Mataupu 94

Le Manaoga ia Tatalo, ma ia Loto Maulalo

I SE taimi muamua, a o iai o ia i Iutaia, na faamatala atu ai e Iesu se tala faatusa e faatatau i le tāua o le maumauai i le tatalo. Ae i lana malaga faaiu i Ierusalema, na ia toe faamamafa atu ai le manaoga ina ia aua neʻi faavaivai i le tatalo. Atonu sa iai pea Iesu i Samaria po o Kalilaia ina ua ia faamatalaina atu i ona soʻo lenei tala faatusa e faapea:

“Sa i le tasi aai se faamasino e lē mataʻu i le Atua ma e lē āva foi i tagata. Na iai foi i lena aai se fafine ua oti lana tane, ma sa alu atu pea o ia i le faamasino ma faapea atu, ‘Ia e faamasino atu i lē ua iai aʻu mea.’ Sa umi se taimi na te leʻi faia, ae mulimuli ane na faapea ifo o ia i lona loto, ‘E ui lava ou te lē mataʻu i le Atua ma e lē āva i se tagata, ae ona o le faasoesa soo mai i a te aʻu o lenei fafine ua oti lana tane, o le a ou faamautinoa ai ua faia le faamasinoga tonu mo ana mea, ina ia aua ai neʻi toe sau o ia ma faatiga mai i a te aʻu.”

Ona taʻu atu lea e Iesu o le faatatauga o le tala e faapea: “Inā faalogo mai ia i le upu a le faamasino e ui ina amioletonu! E mautinoa, e ui lava ina onosai le Atua i a te i latou, ae pe na te lē faia ea le faamasinoga tonu mo ē ua ia filifilia o loo alalaga atu pea i a te ia i le ao, atoa ma le po?”

E lē o le uiga o le tala a Iesu e faapea, ua pei Ieova le Atua o lena faamasino amioletonu. Na i lo lea, afai sa tali atu lena faamasino amioletonu i talosaga faifai pea, e lē masalomia foi la le tali mai o le Atua o lē e tumu i le amiotonu ma lelei, pe afai e lē faavaivai ona tagata e tatalo atu. O lea, na faaauau ai ona fetalai atu Iesu: “Ou te fai atu i a te outou, e vave ona faamasino le [Atua] i a latou mea.”

Ua masani ona lē tuuina atu le faamasinoga tonu i tagata faatauvaa ma ē matitiva, a ua alofagia pea ē malolosi ma ē mauoa. Peitai, o le Atua, e lē gata o le a ia faamautinoa ua faasalaina ma le tonu ē amioleaga, ae e faamautinoa foi ua faia ma le tonu i ana auauna, e ala i le foaiina atu i a te i latou o le ola e faavavau. Ae e toafia ni tagata ua talitonu ma le mausalī, o le a faavave ona faia e le Atua le faamasinoga tonu?

I le faasino patino atu i le faatuatua e ō faatasi ma le malosi o le tatalo, na fesili atu ai Iesu: “Pe a sau le Atalii o le tagata, po o le a ia maua moni ea le faatuatua i le lalolagi?” E ui lava sa leʻi taliina lena fesili, ae na faaalia ai faapea atonu o le a lē taatele lena ituaiga o faatuatua pe a afio mai Keriso i le mana o le Malo.

Na aofia ai i a i latou na faalogologo i a Iesu, nisi sa iai le lagona faualuga i lo latou faatuatua. Sa latou manatu i a i latou lava faapea e amiotonu, ma latou vaai maulalo ai i isi. E iai nisi o soʻo o Iesu atonu sa aofia ai i lenei vaega. O lea, na ia faamatala atu ai i a te i latou na, le tala faatusa o loo mulimuli mai e faapea:

“E toalua ni tagata na ō atu i le malumalu e tatalo, o le Faresaio le tasi, a o le ao lafoga le tasi. Na tu le Faresaio ma tatalo lemu atu e faapea, ‘Le Atua e, ou te faafetai atu i a te oe ina ua ou lē pei o le toatele o tagata, o ē faomea, o ē amioletonu, o ē mulilulua, pe e pei o lena telona foi. E tailua i vaiaso ona ou anapogi, ou te avatua mea e sefuluai o mea uma ou te maua.”

Sa matauina le ʻau Faresaio i le faalialiavale o la latou amiotonu i le lautele ina ia faaofo ai isi tagata. O aso masani sa faia ai a latou lava anapogi, o Aso Gafua ma Aso Tofi, ma sa fai ma a latou tū le totogi atu o sefuluai e oo lava i nai laau iti o le fanua. I ni nai masina muamua atu, na faaalia ai lo latou inoino i tagata lautele i le taimi o le Tausamiga o Faleapitaga ina ua latou faapea atu: “O lenei vao tagata latou te lē iloa le Tulafono [po o le auala sa faauigaina i ai e Faresaio], ua fetuuina lava i latou.”

I le faaauauina o lana tala faatusa, na faamatala atu ai e Iesu e uiga i lena tagata “ua fetuuina” e faapea: “Na tu mamao atu foi le ao lafoga, e leʻi mafai ona tepa aʻe i le lagi, a ua tuʻituʻi pea lona fatafata, ma faapea atu, ‘Le Atua e, ia e alofa mai i a te aʻu le tagata agasala.” Talu ai sa faailoa atu ma le loto maulalo e le ao lafoga ōna sese, na fetalai atu ai Iesu: “Ou te fai atu i a te outou, na alu ifo lena tagata i lona fale ua tauamiotonuina, ae lē faapea le isi; auā o sē faamaualuga o ia i a te ia e faamaulaloina lea, a o lē faamaulalo o ia i a te ia, e faamaualugaina lea.”

O lea na toe faamamafa atu ai e Iesu le manaoga, ia loto maulalo. I le ola aʻe i se sosaiete sa matuā taatele ai taaʻiga a le ʻau Faresaio faafiaamiotonu, ma sa faatauina ai tulaga ma tofiga maualuluga, sa lē o se mea la e ofo ai ona e oo lava i soʻo o Iesu sa aafia ai. Peitai, maeu se lesona lelei i le loto maulalo na aʻoaʻoina e Iesu! Luka 18:1-14; Ioane 7:49.

▪ Aisea na faataunuuina ai e le faamasino amioletonu le talosaga a le fafine ua oti lana tane, ma o le ā le lesona ua aʻoaʻoina mai i le tala faatusa a Iesu?

▪ O le ā le faatuatua o le a fia silasila i ai Iesu pe a afio mai?

▪ O ai na faamatala atu i ai e Iesu lana tala faatusa e uiga i le Faresaio ma le ao lafoga?

▪ O le ā le uiga o le ʻau Faresaio e ao ona aloese ai?