma na amataina ai e Iesu lana faiva i le lautele. O le taimi lena na avea ai Aneterea, o Simona Peteru, o Ioane, ma atonu foi o Iakopo (le uso o Ioane), o Filipo, ma Natanielu (sa igoa foi i a Patolomaio), ma ona uluai soʻo. A o faasolosolo pea, e toatele foi isi sa auai ma i latou na, ina ia mulimuli i a Keriso.

Sa sauni loa Iesu e filifilia ona aposetolo. O i latou ia o le a avea ma ana aumea vavalalata o le a tuuina atu i ai se toleniga faapitoa. Peitai a o leʻi filifilia i latou, sa maliu atu Iesu i le mauga ma tatalo ai i le po atoa, atonu sa ia ole atu mo le atamai ma le faamanuiaga a le Atua. Ina ua ao, ona ia taloina lea o ona soʻo, ma filifilia ai le toʻa 12 mai i a i latou. Peitai, talu ai sa avea pea i latou ma tagata aʻoga a Iesu, sa taʻua ai lava i latou o soʻo.

O le toaono na filifilia e Iesu, e pei ona taʻua i luga, o i latou na sa avea ma ona uluai soʻo. Na filifilia foi Mataio o lē na valaaulia e Iesu a o iai i lona ofisa o lafoga. O le isi toalima na filifilia, o Iuta (o lē sa igoa foi i a Tataio), o Iuta le Sekara, o Simona le Kanana, o Toma, ma Iakopo le atalii o Alefaio. O Iakopo lea na faaigoa foi i a Iakopo lē Ititi, atonu ona o lona faatino iti po o le itiiti foi o ona tausaga i lo le isi aposetolo o Iakopo.

E oo ane i lena taimi, ua fai si umi o mafuta pea Iesu ma i latou ia e toʻa 12, ma sa ia silafia lelei i latou. O le mea moni, o le toatele o i latou o ona lava tauaiga. O Iakopo ma lona uso o Ioane e mautinoa o uluai tauusoga ia o Iesu. Ma e mautinoa foi o Alefaio, o le uso lea o Iosefa le tamāfai o Iesu. O le atalii la o Alefaio, le aposetolo o Iakopo, o se tauusoga foi o Iesu.

O le mea moni, sa faigofie i a Iesu ona manatuaina igoa o ona aposetolo. Ae po o e manatuaina ea? Ia tau ina e manatua, e toalua e igoa i a Simona, e toalua e igoa i a Iakopo, e toalua foi e igoa i a Iuta, ma o Simona e iai lona uso o Aneterea, a o Iakopo e iai lona uso o Ioane. O le auala lena e manatuaina ai aposetolo e toavalu. O le isi toafa e aofia ai le ao lafoga (o Mataio), ma lē na masalosalo mulimuli (o Toma), atoa ma lē na valaaulia i lalo o le laau (o Natanielu), ma lana uō o Filipo.

O le toʻa 11 o aposetolo o tagata Kalilaia, le nuu moni o Iesu. O Natanielu e sau mai Kana. O Filipo, o Peteru, ma Aneterea e tupuga mai Petesaita, ae mulimuli ane sa toe siitia atu Peteru ma Aneterea i Kapanaumi i le nuu e foliga mai na nofo ai Mataio. Sa faia e Iakopo ma Ioane se pisinisi faifaiva ma e lē taumatea sa nonofo i laua i Kapanaumi po o se nofoaga e latalata ane i ai. A o Iuta le Sekara, o lē na mulimuli ane ona faalataina Iesu, e foliga mai e na o ia lava le aposetolo e sau mai Iutaia. Mareko 3:13-19; Luka 6:12-16.

▪ O ai aposetolo atonu o ni tauaiga o Iesu?

▪ O ai aposetolo o Iesu, ma e faapefea ona e manatuaina o latou igoa?

▪ O fea nuu o le au aposetolo?