Le Otoina o Saito i le Sapati
Mataupu 31
Le Otoina o Saito i le Sapati
E LEʻI pine ae tuua loa Ierusalema e Iesu ma ona soʻo ae toe foi atu i Kalilaia. O le taimi lea o le tau e totogo ai mea, ma sa iai pea saito i au o saito i le fanua. Ua fia aai le au soʻo. Ona latou otoina ai lea o fatu saito ma aai ai. Ae talu ai ona o le aso lea o le Sapati, na iloagofie atu ai a latou gaoioiga.
Na seʻi faatoʻā uma lava ona taumafai taʻitaʻi lotu i Ierusalema e fasiotia Iesu ona o lona solia ma le iloa o le Sapati. A o lea foi ua faatoai atu le tuuaiga a le au Faresaio. Sa latou faitio atu e faapea: “Faauta! Ua faia e ou soʻo le mea e sa i le sapati.”
Fai mai le au Faresaio e faapea, o le otoina o saito ma mili i o latou lima e aai ai, ua tusa lea ma le seleseleina po o le sasaina o saito. Ae ona o le maumauai o o latou manatu i galuega e aofia ai, na avea ai le Sapati ma avega mamafa, ae semanū na faia le Sapati o se taimi e olioli ai, ma atiina aʻe ai faaleagaga. O lea na tali atu ai Iesu e ala i ni faaaoaoga faale-Tusi Paia e faaalia ai sa leʻi fuafuaina lava e Ieova le Atua se faatatauga maumauai lē talafeagai faapena, o Lana tulafono o le Sapati.
Na fai mai Iesu, ina ua fia aai Tavita ma tagata sa i a te ia, ona latou ō atu lea i le fale fetafai ma latou aai i areto o taulaga. O na areto, sa aveesea mai luma o Ieova ae suia i areto fou, ma sa masani ona tuu e aai ai ositaulaga. Ae ona sa matelaina i latou, sa leʻi taʻusalaina ai Tavita ma ona tagata ina ua latou aai ai.
E ala i se isi faaaoaoga, na fetalai atu ai Iesu e faapea: “Tou te leʻi faitau ea foi i le Tulafono e faapea, o sapati uma, e solia ai e le au faitaulaga i le malumalu le sapati, ae e lē sala lava i latou?” Ioe, e tusa lava po o le Sapati, ae sa faaauau pea ona fasi e faitaulaga ia manu, ma faia isi galuega i le malumalu mo le saunia o taulaga i manu! Ua fetalai atu Iesu: “Ae ou te fai atu i a te outou, o i inei lē e sili i le malumalu.”
I le lapataia o le au Faresaio, na fetalai atili atu ai Iesu e faapea: “Ana outou iloa le uiga o lea upu, ‘Ou te loto i le alofa ae e lē o le taulaga,’ po ua outou lē faasalaina o ē lē sala.” Ona faaiu ai lea i lona fetalai atu e faapea: “Auā o le Atalii o le tagata, o le Alii lava ia o le sapati.” O le ā le uiga o lena fetalaiga a Iesu? Sa faatatau lea e Iesu i lana pulega filemu o le Malo i le afe o tausaga.
Ua 6,000 nei tausaga, talu ona pagatia tagata i le soona faapologaina e Satani le Tiapolo, i faiga sauā ma taua ua avea ma mea e tutupu i aso taitasi. Ae peitai, i le pulega sili o le Sapati a Keriso, o le a avea lea o se taimi o le mapusaga mai na puapuaga ma mafatiaga uma. Mataio 12:1-8; Levitiko 24:5-9; 1 Samuelu 21:1-6; Numera 28:9; Hosea 6:6.
▪ O le ā le tuuaiga na faia i soʻo o Iesu, ma sa faapefea ona tali atu i ai Iesu?
▪ O le ā le lē taulau o le au Faresaio na faailoa atu e Iesu?
▪ O le ā le itu ua avea ai Iesu ma ‘Alii o le sapati’?