Mataupu 113

Le Loto Maulalo i le Paseka Mulimuli

E ALA i faatonuga mai i a Iesu, ua iai nei Peteru ma Ioane i Ierusalema e faia ni sauniuniga mo le Paseka. Mulimuli ane i le itula afiafi, sa taunuu ane loa Iesu ma e foliga mai na ō mai faatasi ma isi aposetolo e toasefulu. Ua goto le la i le tafatafailagi a o faaifoifo ane Iesu ma lana au malaga mai le Mauga o Olive. O le toe silasila mulimuli atu lea a Iesu i le aai a o ao, mai lenei mauga seia oo i lona toetu mai.

E leʻi pine ae taunuu loa Iesu ma lana au malaga i le aai ma ō atu loa i le fale o le a latou faamanatuina ai le Paseka. Na latou savavali atu i sitepu o le fale e agaʻi i se potu tele lava i luga, o i inā na latou maua i ai sauniuniga uma na faia mo lo latou faamanatuina faapitoa o le Paseka. Sa faatalitalia ma le naunautai e Iesu lenei sauniga, e pei ona ia fetalai: “Ua tele lava loʻu manao e muai ʻai lenei paseka ma outou, a o leʻi oo i loʻu tiga.”

E tusa ai ma le tū masani, e fa ipu uaina e taumafaina e i latou e auai i le Paseka. Ina ua uma ona talia le ipu e foliga mai o le ipu lona tolu, ona fai lea e Iesu le faafetai ma faapea atu: “Ia outou tago i lenei ipu, ma ia tufatufa ane i a te outou; auā ou te fai atu i a te outou, ou te lē toe inu lava i le fua o le vine, seia oo mai le malo o le Atua.”

I se taimi a o faagasolo le taumafataga, na tulaʻi ai Iesu, sa faataatia ese lona ofu tele, ae tago i le solo, ma faatumu le pesini i vai. O le mea masani, e tatau ona faamautinoa e le tagata talimalo ua mulumuluina vae o mālō. Ae talu ai e leai se tagata talimalo o iai i lenei sauniga, o lea na faia ai e Iesu lenei auaunaga totino. Sa ono mafai e so o se tasi o le au aposetolo ona puʻea le avanoa e faia ai lenei mea; peitai, ona e foliga mai sa iai pea ni feteenaiga i a i latou, o lea sa lē faia ai e se tasi. O lea la, sa masiasi i latou a o amata ona mulumulu e Iesu o latou vae.

Ina ua oo mai Iesu i a Peteru, na tetee atu o ia: “E te lē mulumulu lava oʻu vae e oo i le faavavau.”

Na fetalai atu Iesu: “Afai ou te lē mulumulu i a te oe, e leai sou tofi faatasi ma aʻu.”

Na tali atu Peteru: “Le Alii e, aua lava na o oʻu vae, a o oʻu lima foi, atoa ma loʻu ulu.”

Sa tali atu Iesu: “O lē ua taele, ia tau o ona vae, ae mamā uma ai, e lē aogā ona mulumulu uma. Ua mamā foi outou, ae e lē o outou uma lava.” Na ia fetalai atu lenei mea auā sa ia silafia le fuafuaga a Iuta le Sekara e faalataina o ia.

Ina ua uma ona mulumulu e Iesu vae o le au aposetolo uma e toʻa 12, e aofia ai ma vae o lē e faalataina o ia, o Iuta, ona ia faamaulu lea o lona ofu tele ma toe taoto i le laulau. Ona ia fesili atu lea: “Ua outou iloa ea le mea ua ou faia i a te outou? Tou te taʻua mai aʻu, o ‘le Aʻoaʻo’ ma ‘le Alii’; ua lelei foi la outou e fai mai na, auā o aʻu lava lea. O lenei, afai o aʻu le Alii, ma le Aʻoaʻo, ua ou mulumuluina o outou vae, e tatau ona outou femulumuluai o outou vae. Auā ua ou avatu le faaaʻoaʻo i a te outou, e pei ona ou faia i a te outou, ia faapea lava e outou ona fai. E moni, e moni, ou te fai atu i a te outou, e lē sili le auauna i lona alii; e lē sili foi lē ua auina i lē e ana le feau. Afai ua outou iloa ia mea, amuia outou pe a outou faia.”

Maeu se lesona matagofie i le auauna atu ma le loto maulalo! Sa lē tatau i le au aposetolo ona saili i le tulaga muamua po o le fia sili, i le manatu faapea sa sili ona tāua i latou e ao ai i isi ona auauna atu pea i a te i latou. Sa manaomia ona latou mulimuli i le faaaʻoaʻoga na faataatia e Iesu. Sa lē o se gaoioiga masani lenei o le mulumuluina o vae. E leai, ae o se gaoioiga o le lotomalie e auauna e aunoa ma le faailoga tagata, e tusa lava po o le ā le faatauvaa ma le lē lelei atonu e iai le galuega. Mataio 26:20, 21; Mareko 14:17, 18; Luka 22:14-18; 7:44; Ioane 13:1-17.

▪ O le ā e tuese ai le silasila atu a Iesu i a Ierusalema a o ia ulu atu iai e faamanatu le Paseka?

▪ I le taimi o le Paseka, e manino mai o le ā le ipu na tuu faasolo atu e Iesu i aposetolo e toʻa 12 ina ua uma ona fai se tatalo?

▪ O le ā le auaunaga totino sa masani ona saunia mo mālō a o iai Iesu i le lalolagi, ma aisea na lē saunia ai i le taimi o le Paseka na faamanatuina e Iesu ma le au aposetolo?

▪ O le ā le fuafuaga a Iesu i le faia o le auaunaga faatauvaa o le mulumuluina o vae o ona aposetolo?