Mataupu 35

Le Lauga e Sili ona Tautaua na Fofogaina

O LE vaaiga i inei o se tasi o mea e matuā lē mafaagaloina i talafaasolopito o le Tusi Paia: O loo nofo Iesu i le auvae mauga, ma fofoga atu lana Lauga tautaua i luga o le Mauga. E i tafatafa o le Sami o Kalilaia, atonu pe felataʻi ma Kapanaumi. Ina ua mavae ona tatalo mo le po atoa, sa filifilia ai loa e Iesu le toʻa 12 o ona soʻo e fai ma aposetolo. Ona ia maliu ifo lea faatasi ma i latou uma, i lena vaega laugatasi o le mauga.

Atonu e te manatu faapea o le a matuā vaivai nei Iesu ma manao ai e fai sina moe. Ae na ō ane le motu o tagata e toatele, o nisi sa ō ane mamao lava mai Iutaia ma Ierusalema, e 60 i le 70 maila [po o le 95 i le 110 kilomita] le mamao. O isi sa ō ane mai nofoaga e tulata i le sami o Turo ma Saitonu i le itu i mātū. Sa latou ō ane e faalogologo i a Iesu ma ia faamaloloina o latou maʻi. Na ō ane ai foi ma tagata na ulufia e temoni, po o agelu leaga a Satani.

A o maliu ifo Iesu, sa faalatalata atu tagata mamai ina ia papai atu i a te ia, ma na ia faamaloloina i latou uma. Ina ua mavae lena, e foliga mai sa maliu aʻe ai loa Iesu i se mea e maualuga i luga o le mauga. Ona ia nofo ai lea i inā ma aʻoaʻo atu i le motu o tagata o loo laupae solo mai i le laugatasi i ona luma. Ma seʻi tau ina manatu i ai! E aunoa ma se tagata e toatasi o lena aofia atoa na toe pagatia i se maʻi tiga!

Na matuā naunau tagata e faalogologo i le faiaoga o lē sa mafai ona faia na vavega ofoofogia. Peitai, o le autū na fofogaina atu ai e Iesu lana lauga, e mo le lelei o ona soʻo, o ē sa nonofo latalata atu i a te ia. Ae ina ia aogā foi i a i tatou, sa faapea ona faamauina ai e Mataio ma Luka lenei lauga.

E tusa e faafa ona umī atu le tala a Mataio e uiga i lena lauga, na i lo o le tala a Luka. Ae lē gata i lea, o nisi vaega o faamaumauga a Mataio, o loo faamatalaina e Luka e pei o ni fetalaiga a Iesu sa faia i se isi taimi o lana faiva, e pei ona matauina pe a faatusatusa le Mataio 6:9-13 i le Luka 11:1-4, ma le Mataio 6:25-34 i le Luka 12:22-31. Peitai, e lē o se mea lena e ofo ai. Auā e manino lava sa sili atu i le faatasi ona aʻoaʻoina e Iesu o na mea, ma sa filifili ai Luka ina ia tusia nisi o na aʻoaʻoga i se faatulagaga e ese.

O le mea na matuā tāua ai le lauga a Iesu, ona e lē gata i le loloto o mea faaleagaga o loo iai, ae o le faigofie ma le manino o le auala na ia tauaaoina ai na upu moni. Sa ia taʻuina atu mea e masani ona tutupu, ma faaaogā mea e masani ai tagata, ma o lea na faigofie ai ona malamalama i ona manatu i latou uma sa saili mo se olaga e sili ona lelei i ala o le Atua.

O Ai e Fiafia Moni?

O tagata uma lava e mananao ina ia fiafia. I le silafiaina o lena mea, na amata ai e Iesu lana Lauga i luga o le Mauga i lona faamatalaina o i latou o ē e fiafia moni. E pei ona tatou iloa, sa vave lava ona taaina ai i lena mea manatu o lana aofia e sili ona toatele. Ae e foliga mai sa fetoaʻi le toatele i ana uluai fetalaiga.

I le tuusaʻo atu e Iesu o ana fetalaiga i ona soʻo, sa ia faapea atu: “E fiafia outou o ē matitiva, auā e ō outou le malo o le Atua. E fiafia outou o ē fia aai nei, auā o le a maoona outou. E fiafia outou o ē fetagisi nei, auā o le a featai outou. E fiafia outou pe a itagia outou e tagata . . . Ia outou olioli i lea aso, ma ia matuā fiafia; auā faauta! o i le lagi lo outou taui e tele.”

O le tala lena a Luka i le faatomuaga o le lauga a Iesu. Ae e tusa ai ma faamaumauga a Mataio, sa fetalai foi Iesu e faapea o ē agamalu, o ē alolofa atu, o ē loto mamā, o ē faatupuina le filemu, e fiafia i latou. E pei ona matauina e Iesu, e ala ona fiafia o i latou ia, ona o le a fai mo latou tofi le lalolagi, o le a faaalia i a i latou le alofa mutimutivale, o le a latou iloa atu le Atua, ma o le a taʻua foi i latou o atalii o le Atua.

Peitai, o le uiga o le fetalaiga a Iesu e fiafia i latou, e lē tau ina ia tausua po o le soona ʻata, e pei o loo fiamalie se tasi. O le fiafiaga moni e loloto atu, o lona uiga o le faamalieina, po o le mauaina o le lotomalie ma le faataunuuina o ni mea i le olaga.

O lea, e pei ona sa faaalia e Iesu, o i latou o ē fiafia moni, o i latou ia o loo iloa lelei o latou manaoga faaleagaga, ua faanoanoa ona o o latou tulaga agasala, a ua oo ina latou iloa le Atua ma auauna i a te ia. E tusa lava la pe inosia ma sauāina i latou ona o le faia o le finagalo o le Atua, ae e fiafia i latou, ona ua latou iloa o loo latou faafiafiaina le Atua ma o le a latou mauaina lana taui o le ola e faavavau.

Peitai, o le toatele o le au faalogologo a Iesu, sa pei lava o isi tagata i aso nei, e talitonu faapea o le auala e maua ai e se tasi le fiafia, o le ola lelei lea ma le mauaina o mea e faafiafiaina ai. Sa silafia e Iesu lena mea. I le taʻuina atu o se faaeseesega atonu sa ofo ai le toatele o lana au faalogologo, na ia fetalai atu ai e faapea:

“Oi talofa i a te outou tagata mauoa, auā ua outou maua lo outou lelei. Oi talofa i a te outou o ē ua maoona nei, auā o le a fia aai outou. Oi talofa i a te outou o ē featai nei, auā o le a faanoanoa, ma fetagisi outou. Oi talofa i a te outou pe a tautala lelei tagata uma i a te outou auā sa faapea lava ona fai e o latou tamā i perofeta pepelo.”

O le ā le uiga o upu a Iesu? Aisea e ʻoi talofa ai, pe a mauoa, pe featai i le saili o faafiafiaga, po o le fiafia foi i faaneeneega mai tagata? Auā afai e maua ma faatauaina e se tagata na mea, o le a tuuesea ai mai lona olaga le auaunaga i le Atua, ae ua na o le auaunaga lea e mafai ai ona maua le fiafiaga moni. I le taimi lava e tasi, sa leʻi faauigaina ai e Iesu faapea a mativa se tagata, pe fia ʻai ma faanoanoa, ona maua ai lea e ia o le fiafia. Peitai, e masani lava, atonu o tagata faatauvaa na e tali atu i aʻoaʻoga a Iesu, ma o le a faapea ona faamanuiaina ai i latou i le fiafiaga moni.

Ona sosoo ai lea ma le fetalai atu o Iesu i ona soʻo e faapea: “O outou o le masima o le lalolagi.” O le mea moni, e lē o le uiga o lana fetalaiga e faapea o i latou o ni masima moni. Na i lo lea, o le masima e faasaoina ai se mea. Sa iai se faaputuga tele o masima i tafatafa o le fata faitaulaga i le malumalu o Ieova, ma sa faaaogāina e ositaulaga sili e faamasima ai taulaga.

Sa avea soʻo o Iesu ma “masima o le lalolagi” ona sa latou taaina tagata i se auala e faasaoina ai. O le mea moni, o le feau sa latou talaʻia o le a faasaoina ai ola o ē uma o le a tali atu i ai! O le a avatu ai i olaga o na tagata uiga o le maumauai, le faamaoni, ma le maufaatuatuaina, e puipuia ai mai so o se mea e faaleagaina ai i latou i le itu faaleagaga ma le itu tau amio.

Na fetalai atu Iesu i ona soʻo: “O outou, o le malamalama o le lalolagi.” E lē mafai ona tuu se lamepa i lalo o le mea e fua ai saito ae e tuu i luga o le tuugalamepa, o lea na fetalai atu ai Iesu: “Ia faapea ona pupula atu lo outou malamalama i luma o tagata.” Sa faia e soʻo o Iesu lenei mea e ala i la latou molimau atu i le lautele, atoa foi ma le avea o ni faaaoaoga pupula i amio e tusa ma mataupu silisili o le Tusi Paia.

O Tapulaa Maualuluga mo Ona Soʻo

Sa manatu taʻitaʻi lotu i a Iesu o sē na solia Tulafono a le Atua ma e leʻi mamao atu ona latou taupulepule e fasioti i a te ia. O lea, a o faaauau e Iesu lana Lauga i luga o le Mauga, sa ia faamatala atu ai e faapea: “Aua neʻi outou manatu ua ou sau e tatalaina le Tulafono po o le au Perofeta. Ou te leʻi sau e tatalaina, a ia faataunuuina.”

Sa faaalia e Iesu le matuā faaaloalo maualuga i le Tulafono a le Atua ma na ia faalaeiauina foi isi ina ia faia faapena. O le mea moni, sa ia fetalai atu e faapea: “O lenei, o sē na te solia se tasi o nei poloaiga iti, ma faapea ona aʻoaʻo atu i tagata, e taʻua o ia o ‘lē aupito itiiti’ i le malo o le lagi,” o lona uiga o lena ituaiga o tagata o le a lē mafai lava ona sao atu i le Malo.

Na i lo le solia o le Tulafono a le Atua, na taʻusalaina e Iesu e oo lava i uiga e pogai ai le solia o le Tulafono. Ina ua silafia e Iesu o loo faapea mai le Tulafono, “Aua e te fasioti tagata,” sa ia faaopoopo atu: “A o aʻu, ou te fai atu i a te outou, ai se tasi e faaauau pea ona ita i lona uso, e nofo sala o ia i le faamasinoga.”

Talu ai le matautia tele o le faaauau pea ona ita i se uso, e ono iu ai i le fasioti tagata, na faataitaia ai e Iesu le tele o taumafaiga e tatau ona faia e se tasi ina ia maua ai le filemu. Na ia aʻoaʻo atu e faapea: “Pe afai foi e te avatu lau taulaga i le fata faitaulaga, ona e manatua ai lea ua i lou uso se mea e tiga ai o ia i a te oe, inā tuu ia i lea mea o lau taulaga i luma o le fata faitaulaga, ae alu oe ia muai faalelei i lou uso, i le e sau ai, ma avatu lau taulaga.”

I le uaʻi atu i le vaega lona fitu o Tulafono e Sefulu, sa faaauau ona fetalai atu Iesu: “Ua outou faalogo na fai mai ē anamua, ‘Aua e te mulilua.’” Peitai na taʻusalaina e Iesu e oo lava i se uiga moomoo ina ia faia le mulilua. “Ou te fai atu aʻu i a te outou, ai sē vaavaai pea i se fafine ina ia manao i ai, ua uma ona mulilua ma ia i lona loto.”

I inei, sa leʻi fetalai ai Iesu e uiga i na o sina manatu puupuu i amioga e lē mamā, ae e uiga i le ‘vaavaai atu pea lava pea.’ O lena vaavaai pea e faagaeeina ai tuʻinanauga tau faalogona, ia e mafai ona iu i le mulilua, pe a maua se avanoa e fai ai. E mafai faapefea e se tagata ona taofia le tupu o lena mea? Na taʻu atu e Iesu se tala faatusa i le tatau ona faia o ni taumafaiga silisili, e faapea: “Afai foi e te tausuai i lou mata taumatau, inā sali ese ia, ma e lafoai. . . . Afai foi e te tausuai i lou lima taumatau, inā tipi ese ia, ma e lafoai.”

E masani lava ona loto malilie tagata e tipiesea se lima po o se vae ua maʻi ina ia faasaoina ai o latou ola. Ae e tusa ai ma le fetalaiga a Iesu, e sili atu ai foi ona tāua le ‘lafoai’ o so o se mea, e oo lava i se mea tāua tele e pei o le mata po o le lima, ina ia alofia ai manatu ma amioga lē mamā. Auā a lē faia faapena, e pei ona faamatala mai e Iesu, o lona uiga o le a lafoina ai na tagata i Kena (o se tafunai sa lafo i ai otaota i tuapa o Ierusalema), lea ua faatusaina i ai le faaumatiaga e faavavau.

Sa talanoaina foi e Iesu le auala e feagai ai ma tagata taufaaleaga ma tetee. Fai mai lana fautuaga: “Aua neʻi tou tetee atu i lē e leaga. Ai sē na te po mai i lou alafau taumatau, ia liliu atu i ai le isi.” E lē o le uiga o le fetalaiga a Iesu e faapea e lē tatau i se tagata ona puipuia o ia po o lona aiga pe a osofaia. E lē faapea e afaina se tasi i se po, ae na o le faaonoono mai ai. O lea, o le uiga o le fetalaiga a Iesu, afai e taumafai se tasi e faatupu se misa po o se fefinauaiga e ala i le po atu i lona lima, pe ala i le faatiga i ni upu taufaaleaga, o se mea sese la le toe taui atu.

Ina ua uma ona ia tataʻi atu manatu i le tulafono a le Atua ia alofa i lē lua te tuaoi, ona faapea atu lea o Iesu: “Ia faaauau pea ona outou alolofa atu i ē ua fai outou mo latou fili ma ia tatalo foi mo ē ua faasaua mai i a te outou.” I lona taʻua o se mafuaaga malosi e faia ai faapea, na ia faaopoopo atu ai: “Ina ia faamaonia ai o outou o atalii o lo outou Tamā o i le lagi, o lē na te faaoso i lona la i ē ua amioleaga atoa ma ē ua amio lelei.”

Na faaiu e Iesu lenei vaega o lana lauga i lona apoapoai atu e faapea: “Ia atoatoa ona lelei o a outou amio, e pei o lo outou Tamā o i le lagi e atoatoa ona lelei o ia.” Sa leʻi manatu Iesu e faapea e mafai e tagata ona lelei atoatoa o latou uiga. Na i lo lena, e mafai ona latou faia faapena, e ala i le faaaoao i le Atua, ma ia faalautele atu lo latou alofa e faaaofia ai ma o latou fili. O loo faamauina i le tala faapena a Luka, fetalaiga a Iesu e faapea: “Ia faaauau ona mutimutivale lo outou alofa, e pei ona alofa mutimutivale o lo outou Tamā.”

Tatalo, ma Faalagolago i le Atua

A o faagasolo le lauga a Iesu, na ia taʻusalaina ai le pepelo a tagata sa faalialiavale lo latou fiaamiotonu. Na ia fetalai atu e faapea: “A e avatu ni mea alofa, aua neʻi e ilia le pu i ou luma, e pei ona faia e tagata pepelo.”

Na fetalai atili atu Iesu: “I le ma lea foi, pe a e tatalo, aua neʻi e pei o tagata pepelo, auā ua latou fia tutū ma tatalo i sunako ma fetaulaigāala, ina ia iloa ai i latou e tagata.” Na i lo lea, na ia faapea atu: “Pe a e tatalo, inā ulu atu ia i lou afeafe, ma tapuni lona faitotoa, i le e tatalo ai i lou Tamā o i le mea lilo.” Sa tatalo Iesu lava ia i luma o le lautele, o lea na te leʻi taʻusalaina ai na tatalo. O le mea sa ia taʻusalaina, o tatalo ia sa faia e faaofo ai le au faalogologo ma faapogaia ai lo latou faaviivii ane.

Sa fautua atili atu Iesu e faapea: “A outou tatalo, aua neʻi tautū i a outou upu, e pei o nuu ese.” E lē o le uiga o upu a Iesu faapea e sese le toe taʻua o ni upu. Auā sa ia ‘toe taʻua foi ni upu’ i nisi o taimi a o ia tatalo. Ae o le mea sa lē finagalo i ai o ia, o le aʻo faatauloto lea po o le “tautū i upu,” e pei o i latou o ē faitauina faasolo le rosalio, a o fai faatauloto a latou tatalo.

Ina ia fesoasoani i lana au faalogologo ia iloa tatalo, na saunia ai e Iesu se tatalo faaaoao o loo aofia ai olega e fitu. O uluai olega e tolu o loo faaalia ai ma le tonu lo tatou aloaia o le pule silisiliese a le Atua ma ana fuafuaga. O olega ia mo le faapaiaina o le suafa o le Atua, ia oo mai lona Malo, ma ia faia lona finagalo. O isi olega e fa, o ni manaoga totino, ua taʻua ia, o talosaga mo meaai i aso taitasi, le faamagaloina o agasala, ia aua neʻi tofotofoina i se mea tatou te lē lavatia, ma ia laveaiina mai i lē o loo leaga.

Sa faaauau pea ona fetalai atu Iesu i lona faailoaina atu o le mailei, o le faamuamuaina lē tatau o mea faitino. Na ia apoapoai atu e faapea: “Aua tou te toloaʻi oa mo outou i le lalolagi, o iai le mogamoga ma le ele e faaumatia ai, o iai foi tagata gaoi e eli atu ma gaoi ai.” E lē gata ina e mavae atu na oa, ae e lē atiina aʻe ai foi se faiā ma le Atua.

O lea, na fetalai atu ai Iesu: “A ia outou toloaʻi oa mo outou i le lagi.” E faia lenei mea e ala i le faamuamuaina i lou olaga o le auaunaga i le Atua. E leai se tasi na te mafaia ona aveesea le aogā o mea ua tatou atiina aʻe ma le Atua po o lana taui sili. Mulimuli ane, na toe faapea atu Iesu: “O le mea ua iai lo outou oa, e iai atoa foi ma o outou loto.”

I lona taʻua atili o le mailei o le pupū i mea faitino, na faamatala atu ai e Iesu se tala faatusa e faapea: “O le lamepa o le tino, o mata ia. Afai foi e lelei ou mata, e malamalama uma ai lou tino; ae afai e leaga ou mata, e pouliuli uma ai lou tino.” O mata o loo lelei, e mafai ona malamalama ai le tino e pei o le molī i se mea pogisa. Ae ina ia saʻo le vaai, e tatau ona lelei mata, o lona uiga, ia taulai atu i se mea e tasi. O mata e sese le mea o loo taulai i ai, e iu ina faatulaga sese ai mea, ma faamuamua ai mea faitino i lo o le auaunaga i le Atua, ma o le iuga o le a pouliuli ‘uma ai le tino.’

Na taualuga e Iesu lenei mataupu i se tala faatusa e sili ona malosi e faapea: “E leai se tasi e mafai ona auauna i ni alii se toalua; auā e inoino o ia i le tasi ae alofa atu i le tasi, a lē o lea, e faapipii atu ia i le tasi ae faaleaogā i le tasi. Tou te lē mafaia ona auauna i le Atua atoa ma Oa.”

Ina ua uma ona avatu o lenei fautuaga, ona faamautinoa atu lea e Iesu i lana au faalogologo e faapea, e lē tatau ona latou popole i o latou manaoga faaletino pe a latou faamuamua le auaunaga i le Atua. Sa fetalai atu o ia: “Ia outou vaavaai i manu felelei, latou te lē lūlū saito pe selesele, pe faaputu i fale saito, ae fāgaina i latou e lo outou Tamā o i le lagi.” Ona ia fesili atu lea: “E lē sili ea lo outou aogā i lo o i latou?”

Ona sosoo ai lea ma le taulai atu o Iesu i lautalotalo o le fanua ma matauina ai e faapea, “e oo lava i a Solomona ma lona matagofie uma, sa leʻi ofu o ia e pei o le tasi o na mea.” Sa faaauau ona ia fetalai atu: “Afai e faapea ona faaofuina e le Atua le vao o le fanua, . . . e lē sili ea ona ia faaofuina o outou o ē faatuatua iti?” Ona faaiuina ai lea e Iesu e faapea: “Aua neʻi outou popole, ma faapea ane, ‘Ni ā mea tatou te aai ai?’ pe ‘Ni ā foi mea tatou te inu ai?’ pe ‘Ni ā foi mea tatou te oofu ai?’ . . . Auā ua silafia e lo outou Tamā o i le lagi e aogā ia mea uma i a te outou. A ia outou muai saili pea le malo o le Atua ma lana amiotonu, ona faaopoopoina atu lea o ia mea uma i a te outou.”

Le Ala i le Ola

O le ala i le ola, o le tausisi lea i aʻoaʻoga a Iesu. Ae e lē faigofie ona faia o lena mea. Mo se faaaoaoga, sa mafuli atu le au Faresaio i le soona faamasinoina o isi, ma e foliga mai sa faataitai foi i ai le toatele. O lea, a o faaauau e Iesu lana Lauga i luga o le Mauga, sa ia apoapoai atu: “Aua tou te faamasino atu, ina neʻi faamasinoina outou; auā o le faamasinoga tou te faamasino atu ai, e faamasinoina ai outou.”

O se mea matautia le mulimuli atu i le taitaiga a le au Faresaio o ē sa soona faitio. E tusa ai ma le tala a Luka, sa faatusa e Iesu lena matautia i lona fetalai atu e faapea: “E mafai ea e le tauaso ona taʻitaʻi i le tauaso? La te lē pauu uma ai ea i le lua?”

O le soona faitio i isi, le faamatilatilaina o o latou sese ma vaavaai masei i a i latou, o se sala matuiā. O lea na fesili atu ai Iesu: “Pe faapefea ona e fai atu i lou uso, ‘Tuu mai ia soʻu eu ese le fasi laau i lou mata’; faauta foi! o i lou lava mata le utupoto? O oe na le pepelo! Ia e muai tiaiese le utupoto i lou lava mata, ona e iloa lelei ai lea ona eu ese le fasi laau i le mata o lou uso.”

E lē o lona uiga faapea e lē tatau i soʻo o Iesu ona faaaogā le utaga poto i le feagai ai ma isi tagata, auā na ia fetalai e faapea: “Aua tou te avatu le mea paia i ulī, aua foi tou te lafo a outou penina i puaa.” O upu moni o le Afioga a le Atua e paia. E pei o ni penina faafaatusa. Peitai, afai e iai ni tagata e pei o ni ulī po o ni puaa, sei tulou, e lē faaalia le talisapaia mo nei upu moni tautele, e tatau la i soʻo o Iesu ona tuua na tagata ae saili mo i latou o ē sili atu ona talilelei mai.

E ui ina sa muai talanoaina e Iesu le tatalo i lana Lauga i luga o le Mauga, ae o lea ua ia faamamafaina nei le manaomia ona maumauai pea i ai. Na ia timai atu e faapea: “Ia outou ole atu, ona foaiina mai ai lea i a te outou.” I le taʻua o se tala faatusa i le nofo sauni o le Atua e tali mai i tatalo, na fesili atu ai Iesu: “O ai foi se tagata o outou pe a ole mai lona atalii i se areto, na te avane ea i a te ia se maa? . . . O lenei, o outou e leaga, afai ua iloa e outou ona avatu o mea lelei ma a outou fanau, e lē sili ea ona foaiina mai e lo outou Tamā o i le lagi o mea lelei i ē ole atu ai i a te ia?”

Ona sosoo ai lea ma le tuuina atu e Iesu o le mea ua avea nei ma tulafono tautaua e uiga i amio, lea ua masani ona taʻua o le Tulafono Faaauro. Na fetalai atu o ia: “O mea uma foi tou te loto i ai ia faia e tagata i a te outou, ia faapea lava ona outou faia i a te i latou.” O le ola aʻe e tusa ai ma lenei tulafono, e aofia ai ni gaoioiga mautinoa mo le lelei o isi, ia faia i a i latou e pei ona e manao e faia i a te oe.

O le ui i le ala i le ola, e lē faigofie e pei ona faaalia i le faatonuga a Iesu e faapea: “Ia outou ulu atu i le faitotoa vaapiapi; auā e vatele le faitotoa, e lautele foi le ala e tau atu i le malaia, e toatele foi i latou o ē ui atu ai. Auā e vaapiapi le faitotoa, e lauitiiti foi le ala e tau atu i le ola, e toaitiiti foi i latou o ē maua.”

Ona o le matautia tele o le taitaiseseina o se tasi, o lea na lapatai atu ai Iesu: “Ia outou ma perofeta pepelo, o ē ō mai i a te outou i ofu faamamoe, a o totonu o luko feai lava i latou.” E pei lava ona iloa o laau lelei ma laau leaga i o latou fua, sa matauina e Iesu, e mafai foi ona iloa o perofeta pepelo i a latou amio ma aʻoaʻoga.

Sa faaauau ona fetalai atu Iesu, i lona faamatalaina e faapea, e lē na o mea e tautala ai se tagata e avea ai o ia ma Ona soʻo, a o mea na te faia. Ua faapea mai nisi tagata o lo latou Alii o Iesu, ae afai latou te lē o faia le finagalo o lona Tamā, fai mai a ia: “Ona ou tautino atu ai lea i a te i latou: Ou te leʻi iloa lava outou! Inā ō ese ia outou i a te aʻu, o outou o ē fai amio leaga.”

Mulimuli ane, sa tuuina atu e Iesu se faaiuga e lē mafaagaloina i lana lauga. Na ia fetalai atu e faapea: “Ai sē faalogo i aʻu upu nei, ma faia e ia, ou te faatusaina o ia i le tagata poto, ua na faia lona fale i luga o le papa. Ona to mai lea o uaga, ua oo mai foi tafega, ua agi mai foi o matagi, ua pesi mai i lea fale, ae leʻi paʻū lava ia, auā ua faavaeina i luga o le papa.”

I le isi itu, sa faailoa atu e Iesu: “Ai se faalogo foi i aʻu upu nei, ae lē faia, e faatusaina o ia i le tagata valea, na faia lona fale i luga o le oneone. Ona to mai lea o uaga, ua oo mai foi tafega, ua agi mai foi o matagi, ua pesi mai i lea fale, ona paʻū ai lea, ua nutipalaina lava.”

Ina ua uma le lauga a Iesu, sa taufai ofo le motu o tagata i le auala sa ia aʻoaʻo atu ai, auā na ia aʻoaʻo atu i a te i latou e pei o sē ua iai le pule ae e lē pei o o latou taʻitaʻi lotu. Luka 6:12-23; Mataio 5:1-12; Luka 6:24-26; Mataio 5:13-48; 6:1-34; 26:36-45; 7:1-29; Luka 6:27-49.

▪ O fea sa iai Iesu ina o faia lana lauga e lē mafaagaloina, o ai sa iai, ma o le ā na tupu a o toeitiiti amata?

▪ Aisea e lē o se mea e ofo ai, le ese o le faatulagaga sa tusia ai e Luka nisi o aʻoaʻoga o le lauga?

▪ O le ā ua matuā tāua ai le lauga a Iesu?

▪ O ai e fiafia moni, ma aisea?

▪ O ai e fai i ai le faaupuga ʻoi talofa, ma aisea?

▪ Sa faapefea ona avea soʻo o Iesu ma “masima o le lalolagi” ma “malamalama o le lalolagi”?

▪ Sa faaalia faapefea le faaaloalo maualuga o Iesu i le Tulafono a le Atua?

▪ O le ā le faatonuga na taʻua e Iesu e aveesea ai pogai o le fasioti tagata ma le mulilua?

▪ O le ā sa faauiga i ai e Iesu lana fetalaiga e faatatau i le liliu atu o le isi alafau?

▪ E mafai faapefea ona tatou lelei atoatoa e pei o le Atua e atoatoa ona lelei?

▪ O ā faatonuga na taʻua e Iesu e uiga i le tatalo?

▪ Aisea e sili ai oa faalelagi, ma e faapefea ona maua?

▪ O ā tala faatusa na aumaia e fesoasoani ai i se tasi ina ia alofia le pupū i mea faitino?

▪ Aisea na fetalai ai Iesu e lē tatau ona popole?

▪ O le ā na fetalai ai Iesu e uiga i le faamasinoina o isi; ae sa faapefea ona ia faaalia le manaomia ona faaaogā e ona soʻo o le utaga poto e faatatau i tagata?

▪ O le ā na fetalai atili ai Iesu e uiga i tatalo, ma o le ā le tulafono e uiga i amio sa ia taʻua?

▪ Sa faaalia faapefea e Iesu le lē faigofie o le ala i le ola ma le matautia o le taitaiseseina?

▪ Na faapefea ona faaiu e Iesu lana lauga, ma o ā ona āuga?